Ukufumana Ubutyebi Obungokomoya EGuinea
KANGANGEENKULUNGWANE, abahloli bamazwe baye babeka ubomi babo esichengeni befun’ ubutyebi. Abo bakhaliphileyo baye bafika eGuinea, eNtshona Afrika, yaye baye bafumana iindidi ezimbini ezingafaniyo zobutyebi—obuphathekayo nobokomoya. Kweli lizwe limi kakuhle ngedayimani, igolide, intsimbi nodidi oluphambili lwebauxite (kwesi sinyithi kuphuma ialuminiyam), kuhlala abantu abangaphezu kwezigidi ezisithoba.
Nangona kungekho nkonzo zininzi zeNgqobhoko kweli lizwe, unqulo lubalulekile yaye abaninzi babuxabisa gqitha ubutyebi bokomoya. Buyintoni kanye kanye obu butyebi? Ngabakhonzi bakaYehova abathembekileyo, abachazwa kuHagayi 2:7 ngokuthi ‘zizinto ezinqwenelekayo zazo zonke iintlanga.’
Ubutyebi Bokomoya
Kungumgudu ukumba nzulu emhlabeni xa ufuna ubutyebi obufihliweyo. Ngokufanayo, kufuneka umgudu nenzondelelo kumaKristu ukuze afumane ubutyebi bokomoya. EGuinea, umsebenzi wokushumayela ngoBukumkani waqala kumbindi weli lizwe ebutsheni beminyaka yee-1950 waza wafikelela kwikomkhulu lalo, iConakry, ekuqaleni kweminyaka yee-1960. Sithethanje, kweli lizwe kukho amaNgqina kaYehova anokuba ngama-900 kumabandla nakumaqela angama-21.
Ngowe-1987 kwafika abavangeli basemazweni baza basebenza nebandla ekwakukuphela kwalo eConakry. Ngoku kukho abavangeli basemazweni abangaphezu kwama-20 kwikomkhulu lalapha nakwezinye iidolophu zalapho. Ngenzondelelo bomeleza amabandla yaye bashumayela nabazalwana basekuhlaleni.
ULuc, ohlala eConakry, wakuvuyela gqitha ukuqhuba isifundo seBhayibhile noAlbert, ugqirha oselula. UAlbert waya kwiicawa ezahlukahlukeneyo efuna inyaniso, yaye wayesebenzelana nemimoya. Wayefake intambo awayeyinikwe lixhwele lisithi uza kuba namathamsanqa. Edanile kuba engade alufumane unqulo lokwenyaniso, uAlbert wazilahla ezo ntambo waza wathandaza esithi: “Thixo, ukuba ukho, ndenze ndikwazi ukuze ndikukhonze. Kungenjalo, ndiza kuzenzel’ unothanda.” Kungekudala emva koko, uAlbert watyelela udadewabo emzini wakhe yaye waphulaphula elinye iNgqina likaYehova liqhuba isifundo seBhayibhile nomtshana wakhe. Kwangoko kwenziwa amalungiselelo okuba uLuc amqhubele isifundo seBhayibhile.
Veki nganye, uLuc wayekuvuyela ukuhamba iikhilomitha ezintlanu ukuya kuqhuba eso sifundo. Nangona uLuc wayengafundanga kuyaphi, uAlbert, owayenemfundo enomsila, wayechukumiseke gqitha lukholo awayenalo kwiZibhalo nayindlela awayelusebenzisa ngayo ulwazi analo lweBhayibhile. Wavuya gqitha uAlbert kukwazi ukuba asingoThixo ongunobangela wokubandezeleka kwabantu, kodwa kunoko, uYehova uzimisele ukukuphelisa konke ukubandezeleka aze enze lo mhlaba ube yiparadesi. (INdumiso 37:9-11) Wachukumiseka gqitha uAlbert kukwazi iinyaniso zeBhayibhile nakukubona indlela entle awayeziphethe ngayo amalungu ebandla.
Noko ke, kanye njengokuba ilitye ledayimani lifanele lisikwe ngumntu onobuchule ukuze likhazimle, naye uAlbert kwafuneka aphephe indlela yehlabathi yokuziphatha ukuze ubomi bakhe buvisisane nemilinganiselo kaThixo yobulungisa. Wayeka ukuya emagqirheni, ukunxila nokungcakaza. Kwakunzima gqitha kuAlbert ukuyeka ukutshaya. Xa ekugqibeleni wazingisa, ethandaza kuYehova ecela uncedo, wayeka ukutshaya. Kwiinyanga ezintandathu kamva, wawubhalisa ngokusemthethweni umtshato wakhe. Umfazi wakhe waqalisa ukufunda iBhayibhile. Kungokunje bobabini bangabakhonzi bakaYehova ababhaptiziweyo.
UMartin uyenye idayimani yokomoya. Waqalisa ukufunda iBhayibhile eGuéckédou xa wayeneminyaka eli-15 ubudala. Abazali bakhe ababengamaKatolika babengakuthandi ukuya kwakhe kwiintlanganiso zamaNgqina kaYehova. Bazitshisa iincwadi zikaMartin zokufunda iBhayibhile, bambetha baza bamgxotha ekhaya. Kanye njengokuba kuyileka idayimani xa ikharbon ifuthaniseleka ngaphantsi komhlaba, uthando lukaMartin ngeenyaniso azifunde eBhayibhileni lwakhula ngenxa yentshutshiso. Ekuhambeni kwexesha, intshutshiso evela kubazali bakhe yadamba, yaye wabuyela ekhaya. Kwabangelwa yintoni oko? Babona indlela awayehluke ngayo uMartin kubantakwabo ababeqalise ukuvukela nababeziphethe kakubi ngokwesini. Eyisekile kukuba uMartin uncedwe lunqulo lwakhe olutsha, uyise wawavumela amalungu ebandla ukuba eze emzini wakhe. Unina ubabulela ngokungazenzisiyo abazalwana ngokunceda unyana wakhe. UMartin wabhaptizwa eneminyaka eli-18 ubudala, emva koko waya kwiSikolo Sokuqeqesha Abalungiseleli yaye ngoku unguvulindlela okhethekileyo.
Ubutyebi Bokomoya Obuvela Kwamanye Amazwe
Ngoxa imveliso eninzi yaseGuinea ithunyelwa kwamanye amazwe, inxalenye yobutyebi bokomoya balapho “ivela” kwamanye amazwe. Abantu abaninzi abahlala apha bavela kwamanye amazwe aseAfrika, ngokuqhelekileyo ngenxa yemeko yezoqoqosho. Abanye babaleke kumazwe abo athwaxwe ziimfazwe kangangexesha elide.
UErnestine, osuka eCameroon, wafika eGuinea kwiminyaka eli-12 eyadlulayo. Ebeqhutyelwa isifundo ngamaNgqina kaYehova kangangeminyaka emininzi esiya nakwiintlanganiso, kodwa engade abhaptizwe. Wachiphiz’ iinyembezi xa wabona abanye bebhaptizwa kwindibano yesiphaluka yamaNgqina kaYehova ngowama-2003. Etyiwa sisazela, wathandaza kuYehova esithi: “Ngoku ndineminyaka engama-51 ubudala, yaye akukho nto intle ndikwenzele yona kude kube ngoku. Ndifuna ukukukhonza.” Emva komthandazo wakhe wokuthobeka, uErnestine wenza kanye loo nto. Waxelela umasihlalisane wakhe ukuba banokuhlala kunye kuphela emva kokuba betshate ngokusemthethweni. Le ndoda yavuma ukutshata naye, yaye kamva wayeneenyembezi zovuyo xa wayebhaptizwa ngoNovemba 2004.
Ukususela ekuqaleni kweminyaka yee-1990, kuye kwafika iimbacu ezininzi eGuinea zivela eLiberia naseSierra Leone, kuquka nezininzi ezingabakhonzi bakaYehova. Bakuba nje befikile kwinkampu yeembacu, abazalwana balungiselela ukuba kubekho iintlanganiso rhoqo, baqalisa umsebenzi wokushumayela, bakha neHolo yoBukumkani. Abanye abantu kule nkampu yeembacu baba ngabakhonzi bakaYehova. UIsaac ngomnye wabo. Emva kokuba ebhaptiziwe, uIsaac wabizwa kwinkampani enkulu awayesebenza kuyo eLiberia. Kodwa wakhetha ukuhlala kwinkampu yeembacu eLainé enguvulindlela othe ngxi. UIsaac uthi: “Ngoku andiceli kumqashi xa ndifuna ukuya ezintlanganisweni okanye endibanweni. Ndikhululekile ukuze ndikhonze uYehova.” NgoDisemba 2003, kwaqhutywa indibano yesithili kule nkampu isemagqagaleni, enamaNgqina ali-150 neembacu ezingama-30 000. Okuvuyisayo kukuba, kweza abantu abangama-591 kuquka abantu abazizithulu abasi-9 abafumana ucwangciso ngentetho yezandla. Kwabhaptizwa abantu abali-12. Abazalwana bawavuyela gqitha amalungiselelo enziwayo ukuze bafumane ukutya kokomoya okuyintabalala.
“Izinto Ezinqwenelekayo” Zenza Iinguqulelo Eziyimfuneko
Akukho nto ixab’ endleleni kubantu abafun’ igolide nedayimani. Noko ke, kuyavuyisa ukubona imigudu eyenziwa ngabantu abatsha ukuze boyise imiqobo, nto leyo eyenza bakwazi ukukhonza uYehova. Khawucinge ngemeko yentombazanana enguZainab.
Xa wayeneminyaka eli-13 ubudala, uZainab waba likhoboka. Wasiwa eGuinea esuka kwilizwe lakowabo eNtshona Afrika. Xa wayeneminyaka engama-20 ubudala, weva isigidimi seBhayibhile. Wayexhinile efuna ukusebenzisa oko wayekufunda.
Kwakunzima kuZainab ukuya kwiintlanganiso zamaKristu. Kodwa wayezixabisa ngokunzulu iintlanganiso kangokuba wayengafuni ukuphoswa zizo. (Hebhere 10:24, 25) Wayedla ngokuzifihla phandle iincwadi zakhe aze adlule ngazo xa ehamba esiya ezintlanganisweni. Ngezihlandlo ezininzi, wayebethelw’ ukubulawa ngabantu ababemthengile xa eye ezintlanganisweni ukuze ondliwe ngokomoya.
Kamva izinto zatshintsha yaye uZainab wakhululeka. Kwangoko waqalisa ukuya kuzo zonke iintlanganiso, nto leyo eyamnceda wenza inkqubela ekhawulezileyo ngokomoya. Akazange awamkele umsebenzi ohlawulayo owawuza kumenza angakwazi ukuya kwiintlanganiso zamaKristu ukuze afundiswe. Wabhalisa kwiSikolo Sobulungiseleli Sobuthixo, waba ngumvakalisi woBukumkani ongabhaptizwanga yaye kamva wafuzisela ukuzahlulela kwakhe kuYehova ngokubhaptizwa emanzini. Emva koko waba nguvulindlela ongumncedani. Kwiinyanga ezintandathu kamva wafaka isicelo sokuba nguvulindlela othe ngxi.
Emva kokuza kwiintlanganiso izihlandlo ezingephi, omnye umntu onomdla wathi: “Andiziva ndilihlwempu xa ndilapha.” Ngoxa abantu abaninzi befuna kuphela ubutyebi baseGuinea, abo bathanda uYehova baxakekile, bafuna ubutyebi bokomoya. Ewe, “izinto ezinqwenelekayo zazo zonke iintlanga” namhlanje ziguqukela kunqulo olunyulu lukaYehova!
[Ibhokisi ekwiphepha 8]
EGUINEA - 2005
Incopho yamaNgqina: 883
Izifundo zeBhayibhile: 1 710
Abantu abebezile eSikhumbuzweni: 3 255
[Iimaphu ezikwiphepha 8]
(Ukuba ufuna inkcazelo ehlahlelwe kakuhle, yiya kwimpapasho)
GUINEA
Conakry
SIERRA LEONE
LIBERIA
[Umfanekiso okwiphepha 9]
UAlbert noLuc
[Umfanekiso okwiphepha 9]
IHolo yoBukumkani eConakry
[Umfanekiso okwiphepha 10]
UErnestine
[Umfanekiso okwiphepha 10]
UMartin
[Umfanekiso okwiphepha 10]
UZainab
[Inkcazelo Ngomfanekiso okwiphepha 8]
EUSAID