Uyakhumbula Na?

Ngaba uye wakunandipha ukufunda iiMboniselo zakutshanje? Ukuba kunjalo, khawubone ukuba unokuyiphendula kusini na le mibuzo ilandelayo:

• Yintoni ebonisa ukuba uYesu wayenabantakwabo noodadewabo?

IBhayibhile itsho kuMateyu 13:55, 56 nakuMarko 6:3. Igama lesiGrike (adelphos) elisetyenziswe apho lichaza “uhlobo oluthile lolwalamano lokwenyama okanye olusemthethweni [yaye] libhekisela kumntakwenu kuphela.” (The Catholic Biblical Quarterly, Januwari 1992)—12/15, iphepha 3.

• Luluphi uhlobo olutsha lwemfazwe olukhoyo, yaye belusoloko lubangelwa yintoni?

Kwiminyaka yakutshanje, iimfazwe eziluthwaxe kakhulu uluntu zezamakhaya—ungquzulwano lwamaqela elizwe elinye angaboni ngasonye. Oyena nobangela wazo yintiyo yobuhlanga nobuzwe, iiyantlukwano zonqulo, ukungabikho kokusesikweni nezidubedube zezobupolitika. Kanti omnye unobangela kukunyolukela igunya nemali.—1/1, iphepha 3-4.

• Sazi njani ukuba uYesu wayengafuni ukuba amaKristu acengceleze amazwi omthandazo ongumzekelo?

UYesu wathetha ngalo mthandazo ungumzekelo kwiNtshumayelo yakhe yaseNtabeni. Kwiinyanga ezili-18 kamva, waphinda iinkalo ezibalulekileyo zoko wayekufundise ngaphambilana ngokuphathelele umthandazo. (Mateyu 6:9-13; Luka 11:1-4) Okuphawulekayo kukuba akazange awaphindaphinde amazwi awo, nto leyo ebonisa ukuba wayengenzi mbhedesho ufanele ucengcelezwe.—2/1, iphepha 8.

• Emva koMkhukula, ihobe lalifumana phi igqabi lomnquma eleza nalo emkhombeni?

Asazi ukuba loo manzi omkhukula ayenetyuwa okanye eshushu kangakanani na. Kodwa imithi yomnquma idla ngokuphinda ihlume emva kokuba iye yagawulwa. Ngoko kusenokwenzeka ukuba eminye yayo yasinda kuloo manzi omkhukula yaza yaphinda yahluma amagqabi.—2/15, iphepha 31.

• AmaNgqina kaYehova aseNigeria akufumana njani ukutya kokomoya ekubeni kwakukho imfazwe yamakhaya kwelo yaye kuvalwe iindlela eBiafra?

Omnye umsebenzi wakwarhulumente wabelwa eYurophu waza omnye wabelwa kwisikhululo esincinane seenqwelo-moya eBiafra. Bobabini aba basebenzi babengamaNgqina. Bazinikela ngokuzithandela ukuze benze umsebenzi oyingozi wokungenisa ukutya kokomoya eBiafra, nto leyo eyanceda abazalwana abaninzi de kwasekupheleni kwemfazwe ngowe-1970.—3/1 iphepha 27.

• Yintoni eyaphunyezwa luXolo lwaseWestphalia, yaye unqulo lwaba naliphi igalelo kulo?

UHlaziyo lwabuqhekeza uBukhosi obuNgcwele baseRoma baba ziicawa ezintathu—amaKatolika, amaLuthere nabalandeli bakaCalvin. Kwayilwa iProtestant Union neCatholic League ekuqaleni kwenkulungwane ye-17. Emva koko kwaqala ukungavisisani konqulo eBohemia kwaza kwakhula kwayimfazwe yokubanga igunya yamazwe ngamazwe. Abalawuli abangamaKatolika nabangamaProtestanti, basebenzisa amaqhinga ukuze bazuze igunya kwezobupolitika nakwezorhwebo. Ekugqibeleni kwabakho uthethathethwano loxolo kwiphondo laseWestphalia eJamani. Phantse emva kweminyaka emihlanu kwatyikitywa iSivumelwano saseWestphalia ngowe-1648, nto leyo eyaphelisa iMfazwe Yeminyaka Engamashumi Amathathu yaza yaphawula ukuzalwa kweYurophu yala maxesha njengelizwekazi elinamazwe amakhulu.—3/15, iphepha 20-3.

• Iyintoni intsingiselo yophawu okanye igama, “lerhamncwa”—inani elingama-666?

Olu phawu kuthethiwe ngalo kwiSityhilelo 13:16-18. Eli rhamncwa libhekisela kulawulo lwabantu, yaye isibakala sokuba irhamncwa ‘linenani lomntu’ sibonisa ukuba oorhulumente abafezekanga. Isi-6 esidibene nama-60 kunye nama-600 sibonisa ukuba uThixo ubagqala njengabasilele ngokupheleleyo. Abo banolu phawu banqula urhulumente wezobupolitika yaye bakhangela kuye ukuze bakhuseleke.—4/1, iphepha 4-7.