‘Ukufumana Iperile Enye Yexabiso Eliphakamileyo’
“Abantu banosukelo lobukumkani bamazulu, yaye abo banolo sukelo bayabufumana.”—MATEYU 11:12.
1, 2. (a) Luluphi uphawu olunqabileyo uYesu awayefuna ukulubalaselisa komnye wemizekeliso yakhe engoBukumkani? (b) Yintoni uYesu awayithethayo kumzekeliso wakhe weperile yexabiso eliphakamileyo?
NGABA ikho into oyithanda kangokuba unokuncama nantoni na onayo ukuze uyifumane? Nangona abantu benokuthetha ngokuzimisela kwabo ukuze bafumane into ethile—imali, udumo, igunya, okanye isikhundla—kunqabile ukuba ubani abone into ayithanda kangangokuba akulungele ukuncama yonke into. UYesu Kristu wathetha ngolu phawu lunqabileyo noluthandekayo komnye wemizekeliso yakhe emininzi ebangel’ umdla engoBukumkani bukaThixo.
2 Lo ngumzekeliso uYesu awawenza ekunye nabafundi bakhe kuphela, ekudla ngokubhekiselwa kuwo njengomzekeliso weperile yexabiso eliphakamileyo. UYesu wathi: “Ubukumkani bamazulu bunjengomrhwebi ohambahambayo ofuna iiperile ezintle. Akuba efumene iperile enye yexabiso eliphakamileyo, wemka kwangoko wathengisa zonke izinto awayenazo waza wayithenga.” (Mateyu 13:36, 45, 46.) Yintoni uYesu awayefuna ukubafundisa yona abo babemphulaphule ngalo mzekeliso? Yaye sinokuzuza njani kumazwi kaYesu?
Ixabiso Eliphakamileyo Leeperile
3. Kutheni iiperile ezintle zazixabiseke kangaka mandulo?
3 Kususela mandulo, iiperile bezigqalwa njengezinto ezibalulekileyo zokuhomba. Enye incwadi ithi ngokutsho komphengululi ongumRoma uPliny Omkhulu, iiperile bezigqalwa “njengeyona nto enexabiso eliphakamileyo.” Ngokungafaniyo negolide, isilivere, okanye amanye amatye anqabileyo amaninzi, iiperile ziveliswa zizinto eziphilayo. Yaziwa ngokubanzi into yokuba iindidi ezithile zeembatyisi zinokuguqula amatye amancinane—abe ziiperile ngokuwagubungela ngolwelo ekuthiwa yinacre. Mandulo, ezona perile zintle zazifumaneka kuLwandle Olubomvu, kwiNyoba yasePersi nakuLwandlekazi lweIndiya—mgama ukusuka kummandla wakwaSirayeli. Alithandabuzeki elokuba esi sisizathu esabangela uYesu athethe “ngomrhwebi ohambahambayo ofuna iiperile ezintle.” Kwakungeyonto ilula ukuba ubani afumane iiperile zexabiso eliphakamileyo.
4. Yintoni eyayibalaseliswa nguYesu kumzekeliso wakhe womrhwebi ohambahambayo?
4 Nangona iiperile ezintle zazibiza ixabiso eliphakamileyo kangangexesha elide, licacile elokuba uYesu kumzekeliso wakhe wayengabalaselisi ixabiso lazo elingokwemali. Kulo mzekeliso, uYesu akazange nje abufanise uBukumkani bukaThixo neperile yexabiso eliphakamileyo, kodwa wanikela ingqalelo ‘kumrhwebi ohambahambayo ofuna iiperile ezintle’ nendlela awasabela ngayo xa wayifumanayo yanye. Ngokungafaniyo nonovenkile nje oqhelekileyo, umrhwebi ohambahambayo weeperile wayenokubizwa ngokuthi yingcali, umntu oneliso elibukhali okanye okwaziyo ukubona iimpawu ezintle nezingabonakali lula zeperile yexabiso elikhethekileyo. Wayeya kuyazi iperile yodidi xa eyibona yaye wayengayi kukhohliswa ngomdlungu nje.
5, 6. (a) Yintoni ngokukhethekileyo ephawulekayo ngomrhwebi okumzekeliso kaYesu? (b) Umzekeliso wobuncwane obufihliweyo utyhila ntoni ngomrhwebi ohambahambayo?
5 Ikho enye into ephawulekayo ngalo mrhwebi uhambahambayo. Umrhwebi oqhelekileyo kuqala ebeya kufumanisa imali anokuyithengisa ngayo loo perile nemali anokuyihlawula ukuze afumane ingeniso. Kwakhona ebeya kufumanisa enoba bakho abantu abaza kuyithenga loo perile ukuze akwazi ukuyithengisa ngokukhawuleza. Ngamanye amazwi, eyona nto ibalulekileyo kuye kukufumana ingeniso ekhawulezileyo kurhwebo lwakhe, kunokuba neperile. Kodwa akunjalo ngomrhwebi uYesu athetha ngaye kumzekeliso wakhe. Wayengenamdla wokufumana ingeniso. Enyanisweni, wayekulungele ukuncama “zonke izinto awayenazo”—mhlawumbi yonke impahla nomhlaba wakhe—ukuze afumane le nto kudala eyifuna.
6 Abarhwebi abaninzi bebeya kuyijonga njengesiphukuphuku le ndoda ikumzekeliso kaYesu. Umrhwebi olumkileyo ebengayi kwenza ubudenge obunje. Kodwa umrhwebi okumzekeliso kaYesu uzijonga izinto ngenye indlela. Umvuzo wakhe awuyomali kodwa luvuyo nolwaneliseko lokuba nento enexabiso elikhulu. Le ngongoma ikhanyiswa ngumzekeliso ofanayo uYesu awawenzayo. Wathi: “Ubukumkani bamazulu bunjengobuncwane obufihlwe entsimini, obafunyanwa ngumntu waza wabufihla; yaye ngenxa yovuyo analo uyahamba aye kuthengisa ngezinto anazo aze ayithenge loo ntsimi.” (Mateyu 13:44) Ewe, uvuyo olufumaneka ngokufumana ubuncwane lwalanele kule ndoda ukuyenza incame yonke into eyayinayo. Ngaba basekho abantu abanjalo namhlanje? Ngaba bukho ubuncwane obubaluleke kangako?
Abo Babeyiqonda Into Yexabiso Eliphakamileyo
7. UYesu wabonisa njani ukuba wayeliqonda ngokucacileyo ixabiso eliphakamileyo loBukumkani?
7 Kumzekeliso wakhe, uYesu wayethetha ‘ngobukumkani bamazulu.’ Ngokuqinisekileyo yena wayeliqonda ixabiso eliphakamileyo loBukumkani. Ingxelo yeVangeli ikungqina ngokucacileyo oko. Emva kokubhaptizwa kwakhe ngowama-29 C.E., uYesu waqalisa “washumayela esithi: ‘Guqukani, kuba ubukumkani bamazulu busondele.’” Kangangeminyaka emithathu enesiqingatha, wafundisa izihlwele zabantu ngoBukumkani. Walityhutyha elo lizwe, ‘ehambela kwizixeko ngezixeko nakwiidolophana ngeedolophana, eshumayela yaye evakalisa iindaba ezilungileyo zobukumkani bukaThixo.’—Mateyu 4:17; Luka 8:1.
8. Yintoni uYesu awayenzayo ukubonisa oko kuya kwenziwa buBukumkani?
8 Ngokwenza imimangaliso eliqela kulo lonke elo lizwe—kuquka ukuphilisa abagulayo, ukondla abalambileyo, ukulawula imozulu nokuvusa abafileyo—kwakhona uYesu wabonisa oko kuya kwenziwa buBukumkani bukaThixo. (Mateyu 14:14-21; Marko 4:37-39; Luka 7:11-17) Ekugqibeleni, wazingqina enyanisekileyo kuThixo nakuBukumkani bakhe ngokunikela ngobomi bakhe, esifa njengomfeli-nkolo kumthi wentuthumbo. Kanye njengalaa mrhwebi uhambahambayo owayekulungele ukunikela yonke into anayo ukuze afumane “iperile . . . yexabiso eliphakamileyo,” uYesu waphilela waza wabufela uBukumkani.—Yohane 18:37.
9. Luluphi uphawu olunqabileyo olwabonakala kubafundi bakaYesu bokuqala?
9 UYesu akazange nje kuphela anikele ingqalelo epheleleyo kuBukumkani kodwa kwakhona wahlanganisa iqela elincinane labalandeli bakhe. Nabo aba babeliqonda ngokucacileyo ixabiso eliphakamileyo loBukumkani. Phakathi kwabo, kwakukho uAndreya, ngaphambili owayengumfundi kaYohane umBhaptizi. Akuva intshumayelo kaYohane yokuba uYesu ‘yiMvana kaThixo,’ uAndreya nomnye wabafundi bakaYohane, ekusenokwenzeka ukuba ngomnye woonyana bakaZebhedi naye ekwakuthiwa nguYohane, kwangoko bamlandela uYesu baza bangamakholwa. Akuphelelanga apho. Kwangoko, uAndreya waya kumntakwabo uSimon waza wathi kuye: “Simfumene uMesiya.” Kungekudala emva koko, uSimon (owaziwa ngokuba nguKefas, okanye uPetros) noFilipu nomhlobo wakhe uNathaniyeli nabo baqonda ukuba uYesu wayenguMesiya. Enyanisweni, uNathaniyeli wathi kuYesu: “Unguye uNyana kaThixo, unguye uKumkani kaSirayeli.”—Yohane 1:35-49.
Bakhuthazwa Ukuba Bathabath’ Inyathelo
10. Basabela njani abafundi xa uYesu weza waza wababiza kamva emva kokudibana nabo okokuqala?
10 Uvuyo uAndreya, uPetros noYohane, nabanye ababenalo xa bafumanisa uMesiya lusenokufaniswa nolo lomrhwebi ohambahambayo xa wafumana iperile yexabiso eliphakamileyo. Yintoni ababeza kuyenza? Iincwadi zeVangeli azisichazeli nto ingako ngento abayenza kwangoko emva kokuhlangana kwabo noYesu okokuqala. Kubonakala ukuba, inkoliso yabo yaphinda yabuyela kubomi bayo besiqhelo. Noko ke, kwisithuba esingangeenyanga ezintandathu ukusa kunyaka kamva, uYesu waphinda wadibana noAndreya, uPetros, uYohane noYakobi umntakwaboYohane kwishishini labo lokuloba kuLwandle lwaseGalili.a Akubabona, uYesu wathi: “Ndilandeleni, ndonenza abalobi babantu.” Bona basabela njani? Ingxelo kaMateyu ithi ngoPetros noAndreya: ‘Bayishiya kwaoko iminatha yabo, bamlandela.’ Kuthiwa ngoYakobi noYohane: ‘Basishiya kwaoko isikhephe noyise, bamlandela.’ Yona ingxelo kaLuka yongezelela isithi “bashiya yonk’ into baza bamlandela.”—Mateyu 4:18-22; Luka 5:1-11.
11. Isenokuba yintoni eyabangela ukuba abafundi bakaYesu bamlandele ngokukhawuleza?
11 Ngaba aba bafundi benza isigqibo sabuphuthuphuthu sokulandela uYesu? Akunjalo! Nangona baphindela kwishishini lentsapho lokuloba emva kokudibana noYesu okokuqala, alithandabuzeki elokuba abakubonayo nabakuvayo ngeso sihlandlo kwabethelela okuthile ezintliziyweni nasezingqondweni zabo. Ukudlula kwexesha elinokuba ngunyaka kwakuya kubanika ithuba elaneleyo lokucingisisa nzulu ngezo zinto. Ngoku kwakufanele benze isigqibo. Ngaba babeya kuba njengomrhwebi ohambahambayo owayechukumiseke gqitha kukufumana iperile yexabiso elikhulu, kanye njengokuba uYesu echaza, “wemka kwangoko” waza wenza into efanelekileyo ukuze athenge loo perile? Kunjalo kanye. Oko bakubonayo nabakuvayo kwabachukumisa gqitha. Baqonda ukuba ngoku lalifikile ixesha lokuba bathabath’ inyathelo. Ngenxa yoko, kanye njengokuba ingxelo isitsho, kwangoko bancama yonk’ into baza bangabalandeli bakaYesu.
12, 13. (a) Abaninzi ababephulaphule uYesu basabela njani? (b) UYesu wathini ngabafundi bakhe abathembekileyo, yaye amazwi akhe athetha ukuthini?
12 Hayi indlela abahluke ngayo aba bathembekileyo kwabanye ekuthethwa ngabo kamva kwiingxelo zeVangeli! Abaninzi babephilisiwe okanye bondliwa nguYesu kodwa baqhubeka nemicimbi yabo yokuphila kwemihla ngemihla. (Luka 17:17, 18; Yohane 6:26) Abanye abazange bavume xa uYesu wabacela ukuba babe ngabalandeli bakhe. (Luka 9:59-62) Ngokwahlukileyo koko, ethetha ngabathembekileyo, uYesu kamva wathi: “Ukususela kwimihla kaYohane umBhaptizi de kube ngoku abantu banosukelo lobukumkani bamazulu, yaye abo banolo sukelo bayabufumana.”—Mateyu 11:12.
13 Ukuba “nosukelo”—lithetha ukuthini eli binzana? Ithetha ngesenzi sesiGrike eliguqulelwe kuso eli binzana, iVine’s Expository Dictionary of Old and New Testament Words ithi: “Esi senzi sithetha ukuzabalaza.” Ngokuphathelele le ndinyana, umphengululi weBhayibhile uHeinrich Meyer uthi: “Ukwenjenje kuthetha ukwenza umzamo ongamandla, ukuzimisela ukubufumana ubukumkani bukaMesiya obuzayo . . . Ukubuzabalazela ngamandla (ingekuko ukulinda usonge izandla) ubukumkani.” Njengomrhwebi ohambahambayo, aba bantu bambalwa bakhawuleza bayiqonda into exabiseke ngokwenene, yaye bakulungela ukunikela yonke into ababenayo ngenxa yoBukumkani.—Mateyu 19:27, 28; Filipi 3:8.
Abanye Bangenelela Kwiphulo
14. UYesu wabenza njani abapostile bakhe bawulungela umsebenzi wokushumayela ngoBukumkani, yaye oku kwaphumela entwenini?
14 Njengokuba uYesu wayeqhubeka eshumayela, waqeqesha waza wanceda abanye ukuba babusukele uBukumkani. Waqala ngokukhetha abali-12 phakathi kwabafundi bakhe waza wababiza ngokuthi ngabapostile, okanye abo bathunywe nguye. Aba, uYesu wabanika imiyalelo eneenkcukacha ngendlela ababefanele babuphumeze ngayo ubulungiseleli babo yaye walumkisa nangeengxaki ezaziza kubakho. (Mateyu 10:1-42; Luka 6:12-16) Kwixesha elinokuba yiminyaka emibini eyalandelayo, babehamba noYesu kuhambo lwakhe lokushumayela kulo lonke elo lizwe, benolwalamano olusondeleyo naye. Bawava amazwi akhe, bayibona imisebenzi yakhe yamandla, baza bawubona nomzekelo awayewumisela. (Mateyu 13:16, 17) Akuthandabuzeki ukuba konke oku kwabachukumisa gqitha, kangangokuba njengomrhwebi ohambahambayo, babenenzondelelo yaye bebusukela ngokuzinikela uBukumkani.
15. UYesu wathi yintoni abalandeli bakhe abafanele bayivuyele?
15 Ukongezelela kubapostile abali-12, uYesu ‘watyumba abanye abangamashumi asixhenxe waza wabathumela ngababini phambi kwakhe kwizixeko neendawo zonke ezo yena ngokwakhe wayeza kuya kuzo.’ Kwakhona wabaxelela ngezilingo neengxaki ababeza kujamelana nazo waza wabayalela ukuba baxelele abantu besithi: “Ubukumkani bukaThixo busondele kuni.” (Luka 10:1-12) Ekubuyeni kwaba bangama-70, babevuya yaye banikela le ngxelo kuYesu: “Nkosi, kwaneedemon zisithobele egameni lakho.” Mhlawumbi bothuka gqitha xa uYesu wabaxelela ukuba babeza kuba novuyo olungakumbi ngenxa yenzondelelo yabo ngoBukumkani. Wathi kubo: “Musani ukuba nemihlali ngenxa yoku, kuba oomoya benithobela, kodwa yibani nemihlali ngenxa yokuba amagama enu ebhaliwe emazulwini.”—Luka 10:17, 20.
16, 17. (a) Yintoni uYesu awayixelela abapostile bakhe abathembekileyo ngobusuku bokugqibela enabo? (b) Amazwi kaYesu abavuyisa aza abaqinisekisa njani abapostile?
16 Ukuqukumbela, ngobusuku bokugqibela uYesu enabapostile bakhe, ngoNisan 14, 33 C.E., waqalisa oko okwaziwa ngokuba siSidlo SeNkosi Sangokuhlwa waza wabayalela ukuba basikhumbule eso siganeko. Ekuhambeni kobusuku, uYesu wabaxelela esithi abali-11 ababeshiyekile: “Nina niye nanamathela kum ezilingweni zam; yaye ndenza umnqophiso nani, kanye njengoko uBawo enze umnqophiso nam, wobukumkani, ukuze nidle, nisele etafileni yam ebukumkanini bam, nize nihlale ezitroneni ukuze nigwebe izizwe ezilishumi elinesibini zakwaSirayeli.”—Luka 22:19, 20, 28-30.
17 Hayi indlela enoba bavuya baza baneliseka ngayo abapostile xa beva la mazwi kaYesu! Babenikwa esona sigxina nelungelo eliphakamileyo elalinokufunyanwa ngumntu. (Mateyu 7:13, 14; 1 Petros 2:9) Njengomrhwebi ohambahambayo, babencame izinto ezibalulekileyo ukuze balandele uYesu besukela uBukumkani. Ngoku babeqinisekiswa ukuba ukuzincama kwabo akulolize.
18. Ukongezelela kubapostile abali-11, ngoobani abanye abaya kuzuza kuBukumkani?
18 Abapostile ababekunye noYesu ngobo busuku yayingengabo bodwa ababeza kuzuza kuBukumkani. UYehova wayethanda ukuba abali-144 000 bathatyathelwe kumnqophiso woBukumkani ukuze balawule noYesu Kristu kuBukumkani basezulwini obuzukileyo. Ukongezelela, umpostile uYohane wabona embonweni “isihlwele esikhulu, ekungekho mntu wakwaziyo ukusibala, . . . simi phambi kwetrone naphambi kweMvana, . . . sisithi: ‘Usindiso silufumene kuThixo wethu, ohleli etroneni, nakuyo iMvana.’” Abo ngabo baya kulawulwa buBukumkani bona besemhlabeni.b—ISityhilelo 7:9, 10; 14:1, 4.
19, 20. (a) Liliphi ithuba elivulekele bonke abantu beentlanga? (b) Nguwuphi umbuzo oza kuphendulwa kwinqaku elilandelayo?
19 Kungekudala ngaphambi kokuba uYesu anyukele ezulwini, wayalela abalandeli bakhe esithi: “Hambani ke ngoko niye kubenza abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bazigcine zonke izinto endiniyalele zona. Yaye, khangelani! ndinani yonke imihla de kube sekuphelisweni kwenkqubo yezinto.” (Mateyu 28:19, 20) Ngenxa yoko, abantu beentlanga zonke babeya kuba ngabafundi bakaYesu Kristu. Nabo aba babeya kuzinikela kuBukumkani—enoba baza kuphila ezulwini okanye emhlabeni—kanye njengokuba umrhwebi ohambahambayo wenza ngeperile entle.
20 Amazwi kaYesu abonisa ukuba umsebenzi wokwenza abafundi wawuya kwenziwa kude kube “sekuphelisweni kwenkqubo yezinto.” Ngoko ke, ngaba kumhla wethu basekho abantu njengomrhwebi ohambahambayo, abakulungeleyo ukuncama yonke into abanayo ukusukela uBukumkani bukaThixo? Lo mbuzo uza kuphendulwa kwinqaku elilandelayo.
[Imibhalo esemazantsi]
a Kusenokwenzeka ukuba uYohane, unyana kaZebhedi, wamlandela uYesu waza wabona ezinye zezinto awazenzayo emva kokudibana naye okokuqala, nto leyo eyenza ukuba uYohane athethe ngazo ngokucacileyo kwingxelo yakhe yeVangeli. (Yohane, isahluko 2-5) Sekunjalo, waphinda wabuyela kwishishini lakowabo lokuloba kangangethutyana ngaphambi kokuba abizwe nguYesu.
b Ukuze ufumane iinkcukacha ezingakumbi, bona isahluko 10 kwincwadi ethi Ulwazi Olukhokelela Kubomi Obungunaphakade, epapashwe ngamaNgqina kaYehova.
Ngaba Unokucacisa?
• Sisiphi isifundo esiyintloko kumzekeliso womrhwebi ohambahambayo?
• UYesu wabonakalisa njani ukuba uyakuqonda ukubaluleka okukhulu koBukumkani?
• Yintoni eyabangela uAndreya, uPetros, uYohane, nabanye ukuba bamlandele kwangoko xa uYesu wababiza?
• Liliphi ithuba elihle abantu beentlanga zonke abanalo?
[Umfanekiso okwiphepha 10]
‘Bashiya yonke into balandela uYesu’
[Umfanekiso okwiphepha 12]
Ngaphambi kokuba anyukele ezulwini, uYesu wayalela abalandeli bakhe ukuba benze abafundi