Uvuko—Ithemba Elizukileyo

INKOLELO yovuko izalise lonke elimiweyo. Incwadi engcwele yamaSilamsi, iKoran, inesahluko sonke esithetha ngovuko. ISurah 75 inenxalenye ethi: “Ndifunga uMhla Wovuko . . . Ngaba umntu ucinga ukuba Thina asinakukwazi ukuwahlanganisa amathambo akhe? . . . Ude athi: ‘Uya kufika nini uMhla Wovuko?’ Ngaba Yena, (kwayena), akangomandla okuvusa abafileyo na?”—ISurah 75:1-6, 40.

IThe New Encyclopædia Britannica ithi: “Kunqulo lwabalandeli bakaZoroaster kukho inkolelo yokuba ekugqibeleni xa kusoyiswa uBungendawo, kuya kubakho uvuko lwabantu bonke, uMgwebo Wokugqibela nokubuyiselwa kobulungisa kwihlabathi elicociweyo.”

IEncyclopaedia Judaica ichaza uvuko ngokuthi “yinkolelo yokuba abafileyo baya kuvuswa benaloo mizimba yabo ukuze baphile emhlabeni kwakhona.” Kwale ntyilalwazi iphinda ithi inkolelo yobuYuda yokuba umntu unomphefumlo ongafiyo yingxuba-kaxaka. Ithi: “Ngeliphandle ezi nkolelo zimbini uvuko nokungafi komphefumlo zahlukene okwempuma kwintshona.”

UbuHindu bufundisa ukuba umntu umana ezalwa ngokutsha. Ukuze kwenzeke oku, umntu umele abe nomphefumlo oqhubeka uphila emva kokufa. Incwadi engcwele yamaHindu iBhagavad Gita ithi: “Umphefumlo otyhutyha umzimba awunakutshatyalaliswa. Akukho mntu unokuwutshabalalisa.”

UbuBhuda buyahluka kubuHindu kuba bona buyabuphikisa ubukho bomphefumlo ongafiyo. Sekunjalo, namhlanje amaBhuda amaninzi kwiMpuma Ekude akholelwa ukuba umphefumlo ongafiyo udlulela komnye umntu emva kokufa.a

Ingxuba-Kaxaka Ngemfundiso Yovuko

Kwimingcwabo yeNgqobhoko kudla ngokushunyayelwa ngokungafi komphefumlo xa umntu esifa nangovuko. Ngokomzekelo, abefundisi becawa yamaTshetshi badla ngokucengceleza amazwi athi: “Kanye njengokuba ikukuthanda kukaThixo uSomandla onenceba enkulu ukuthabatha umphefumlo walo mzalwana wethu usishiyileyo, ngoko siyawunikela umzimba wakhe emhlabeni; umhlaba emhlabeni, uthuthu eluthuthwini, uthuli eluthulini; sinethemba eliqinileyo lokuba uya kufumana uVuko lobomi obungunaphakade, ngoYesu Kristu iNkosi yethu.”—The Book of Common Prayer.

La mazwi anokwenza ubani azibuze enoba iBhayibhile ifundisa uvuko okanye imfundiso yokungafi komphefumlo kusini na. Noko ke, phawula amazwi kaNjingalwazi wamaProtestanti aseFransi uOscar Cullmann. Kwincwadi yakhe ethi Immortality of the Soul or Resurrection of the Dead? uthi: “Kukho umahluko omkhulu gqitha kwithemba lamaKristu lokuvuswa kwabafileyo nenkolelo yamaGrike yokungafi komphefumlo. . . . Nakuba kamva ubuKristu bazivubayo ezi mfundiso zimbini, namaKristu aqhelekileyo namhlanje engakwazi kuzahlula, andisiboni isizathu sokukufihla oko sicinga ukuba yinyaniso mna nenkoliso yabaphengululi. . . . Xa iyonke iTestamente Entsha ithetha ngokholo eluvukweni. . . . Umntu ofe fi, uvuselwa ebomini ngokudalwa ngokutsha nguThixo.”

Siyaqondakala ke isizathu sokuba abantu abaninzi bedidekile ngokuphathelele ukufa novuko. Ukuze kuconjululwe oku, kufuneka sihlolisise iBhayibhile, equlethe inyaniso evela kuMdali womntu, uYehova uThixo. IBhayibhile ineengxelo eziliqela zabantu abaye bavuswa. Makhe sihlolisise zibe ne kwezi ngxelo zovuko sibone oko zisixelela kona ngovuko.

“Abafazi Babamkela Abafileyo Babo Bevukile”

Xa wayebhalela amaYuda angamaKristu, umpostile uPawulos wathi abafazi bokholo “babamkela abafileyo babo bevukile.” (Hebhere 11:35) Omnye kwabo bafazi wayehlala eTsarefati, idolophu yaseFenike kufuphi naseSidon kuNxweme lweMeditera. Wayengumhlolokazi onobubele owamkela umprofeti kaThixo uEliya waza wamenzela into esiwa phantsi kwempumlo nakuba indlala yayigqugqisile. Okubuhlungu kukuba, unyana walo mfazi wagula waza wafa. Kwangoko uEliya wamthwala waya naye kwigumbi eliphezulu awayelala kulo lo mprofeti, wacela uYehova ukuba amvuse. Kwenzeka ummangaliso, ibe lo nkwenkwe ‘yabuyela ebomini.’ UEliya wayibuyisela kunina wathi: “Uyabona, unyana wakho uyaphila.” Wasabela njani unina? Evuya, wathi: “Ngoku, eneneni, ndiyazi ukuba uyindoda yakwaThixo nokuba ilizwi likaYehova elisemlonyeni wakho liyinyaniso.”—1 Kumkani 17:22-24.

Malunga neekhilomitha ezili-100 ukusuka eTsarefati kwakukho isibini esasinesisa esanyamekela lowo wangena ezihlangwini zikaEliya, umprofeti uElisha. Umfazi walapho wayesaziwa kwidolophu yaseShunem. Benomyeni wakhe banika uElisha indawo yokufihla intloko kwigumbi eliphezulu emzini wabo. Iintlungu yabo yokungabi nabantwana yaba luvuyo xa eli bhinqa lazala unyana. Njengoko ikhula le nkwenkwana, yayidla ngokuhamba nabavuni iye kuyise emasimini. Ngenye imini kwehla intlekele. Yakhala ngentloko ebuhlungu. Ngokukhawuleza umlindi wayithwala wayigodusa. Unina wayisingatha, kodwa yafa ekugqibeleni. Ebuhlungu gqitha lo mama wagqiba ekubeni acele uncedo kuElisha. Ehamba nomlindi baya emntla-ntshona besinge kwiNtaba yeKarmele, apho wayehlala khona uElisha.

Akuva oko kwehlileyo, lo mprofeti wathumela umlindi wakhe uGehazi, ukuba ahambe ngaphambili ibe wafika ifile ngokwenene loo nkwenkwe. UElisha nalo mfazi balandela, kodwa kwenzeka ntoni ukufika kwabo eShunem? Ingxelo yesi-2 yooKumkani 4:32-37 ithi: “Ekugqibeleni uElisha wangena endlwini, nantso inkwenkwe ifile, ilaliswe esingqengqelweni sakhe. Wandula ke wangena waluvala ucango bebobabini waza wathandaza kuYehova. Ekugqibeleni wenyuka walala phezu komntwana waza wabeka umlomo wakhe emlonyeni wakhe namehlo akhe phezu kwamehlo akhe neentende zakhe phezu kweentende zakhe, waqhubeka egobile phezu kwakhe, yaye ngokuthe ngcembe inyama yomntwana yafudumala. Wandula ke wahamba endlwini, wasinga ngapha kwakanye wabuya wasinga ngaphaya kwakanye, emva koko wenyuka waya kugoba phezu kwakhe. Yaye inkwenkwe yaqalisa ukuthimla kasixhenxe, emva koko inkwenkwe yawavula amehlo ayo. Ke kaloku wabiza uGehazi wathi: ‘Biza lo mfazi womShunem.’ Ngoko wambiza waza weza kuye. Wandula ke wathi: ‘Phakamisa unyana wakho.’ Wangena waza wawa ezinyaweni zakhe, waqubuda kuye emhlabeni, emva koko waphakamisa unyana wakhe waza waphuma.”

Njengomhlolokazi waseTsarefati, nalo eli bhinqa laseShunem lalisazi ukuba ngamandla kaThixo abangele oko. Bobabini aba bafazi bavuya gqitha njengoko uThixo wabuyisela inzala yabo abayithandayo ebomini.

Ukuvuswa Kwabafileyo Ngexesha Lobulungiseleli BukaYesu

Malunga neminyaka engama-900 kamva, kwavuswa umntu ofileyo kummandla okufutshane kumantla eShunem ngaphandle kwedolophana yaseNayin. Njengoko uYesu Kristu nabafundi bakhe babesuka eKapernahum, xa besondela kwisango laseNayin badibana nabantu ababethwele isidumbu besiya kungcwaba, ibe uYesu wambona umhlolokazi owayefelwe ngunyana okuphela kwakhe. UYesu wamxelela ukuba ayeke ukukhala. Ugqirha uLuka, usichazela oko kwenzekayo: ‘[UYesu] wasondela, wachukumisa ithala, baza bema ngxi abo babethwele, wathi: “Mfana, ndithi kuwe, Vuka!” Wavuka umfi wahlala nkqo waza wathetha, wandula ke wamnikela kunina.’ (Luka 7:14, 15) Abawubonayo lo mmangaliso bamzukisa uThixo. Iindaba zolu vuko zasasazeka zaya kutsho emazantsi kulo lonke elakwaYuda nakwizithili ezilingqongileyo. Okubangel’ umdla kukuba, abafundi bakaYohane uMbhaptizi beva ngolu vuko baza baya kuxelela uYohane. Naye wathi akuva ngalo wabathumela kuYesu ukuze baye kumbuza enoba unguye na uMesiya olindelweyo. UYesu wathi kubo: “Hambani niye kuxela kuYohane oko nikubonileyo nenikuvileyo: iimfama ziyabona, iziqhwala ziyahamba, abaneqhenqa bayahlanjululwa nezithulu ziyeva, abafileyo bayavuswa, amahlwempu axelelwa iindaba ezilungileyo.”—Luka 7:22.

Kwimimangaliso yokuvusa abantu abafileyo kukaYesu owona waziyo ngulowo wokuvusa umhlobo wakhe uLazaro. Kwesi isihlandlo, uYesu walibaziseka waza wafika kwikhaya likaLazaro sele efile. Ukufika kwakhe uYesu eBhethani, uLazaro wayesele eneentsuku ezine efile. Xa uYesu wathi makususwe ilitye elaligqume ingcwaba, uMartha wakwala oko wathi: “Nkosi, kungoku nje umele ukuba uyanuka, kuba ziintsuku ezine.” (Yohane 11:39) Ukanti, nakuphi na ukonakala komzimba kaLazaro akuzange kuthintele ukuba avuswe. Ngomyalelo kaYesu, “waphuma umntu lowo obefile, iinyawo nezandla zakhe zibotshwe ngezithandelo, nobuso bakhe busongelwe ngelaphu.” Kamva, izenzo zeentshaba zikaYesu zangqina ukuba uLazaro wabuyiselwa ngokwenene ebomini.—Yohane 11:43, 44; 12:1, 9-11.

Sifunda ntoni kwezi ngxelo zine zovuko? Mntu ngamnye owavuswayo wabuyela ebomini esengulaa mntu ebenguye ngaphambili. Bonke bavuka besaziwa ngabantu nezalamane zabo. Akukho namnye kubo owachaza oko bekusenzeka ngelo xesha lifutshane lokufa kwakhe. Akakho owavuka ebalisa ngokuya kwakhe kwelinye ilizwe. Kuyabonakala ukuba bonke bavuka beyimiqaba-qaba. Kubo kwakungathi bebelele umzuzwana baza bavuka, kanye njengokuba uYesu wabonisayo. (Yohane 11:11) Noko ke, emva kwexesha ngamnye kubo waphinda wafa.

Ukumanyaniswa Nabo Sibathandayo Kwakhona—Ithemba Elizukileyo

Kungekudala emva kwesiganeko sokufa kukaOwen, ekuthethwe ngaye kwinqaku elingaphambili, uyise watyelela omnye ummelwane wakhe. Apho phezu kwetafile, wabona iphetshana elibhengeza intetho yesidlangalala eyayiququzelelwa ngamaNgqina kaYehova. Umxholo wayo othi, “Abantu Abafileyo Bayaphi?” wavusa umdla wakhe. Ngumbuzo kanye awayezibuza wona lowo. Wabakho kuloo ntetho waza wathuthuzeleka ngokwenene koko kuthethwa yiBhayibhile. Wafunda ukuba abantu abafileyo ababandezeleki. Kunokungcungcuthekiswa esihogweni okanye bathatyathwe nguThixo abenze iingelosi ezulwini, abafileyo kuquka uOwen, balinde engcwabeni de kufike ixesha lokuvuswa kwabo.—INtshumayeli 9:5, 10; Hezekile 18:4.

Ngaba nikhe nehlelwa yintlekele kwintsapho yakho? Ngaba nawe njengoyise kaOwen uyazibuza ukuba baphi na abo bafileyo ubathandayo yaye ungaze uphinde ubabone na? Ukuba kunjalo, sicela uqwalasele ngakumbi oko kufundiswa yiBhayibhile ngovuko lwabafileyo. Mhlawumbi uzibuza ukuba: ‘Luya kubakho nini uvuko? Ngoobani kanye abaya kuzuza kulo?’ Nceda ufunde amanqaku alandelayo wona axubusha ngale mibuzo neminye.

[Umbhalo osemazantsi]

[Umfanekiso okwiphepha 5]

UYehova wasebenzisa uElisha ukuvusa unyana womfazi womShunem

[Umfanekiso okwiphepha 5]

UEliya wacela uYehova ukuba avuse le nkwenkwe ekufeni

[Umfanekiso okwiphepha 6]

UYesu wavusa unyana womhlolokazi waseNayin

[Umfanekiso okwiphepha 7]

Uvuko luya kumanyanisa kwakhona izalamane nabantu bazo ezibathandayo