Ukuzithoba Kubelusi Abanothando
“Bathobeleni abo bakhokelayo phakathi kwenu nize nibalulamele.”—HEBHERE 13:17.
1, 2. Ziziphi izibhalo ezibonisa ukuba uYehova noYesu ngaBelusi abanothando?
UYEHOVA UTHIXO noNyana wakhe, uYesu Kristu, ngaBelusi abanothando. UIsaya waprofeta wathi: “Khangela! INkosi enguMongami uYehova iya kuza kanye njengowomeleleyo, yaye ingalo yayo iya kulawula. . . . Njengomalusi iya kuwalusa umhlambi wayo. Ngengalo yayo iya kuqokelela ndawonye amatakane; iya kuwathwala ngesifuba sayo. Ezo zanyisayo iya kuzikhaphela ngenyameko.”—Isaya 40:10, 11.
2 Eso siprofeto sokubuyiselwa kwezinto sazaliseka okokuqala xa intsalela yamaYuda yabuyela kwaYuda ngowama-537 B.C.E. (2 Kronike 36:22, 23) Saphinda sazaliseka xa intsalela yabathanjiswa yakhululwa “kwiBhabhiloni Enkulu” ngowe-1919 nguKoreshi Omkhulu, uYesu Kristu. (ISityhilelo 18:2; Isaya 44:28) ‘Uyingalo’ kaYehova yolawulo, eqokelela izimvu aze azaluse ngemfesane. UYesu wathi: “Ndingumalusi omhle, kwaye ndiyazazi izimvu zam nezimvu zam ziyandazi.”—Yohane 10:14.
3. UYehova uyibonisa njani inkxalabo ngendlela eziphathwa ngayo izimvu zakhe?
3 Isiprofeto esikuIsaya 40:10, 11 sibonisa indlela uYehova abathantamisa ngayo abantu bakhe. (INdumiso 23:1-6) Ngexesha lobulungiseleli bakhe emhlabeni, uYesu wayebathantamisa abafundi bakhe nabanye abantu. (Mateyu 11:28-30; Marko 6:34) UYehova noYesu babebathiyile abelusi okanye iinkokeli zakwaSirayeli ezazingenanceba kunoko zixhaphaza umhlambi. (Hezekile 34:2-10; Mateyu 23:3, 4, 15) UYehova wathembisa wathi: “Ndiya kuzisindisa izimvu zam, yaye azisayi kuba yinto yokuphangwa; kwaye ndiya kugweba phakathi kwemvu nemvu. Ndiya kuvelisa phezu kwazo umalusi omnye, yaye umele azondle, umkhonzi wam kanye uDavide. Yena uya kuzondla, kwaye yena uya kuba ngumalusi wazo.” (Hezekile 34:22, 23) Kweli xesha lesiphelo, uYesu Kristu, uDavide Omkhulu, ‘ngumalusi omnye’ uYehova aye wammisela phezu kwabo bonke abakhonzi bakhe abalapha emhlabeni, amaKristu athanjisiweyo nalawo ‘ezinye izimvu.’—Yohane 10:16.
Izipho Zasezulwini Kwibandla
4, 5. (a) Sisiphi isipho esixabisekileyo uYehova aye wasipha abantu bakhe abasemhlabeni? (b) Sisiphi isipho uYesu aye wasipha ibandla lakhe?
4 Ngokumisela “umalusi omnye” onguYesu Kristu kubakhonzi bakhe abasemhlabeni, uYehova walipha isipho esixabisekileyo ibandla lamaKristu. Esi sipho seNkokeli evela ezulwini kwaprofetwa ngaso kuIsaya 55:4 kwathiwa: “Khangelani! Ndimnike ukuba abe lingqina kumaqela eentlanga, inkokeli nomphathi wamaqela eentlanga.” AmaKristu athanjisiweyo namalungu “esihlwele esikhulu” aphuma kuwo onke amaqela eentlanga, izizwe, izizwana neelwimi. (ISityhilelo 5:9, 10; 7:9) Ayila ibandla lezizwe ngezizwe, “umhlambi omnye,” okhokelwa ‘ngumalusi omnye,’ uKristu Yesu.
5 Naye uYesu, uye walipha isipho esixabisekileyo ibandla lakhe elisemhlabeni. Ngaphantsi kwakhe uye wamisela abelusi abathembekileyo abaxelisa uYehova noYesu, besalusa umhlambi ngenyameko. Umpostile uPawulos wathetha ngesi sipho sixabisekileyo kwileta awayibhalela ibandla lase-Efese. Wathi: “‘Xa wenyukela phezulu wathabatha abathinjwa; wanikela izipho ezingabantu.’ . . . Bambi wabanika ukuba babe ngabapostile, bambi babe ngabaprofeti, bambi babe ngabavangeli, bambi babe ngabalusi nabafundisi, ngenjongo yokulungiswa kwabo bangcwele, ukwenzela umsebenzi wobulungiseleli, ukuze kwakhiwe umzimba kaKristu.”—Efese 4:8, 11, 12.
6. Bachazwa njani abaveleli abathanjisiweyo abakhonza kwiqumrhu labadala abachazwe kwiSityhilelo 1:16, 20, yaye kunokuthiwani ngabadala abamiselweyo bezinye izimvu?
6 Ezi ‘zipho zingabantu’ ngabaveleli, okanye abadala, abamiselwe nguYehova noNyana wakhe, ngomoya oyingcwele, ukuze bawaluse ngemfesane umhlambi. (IZenzo 20:28, 29) Ekuqaleni, bonke aba baveleli babengamaKristu athanjisiweyo. KwiSityhilelo 1:16, 20 abo bakhonza kumaqumrhu abadala kwibandla labathanjiswa bafuziselwa “zinkwenkwezi’’ okanye ‘iingelosi’ ezikwisandla sasekunene sikaKristu. Noko ke, kweli xesha lesiphelo, inani labathanjiswa abalapha emhlabeni liya lincipha, inkoliso yabadala abangamaKristu emabandleni ngabezinye izimvu. Ekubeni bemiselwa ngabameli beQumrhu Elilawulayo ngaphantsi kolwalathiso lomoya oyingcwele, nabo kunokuthiwa bakwisandla sasekunene (okanye, bangaphantsi kolwalathiso) loMalusi Olungileyo, uYesu Kristu. (Isaya 61:5, 6) Ekubeni abadala abakumabandla ethu bethobela uKristu, oyiNtloko yebandla, sifanele sisebenzisane ngokupheleleyo nabo.—Kolose 1:18.
Ukuthobela Nokululama
7. Sisiphi isiluleko esanikelwa ngumpostile uPawulos mayela nesimo sengqondo sethu kabaveleli abangamaKristu?
7 ABelusi bethu basezulwini uYehova uThixo, noYesu Kristu, balindele ukuba sibathobele size sibalulamele abelusi abasebenza ngaphantsi kwabo abaye babamisela ebandleni. (1 Petros 5:5) Ephefumlelwe, umpostile uPawulos wabhala wathi: “Bakhumbuleni abo bakhokelayo phakathi kwenu, abaye bathetha ilizwi likaThixo kuni, yaye njengoko nisondela impumelelo yehambo yabo xelisani ukholo lwabo. Bathobeleni abo bakhokelayo phakathi kwenu nize nibalulamele, kuba bahlala beyilindile imiphefumlo yenu njengabo baya kuphendula; ukuze bakwenze oku ngovuyo kungekhona ngokuncwina, kuba oko kungenza umonakalo kuni.”—Hebhere 13:7, 17.
8. Yintoni uPawulos asimema ukuba “sicamngce’’ ngayo yaye sifanele ‘sithobele’ njani?
8 Phawula ukuba uPawulos usimema ukuba “sicamngce,” okanye sondele, imiphumo yehambo yokuthembeka yabadala size silandele imizekelo yokholo lwabo. Ukongezelela, usicebisa ukuba siluthobele size silululamele ulwalathiso lwabo. Umphengululi weBhayibhie uR. T. France uthi igama lesiGrike santlandlolo, eliguqulelwe ngokuthi “thobelani” “asilogama nje elidla ngokusetyenziswa xa kuthethwa ngokuthobela, kunoko lithetha ‘ukweyiselwa,’ libonisa ukwamkela ukhokelo lwabo.” Abadala asibathobeli kuphela ngenxa yokuba iLizwi likaThixo lisiyalela ukuba senjenjalo kodwa ngenxa yokuba banezilangazelelo zoBukumkani nezokungenelwa kwethu. Ngokuqinisekileyo siya konwaba ukuba siyavuma ukuthobela ukhokelo lwabo.
9. Kutheni sifanele “silulame” ukongezelela ekuthobeleni?
9 Kuthekani ukuba kwimeko ethile, asiqinisekanga ukuba ulwalathiso lwabadala yeyona ndlela ifanelekileyo yokwenza izinto? Kufuneka xa kulapho ke ukululama. Kulula ukuthobela xa yonke into icacile yaye siyavumelana nayo, kodwa siya kubonisa ukuba silulame ngokwenene xa sithobela nangona singaluqondi kakuhle ulwalathiso olunikelwayo. UPetros, owaba ngumpostile kamva, wabonisa olu hlobo lokululama.—Luka 5:4, 5.
Izizathu Ezine Zokusebenzisana Nabo
10, 11. Yiyiphi indlela abaveleli ‘abaye bathetha ngayo ilizwi likaThixo’ kwamanye amaKristu ngenkulungwane yokuqala nanamhlanje?
10 KweyamaHebhere 13:7, 17, ecatshulwe ngasentla, umpostile uPawulos uchaza izizathu ezine zokuba sifanele sibathobele size sibalulamele abaveleli abangamaKristu. Esokuqala kukuba ‘baye balithetha ilizwi likaThixo kuthi.’ Khumbula ukuba “izipho ezingabantu” uYesu azipha amabandla zezokuba ‘kulungiswe abo bangcwele.’ (Efese 4:11, 12) UYesu walungisa indlela yokucinga nokuziphatha kwamaKristu enkulungwane yokuqala esebenzisa aba belusi bathembekileyo baphantsi kwakhe, abanye babo abaphefumlelwa ukuba babhale iincwadi eziya emabandleni. Wasebenzisa abo baveleli bathanjiswe ngomoya ukuze alathise aze akhe amaKristu enkulungwane yokuqala.—1 Korinte 16:15-18; 2 Timoti 2:2; Tito 1:5.
11 Namhlanje, uYesu usalathisa ‘ngekhoboka elithembekileyo neliyingqondi,’ elimelwa liQumrhu Elilawulayo nabadala abamiselweyo. (Mateyu 24:45) Ekubeni sihlonela ‘umalusi oyintloko,’ uYesu Kristu, sithobela isiluleko sikaPawulos esithi: “Nibahlonele abo basebenza nzima phakathi kwethu, abanongamelayo eNkosini, abanilulekayo.”—1 Petros 5:4; 1 Tesalonika 5:12; 1 Timoti 5:17.
12. Abaveleli ‘bahlala beyilinde njani imiphefumlo yethu’?
12 Isizathu sesibini sokuba sisebenzisane nabaveleli abangamaKristu kukuba “bahlala beyilindile imiphefumlo [yethu].” Xa befumanisa ukuba kukho into ethile kwisimo sengqondo sethu okanye kwindlela esiziphethe ngayo enokusenzakalisa ngokomoya, bakhawuleza basiluleke ngenjongo yokusibuyisa. (Galati 6:1) Igama lesiGrike eliguqulelwe ngokuthi “bahlala beyilindile” ngokoqobo lithetha “ukuthi qwa ungalali.” Ngokutsho komnye umphengululi weBhayibhile, “lithetha umlindi ohlala ephaphamile.” Ukongezelela ekusincedeni sihlale siphaphile ngokomoya, abadala basenokungalali kuba bexhalabele imeko yethu yokomoya. Ngaba asifanele sisebenzisane nabadala abanothando ngaloo ndlela, abenza unako nako ukuxelisa imfesane eboniswa nguYesu Kristu, “umalusi omkhulu wezimvu”?—Hebhere 13:20.
13. Ziziphi iindlela abaveleli nawo onke amaKristu afanele aphendule ngazo yaye ephendula kubani?
13 Isizathu sesithathu sokusebenzisana nabaveleli kukuba bahlala besilindile “njengabo baya kuphendula.” Abaveleli bayakhumbula ukuba bangabelusi abasebenza phantsi, kwaBelusi basezulwini, uYehova uThixo noYesu Kristu. (Hezekile 34:22-24) UYehova nguMnini-zimvu, ‘awazithenga ngegazi lowakhe uNyana,’ kwaye uyabaphendulisa abaveleli ngendlela abawuphatha ngayo umhlambi wakhe, ofanele uphathwe “ngemfesane.” (IZenzo 20:28, 29) Ngenxa yoko, sonke sifanele siphendule kuYehova ngendlela esisabela ngayo kulwalathiso lwakhe. (Roma 14:10-12) Ukuthobela kwethu abadala abamiselweyo kubonisa ukuba sithobela uKristu, iNtloko yebandla.—Kolose 2:19.
14. Yintoni enokwenza abaveleli baphendule ‘bencwina,’ yaye ibiya kuba njani imiphumo yoko?
14 UPawulos wachaza isizathu sesine sokuba sifanele sithobele abaveleli abangaKristu. Wathi: “Ukuze bakwenze oku ngovuyo kungekhona ngokuncwina, kuba oko kungenza umonakalo kuni.” (Hebhere 13:17) Ekubeni beneembopheleleko ezinzulu zokufundisa, zokwalusa, nokukhokela kumsebenzi wokushumayela, ukukhulisa abantwana babo, nokulungisa iingxaki zebandla, abadala banomthwalo onzima. (2 Korinte 11:28, 29) Ukuba asisebenzisani nabo, sandisa umthwalo wabo. Oku bekuya kubenza ‘bancwine.’ Ukungasebenzisani kwethu nabo bekungayi kumkholisa uYehova ibe oko bekuya kubangela umonakalo kuthi. Kodwa, xa sinentlonelo efanelekileyo nentsebenziswano, abadala banokuwenza bevuya umsebenzi wabo, yaye oko kuphumela kumanyano nasekuwenzeni ngovuyo umsebenzi wokushumayela ngoBukumkani.—Roma 15:5, 6.
Indlela Esinokubonisa Ngayo Ukululama
15. Yiyiphi indlela esinokubonisa ngayo ukuthobela nokululama kwethu?
15 Zininzi iindlela esinokusebenzisana ngazo nabaveleli abamiselweyo. Benenjongo yokuvumelana neemeko ezintsha kwintsimi yethu, ngaba abadala baye balungiselela ukuba kuqhutywe iintlanganiso zenkonzo yasentsimini ngamaxesha aza kufuna ukuba sitshintshe ucwangciso lwethu maxa wambi? Masenze umgudu ukuze siwaxhase la malungiselelo matsha. Sisenokusikelelwa ngendlela esingakhange siyicinge. Ngaba umveleli wenkonzo uza kutyelela kwiSifundo Sencwadi Sebandla sethu? Masibe nesabelo ngokuzeleyo kangangoko kunokwenzeka kumsebenzi wokushumayela kuloo veki. Ngaba siye safumana isabelo kwiSikolo Sobulungiseleli Sobuthixo? Simele siqiniseke ukuba sibakho ukuze sisenze eso sabelo. Ngaba umveleli weSifundo Sencwadi Sebandla uye wenza isaziso sokuba iqela lethu lilo eliza kucoca iHolo yoBukumkani? Masimxhase ngokupheleleyo, ngokwamandla nempilo yethu. Ngezi ndlela nezinye, sibonisa ukuba siyawathobela amadoda amiselwe nguYehova noNyana wakhe ukuba anyamekele umhlambi.
16. Ukuba umdala akazenzi ngendlela ekwalathiswa ngayo izinto, kutheni eso ingesosizathu sokuba sivukele?
16 Maxa wambi, umdala usenokungenzi izinto ngendlela elalathisa ngayo ikhoboka elithembekileyo neQumrhu Elilawulayo. Ukuba uyaqhubeka esenza izinto ngaloo ndlela, kuya kufuneka aphendule kuYehova, “umalusi nomveleli wemiphefumlo [yethu].” (1 Petros 2:25) Kodwa nakuphi na ukusilela kwabadala abathile akusosizathu sokuba sivukele. UYehova akakusikeleli ukungathobeli nemvukelo.—Numeri 12:1, 2, 9-11.
UYehova Uyawusikelela Umoya Wentsebenziswano
17. Simele sibe njani isimo sengqondo sethu ngabaveleli bethu?
17 UYehova uThixo uyazi ukuba amadoda awamisele njengabaveleli akafezekanga. Nakuba enjalo uyawasebenzisa, kwaye ngomoya wakhe uyabalusa abantu bakhe abasemhlabeni. Inyaniso kukuba sonke, thina nabadala sincedwa ‘ngamandla angaphaya koko kuqhelekileyo [kaThixo] kungekhona awethu.’ (2 Korinte 4:7) Sifanele simbulele uYehova ngoko akufezayo esebenzisa abaveleli abathembekileyo, yaye simele sisebenzisane nabo.
18. Yintoni kanye esiyenzayo xa sithobela abaveleli bethu?
18 Abaveleli benza unako nako ukuze baphile ngokuvisisana nendlela abachaza ngayo uYehova abelusi abamisele phezu komhlambi wakhe kule mihla yokugqibela, njengokuba kuchazwe kuYeremiya 3:15: “Ndiza kuninika abalusi ngokuvumelana nentliziyo yam, kwaye ngokuqinisekileyo baya kunondla ngolwazi nangengqiqo.” Ngokuqinisekileyo abadala abaphakathi kwethu benza umsebenzi omhle wokufundisa nokukhusela izimvu zikaYehova. Ngamana singaqhubeka sibonisa uxabiso ngokuzibhokoxa kwabo ngokusebenzisana nabo, sibathobele yaye sibalulamele. Xa sisenjenjalo, siya kubonisa ukuba siyabaxabisa aBelusi bethu basezulwini uYehova uThixo noYesu Kristu.
Imibuzo Yempinda
• UYehova noYesu Kristu bazibonise njani ukuba bangaBelusi abanothando?
• Ukongezelela ekuthobekeni kutheni kubalulekile nje ukuba silulame?
• Ziziphi iindlela esinokubonisa ngazo ukuba silulamile?
[Umfanekiso okwiphepha 27]
Abadala abangamaKrisu bathobela ubunkokeli bukaKristu
[Imifanekiso ekwiphepha 29]
Zininzi iindlela zokubonisa ukuba siyabathobela abelusi abamiselwe nguYehova