Imibuzo Evela Kubafundi
Ukuba umntu ukhathazwa ziidemon, unokukhululeka njani kwimpembelelo yazo?
Ilizwi likaThixo libonisa ukuba abo bakhathazwa ziidemon banokukhululeka kwimpembelelo yazo. Umthandazo ubalulekile ukuze ubani akhululeke kule ngxaki. (Marko 9:25-29) Kodwa umntu okhathazwa ziidemon kusenokufuneka athabathe amanye amanyathelo. Iziganeko ezibandakanya amaKristu enkulungwane yokuqala zingumzekelo wenye into efunekayo.
Abanye kwiEfese yamandulo babesebenzisana needemon ngaphambi kokuba babe ngabalandeli bakaKristu. Noko ke, emva kokuba benze isigqibo sokukhonza uThixo, ‘abo babeqhelisela ubugcisa bomlingo bazizisa ndawonye iincwadi zabo baza bazitshisa phambi kwakhe wonk’ ubani.’ (IZenzo 19:19) Ngokutshisa kwabo iincwadi zokuvumisa, abo basand’ ukuba ngamakholwa e-Efese babamisela umzekelo bonke abo banqwenela ukwahlukana needemon namhlanje. Kubalulekile ngabantu abanaloo ngxaki ukuba batshabalalise nantoni na enxulumene nokusebenzelana nemimoya. Oku kusenokuquka iincwadi, amaphephancwadi, imifanekiso eshukumayo, izinto ezifumaneka kwi-Internet nakweminye imithombo enokuthanani nokusebenzelana nemimoya, umculo kwakunye namakhubalo okanye ezinye izinto ezinxityelwa “ukuzikhusela” okanye nantoni na enento yokwenza nokusebenzelana nemimoya.—Duteronomi 7:25, 26; 1 Korinte 10:21.
Kangangeminyaka embalwa emva kokuba loo maKristu ase-Efese ezitshabalalisile iincwadi zawo zomlingo, umpostile uPawulos wabhala: “Sizamazamana . . . nemikhosi yoomoya abangendawo.” (Efese 6:12) UPawulos wabongoza amaKristu wathi: “Yambathani sonke isikrweqe sikaThixo ukuze nikwazi ukuma niqinile nxamnye namaqhinga kaMtyholi.” (Efese 6:11) Elo cebiso lisasebenza nangoku. AmaKristu afanele athabathe amanyathelo ukuze omelele ngokomoya, oko kuya kuwakhusela nxamnye nemimoya engendawo. UPawulos egxininisa wathi: “Ngaphezu kwezinto zonke, thabathani ikhaka elikhulu lokholo, enothi ngalo nikwazi ukucima yonke imijukujelwa evuthayo yalowo ungendawo.” (Efese 6:16) Umntu unokulomeleza ukholo lwakhe ngokufunda iBhayibhile. (Roma 10:17; Kolose 2:6, 7) Ngoko ke, ukufunda iBhayibhile rhoqo kunokusinceda sibe nokholo oluya kusikhusela kwimpembelelo yoomoya abangendawo.—INdumiso 91:4; 1 Yohane 5:5.
Loo maKristu ase-Efese kwafuneka athabathe elinye inyathelo elibalulekileyo. UPawulos wathi: “Ngazo zonke izihlandlo niqhubeka nithandaza ngako konke ukuthandaza nokukhunga nikuwo umoya.” (Efese 6:18) Ewe, ukuthandazela ukukhuselwa nguYehova, enyanisweni kubalulekile kwabo bafuna ukukhululeka kwiintlaselo zeedemon namhlanje. (IMizekeliso 18:10; Mateyu 6:13; 1 Yohane 5:18, 19) IBhayibhile ichanile xa isithi: “Zithobeni, ke ngoko, kuThixo; kodwa mchaseni uMtyholi, wonibaleka.”—Yakobi 4:7.
Ngoxa umntu ohlaselwa ziidemon efanele athandaze ngokusuk’ entliziyweni ukuze akhululeke kuzo, amanye amaKristu okwenyaniso asenokuthandazela omnye umntu okufuna ngokunyanisekileyo ukukhonza uYehova nowenza konke okusemandleni akhe ukuxhathisa imimoya engendawo. Asenokucela uThixo ukuba loo mntu ukhathazwa ziidemon azuze amandla omoya oyingcwele ukuze axhathise ukuhlaselwa zizo. Ekubeni iLizwi likaThixo lisithi “isikhungo somntu olilungisa, xa sisebenza, sinamandla amakhulu,” imithandazo yabakhonzi bakaThixo ngokuqinisekileyo iya kumnceda lowo ukhathazwa ziidemon nowenza konke okusemandleni akhe ukuze ‘amchase uMtyholi.’—Yakobi 5:16.
[Umfanekiso okwiphepha 31]
AmaKristu ase-Efese azitshisa iincwadi zobugqi