Sinokulungenisa Njani Ulwazi NgoThixo?

Abanye abantu bayathandabuza ukuba uThixo ngokwenene unomdla wokuba abantu bamazi. Ukuba unomdla, yintoni ayenzayo ukuze bamazi?

UMHLAZIYI wobuProtestanti uJohn Calvin wenkulungwane ye-16 echan’ ucwethe wathi, akukho mntu unokuzazela uThixo ngaphandle kokuba yena azityhile kuye. Noko ke, abanye abantu basenokuzibuza enoba uThixo ngokwenene unomdla wokuzityhila kubo kusini na. Yaye ukuba unomdla, uzityhila njani?

UYehova, “uMdali Ozukileyo,” unesizathu sayo nantoni na ayenzayo. Kwakhona “njengoThixo uSomandla,” uyakwazi ukuphumeza iinjongo zakhe. (INtshumayeli 12:1; Eksodus 6:3) Sinokuqiniseka ukuba ufuna abantu bazazi iinjongo zakhe, kuba umprofeti uAmos waphefumlelwa ukuba athi: “INkosi enguMongami uYehova ayiyi kwenza nto ngaphandle kokuba iwutyhilile umcimbi wayo oyimfihlo kubakhonzi bayo abaprofeti.” Phawula ukuba uThixo wathi uya kuzityhila iinjongo zakhe kuphela kubakhonzi bakhe, kwabo bamthanda ngokunyanisekileyo. Ngaba oko akukho ngqiqweni? Izinto zakho eziyimfihlo uzichazela bani? Ngaba uxelela nabani na okanye uxelela izalamane okanye abahlobo bakho?—Amosi 3:7; Isaya 40:13, 25, 26.

Abantu abathobekileyo bayakhwankqiswa bubulumko nolwazi lukaThixo yaye oko kufanelekile. Kodwa ke, kufuneka okungakumbi kunokukhwankqiswa nje, ukuba sifuna ukuzuza kubulumko nolwazi lobuthixo. IBhayibhile ithi ukuze sifunde ngeengcamango zikaThixo kufuneka sibe nentliziyo ethobekileyo: ‘Wamkele amazwi am uze uyigcine kuwe imiyalelo yam. Nikela ingqalelo kubulumko ngendlebe yakho. Yithobele ukuqonda intliziyo yakho. Biza ukuqonda, nelizwi lakho lise ekuqondeni. Qhubeka ubufuna njengesilivere.’—IMizekeliso 2:1-4.

Umntu othobekileyo owenza konke oku, ngokwenene uya kumazi uThixo. Incwadi yeMizekeliso yalek’ umsundulu isithi: “UYehova unika ubulumko; emlonyeni wakhe kuphuma ukwazi nokuqonda.” Ewe, abantu abayifuna ngokunyanisekileyo inyaniso ‘banokubuqonda ubulungisa, nomgwebo nokuthe tye, ikhondo lokulungileyo liphela.’—IMizekeliso 2:6-9.

Ukuphanda Inyaniso

IEncyclopedia of Religion ithi: “Ubomi babantu kukufuna ukwazi into yokwenene nengeyiyo, enamandla nengenawo, eyinyaniso nebubuxoki, ecocekileyo nengcolileyo, ecacileyo nedidayo kuquka nengafaniyo nezinye. Ukuze abantu baneliseke baye baphanda ngenyaniso. Abo baye baphanda ngoYehova ukuze bafumane inyaniso baye bayifumana, kuba umdumisi uthi ‘nguThixo wenyaniso.’—INdumiso 31:5.

Igama elithi Yehova ngokoqobo lithetha ukuthi “Ubangela Kubekho.” (Genesis 2:4) Ngenxa yoko, intsingiselo yegama likaThixo yenza sazi ukuba nguMdali yaye isinceda sazi nenjongo yakhe. Eneneni, ukulazi nokulisebenzisa igama elithi Yehova yenye yezinto ezifanisa unqulo lokwenyaniso. UYesu wayeyiqonda ngokucacileyo loo nto. Ethetha ngabalandeli bakhe, wathi kuThixo emthandazweni: “Ndilazisile igama lakho kubo yaye ndiza kulazisa, ukuze uthando owandithanda ngalo lube kubo ndize nam ndimanyane nabo.”—Yohane 17:26.

Ethembele kubuhlobo awayenabo noThixo, umprofeti wamandulo ongumHebhere uYosefu, xa kwakufuneka etyhile intsingiselo yephupha, ezithembile wathi: “AsikokukaThixo na ukutolika?”—Genesis 40:8; 41:15, 16.

Kwiinkulungwane eziliqela kamva, uKumkani uNebhukadenetsare waseBhabhiloni wayenephupha yaye amadoda alumkileyo akhe akazange akwazi ukuchaza intsingiselo yalo. Umprofeti uDaniyeli wathi kukumkani: “Kukho uThixo emazulwini onguMtyhili weemfihlelo, yaye umazisile uKumkani uNebhukadenetsare okuya kwenzeka ekupheleni kwemihla.”—Daniyeli 2:28.

Umzekelo kaYosefu noDaniyeli ubonisa ukuba ubulumko nolwazi lukaThixo lufunyanwa kuphela ngabo bakhonza uYehova uThixo. Kakade ke, ukuze uThixo akholiswe sithi kusenokufuneka silahle iimbono esasinazo ngaphambili. AmaYuda enkulungwane yokuqala awaba ngamaKristu kwafuneka enze loo nto. Ekubeni ayekhule ehlonela yaye ethobela imithetho yenkqubo yezinto yamaYuda, kwathabath’ ixesha ukuze amkele uYesu njengoMesiya. UYesu wayezele ukuzalisekisa uMthetho kaMoses ‘owawusisithunzi sezinto ezilungileyo eziza kuza.’ (Hebhere 10:1; Mateyu 5:17; Luka 24:44, 45) Loo mthetho wathatyathelw’ indawo ‘ngumthetho kaKristu,’ owawungaphezulu kakhulu kunoMthetho kaMoses.—Galati 6:2; Roma 13:10; Yakobi 2:8.

Sonke siye sazalelwa ehlabathini elahlukanisiweyo noThixo. Ngenxa yesono esasizuza njengelifa kuAdam noEva, sizalwa sizintshaba zikaThixo, singenalwazi luchanileyo ngeenjongo zakhe. Kwakhona iintliziyo zethu zinenkohliso. (Yeremiya 17:9; Efese 2:12; 4:18; Kolose 1:21) Ukuze sibe ngabahlobo bakaThixo, sifanele sicinge ngendlela uThixo acinga ngayo. Ukwenjenjalo akulula.

Kusenokuba nzima ukwahlukana neengcamango okanye uqheliselo lonqulo lobuxoki, ngokukodwa ukuba sazifundiswa sisengabantwana. Kodwa ngaba kububulumko ukuqhubeka sikunqulo lobuxoki? Akunjalo! Ngokuqinisekileyo kububulumko ukutshintsha indlela esicinga ngayo ukuze uThixo akholiswe sithi.

Ukwazi Ijelo UThixo Asifundisa Ngalo

Sinokuncedwa phi ukuze siqonde iLizwi lenyaniso size siphile ngokuvisisana nalo? KuSirayeli wamandulo, wabeka abantu abathile abathembileyo nabanyanisekileyo ukuba bakhokele uhlanga. INkokeli yebandla lamaKristu namhlanje, uKristu, ngokufanayo ukhokela abo ngokunyanisekileyo baphanda ngenyaniso. Ukwenza oko ngabalandeli bakhe abathembileyo nabanyanisekileyo, abalijelo elinembopheleleko yokwalathisa nokukhusela abo bayifuna ngokunyanisekileyo inyaniso. (Mateyu 24:45-47; Kolose1:18) Kodwa umntu unokulazi njani ijelo uThixo alisebenzisayo ukusifundisa?

Abalandeli abanyanisekileyo bakaYesu Kristu benza unako-nako wokuxelisa iimpawu uYesu awayenazo ngoxa wayengumntu. Kweli hlabathi lizaliswe bubungendawo, kulula ukubabona aba balandeli, bahlukile kuba babonisa iimpawu zokomoya. (Bona ibhokisi ekwiphepha 6.) Ngaba ezi mpawu ziyaboniswa kwicawa olilungu layo okanye kwicawa yommelwane wakho? Kuya kuba kuhle ukuphanda ngalo mba uncedwa yiBhayibhile.

Siyakukhuthaza ukuba ukwenze oko ngokufunda iBhayibhile. Kunyaka odluleyo, ngokomlinganiselo, bangaphezu kwe-6 000 000 abantu kumazwe angama-235 abaye baxhamla kweli lungiselelo lokufunda iBhayibhile namaNgqina kaYehova. Ukufumana ubulumko nolwazi lukaThixo yinto eqhubekayo, eyanelisayo nevuzayo. Kutheni ungaqali ngoku ukufunda iBhayibhile ukuze ufumane ubulumko nolwazi lukaThixo. Akusoze uzisole ngokwenjenjalo. Ewe, sinako ukumazi uThixo!

[Ibhokisi ekwiphepha 6]

ABO BENZA IZINTO NGOKUVISISANA NOTHIXO . . .

abathabath’ icala kwiingxwabangxwaba zezopolitiko.—Isaya 2:4.

bavelisa iziqhamo ezihle ngokwenza ukuthanda kukaThixo.—Mateyu 7:13-23.

babonisa uthando olunyanisekileyo phakathi kwabo.—Yohane 13:35; 1 Yohane 4:20.

bamanyene.—Mika 2:12.

abaxelisi izimo zengqondo nehambo ephosakeleyo yehlabathi elibangqongileyo.—Yohane 17:16.

bashumayela ngenyaniso yaye benza abafundi.—Mateyu 24:14; 28:19, 20.

bayakuvuyela ukuhlanganisana ukuze bakhuthazane.—Hebhere 10:25.

badumisa uThixo ngokumanyeneyo emhlabeni wonke.—ISityhilelo 7:9, 10.

[Imifanekiso ekwiphepha 7]

Ulwazi ngoThixo silufumana singabantu ngabanye, iintsapho nasebandleni