Isixhobo Esiluncedo Ekuguquleleni
UMBHALI weBhayibhile, uYehova uThixo unqwenela ukuba iindaba ezilungileyo zoBukumkani zivakaliswe kuzo “zonke iintlanga nezizwe neelwimi nabantu.” (ISityhilelo 14:6) Ufuna iLizwi lakhe elibhaliweyo lifikelele kubo bonke abantu. Ukuze kwenzeke oko, iBhayibhile iye yaguqulelwa kwiilwimi ezininzi ngaphezu kwayo nayiphi na enye incwadi ehlabathini. Bangamawaka abaguquleli abaye bazibhokoxa ukuze badlulisele iingcamango zikaThixo kwezinye iilwimi.
Noko ke, iBhayibhile asiyoncwadi nje ephelele ekubeni iguqulelwe. Izihlandlo ezininzi, kuye kwasetyenziswa yona ukuze kuguqulelwe ezinye iincwadi. Abaguquleli abaninzi baye bathelekisa iindlela aguqulelwe ngazo amabinzana athile eBhayibhile kwiilwimi ezahlukahlukeneyo ukuze baguqulele ngokuchanileyo amagama athile. Njengesixhobo esisemgangathweni sokunceda ekuguquleleni, ngoku iBhayibhile isetyenziswa nasekuguquleleni ngekhompyutha.
Kunzima gqitha ukuba ikhompyutha ikwazi ukuguqulela. Ezinye iingcali zivakalelwa ukuba ukuguqulela yinto engaphaya kwamandla ekhompyutha. Kutheni kunjalo? Ulwimi asikokudityaniswa nje kwamagama. Lwimi ngalunye luneendlela zalo zokudibanisa amagama, imigaqo, izinto ezamkelekileyo nezingamkelekanga kulo, izangotshe nezikweko. Iye yawa phantsi imigudu yokufundisa ikhompyutha zonke ezi zinto. Inkoliso yeenguqulelo ezenziwe yikhompyutha kunzima gqitha ukuba ziqondwe.
Noko ke, ngokutsho kukaFranz Josef Och ingcali ephambili kwinkqubo yokuguqulela ngekhompyutha, ngoku izazinzulu zekhompyutha zizama iindlela ezintsha zokuguqulela. Masithi ufuna ukuguqulela isiHindi kwisiNgesi. Kuqala, uthabatha umbandela osele uguqulelwe ngezo lwimi zombini. Wufake kwikhompyutha. Ikhompyutha iza kuthelekisa loo mibandela yezo lwimi zombini. Ngokomzekelo, xa ikhompyutha ifumana igama lesiHindi elifanayo rhoqo kwiindawo eziliqela efumana kuzo igama lesiNgesi elithi “house,” (indlu) ikhompyutha iya kugqiba ekubeni elo gama lesiHindi lithetha “indlu.” Amanye amagama akufutshane nalo amele abe ziziphawuli, njengesithi “khulu,” “ncinane,” “dala,” okanye “tsha.” Ngoko ikhompyutha yakha uludwe lwamagama ahamba kunye nadibeneyo. Emva kolo ‘qheliselo,’ olunokuthabath’ iintsuku ezimbalwa okanye iiveki, ikhompyutha inokwenza ngendlela efanayo nasekuguquleleni umbandela omtsha. Nakuba oko ikuguquleleyo kunokusilela kwigrama nesimbo sokubhala, kodwa idla ngokuqondakala into ethethwayo neengcamango ezibalulekileyo.
Umgangatho woko kuguqulelwa yikhompyutha uxhomekeke kubuninzi nokuba semgangathweni kwalo mbandela ihlohlwe ngawo ekuqaleni. Iba luncedo xa kulapho ke iBhayibhile. Iguqulelwe ngenyameko ngeelwimi ezininzi, ifumaneka lula yaye iqulethe umbandela omninzi. Ngoko iBhayibhile yaba yinto yokuqala esetyenziswa zezi ngcali ukuze zenze ikhompyutha yazi ulwimi olutsha.