Isikolo Sabo Banceda Abantu Ehlabathini Lonke

KUMABANDLA amaNgqina kaYehova angaphezu kwama-98 000 kumazwe angaphezu kwama-200, abantu bazo zonke iintlobo bafundiswa nguThixo. Eyona ncwadi isetyenziswayo yiBhayibhile, ibe injongo yale mfundo kukunceda abantu benze inkqubela ngokomoya ngokufunda eyona nto kuyiyo ukuthanda kukaThixo nendlela yokuphila ngokuvisisana nako. Abo bayamkelayo le mfundiso bangenelwa gqitha. Oko bakufundayo bakuxelela abanye, bethobela umyalelo kaYesu Kristu wokwenza abafundi.—Mateyu 28:19, 20.

Ukongezelela kucwangciso lokufundisa kumabandla awo, amaNgqina kaYehova aye aseka izikolo ezininzi ezikhethekileyo. Esinye sazo siSikolo Sokuqeqesha Abalungiseleli. Saqaliswa ngo-Oktobha 1987 ePittsburgh, ePennsylvania, eUnited States. Iklasi yokuqala yayinabafundi abangama-24 abathetha isiNgesi. Ukususela ngoko siye saqhutywa ngeelwimi ezingama-21 kumazwe angama-43. Ukuza kuthi ga ngoku, kwesi sikolo kuye kwafundiswa abadala abangatshatanga nezicaka zolungiselelo ezivela kumazwe angaphezu kwama-90. Emva kokugqiba izifundo zeeveki ezisibhozo, abaphumeleleyo bathunyelwa apho kukho imfuneko yabavakalisi, kwilizwe labo okanye kwelinye ilizwe. Ekupheleni kowama-2005, bekusele kukho abalungiseleli abangamaKristu abangaphezu kwama-22 000 abaphumelele kwesi sikolo. Ukuzibhokoxa kwabo ngokuthobeka ukuze bahambisele phambili izilangazelelo zoBukumkani nokunceda abanye kuye kwasikelelwa gqitha.—IMizekeliso 10:22; 1 Petros 5:5.

Amalungiselelo Okuya Kwesi Sikolo

Ukuze ikwazi ukuya kwiSikolo Sokuqeqesha Abalungiseleli, inkoliso yabafundi kuye kufuneke icele emsebenzini. Maxa wambi oku kuba yingxaki. EHawaii, amadoda amabini angamaKristu awayemenyelwe kwesi sikolo kwafuneka acele ukungabikho kumsebenzi wawo wobutitshala. Ekholose ngoYehova, afaka izicelo zawo, echaza nesizathu sokuba efuna ukuya nendlela aza kungenelwa ngayo. Omabini avunyelwa ukuba aye.

Kwiimeko ezininzi, amaNgqina acela ukungabikho emsebenzini adla ngokuxelelwa ukuba aza kuphelelwa ngumsebenzi. Adla ngokukhetha ukufumana uqeqesho kwintlangano kaYehova nakuba oko kuthetha ukulahlekelwa yimisebenzi yawo. Abanye badla ngokuphinda bacelwe ngabaqeshi babo ukuba babuyele emsebenzini ukubuya kwabo esikolweni. Ngamafutshane, oko kuzimisela kwabo ukuya esikolweni kunokuchazwa ngale ndlela: Faka isicelo sokungabikho kumqeshi wakho, uthandaze kuYehova ucele uncedo uze emva koko uyekele izinto ezandleni zakhe.—INdumiso 37:5.

‘Ukufundiswa NguYehova’

Kwesi sikolo seeveki ezisibhozo kufundwa iBhayibhile ngokucokisekileyo. Abafundi bafunda indlela abantu bakaYehova abalungelelaniselwa ngayo ukwenza ukuthanda kukaThixo nabanokuyisebenzisa ngokuphumelela ngakumbi ngayo iBhayibhile entsimini, kwiintlanganiso zebandla nakwiindibano.

Omnye umfundi owaphumelela kwesi sikolo wabhalela omnye owayeseza kuya kuso wathi: “Ndikholelwe xa ndisithi, uza kufumana eyona mfundo isemagqabini. Uza kubona ukuba yinyaniso kwesibhalo esithi ‘sifundiswa nguYehova.’ Konke oku kuya kuxonxa, kusulungekise intliziyo nobuntu bakho ukuze ulandele umzekelo kaKristu Yesu. Uza kufumana awona mava abalaseleyo ebomini.”—Isaya 54:13.

Abavangeli, Abelusi Nabafundisi

Okwangoku, abaphumelele kwiSikolo Sokuqeqesha Abalungiseleli basakhonza kumazwe ali-117. La mazwe aquka iziqithi ezikwiAtlantiki, iCaribbean nePasifiki namazwe amaninzi aneeofisi zamasebe amaNgqina kaYehova. La masebe athi uqeqesho olufunyanwa ngaba bafundi lubonakala kumsebenzi wabo wobuvangeli, owokwalusa nowokufundisa. Olu qeqesho lubanceda bayisebenzise ngempumelelo iBhayibhile entsimini. (2 Timoti 2:15) Xa bephendula imibuzo yabaninimzi, basebenzisa incwadi ethi Ukuqiqa NgeZibhaloa ibe baqeqesha abanye abavakalisi boBukumkani ukuba benjenjalo. Inzondelelo yabo iyabosulela abanye, ibe umsebenzi wabo womeleza amabandla.

Abadala bebandla banelungelo ‘lokwalusa umhlambi,’ benyamekela iintswelo zokomoya zabanye. (1 Petros 5:2, 3) Omnye umdala wathi ngokuphathelele eli lungiselelo: “Siyayixabisa into yokuba iofisi yesebe isithumelela aba bazalwana baqeqeshwe kakuhle ukuba basincede kulo msebenzi mkhulu wokwalusa umhlambi kaThixo.” Elinye isebe kwiMpuma Ekude lathi: “Abafundi abaphumelele kwesi sikolo banemfesane gqitha. Bayazibhokoxa ibe oko kubenza bahlonelwe libandla. Baziwa ngokuthobeka, ububele nenzondelelo ibe baxatyiswa gqitha ngenxa yoko. Bakulungele ukuzincama ibe ngovuyo bayakwazi ukufudukela kumabandla afuna abelusi.” (Filipi 2:4) La madoda alukhuthazo kubazalwana ibe afanele anconywe.—1 Korinte 16:18.

Ukongezelela koku, abahlohli besi sikolo banceda abafundi baphucule ubuchule babo njengezithethi zasesidlangalaleni. Ngokusebenzisa amacebiso neziluleko abazifumanayo, uninzi lwabo lunokukhawuleza lusetyenziswe kwiindibano zesiphaluka nezesithili. Omnye umveleli wesiphaluka waphawula ukuba aba bafundi banikela “iintetho ezisemagqabini baze baqiqe ngombandela.”—1 Timoti 4:13.

Kwelinye ilizwe laseAfrika emva kokuba kuqhutywe esi sikolo nabafundi bethunyelwe entsimini, indlela yokufundisa kwiintlanganiso zebandla yaphucuka gqitha. Abadala abavela kwesi sikolo baluncedo kumsebenzi wobuvangeli, wokwalusa nokufundisa, ngaloo ndlela besakha amabandla ngokomoya.—Efese 4:8, 11, 12.

Indlela Ephuculweyo Yokwalathisa Amabandla

Kwiindawo ezininzi, kufuneka abadala nezicaka zolungiselelo ezingakumbi. Amanye amabandla ebengayi kuba nabo abadala ukuba bekungathunyelwa umfundi ophumelele kwesi sikolo. Ngoko ke abafundi abaninzi bathunyelwa kwezo ndawo.

Amasebe amaninzi athi la madoda “alwazi kakuhle ulwalathiso lwentlangano,” “akazithabathi lula iimbopheleleko zawo,” “anceda abanye baqonde baze bahlonele intlangano kaYehova,” ibe “anceda amabandla akuwo athandane aze akheke ngokomoya.” Oku kubangelwa kukuba aba bafundi balandela oko kubhalwe kwiLizwi likaThixo ibe abakholosanga ngokwabo ukuqonda okanye babe zizilumko kumehlo abo. (IMizekeliso 3:5-7) La madoda aba zizipho zokomoya kumabandla athunyelwa kuwo.

Ukusebenza Kummandla Okwanti

Kwaba bafundi abanye bangoovulindlela abakhethekileyo ibe banceda amaqela akwanti abe ngamabandla. Echaza indlela aluxabisa ngayo uncedo abalufumeneyo, omnye umdala okummandla okwanti eGuatemala wathi: “Kangangeminyaka engama-20 ndandikhathazwa kukuba le ntsimi inkulu kangaka iza kunyanyekelwa njani. Ndandisoloko ndikuthandazela oku. Abazalwana abavela kwiSikolo Sokuqeqesha Abalungiseleli bazizithethi eziqeqeshwe kakuhle ibe bayazi kakuhle nendlela esebenza ngayo intlangano, ndibulela gqitha ukubona ukuba lo mmandla unyanyekelwa ngothando.”

Aba bafundi baye bafunda ukusebenza ngempumelelo kwimimandla apho kuye kufuneke bahambe imigama emide kwindawo ezineentaba ukuya kufikelela kwiilali eziqeleleneyo. Apho bafika bamisele amaqela akwanti, nokuba abanye abavakalisi abakhange bakwazi ukwenjenjalo. Ngokomzekelo, umdala waseNiger wacela ukuza kuncedwa ngabafundi abaphumeleleyo kuba wayevakalelwa kukuba banokwenza umsebenzi omhle kakhulu kwindawo ahlala kuyo. Kusenokuba lula ukuba amadoda angatshatanga abe ngoovulindlela abakhethekileyo nabaveleli besiphaluka kwiindawo ezikwanti. Njengompostile uPawulos, bajamelana ‘neengozi zemilambo, iingozi zezihange, iingozi entlango,’ izinto ezithile ezibakhathazayo, nokuxhalabela amabandla abakuwo.—2 Korinte 11:26-28.

Bayingenelo Kulutsha

IZibhalo zibongoza abaselula ukuba bakhumbule uMdali wabo. (INtshumayeli 12:1) Abafundi abaphumelele kwiSikolo Sokuqeqesha Abalungiseleli nabanenzondelelo bangumzekelo omhle kulutsha olungamaKristu. Emva kokuba kufike abafundi ababini kwelinye ibandla eUnited States, ixesha elichithwa ngabazalwana entsimini laphindaphindeka. Ukongezelela, inani loovulindlela abathe ngxi, okanye abavakalisi boBukumkani bexesha elizeleyo, landa ukususela kwaba-2 ukusa kwabali-11. Kuye kwenzeka into efanayo nakwamanye amabandla amaninzi.

Aba baphumeleleyo bakwakhuthaza amadoda aselula ukuba aye kwesi sikolo. Oku kuye kwakhuthaza abangekabi zizicaka zolungiselelo ukuba basukele elo lungelo. Isebe laseNetherlands libiza aba baphumelele kwesi sikolo ngokuthi “yimizekelo ephilayo yabafana abasacinga ngoko bamele bakwenze ngobomi babo.”

Ukukhonza Kumabandla Athetha Iilwimi Zasemzini

Kumazwe amaninzi, kwenziwa imigudu engakumbi yokushumayela iindaba ezilungileyo kubantu ngeelwimi zabo zomthonyama. Abafundi abaphumelele kwiSikolo Sokuqeqesha Abalungiseleli badla ngokufunda ezinye iilwimi baze baye kusebenza kwintsimi enabantu abaninzi abasuka kwezinye iindawo. Ngokomzekelo, eBelgium, kufuneka abavakalisi boBukumkani abanokushumayela kwabo bathetha ulwimi lwesiAlbania, lwesiPersi nesiRashiya.

Amabandla namaqela athetha iilwimi zasemzini eBritani, eItali, eJamani, eMexico naseUnited States, nakwamanye amazwe sele ezuza gqitha kubaveleli abahambahambayo, abadala nezicaka zolungiselelo eziphumelele kwesi sikolo. Isebe laseKorea lithi “abafundi abaphumelele kwesi sikolo abangaphezu kwama-200 baphumeza indima enkulu ekuncedeni amabandla namaqela athetha iilwimi zasemzini.”

Ukukhonza Ngokuthobeka Kwezinye Izabelo

Ukongezelela ekukhonzeni kumaqela namabandla athetha iilwimi zasemzini, abo baphumelele kwesi sikolo bangabadala, izicaka zolungiselelo nabaveleli abahambahambayo. Abanye bamkela izabelo kwamanye amazwe, maxa wambi basebenze kwiSebe Lenkonzo kwiofisi yesebe. Abo banobuchule bokwakha banokuncedisa ekwakhiweni kweeHolo zoBukumkani.

Ukwanda kwamabandla neziphaluka ehlabathini lonke kubonisa ukuba kusoloko kufuneka abaveleli abahambahambayo. Ukuze kwaneliswe le ntswelo, kuye kuqeqeshwe abafundi abathile abaphumelele kwesi sikolo kumsebenzi wokuhambahamba iiveki ezilishumi baze emva koko babe ngabaveleli besiphaluka ababambeleyo okanye abasisigxina. Bamalunga ne-1 300 ngoku kwaba bafundi abangabaveleli abahambahambayo kumazwe angama-97. Kwelinye ilizwe laseAfrika, abaveleli abahambahambayo abangama-55 ekhulwini baphumelele kwesi sikolo. Kwakwelinye apho eAfrika, bangama-70 ekhulwini.

EKhanada, kwiMpuma Ekude, eOstreliya, eUnited States naseYurophu, amakhulu abafundi abaphumelele kwesi sikolo baye bathunyelwa kwamanye amazwe ukuya kunceda kwiinkalo ezithile. Ngenxa yoko, esi sikolo siye sayingenelo ehlabathini lonke.

Esebenzisa uNyana wakhe, uYesu Kristu, uYehova uye wavelisa abavangeli, abelusi, abafundisi nabanye abahambisela phambili izilangazelelo zoBukumkani kule mihla yokugqibela. Ngaba likho ithemba lokuba abantu bakaThixo baseza kwanda? Ngokuqinisekileyo! Ngoko kusoloko kufuneka amadoda azahluleleyo azabalazele iimbopheleleko ezinkulu. (Isaya 60:22; 1 Timoti 3:1, 13) ISikolo Sokuqeqesha Abalungiseleli sinika abadala nezicaka zolungiselelo ithuba lokuba baphangalale kubulungiseleli babo, ukuze kungenelwe bona nabanye ehlabathini lonke.

[Umbhalo osemazantsi]

[Imifanekiso ekwiphepha 10]

ISikolo Sokuqeqesha Abalungiseleli sihambisela phambili izilangazelelo zoBukumkani ehlabathini lonke

[Imifanekiso ekwiphepha 13]

Ngaba unqwenela ukuba kwiSikolo Sokuqeqesha Abalungiseleli ukuze uncede abanye?