Ngaba Ngokwenene Sinokumazi UThixo?
‘Oku kuthetha ubomi obungunaphakade, ukungenisa kwabo ulwazi ngokuphela koThixo oyinyaniso.’—Yohane 17:3.
“UMPOSTILE UPAWULOS uthi: “Hayi ubunzulu bobutyebi nobobulumko nobolwazi lukaThixo!” Wongezelela athi: “Hayi indlela engaphengululeki ngayo imigwebo yakhe nendlela ezingalandeki ngayo iindlela zakhe!” (Roma 11:33) Ngaba la mazwi atheth’ ukuthi akunakwenzeka ngabantu ukuba babe nobulumko okanye ulwazi ngoThixo nangeenjongo zakhe?
Abantu abaphenjelelwa ziimfundiso zecawa bacinga ukuba asinakumazi uThixo. IEncyclopedia of Religion ithi: “UThixo akafuni simazi. . . . UThixo akanalo igama okanye akanakuchazwa. Akukho gama okanye inkcazelo enokumchaza, kuba uThixo mkhulu . . . Akanakwaziwa.”a
Iphephancwadi iNewsweek lithi, abantu abaninzi abangenamdla kangako kwizinto zonqulo batyekele “kuhlobo olutsha lwenkolelo yesithethe” yokuba “inyaniso inye yaye loo nyaniso ikukuba akukho nyaniso.”
Sekunjalo, abantu abaninzi abakhange bafumane mpendulo xa bebefuna ukwazi ngenjongo yobomi. Kukho iingxaki ezithwaxa abantu ezifana nendlala, izifo nogonyamelo. Kubo, ukungaqiniseki ngobomi kusenokubakhathaza. Basenokufuna ukwazi iimpendulo kodwa ukuba abazifumani, basenokugqiba ngelithi azikho. Ngenxa yoko, abantu abaninzi abanjalo baye bayeka ukuya ecaweni baza bafuna uThixo ngeendlela zabo—ukuba phofu basakholelwa ukuba ukho.
Imbono YeBhayibhile
Abo bayifundayo iBhayibhile nabamkela uYesu Kristu njengeSithethi sikaThixo banomdla wokwazi imbono yeBhayibhile. Mhlawumbi uyakhumbula uYesu ethetha ngeendlela ezimbini, esithi “ibanzi kwaye iphangaleleyo indlela esa entshabalalweni” yaye “imxinwa indlela esa ebomini.” Wachaza indlela esinokubafanisa ngayo abo bahamba kwindlela nganye, esithi: “Nobaqonda ngeziqhamo zabo.” Ziziphi ezo ziqhamo? Asikuko oko bakuthethayo kodwa koko bakwenzayo njengokuba uYesu esithi: “Asingabo bonke abathi kum, ‘Nkosi, Nkosi,’ abaya kungena ebukumkanini bamazulu, kodwa ngulowo wenza ukuthanda kukaBawo osemazulwini oya kungena.” Ukukholelwa nje kuThixo akwanele. Sifanele senze ukuthanda kwakhe. Sifanele kuqala sibe nolwazi oluchanileyo ngokuthanda kukaThixo.—Mateyu 7:13-23.
UYesu watsho ngokucacileyo ukuba kunokwenzeka ngabantu ukuba bamazi uThixo. Wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Licacile elokuba, sinokuba nobulumko nolwazi ngoThixo kodwa kuphela ukuba siyalufuna olo lwazi. Noko ke, isipho sikaThixo kwabo benjenjalo, bubomi obungunaphakade. Ngoko ke ukufuna ulwazi kuwufanele umgudu.
[Umbhalo osemazantsi]
a Izithethe zonqulo lwaseMpuma zobuHindu, ubuTao nobuBhuda zineemfundiso ezifanayo.
[Umfanekiso okwiphepha 4]
UYesu wathi, indlela emxinwa isa ebomini