Imibuzo Evela Kubafundi

Intshumayeli yayithetha ukuthini xa isithi ifumene “indoda yanye kwabaliwaka” kodwa ayafumana nelinye “ibhinqa phakathi kwabo bonke aba”?—INtshumayeli 7:28.

Ukuze siwaqonde la mazwi aphefumlelweyo, simele sazi indlela uThixo abajonga ngayo abafazi. IBhayibhile ibhekisela kuRute umolokazana womhlolokazi uNahomi ngokuthi “ungumfazi obalaseleyo.” (Rute 3:11) Yona IMizekeliso 31:10 ithi, umfazi ofanelekileyo “ixabiso lakhe lingaphezulu lee kwelekorale.” Wayetheth’ ukuthini ke, uKumkani uSolomon wakwaSirayeli mandulo xa esithi: “Ndifumene indoda yokwenene yanye kwaliwaka, kodwa andafumana nalinye ibhinqa lokwenene”?—ngokwenguqulelo kaMoffatt.

Umongo wesi sibhalo ubonisa ukuba ngomhla kaSolomon amabhinqa amele ukuba ayenemilinganiselo yokuziphatha ephantsi. (INtshumayeli 7:26) Kusenokwenzeka ukuba oku kwabangelwa yimpembelelo yabafazi beentlanga ababenqula uBhahali. NoKumkani uSolomon wanikezela kwimpembelelo yegquba labafazi bakhe basemzini. IBhayibhile ithi, “Waba nabafazi abangamakhulu asixhenxe, amakhosazana, namashweshwe angamakhulu amathathu; kwaye abafazi bakhe bayityekisa intliziyo yakhe” waza wanqula oothixo bobuxoki. (1 Kumkani 11:1-4) Nawo amadoda ayenemilinganiselo ephantsi yokuziphatha—xa yayinye kuphela indoda elilungisa kwaliwaka, phantse kwakufana nokungathi ayikho. USolomon uqukumbela ngokuthi: “Koku kuphela endikufumeneyo, kukuba uThixo oyinyaniso walwenza uluntu lwathi tye, kodwa lusuke lona lwafuna amacebo amaninzi.” (INtshumayeli 7:29) Esi sisigqibo afikelela kuso ngoluntu luphela—kungekhona ukuthelekisa indoda nomfazi. Ngoko ke, amazwi akwiNtshumayeli 7:28 amele ajongwe njengabhekisela kwimeko yokuziphatha yabo bonke abantu bomhla kaSolomon.

Noko ke, ikho nenye into esenokuba ithethwa yile ndinyana. Kusenokwenzeka ukuba sisiprofeto, kuba alikho ibhinqa elakha lamthobela ngokupheleleyo uYehova. Kodwa yakha yakho indoda enjalo—uYesu Kristu.—Roma 5:15-17.

[Umfanekiso okwiphepha 31]

“Indoda yanye kwabaliwaka”