Ukukhangela “Iperile . . . Yexabiso Eliphakamileyo” Namhlanje
“Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina.”—MATEYU 24:14.
1, 2. (a) AmaYuda ngomhla kaYesu ayecinga ntoni ngoBukumkani bukaThixo? (b) Yintoni uYesu awayenzayo ukudlulisela ulwazi oluchanileyo ngoBukumkani, yaye oku kwaba nayiphi imiphumo?
UBUKUMKANI bukaThixo babungumbandela obaluleke gqitha kumaYuda xa uYesu weza emhlabeni. (Mateyu 3:1, 2; 4:23-25; Yohane 1:49) Noko ke, ekuqaleni inkoliso yawo yayingazi ngokupheleleyo ukuba babuya kuba bukhulu okanye bube namandla kangakanani na, nokuba babuya kuba ngurhulumente wasezulwini. (Yohane 3:1-5) Kwanathile kulawo aba ngabalandeli bakaYesu ayengaqondi ngokupheleleyo into obuyiyo uBukumkani bukaThixo okanye into awayemele ayenze ukuze azuze iintsikelelo zokuba ngabalawuli kunye noKristu.—Mateyu 20:20-22; Luka 19:11; IZenzo 1:6.
2 Njengokuba ixesha lalihamba, ngomonde uYesu wabafundisa izinto ezininzi abafundi bakhe, kuquka nomzekeliso weperile yexabiso eliphakamileyo ekuthethwe ngawo kwinqaku elandulelayo, ebabonisa ukubaluleka kokuzibhokoxa ekufuneni kwabo uBukumkani basezulwini. (Mateyu 6:33; 13:45, 46; Luka 13:23, 24) Kumele ukuba oku kwazichukumisa ngokwenene iintliziyo zabo kuba kungekudala baba ngabavakalisi abakhutheleyo nabanenkalipho beendaba ezilungileyo zoBukumkani kwimimandla ekude yomhlaba, nto leyo engqinwa yincwadi yeZenzo.—IZenzo 1:8; Kolose 1:23.
3. Ngokuphathelele ixesha lethu, yintoni uYesu awayithethayo ngoBukumkani?
3 Kuthekani namhlanje? Izigidi zabantu zithenjiswa ngobomi kumhlaba oyiparadesi oya kuba ulawulwa bobo Bukumkani. Kwisiprofeto sakhe esibalulekileyo esiphathelele ‘ukupheliswa kwenkqubo yezinto,’ ngokungqalileyo uYesu wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:3, 14; Marko 13:10) Kwakhona wachaza ukuba lo msebenzi mkhulu uya kwenziwa phezu kwayo nje imiqobo neengxaki, kwanentshutshiso. Sekunjalo, waqinisekisa esithi: “Lowo unyamezele kwada kwasekupheleni uya kusindiswa.” (Mateyu 24:9-13) Konke oku kuthetha ukuzincama nokuzinikela okwabonakaliswa ngumrhwebi ohambahambayo okumzekeliso kaYesu. Ngaba bakho namhlanje abantu ababonakalisa ukholo nenzondelelo enjalo ekufuneni uBukumkani?
Uvuyo Lokufumana Inyaniso
4. Inyaniso engoBukumkani ibachaphazela njani abantu namhlanje?
4 Umrhwebi kumzekeliso kaYesu wavuya gqitha kukufumana oko wayekugqala ‘kuyiperile yexabiso eliphakamileyo.’ Lolo vuyo ke olwamenza ukuba enze konke okusemandleni akhe ukuze ayifumane loo perile. (Hebhere 12:1) Namhlanje, abantu batsaleleka baze bachukunyiswe yinyaniso engoThixo noBukumkani bakhe. Oku kusikhumbuza amazwi athethwa nguMzalwan’ uAlexander H. Macmillan, owabhala ngendlela awamfuna ngayo uThixo nenjongo Yakhe ngabantu, kwincwadi ethi Faith on the March. Wathi: “Into endiyifumeneyo isafunyanwa ngabantu abaninzi nyaka ngamanye. Yaye aba ngabantu nje abaqhelekileyo abafana nam nawe, kuba bavela kuzo zonke iintlanga nezizwe, baneemvelaphi nobudala obahlukahlukeneyo. Inyaniso ayikhethi mntu. Inokufunyanwa ngabo bonke abantu.”
5. Yiyiphi imiphumo emihle ebonakala kwingxelo yenkonzo yonyaka wama-2004?
5 Oku kungqinwa ngabantu abanyanisekileyo abangamakhulu ezigidi abashukunyiswa ziindaba ezilungileyo zoBukumkani bukaThixo nyaka ngamnye, baze bahlulele ubomi babo kuYehova ukuze benze ukuthanda kwakhe. Oku kube njalo nakunyaka wenkonzo wama-2004, oqale ngoSeptemba 2003 ukusa kuAgasti 2004. Kwezo nyanga zili-12, abantu abangama-262 416 baye bakubonakalisa ekuhleni ukuzahlulela kwabo kuYehova ngokubhaptizwa emanzini. Oku kwenzeke kumazwe angama-235, apho amaNgqina kaYehova aqhuba khona izifundo zeBhayibhile zasekhaya ezizi-6 085 387 veki nganye ukuze ancede abantu abaneemvelaphi ezingafaniyo nabaphuma kwiintlanga, izizwe neelwimi ezahlukahlukeneyo ukuze bamkele inyaniso yeLizwi likaThixo enik’ ubomi.—ISityhilelo 7:9.
6. Yintoni ebangela ulwando oluthe ngcembe ukutyhubela iminyaka?
6 Yintoni ebangele ukuba konke oku kwenzeke? Alithandabuzeki elokuba uYehova uye wabatsalela kuye aba bantu banotyekelo oluhle. (Yohane 6:65; IZenzo 13:48) Noko ke, awujongelwa phantsi umoya wokuzincama nemigudu emikhulu eyenziwe ngabo baye bazibhokoxa ngoxa befuna uBukumkani. Eneminyaka engama-79 ubudala, uMzalwan’ uMacmillan wabhala esithi: “Kususela nje kwixesha endaqala ngalo ukuva ngoko kuya kwenzeka kubantu abagulayo nabafayo, ithemba endinalo kwisigidimi seBhayibhile lisaqaqambile. Ukususela ngoko ndazimisela ukufumanisa okungakumbi ngoko kufundiswa yiBhayibhile ukuze ndikwazi ukunceda abanye njengam abafuna ulwazi ngoThixo uSomandla, uYehova nangeenjongo zakhe ezintle ngabantu.”
7. Ngawaphi amava abonisa uvuyo nenzondelelo abanayo abo bafumana inyaniso yeBhayibhile?
7 Inzondelelo enjalo isabonakala nanamhlanje phakathi kwabakhonzi bakaYehova. Ngokomzekelo, masicinge ngoDaniela waseVienna, eOstriya. Wathi: “Ukususela ebuntwaneni, uThixo ebengumhlobo wam osenyongweni. Ndandisoloko ndifuna ukwazi igama lakhe kuba igama elithi ‘Thixo’ yayingelogama lamntu. Kodwa kwafuneka ndilinde ndide ndibe neminyaka eli-17 ubudala, xa amaNgqina kaYehova eza ekhaya. Andicacisela yonke into endandifuna ukuyazi ngoThixo. Ekugqibeleni ndandiyifumene inyaniso, yaye yayiyiyo ngokwenene! Ndandivuya gqitha kangangokuba ndaqalisa ukushumayela kuye nabani na endandidibana naye.” Inzondelelo awayenayo uDaniela yambangela ukuba aqalise ukugculelwa ngabantwana awayefunda nabo esikolweni. Uhlabela mgama esithi: “Noko ke, oku kum kwakunjengokubona ukuzaliseka kwesiprofeto seBhayibhile kuba ndandifundile ukuba uYesu wayethe abalandeli bakhe babeya kuthiywa baze batshutshiswe ngenxa yegama lakhe. Ndandivuya gqitha yaye ndimangalisekile.” Kungekudala, uDaniela wahlulela ubomi bakhe kuYehova, waza wabhaptizwa, yaye waqalisa usukelo lokuba ngumvangeli wasemazweni. Emva kokuba etshatile uDaniela, yena nomyeni wakhe uHelmut, baqalisa ukushumayela eVienna kubantu baseAfrika, kumaTshayina, kubemi bakwiiPhilippines nakumaIndiya. Sithethanje, uDaniela noHelmut bangabavangeli basemazweni emzantsi-ntshona Afrika.
Abanikezeli
8. Yiyiphi indlela eluncedo abaninzi abaye babonakalisa ngayo uthando lwabo ngoThixo nokunyaniseka kuBukumkani bakhe?
8 Enyanisweni, ubuvangeli basemazweni yenye yeendlela abantu bakaYehova namhlanje ababonakalisa ngazo uthando abanalo ngoThixo nokunyaniseka kuBukumkani bakhe. Njengomrhwebi kumzekeliso kaYesu, aba bakule nkonzo bakulungele ukuhamba imigama emide ngenxa yoBukumkani. Phofu ke, aba bavangeli basemazweni abahambi kuba befuna iindaba ezilungileyo zoBukumkani, ngabo abathabatha ezi ndaba bazise kubantu abahlala kwimimandla ekude, bebafundisa yaye bebanceda ukuba babe ngabafundi bakaYesu Kristu. (Mateyu 28:19, 20) Kumazwe amaninzi, bafanele bajamelane nobunzima bokwenene. Kodwa ukunyamezela kwabo kuba nemivuzo.
9, 10. Ngawaphi amava avuyisayo ababa nawo abavangeli basemazweni kumazwe akude njengakwiCentral African Republic?
9 Ngokomzekelo, eCentral African Republic, abantu ababeze eSikhumbuzweni sokufa kukaKristu kunyaka ophelileyo babengama-16 184, abantu abaliphindaphinda kasixhenxe inani labavakalisi boBukumkani kwelo lizwe. Ekubeni kwimimandla emininzi yelo lizwe kungekho mbane, ngokuqhelekileyo abantu bayenzela phantsi komthunzi womthi imisetyenzana yabo yasekhaya. Ngoko ke kuqhelekile nangabavangeli basemazweni ukwenza umsebenzi wabo ngendlela efanayo—baqhube izifundo zeBhayibhile phandle phantsi komthi onomthunzi. Akukhanyi kuze kuphole nje kuphela phandle, kodwa kwakhona kukho enye inzuzo. Abantu bayithanda ngokungazenzisiyo iBhayibhile, yaye ukuncokola ngonqulo kuqheleke njengokuthetha ngemidlalo okanye ngemozulu kwabanye abantu. Ngokuqhelekileyo, abantu abadlulayo bayakuphawula okwenzekayo baze nabo beze esifundweni.
10 Ngenxa yoku, xa omnye umvangeli wasemazweni wayeqhubela isifundo seBhayibhile phandle, umfana ohlala ngaphaya kwendlela weza waza wathi ekubeni kungekho mntu uzileyo kuye, lo mvangeli wasemazweni ufanele eze ekhayeni lakhe ukuze afunde iBhayibhile kunye naye. Phofu ke, wavuya gqitha lo mvangeli wasemazweni, yaye lo mfana wenza inkqubela ekhawulezileyo. Kwelo lizwe, amapolisa adla ngokuwamisa amaNgqina endleleni, phofu engenanjongo yakuwabamba, kodwa ukuze acele inkupho entsha yeMboniselo noVukani! okanye ukuwabulela ngenqaku elithile alithande gqitha.
11. Phezu kwazo nje izilingo, abo bebengabavangeli basemazweni kangangexesha elide bavakalelwa njani ngenkonzo yabo?
11 Abaninzi ababa ngabavangeli basemazweni kwiminyaka engama-40 okanye engama-50 eyadlulayo basasebenza ngokuthembeka entsimini. Lo ngumzekelo wokuthembeka nokunyamezela kuthi sonke. Kwiminyaka engama-42 edluleyo, esinye isibini siye sasebenza njengabavangeli basemazweni kumazwe amathathu. Indoda ithi: “Akuzange kube lula. Besisilwa nesifo seengcongconi kangangeminyaka engama-35. Sekunjalo, asizange sizisole ngokuba ngabavangeli basemazweni.” Yona inkosikazi yongezelela isithi: “Bekusoloko kukho izinto ezisenza sibe nombulelo. Inkonzo yasentsimini imnandi gqitha, yaye kulula ukuqalisa izifundo zeBhayibhile. Xa ubona abafundi besiza ezintlanganisweni size sizazise kubo, sihlandlo ngasinye oku kuba ngathi yimbutho yentsapho.”
‘Bazigqala Zonke Izinto Ziyilahleko’
12. Uxabiso lokwenene ngokubaluleka koBukumkani lubonakaliswa njani?
12 Xa umrhwebi ohambahambayo wafumana iperile yexabiso eliphakamileyo, “wemka kwangoko wathengisa zonke izinto awayenazo waza wayithenga.” (Mateyu 13:46) Umoya wokukulungela ukuncama into ebonakala ibalulekile ubonakala kwabo baliqondayo ixabiso lokwenene loBukumkani. Njengomnye owayeza kuba noKristu kuzuko loBukumkani, umpostile uPawulos wathi: “Ndikwazigqala zonke izinto ziyilahleko ngenxa yexabiso eligqwesileyo lolwazi olungoKristu Yesu iNkosi yam. Ngenxa yakhe ndiye ndalahlekelwa zizinto zonke yaye ndizigqala njengenkunkuma eninzi, ukuze ndimzuze uKristu.”—Filipi 3:8.
13. Umntu othile kwiCzech Republic walubonakalisa njani uthando lwakhe ngoBukumkani?
13 Ngendlela efanayo, abaninzi namhlanje bakulungele ukwenza iinguqulelo ezinkulu kubomi babo ukuze bazuze iintsikelelo zoBukumkani. Ngokomzekelo, ngo-Oktobha 2003, inqununu yesikolo eneminyaka engama-60 ubudala kwisikolo saseCzech Republic yafumana incwadi yokufunda iBhayibhile ethi Ulwazi Olukhokelela Kubomi Obungunaphakade. Emva kokuyifunda, kwangoko yaqhagamshelana namaNgqina kaYehova kummandla ehlala kuwo yaza yaqhutyelwa isifundo seBhayibhile. Yenza inkqubela entle gqitha ngokomoya yaye kungekudala yaqalisa ukuza kuzo zonke iintlanganiso. Noko ke, kuthekani ngomnqweno eyayinawo wokuba ngusodolophu nokuvotelwa ukuze ibe lilungu lebhunga likarhulumente? Yakhetha ukungenela ugqatso olwahlukileyo—ugqatso lobomi, njengomvakalisi woBukumkani. Ithi, “ndakwazi ukunika abantwana endandibafundisa iincwadi ezininzi zeBhayibhile.” Yafuzisela ukuzahlulela kwayo kuYehova ngokubhaptizwa emanzini kwindibano eyayingoJulayi 2004.
14. (a) Iindaba ezilungileyo zoBukumkani ziye zabashukumisela ukuba benze ntoni abantu abazizigidi? (b) Yiyiphi imibuzo ebalulekileyo ngamnye wethu anokuzibuza yona?
14 Abanye abazizigidi ehlabathini lonke baye basabela ngendlela efanayo kwiindaba ezilungileyo zoBukumkani. Baye baphuma kwihlabathi elingendawo, babulahla ubuntu obudala, bahlukana nabahlobo babo bangaphambili, baza baluyeka usukelo lwabo lwehlabathi. (Yohane 15:19; Efese 4:22-24; Yakobi 4:4; 1 Yohane 2:15-17) Yintoni ebangela ukuba benze yonke le nto? Kungenxa yokuba bazijonga iintsikelelo zoBukumkani bukaThixo zibaluleke ngaphezu kwayo yonke enye into enokufumaneka kule nkqubo ikhoyo yezinto. Ngaba uvakalelwa ngendlela efanayo ngeendaba ezilungileyo zoBukumkani? Ngaba zikubangela ukuba wenze iinguqulelo ezifunekayo ukuze indlela yakho yokuphila, imilinganiselo nosukelo onalo luvisisane noko kufunwa nguYehova? Ukwenjenjalo kuya kuphumela kwintabalala yeentsikelelo ngoku nakwixesha elizayo.
Isivuno Sifikelela Incopho
15. Yintoni eya kwenziwa ngabantu bakaThixo kwimihla yokugqibela ekwaprofetwa ngayo?
15 Umdumisi wabhala esithi: “Abantu bakho baya kuzinikela ngokuvumayo ngemini yomkhosi wakho.” Abo bazinikeleyo baquka ‘iqela labantu abaselula kanye njengamathontsi ombethe’ kunye ‘nomkhosi omkhulu wabafazi abavakalisa iindaba ezilungileyo.’ (INdumiso 68:11; 110:3) Uye wayintoni umphumo wenzondelelo nokuzincama kwabantu bakaYehova—amadoda namabhinqa, aselula nakhulileyo—kule mihla yokugqibela?
16. Nikela umzekelo wendlela abakhonzi bakaThixo abazibhokoxa ngayo ukuze bancede abanye bafunde ngoBukumkani.
16 Uvulindlela, okanye umvakalisi woBukumkani wexesha elizeleyo, eIndiya wayezibuza ngendlela abanokuncedwa ngayo abantu abangaphezu kwezigidi ezibini abazizithulu kwelo lizwe ukuba bafunde ngoBukumkani. (Isaya 35:5) Wenza isigqibo sokubhalisa kwisikolo esiseBangalore ukuze afunde intetho yezandla. Apho wakwazi ukudlulisela ithemba loBukumkani kubantu abaninzi abazizithulu, yaye kwaqaliswa amaqela okufunda iBhayibhile. Kwiiveki nje ezimbala, abantu abangaphezu kweshumi elinesibini baqalisa ukuza kwiintlanganiso kwiHolo yoBukumkani. Kamva, kwitheko lomtshato, lo vulindlela wadibana nomfana osisithulu waseCalcutta owayenemibuzo emininzi yaye wabonakalisa umdla wokwazi okungakumbi ngoYehova. Noko ke, kwakukho ingxaki. Lo mfana kwakufuneka abuyele eCalcutta, kumgama onokuba ziikhilomitha ezili-1 600, akuze aye kuqalisa ekholeji, yaye kwakungekho maNgqina apho ayaziyo intetho yezandla. Emva komgudu omkhulu, uyise wavuma ukuba angaya kufunda eBangalore ukuze akwazi ukuqhubela phambili nesifundo sakhe seBhayibhile. Wenza inkqubela entle ngokomoya, yaye emva kwexesha elinokuba ngunyaka, wahlulela ubomi bakhe kuYehova. Yena, uye wafunda iBhayibhile nabantu abaninzi abazizithulu kuquka umfana akhule naye. Ngoku iofisi yesebe yaseIndiya ilungiselela ukuba oovulindlela bafunde intetho yezandla ukuze baye kunceda kuloo ntsimi.
17. Balisa into oyifumanisa inik’ umdla ngengxelo yenkonzo yonyaka wama-2004 ekwiphepha 19 ukusa kwelama-22.
17 Kwiphepha 19 ukusa kwelama-22 kweli phephancwadi, uza kufumana ingxelo yonyaka yehlabathi lonke yomsebenzi wasentsimini wamaNgqina kaYehova wonyaka wenkonzo wama-2004. Ziphe ixesha lokuyihlolisisa, uze uzibonele ngokwakho ubungqina bokuba abantu bakaYehova emhlabeni wonke baxakeke gqitha namhlanje befuna “iperile yexabiso eliphakamileyo.”
Qhubekani “Nifuna Kuqala Ubukumkani”
18. Yiyiphi inkcazelo uYesu angazange ayiquke kumzekeliso womrhwebi ohambahambayo, yaye kutheni engazange enjenjalo?
18 Xa sibuyela kumzekeliso kaYesu womrhwebi ohambahambayo, siphawula ukuba uYesu akazange athethe nto ngendlela lo mrhwebi wayeza kuziphilisa ngayo emva kokuthengisa yonke into awayenayo. Ngokusengqiqweni, abanye basenokubuza, ‘Lo mrhwebi wayeza kukufumana phi ukutya, impahla, nendawo yokuhlala ekubeni ngoku engenanto aqamele ngayo? Yayiya kumnceda ngantoni loo perile ixabisekileyo?’ Leyo yimibuzo esengqiqweni xa ubani ecinga ngokwenyama. Kodwa ngaba uYesu akazange abongoze abafundi bakhe esithi: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni”? (Mateyu 6:31-33) Ingongoma eyintloko yalo mzekeliso yimfuneko yokubonakalisa ukuzinikela okupheleleyo kuThixo nenzondelelo ngoBukumkani. Ngaba ikho into esinokuyifunda kulo mzekeliso?
19. Yintoni esinokuyifunda ngokuyintloko kumzekeliso kaYesu weperile enexabiso eliphakamileyo?
19 Enoba sisandul’ ukufunda ngeendaba ezilungileyo okanye besisukela uBukumkani yaye sixelela abanye ngeentsikelelo zabo kangangeminyaka emininzi, simele siqhubeke sibeka uBukumkani kuqala ebomini bethu. La ngamaxesha anzima, kodwa sinezizathu eziqinileyo zokukholelwa ukuba le nto siyifunayo yinto yokwenene yaye ayinakuthelekiswa nanto—kanye njengeperile eyafunyanwa ngumrhwebi. Iziganeko zehlabathi neziprofeto zeBhayibhile ezizalisekileyo zinikela ubungqina obucacileyo bokuba siphila ‘ekuphelisweni kwenkqubo yezinto.’ (Mateyu 24:3) Ngamana njengomrhwebi ohambahambayo, singabonakalisa inzondelelo ngoBukumkani bukaThixo size silivuyele ilungelo esinalo lokuvakalisa iindaba ezilungileyo.—INdumiso 9:1, 2.
Ngaba Usakhumbula?
• Ekuhambeni kweminyaka, yintoni eye yabangela ulwando phakathi kwabanquli bokwenyaniso?
• Nguwuphi umoya okhoyo phakathi kwabavangeli basemazweni?
• Ziziphi iinguqulelo abanye abazenzileyo ngenxa yeendaba ezilungileyo zoBukumkani?
• Yintoni ebalulekileyo esinokuyifunda kumzekeliso kaYesu weperile yexabiso eliphakamileyo?
[Isicangca esikwiphepha 19-22]
INGXELO YONYAKA WENKONZO WAMA-2004 YAMANGQINA KAYEHOVA EHLABATHINI LONKE
(Bona imiqulu)
[Umfanekiso okwiphepha 14]
“Inyaniso . . . ifunyanwa ngabo bonke abantu.”—A. H. Macmillan
[Umfanekiso okwiphepha 15]
UDaniela noHelmut bashumayela kwintsimi yabantu abathetha iilwimi zasemzini eVienna
[Imifanekiso ekwiphepha 16, 17]
Njengomrhwebi ohambahambayo, abavangeli basemazweni namhlanje bazuza iintsikelelo ezininzi
[Umfanekiso okwiphepha 17]
“Abantu bakho baya kuzinikela ngokuvumayo”