Ukwehla Kwentlekele

UOWEN, inkwenkwana eneminyaka emibini enesiqingatha ubudala wayedlala kwigumbi lokuhlambela kowabo. Wagwencela de waya kufika kwikhabhathi yamayeza abazali bakhe ababecinga ukuba akanakuze afike kuyo. Apho kuyo wafumana ibhotile eyatsala amehlo akhe. Wayivula wasela oko kungaphakathi. Yehl’ intlekele.

Lo bhotile yayineasidi ebulalayo, ibe okubuhlungu imveku, uOwen wafa. Zaba lihlwili iintliziyo zabazali bakhe. Uyise, uPercy, wacela intuthuzelo kwicawa yakhe. Wabuza oku: “Kubangelwe yintoni oku?” Umfundisi waphendula: “UThixo ebefuna enye ingelosi encinane ezulwini.” Edandathekile, lo mzali oko wakubona kungekho sesikweni kwaphela. Ngaba ngokwenene nguThixo owabangela loo ntlekele? Edanile, uPercy waqhawula amatyathanga necawa yakhe.

Njengoko ecinga ngeso siganeko, uPercy wayezibuza oku: ‘Ngaba umntwana wam usatyiwa ziintlungu? Ngaba ndiya kuze ndiphinde ndimbone?’

Nawe usenokuba uyazibuza ngoko kwenzekayo kumntu ofileyo nokuba sinokuphinda sibabone abantu bethu abafayo kwixa elizayo. ILizwi likaThixo, iBhayibhile lisinika iimpendulo zale mibuzo. Lineempendulo ezicacileyo nezithuthuzelayo kubo bonke abaye behlelwa ziintlekele ezifanayo. Into ebaluleke ngakumbi kukuba, lisichazela ngethemba elizukileyo elithenjiswe nguThixo—uvuko lwabafileyo.

Nceda ufunde inqaku elilandelayo ukuze ufunde ngakumbi ngeli themba limangalisayo.