Ukuba Nethemba Phakathi Kwabantu Abadakumbileyo—Indibano Kwinkampu Yeembacu
INKAMPU yeembacu yaseKakuma ikumantla elizwe laseKenya, kude kufuphi nomda waseSudan. Ihlala abantu abangaphezu kwama-86 000. Kulo mmandla uyinkqantosi, iqondo lobushushu lintinga liye kutsho kuma-50°C. Iingxabano phakathi kweembacu yinto yomhla nezolo. Inkoliso yabantu abahlala kule nkampu idakumbile. Noko ke, bakho abasenethemba.
Phakathi kwezi mbacu kukho iqela lamaNgqina kaYehova, ashumayela iindaba ezilungileyo zoBukumkani ngenzondelelo. Ahlanganyela kwibandla elincinane laseLodwar, elimalunga neekhilomitha ezili-120 kumazantsi aloo nkampu. Elona bandla likufutshane kwelo laseLodwar likumgama omalunga neeyure ezisibhozo xa uhamba ngemoto.
Ekubeni iimbacu zingavumelekanga ukushiya inkampu, inkoliso yazo azikwazi ukuya kwiindibano ezincinane nezinkulu zamaNgqina kaYehova. Ngenxa yeso sizathu kwalungiselelwa ukuba kuqhutywe indibano ekhethekileyo yosuku olunye apho enkampini.
Uhambo Lokuya Emntla
Ukuze axhase le ndibano, amaNgqina ali-15 kwidolophana yase-Eldoret, emalunga neekhilomitha ezingama-480 kumazantsi ale nkampu, enjenjeya ecanda ilizwe esinge eLodwar ehamba ngebhasi encinane ekwanikelwa ngayo sisifundo somzalwana. Athabatha olu hambo ngenjongo yokukhuthaza nokomeleza abazalwana bawo.
Olu hambo lwaqala ekuseni kusekho inkwankca kummandla weentaba zaseKenya ongasentshona. Babeza kuhamba kwindlela embi enyukayo baze banqumle kwiifama namahlathi ngaphambi kokuba behlele kwinkqantosi eshushu. Umhlambi weebhokhwe neenkamela wawusidla kuloo mqwebedu. Amadoda ayehambahamba enxibe ezakwantu, ephethe amagqudu, izaphetha namatolo. Emva kokuhamba iiyure ezili-11 amaNgqina ade agaleleka eLodwar, indawo eshushu neqhuma uthuli ihlala abantu abamalunga nama-20 000. Emva kokwamnkelwa ngezandla ezishushu ngabazalwana, ezi ndwendwe zakhe zathi ukubek’ ubilo ukuze zilungele umsebenzi wempela-veki.
Ngentsasa elandelayo, iindwendwe zatyelela iindawo ezithile zasekuhlaleni. Zaya kubona ichibi laseTurkana, elilelona likhulu eKenya. Ekubeni lingqongwe yintlaninge yemithi yasentlango, likhaya lezona ngwenya zininzi ehlabathini. Imbinana yabantu ehlala kude kufuphi nonxweme isela amanzi amtyuba eli chibi. Ngorhatya ezi ndwendwe zaya kwiSikolo Sobulungiseleli Sobuthixo neNtlanganiso Yenkozo kwibandla lasekuhlaleni. Abazalwana baneHolo YoBukumkani entle, eyakhiwa ngowama-2003 ngelungiselelo lamaNgqina lokwakhela amazwe angathathi ntweni.
Indibano Ekhethekileyo Yosuku Olunye
Le ndibano ikhethekileyo yayingeCawa. IBandla laseLodwar, kunye nabazalwana abatyeleleyo, bavunyelwa ukuba bangene enkampini ngentsimbi yesi-8:00 kusasa, kuba amaNgqina ayezimisele ukuqalisa kwangethuba. Indlela eya khona yayinamajikojiko inqumla kumhlaba ongumqwebedu xa usiya ngakumda waseSudan. Le ndlela yayityhubela phakathi kweentaba eziphakamileyo. Ngaphambili kwakubonakala idolophana yaseKakuma. Kwakusina, indlela eya enkampini yayinodaka nezantyalantyala zamanzi. Inkoliso yemizi yayakhiwe ngezitena zodaka ifulelwe ngenkcenkce okanye ngeseyile. Iimbacu ezivela e-Ethiopia, eSomalia naseSudan nezinye zazihlala kwiindawo ezahlukeneyo. Ezi ndwendwe zamnkelwa ngezandla ezishushu.
Indibano yaqhutyelwa kwiziko lokuqeqesha. Imizobo eseludongeni yayiyichaza kakuhle intlungu yeembacu, kodwa ngaloo mini abantu ababekuloo holo babechwayitile. Zonke iintetho zazinikelwa ngesiNgesi nangesiSwahili. Ezinye izithethi zazizazi kakuhle zombini ezi lwimi kangangokuba zaziguqulela kwangokwazo. Umzalwana oyimbacu osuka eSudan wanikela intetho yokuvula enomxholo othi, “Ukuhlolisisa Intliziyo Yethu Yokomfuziselo.” Ezinye zanikelwa ngabadala abatyeleleyo.
Imbalasane kuyo nayiphi na indibano lubhaptizo. Ekuqukunjelweni kwentetho yobhaptizo, onke amehlo ayethe ntsho kuGilbert njengoko wayephakama. Wasaba kwilizwe lakowabo noyise xa kwakutshatyalaliswa uhlanga ngowe-1994. Ekuqaleni bakhe bath’ ukugob’ ityholo eBurundi, kodwa bakhawuleza baqonda ukuba basekummandla kafayayo. UGilbert wasabela eZaire, kamva wadlulela eTanzania—maxa wambi ezimela emahlathini—ekugqibeleni wade wafika eKenya. Amehlo ayethe gwanty’ iinyembezi kwabaninzi njengoko isithethi sasimamkela njengomzalwana ebandleni. Emi phambi kwaloo mbinana yabaphulaphuli abangama-95, uGilbert wayiphendula ngokucacileyo nangokuzithemba imibuzo emibini wathi “Ndiyo!”—elo ligama lesiSwahili elithetha ukuthi “Ewe!” Yena nabanye abazalwana bemba iqula elincinane baza balifaka iseyile awayekade efulela ngayo igxamesi lakhe. Kangangendlela awayekulangazelela ngayo ukubhaptizwa, ngaloo ntsasa wazalisa iqula ngamanzi awayewathutha nge-emele.
Enye yeembalasane zocwangciso lwasemva kwemini yayikukubaliswa kwamava ngemeko ekhethekileyo yamaNgqina aziimbacu. Omnye umzalwana wachaza indlela awaqalisa ngayo ukushumayela kwindoda eyayiphumle phantsi komthi.
“Khawundixelele, ngaba uhlala ukhuselekile lonke ixesha ngaphantsi komthi?”
“Ewe,” yaphendula yatsho le ndoda. Yandula yathi, “Ngaphandle kwasebusuku.”
Lo mzalwana wayifundela uMika 4:3, 4 othi: “Kwaye okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo.” “Uyeva,” wacacisa wathi, “Kwihlabathi elitsha likaThixo, uya kuhlala ukhuselekile lonke ixesha.” Le ndoda yathabatha impapasho yokufundisisa iBhayibhile.
Omnye udade owayetyelele eKakuma wayesandul’ ukufelwa zizalamane zakhe ezithathu. Egqabaza ngabazalwana ababekuloo nkampu, wathi: “Yeyona ndawo kuphilwa nzima kuyo; kodwa ukholo lwabo lomelele. Batsala nzima, kodwa bakhonza uYehova ngokonwaba. Baseluxolweni noThixo. Ndakhuthazwa ukuba ndilondoloze uxolo ndize ndikhonze uYehova. Andinanto ndinokuyikhalazela!”
Ngokuqhwanyaza nje kweliso yafikelel’ esiphelweni loo ndibano. Kwintetho yokuqukumbela, isithethi sachaza ukuba kwakukho abameli abavela kumazwe asibhozo. Elinye iNgqina eliyimbacu lathi le ndibano bubungqina bokumanyana nokuthandana kwamaNgqina kaYehova nakuba ephila kwihlabathi eliziintlaba zahlukane. AngamaKristu angabazalwana bokwenyaniso.—Yohane 13:35.
[Ibhokisi/Umfanekiso okwiphepha 25]
AMAKHWENKWE ASESUDAN AZIIMBACU
Ukususela oko kwaqalisa imfazwe yamakhaya eSudan ngowe-1983, abantu abazizigidi ezihlanu baye babhaca emakhayeni abo. Phakathi kwabo kukho abantwana abangama-26 000 abahlukana nentsapho zabo. Amawaka abo asabela kwiinkampu zeembacu e-Ethiopia, apho ahlala malunga neminyaka emithathu. Banyanzeleka ukuba bafuduke kwakhona, bahamba unyaka wonke benqumla eSudan ukuya emantla eKenya, ubukhulu becala babulawa ngamajoni, ngabaphangi, zizifo nangamarhamncwa asendle. Sisiqingatha kuphela sabo bantwana esasindayo kolo hambo luyingozi, ngoku sele bengamagqala ale nkampu yaseKakuma. Imibutho enikela uncedo, iwabiza ngokuba ngamakhwenkwe aseSudan aziimbacu.
Inkampu yeembacu yaseKakuma sele ilikhaya leentlanga ezahlukeneyo ezivela eSudan, eSomalia, e-Ethiopia nakwamanye amazwe. Xa imbacu ifika inikwa izinto zokwakha neseyile yokufulela. Kabini ngenyanga mbacu nganye inikwa iikhologram ezintandathu zomgubo, ikhilogram enye yeembotyi, ioli yokupheka netyuwa. Inkoliso yeembacu itshintshisa ngako ukuze ifumane ezinye izinto ezifunayo.
Amanye kula makhwenkwe aye adityaniswa neentsapho zawo okanye afuduselwa kwamanye amazwe. Kodwa ngokutsho kweOfisi Yeembacu, “amawaka angakumbi kula makhwenkwe asahlala kwinkampu yaseKakuma eqhuma uthuli nebhuzwa ziimpukane, ke lonto kunzima nokuba mawafunde okanye afumane into esiwa ethunjini.”
[Inkcazelo]
Courtesy Refugees International
[Imaphu ekwiphepha 23]
(Ukuba ufuna inkcazelo ehlahlelwe kakuhle, yiya kwimpapasho)
KENYA
Inkampu yaseKakuma
Ichibi laseTurkana
Lodwar
Eldoret
Nairobi
[Umfanekiso okwiphepha 23]
Ubomi bumaxongo kwezi nkampu
[Umfanekiso okwiphepha 23]
Kunkinkishwa amanzi kwinkampu yaseKakuma
[Umfanekiso okwiphepha 23]
AmaNgqina aseKenya athabatha uhamba olude esiya kumantla elizwe ukuze akhuthaze abazalwana bawo
[Umfanekiso okwiphepha 24]
Umvangeli wasemazweni uguqulela intetho enikelwa nguvulindlela okhethekileyo wasekuhlaleni
[Umfanekiso okwiphepha 24]
Iqula lokubhaptiza
[Inkcazelo Ngomfanekiso okwiphepha 23]
Rationing water and Kakuma Refugee Camp: Courtesy Refugees International