Ukuchaza Umqondiso Ngumbandela Onzulu!

“Ekuqaleni ndandicinga ukuba unyana wethu uAndreas unentloko nje ebuhlungu. Kodwa waphelelwa ngumdla wokutya yaye wayenomkhuhlane. Intloko yaba buhlungu gqitha, yaye ndaba nexhala. Ukubuya komyeni wam, samsa kwagqirha uAndreas. Wamxilonga uAndreas waza wamthumela esibhedlele ngokukhawuleza. Ingxaki yayingeyontloko nje kuphela. UAndreas wayedumbe umnqonqo (meningitis). Wanyangwa yaye wakhawuleza wachacha.”—UGertrud, umama waseJamani.

ABAZALI abaninzi baqhelene nala mava kaGetrud. Bayazibona iimpawu ezibonisa ukuba kusenokwenzeka ukuba umntwana uyagula. Nangona ingezizo zonke izigulo ezixhalabisayo, abazali abanakuzityeshela iimpawu ezibonisa ukugula ebantwaneni babo. Ukuqwalasela iimpawu nokwenza oko kuyimfuneko kunokwenza umahluko omkhulu. Ngumbandela obalulekileyo.

Ukuwuqonda umqondiso kubalulekile nangaphandle kwempilo. Omnye umzekelo yintlekele yemvelo eyitsunami eyenzeka ngoDisemba 2004 kwimimandla erhangqe uLwandlekazi lwaseIndiya. Imibutho karhulumente kwiindawo ezinjengeOstreliya neHawaii yarhanela ukuba kuza kubakho inyikima enkulu kumantla eSumatra yaza yayibona nengozi eyayiza kwenzeka ngenxa yoko. Sekunjalo, yayingekho indlela yokuba balunyukiswe baze basabele abantu ababekuloo mimandla. Ngenxa yoko kwafa abantu abangaphezu kwama-220 000.

Eyona Miqondiso Ibalulekileyo

Xa uYesu Kristu wayesemhlabeni wafundisa abaphulaphuli bakhe indlela yokubona imiqondiso nokuthabatha inyathelo ngokukhawuleza. Wayethetha ngeyona nto ibalulekileyo. IBhayibhile ithi: “Kweza kuye abaFarisi nabaSadusi baza, bemhenda, bamcela ukuba ababonise umqondiso ovela ezulwini. Ekuphenduleni wathi kubo: ‘Xa kusihlwa niqhele ukuthi, “Imozulu iza kuba ntle, kuba isibhakabhaka sibomvu okomlilo”; yaye kusasa nithi, “Iza kuba yimozulu yobusika, enemvula namhlanje, kuba isibhakabhaka sibomvu okomlilo, kodwa lisibekele.” Niyakwazi ukutolika imbonakalo yesibhakabhaka, kodwa imiqondiso yamaxesha aninako ukuyitolika.’”—Mateyu 16:1-3.

Xa wayethetha ‘ngemiqondiso yamaxesha,’ uYesu wabonisa ukuba abaphulaphuli benkulungwane yokuqala abangamaYuda babefanele bakuphaphele ukungxamiseka kwamaxesha. Inkqubo yezinto yamaYuda yayiza kwehlelwa yintlekele eyayiza kuwachaphazela. Kwiintsuku nje ezimbalwa ngaphambi kokufa kwakhe, uYesu wathetha nabafundi bakhe ngomnye umqondiso—umqondiso wobukho bakhe. Oko wakuthethayo ngelo xesha kubaluleke kuye wonke umntu nanamhlanje.