Musa Ukoyika—UYehova Unawe!

NGAPHEZU kweminyaka engama-50 eyadlulayo, kungekudala nje emva kokuqhushumba kweebhombu zenyukliya zokuqala, isazinzulu esafumana iBhaso likaNobel uHarold C. Urey sathi ngekamva: “Siya kudla sisoyika, silale sisoyika, sihlale sisoyika size sife sisoyika.” Eneneni, namhlanje ihlabathi lizaliswe luloyiko, ibe asingomnqa oko. Mihla le, amaphephandaba achaza ngeziganeko ezoyikekayo zobugrogrisi, ugonyamelo nezigulo ezididayo.

NjengamaKristu siyayazi intsingiselo yezo meko. Zibonisa ukuba siphila ‘kwimihla yokugqibela’ yale nkqubo ingendawo, eyaxelwa kwangaphambili yiBhayibhile ukuba iya kubonakala ngokuba ‘namaxesha amanqam ekunzima ukujamelana nawo.’ (2 Timoti 3:1) Oko kusenza sibe nokholo olomeleleyo lokuba kungekudala uYehova uThixo uza kuzisa ihlabathi elitsha elinobulungisa. (2 Petros 3:13) Noko ke, ngaba lukho uloyiko esijamelana nalo okwangoku?

Indlela Abakhonzi BakaThixo Abalujonga Ngayo Uloyiko

UYakobi, uDavide noEliya ngabanye babakhonzi bakaYehova abaye bafikelwa luloyiko xa babesengozini. (Genesis 32:6, 7; 1 Samuweli 21:11, 12; 1 Kumkani 19:2, 3) La madoda ayengaswelanga lukholo. Kunoko, abonisa ukuba athembele ngokupheleleyo kuYehova. Sekunjalo, uYakobi, uDavide noEliya boyika njengamntu wonke. Umfundi uYakobi wathi: “UEliya wayengumntu oneemvakalelo ezinjengezethu.”—Yakobi 5:17.

Nathi sisenokuba noloyiko xa sicinga ngomqobo esijamelene nawo okanye esinokujamelana nawo kwixesha elizayo. Ukoyika ngaloo ndlela kuyaqondakala. Ngapha koko, neBhayibhile ithi uSathana uMtyholi uzimisele ‘ukwenza imfazwe’ nabo “bagcina imiyalelo kaThixo nabanomsebenzi wokungqinela uYesu.” (ISityhilelo 12:17) Ngoxa loo mazwi ebhekisela ngokungqalileyo kumaKristu athanjisiweyo, uPawulos wathi: “Bonke abo banqwenela ukuphila ngozinikelo lobuthixo ngokunxulumene noKristu Yesu, nabo baya kutshutshiswa.” (2 Timoti 3:12) Sekunjalo, asimele soyike ngokugqithiseleyo xa sijamelene neengxaki. Ngoba?

“UThixo Wezenzo Zokusindisa”

Umdumisi uDavide wabhala: “UThixo oyinyaniso kuthi unguThixo wezenzo zokusindisa.” (INdumiso 68:20) Izihlandlo ezininzi uYehova uye wabonisa amandla anawo okusindisa abantu bakhe, ngokubahlangula kwiingozi okanye ngokubanika amandla okuba banyamezele. (INdumiso 34:17; Daniyeli 6:22; 1 Korinte 10:13) Ngokusuka kufundisiso lwakho lweBhayibhile, zingaphi ‘izenzo zokusindisa’ ozikhumbulayo?

Usebenzisa iWatch Tower Publications Index,a kutheni ungenzi uphando ngeziganeko ezenzeka ngokwenene njengoNogumbe womhla kaNowa, ukusindiswa kukaLote neentombi zakhe eSodom naseGomora, iMfuduko yamaSirayeli esuka eYiputa nokuhamba kwawo kuLwandle Olubomvu okanye ukukatya kweyelenqe likaHaman lokutshabalalisa amaYuda? Ukufunda nokucamngca ngezi ziganeko zibangel’ umdla kuya komeleza ukholo lwakho lokuba uYehova nguThixo wezenzo zokusindisa. Oku kuya kukunceda ujamelane neemvavanyo zokholo lwakho ngaphandle koloyiko.

Imizekelo Yezi Mini

Ngaba bakho abantu obakhumbulayo abaye babonakalisa unyamezelo kwindawo ohlala kuyo? Isenokuba ngumntu owavalelwa entolongweni ngenxa yokuthembeka kuThixo. Kusenokwenzeka ukuba kukho umKristu othile owalupheleyo omaziyo okhonza uYehova nangona enempilo enkenenkene. Okanye cinga ngolutsha olungazibandakanyiyo kwizinto zehlabathi nangona lucinezelwa kanobom ngabo lufunda nabo. Kukwakho nabazali abakhulisa abantwana ngaphandle kwamaqabane, okanye abo bangatshatanga abakhonza uYehova nangona bengamalolo. Yintoni oyifundayo kwabo bantu? Ukucamngca ngezenzo zabo zokuthembeka kunokukunceda unyamezele uze ube nenkalipho kungakhathaliseki ukuba ziziphi na iimvavanyo ojamelana nazo.

Ukungabi naloyiko akufuneki kuphela xa sichaswa naxa sitshutshiswa kodwa kwanaxa siqalisa ukuthandabuza ukuba uYehova uyasithanda. Sifanele siqiniseke ukuba intlawulelo kaKristu isebenza kumntu ngamnye. (Galati 2:20) Sinokwandula ke, sisondele kuYehova ngaphandle koloyiko okanye ukunkwantya ngokugqith’ emgceni. Ukuba siziva singakufanelekeli ukuthandwa nguYehova, sinokucinga ngamazwi kaYesu awawathetha kubalandeli bakhe esithi: “Ngaba oongqatyana ababini abathengiswa ngengqekembe exabiso lincinane na? Kanti akukho namnye kubo oya kuwela emhlabeni ngaphandle kolwazi lukaYihlo. Nina ke, kwaneenwele ezi zentloko yenu zibaliwe zonke. Ngoko ke musani ukoyika: nixabiseke ngaphezu koongqatyana abaninzi.”—Mateyu 10:29-31.

Amaphephancwadi IMboniselo noVukani! asoloko epapasha amava amaNgqina kaYehova ale mihla aye ajamelana neemeko ezilucelomngeni ngaphandle koloyiko. Oku akuthethi ukuba ayengeva ntlungu. Eyona ithethwayo kukuba akazange avumele oko kuwenze ayeke ukukhonza uYehova. Iingxelo zawo ezipapashiweyo zinokukunceda nawe unyamezele ube nenkalipho. Khawuqwalasele le mizekelo mibini.

Ingozi Yabuguqula Ubomi Bakhe

UVukani! kaMeyi 8, 2003, wawunenqaku elithi “Indlela Ingozi Eyabuguqula Ngayo Ubomi Bam.” Kweli nqaku, uStanley Ombeva, oliNgqina likaYehova eKenya, uchaza ucelomngeni awajamelana nalo ngenxa yokutshayiswa yimoto eyayibaleka ngesantya esiphezulu. Ekubeni impilo yakhe yayisiba mandundu, waphulukana nomsebenzi nazo zonke iingenelo ezihambisana nawo. UMzalwan’ uOmbeva uyavuma esithi: “Ukubona imeko endandikuyo kwandenza ndadandatheka, ndingafuni bantu ndaza ndaba ngumntu ocaphuka msinya. Maxa wambi ndandisiba nomsindo ndize ndibe buhlungu ngokugqithiseleyo.” Nangona wayejamelene nobu bunzima, le ndoda ingumKristu yaba nenkalipho. Akazange avumele ukuphoxeka kumongamele kuze kumenze anikezele ngokupheleleyo. Kunoko, wathembela ngoYehova. UMzalwan’ uOmbeva uthi: “Kuzo zonke izinto endandityhubela kuzo wayendixhasa—kangangokuba maxa wambi ndandisiba neentloni ngendlela endivakalelwa ngayo. Ndenza isigqibo sokufunda izibhalo endandisazi ukuba ziza kundithuthuzela ndize ndicamngce ngazo.”

Ukuthetha phandle kukaMzalwan’ uOmbeva kwenza abanye bakwazi ukunyamezela iimvavanyo ngenkalipho. Omnye udade ongumKristu wabhala: “Ndalila xa ndandifunda eli nqaku. Ndavakalelwa kukuba ngeli nqaku uYehova wayebonisa ukuba unothando nenyameko ibe endithuthuzela.” Elinye iNgqina labhala: “Amanqaku anjengeli asikhuthaza gqitha thina bajamelana neemeko ezifana nezi nabangazichaziyo ukuba bayabandezeleka.”

Ukuhlangabezana Nokudandatheka

Amanye amava achukumisayo ngakaHerbert Jennings, akwinqaku elithi “Anikwazi Oko Ubomi Benu Buya Kuba Kuko Ngomso.”b UMzalwan’ uJennings unesigulo sokuphazamiseka engqondweni. Ecinga ngeentsuku zokuqalisa kwakhe ukugula, uthi: “Kwakusiba nzima nokuya kwiintlanganiso zamaKristu. Sekunjalo, ndandeyiseke ngokupheleleyo ngokubaluleka konxulumano lokomoya. Ukuze ndihlangabezane noko, ndandidla ngokungena kwiHolo yoBukumkani emva kokuba isihlwele sele sihleli phantsi ndize ndimke ngaphambi nje kokuba siqalise ukuxokozela ekupheleni kocwangciso.”

Kwakunzima nokuba ashumayele. UMzalwan’ uJennings uthi: “Maxa wambi, ndandisithi sele ndifikile endlwini, ndingabi nayo inkalipho yokunkqonkqoza. Noko ke, ndandingahambi kuba ndandiqonda ukuba ubulungiseleli bethu buthetha usindiso kuthi nakuye nabani na osabela kakuhle. (1 Timoti 4:16) Emva kwethutyana, ndandiye ndizilungelelanise kwakhona, ndiye kumnyango olandelayo ndize ndiphinde ndizame. Ngokuqhubeka ndisiba nesabelo kubulungiseleli, ndahlala ndiphilile ngokomoya ukusa kumlinganiselo othile, yaye oko kwandenza ndakwazi ngakumbi ukunyamezela.”

Ukuthetha phandle kukaMzalwan’ uJennings kwanceda abafundi abaninzi bajamelana neenkxwaleko zabo ngaphandle koloyiko njengaye. Ngokomzekelo, omnye udade ongumKristu wabhala: “Kule minyaka ingama-28 ndifunda amaphephancwadi IMboniselo noVukani!, andizange ndakha ndachukumiseka kangaka njengaxa ndandifunda eli nqaku. Kwaye kwafuneka ndiyeke ukuba kwinkonzo yexesha elizeleyo ibe ndaziva ndinetyala, ndivakalelwa kukuba ukuba bendinokholo olungakumbi ngendiye ndaqhubeka. Ukufunda ngendlela uMzalwan’ uJennings aye wayeka ngayo isabelo sakhe ukuze anyamekele impilo yakhe kwandinceda ndajonga imeko yam ngendlela elungeleleneyo. Ngokwenene le yayiyimpendulo yemithandazo yam!”

Omnye umzalwana ongumKristu wabhala: “Kuye kwafuneka ndiyeke ukuba ngumdala, ilungelo ebendilinandipha kangangeminyaka elishumi, ngenxa yesigulo sengqondo. Ndandiziva ndisilele kangangokuba kwakundidandathekisa ukufunda amabali obomi, adla ngokuthetha ngezinto ezinkulu gqitha eziye zenziwa ngabantu bakaYehova. Inzondelelo kaMzalwan’ uJennings yandikhuthaza. Eli nqaku ndilifunde ndaliphindaphinda.”

Ukutyhalela Phambili Ngentembelo

NjengoMzalwan’ uOmbeva noJennings, amaNgqina kaYehova amaninzi akhonza uYehova uThixo ngenkalipho nangona ejamelene nobunzima. Ukuba kunjalo nakuwe, ufanelwe kukunconywa. Qiniseka ukuba: ‘UThixo akanantswela-bulungisa ukuba angawulibala umsebenzi wakho nothando owalubonisayo ngegama lakhe, ngokuthi ulungiselele abangcwele yaye usaqhubeka ubalungiselela.’—Hebhere 6:10.

Kanye njengokuba uYehova wanceda abantu abathembekileyo mandulo ukuba boyise iintshaba zabo, unokukunceda woyise nawuphi na umqobo onokujamelana nawo. Ngoko ke, hlala ukhumbula amazwi uYehova awawathetha esebenzisa umprofeti uIsaya esithi: “Musa ukoyika, kuba ndinawe. Musa ukubhekabheka, kuba ndinguThixo wakho. Ndiza kukuqinisa. Ndiza kukunceda ngokwenene. Ndiza kukubamba nkqi ngokwenene ngesandla sam sasekunene sobulungisa.”—Isaya 41:10.

[Imibhalo esemazantsi]

[Imifanekiso ekwiphepha 16]

NjengoStanley Ombeva (ngasentla) noHerbert Jennings (ekunene), abaninzi bakhonza uYehova ngenkalipho

[Inkcazelo Ngomfanekiso okwiphepha 14]

USAF photo