Ngaba Uya ‘Kuqhubeka Uhamba Ngokomoya’?
“Ukuba niqhubeka nihamba ngokomoya anisayi kulawulwa yiminqweno yenyama konke konke.”—GALATI 5:16.
1. Linokupheliswa njani ixhala lokona umoya?
IKHO indlela onokuliphelisa ngayo ixhala lokuba wone umoya oyingcwele kaYehova. Kukwenza oko kwathethwa ngumpostile uPawulos esithi: “Ukuba niqhubeka nihamba ngokomoya anisayi kulawulwa yiminqweno yenyama konke konke.” (Galati 5:16) Ukuba sivumela umoya kaThixo usikhokele, asiyi koyiswa yiminqweno yenyama engafanelekanga.—Roma 8:2-10.
2, 3. Ukuqhubeka sihamba ngokomoya kuya kuba naziphi iingenelo kuthi?
2 Njengoko ‘siqhubeka sihamba ngokomoya,’ amandla kaThixo asebenzayo aya kusibangela ukuba sithobele uYehova. Siya kubonisa iimpawu zobuthixo kubulungiseleli bethu, ebandleni, ekhaya nakwezinye iindawo. Isiqhamo somoya siya kubonakala kwindlela esiwaphatha ngayo amaqabane ethu omtshato, abantwana bethu, abantu esikholwa nabo, kunye nabanye.
3 Ukuba ‘siphilile emoyeni ngokwembono kaThixo’ siya kuyeka ukwenza izono. (1 Petros 4:1-6) Ukuba siphenjelelwa ngumoya, ngokuqinisekileyo asiyi kwenza sono singenakuxoleleka. Kodwa ziziphi ezinye iingenelo esiya kuzifumana ukuba siqhubeka sihamba ngokomoya?
Hlala Usondele KuThixo NoKristu
4, 5. Ukuhamba ngokomoya kuyichaphazela njani indlela esimjonga ngayo uYesu?
4 Ngenxa yokuba sihamba ngomoya oyingcwele, sihlala sinolwalamano olusondeleyo noThixo noNyana wakhe. Ebhala ngezipho zokomoya, uPawulos waxelela abantu baseKorinte ababekholwa kunye naye oku: “Yiqondeni [nina enanifudula ninqula izithixo] into yokuba akukho bani uthetha ngokuqhutywa ngumoya kaThixo unokuthi: ‘UYesu uqalekisiwe!’ yaye kungekho bani unokuthi: ‘UYesu uyiNkosi!’ engaqhutywa ngumoya oyingcwele.” (1 Korinte 12:1-3) Nawuphi na umoya obangela ukuba abantu baqalekise uYesu, ngokaSathana uMtyholi. Ngoko, ekubeni singamaKristu ahamba ngomoya oyingcwele, seyisekile kukuba uYehova wamvusa uYesu kwelabafileyo waza wamenza mkhulu kunazo zonke ezinye izidalwa. (Filipi 2:5-11) Sinokholo kwidini lentlawulelo likaKristu yaye uYesu simamkela njengeNkosi esiyimiselwe nguThixo.
5 Abanye ababezibiza ngokuba ngamaKristu kwinkulungwane yokuqala basikhanyela isibakala sokuba uYesu weza esenyameni. (2 Yohane 7-11) Oko kwabangela ukuba abanye bazikhanyele iimfundiso zokwenyaniso ezingoYesu uMesiya. (Marko 1:9-11; Yohane 1:1, 14) Ukuhamba ngomoya oyingcwele kuyasinceda singanikezeli kuwexuko olunjalo. Kodwa ukuba sihlala siziphaphele izinto zokomoya, siya kuqhubeka sifumana ububele bukaYehova obungasifanelanga size ‘sihambe enyanisweni.’ (3 Yohane 3, 4) Ngoko ke, masizimisele ukulugatya lonke uwexuko ukuze sihlale sinolwalamano oluluqilima noBawo wethu osezulwini.
6. Ziziphi iimpawu eziveliswa ngumoya kaThixo kwabo bahamba ngokomoya?
6 UPawulos wadwelisa unqulo-zithixo namahlelo abawexuki kunye ‘nemisebenzi yenyama’ efana nohenyuzo nehambo evakalala. Kodwa wathi: “Abo ke bangabakaKristu Yesu bayibethelele inyama kunye neenkanuko neminqweno yayo. Ukuba siphila ngomoya, masihambe ngokulungeleleneyo kwangomoya.” (Galati 5:19-21, 24, 25) Ziziphi iimpawu eziveliswa ngamandla kaThixo asebenzayo kwabo baphila baze bahambe ngokomoya? UPawulos wabhala wenjenje: “Isiqhamo somoya luthando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa.” (Galati 5:22, 23) Makhe siqwalasele ezi nkalo zesiqhamo somoya.
‘Sithandane’
7. Luyintoni uthando, yaye ziziphi ezinye iimpawu zalo?
7 Uthando yenye indlela esibonakala ngayo isiqhamo somoya yaye lubonakala ngokuba nomsa onzulu ngabanye, ukubaxhalabela ngokungazingci, nokuba nolwalamano olusondeleyo kunye nabo. IZibhalo zithi “uThixo uluthando” ngenxa yokuba ungumthombo wothando. Indlela uThixo noNyana wakhe abaluthanda kakhulu ngayo uluntu ibonakaliswe kwidini lentlawulelo likaYesu Kristu. (1 Yohane 4:8; Yohane 3:16; 15:13; Roma 5:8) Njengabalandeli bakaYesu, saziwa ngendlela esithandana ngayo. (Yohane 13:34, 35) Phofu ke, siyalelwe ukuba ‘sithandane.’ (1 Yohane 3:23) UPawulos uthi uthando luzeka kade umsindo yaye lunobubele. Alunamona, alukhukhumali, aluziphathi ngokungandilisekanga, yaye alufuni ezalo izilangazelelo. Uthando alucaphuki yaye alunanzondo. Luvuyisana nenyaniso, alubi nemihlali ngentswela-bulungisa. Uthando luthwala, lukholelwa, luthemba yaye lunyamezela izinto zonke. Ngaphezu kwako konke, aluze lutshitshe.—1 Korinte 13:4-8.
8. Kutheni sifanele sibathande abo sikhonza nabo uYehova?
8 Ukuba sivumela umoya kaThixo uvelise uthando kuthi, luya kuhlala lubonakala kulwalamano esinalo noThixo kunye nommelwane. (Mateyu 22:37-39) Umpostile uYohane wabhala wenjenje: “Lowo ungenaluthando uhleli ekufeni. Lowo umthiyileyo umzalwana wakhe usisibulala-mntu, yaye niyazi ukuba akukho sibulala-mntu sinobomi obungunaphakade obuhleliyo kuso.” (1 Yohane 3:14, 15) Isibulala-mntu sasikhuselwa kwindawo yokusabela ekwisixeko sakwaSirayeli kuphela xa singabulalanga ngenxa yentiyo. (Duteronomi 19:4, 11-13) Ukuba sikhokelwa ngumoya oyingcwele, siya kumthanda uThixo, abo sikhonza nabo kunye nabanye.
“Uvuyo LukaYehova Ligwiba Lenu”
9, 10. Luyintoni uvuyo, yaye ziziphi ezinye izizathu esinazo zokuvuya?
9 Ukuvuya kuthetha ukuba wonwabe ngokwenene. UYehova ‘nguThixo onoyolo.’ (1 Timoti 1:11; INdumiso 104:31) UNyana uyayoliswa kukwenza ukuthanda kukaYise. (INdumiso 40:8; Hebhere 10:7-9) Yaye “uvuyo lukaYehova ligwiba” lethu.—Nehemiya 8:10.
10 Uvuyo esilunikwe nguThixo lusenza sonwabe xa sisenza ukuthanda kwakhe kwanaxa sisiva ubunzima, iintlungu, okanye sitshutshiswa. Hayi indlela okusonwabisa ngayo ‘ukwazi uThixo’! (IMizekeliso 2:1-5) Ulwalamano lwethu noThixo lusekelwe ekumazini ngendlela echanileyo nokuba nokholo kuye nakwidini lentlawulelo likaYesu. (1 Yohane 2:1, 2) Enye into ebangela ukuba sivuye kukuba yinxalenye yokuphela kobuzalwana bokwenyaniso bazwenibanzi. (Zefaniya 3:9; Hagayi 2:7) Sivuyiswa lithemba esinalo loBukumkani nelungelo elizukileyo lokuvakalisa iindaba ezilungileyo. (Mateyu 6:9, 10; 24:14) Kwakhona sivuyiswa lithemba lobomi obungunaphakade. (Yohane 17:3) Ekubeni sinelo themba limangalisayo, sifanele ‘sizaliswe luvuyo kuphela.’—Duteronomi 16:15.
Yiba Noxolo Yaye Uzeke Kade Umsindo
11, 12. (a) Unokuluchaza njani uxolo? (b) Yintoni oluyenzayo uxolo lukaThixo kuthi?
11 Uxolo—enye inkalo yesiqhamo somoya—kukuzola kungekho nto ikuphazamisayo. UBawo wethu osemazulwini nguThixo woxolo, yaye siqinisekiswa ngala mazwi: “UYehova uya kubasikelela ngoxolo abantu bakhe.” (INdumiso 29:11; 1 Korinte 14:33) UYesu wabaxelela oku abafundi bakhe: “Ndinishiyela uxolo, ndininika uxolo lwam.” (Yohane 14:27) Oko kwakuza kubanceda njani abalandeli bakhe?
12 UYesu wanika abalandeli bakhe uxolo olwazolisa iintliziyo neengqondo zabo, lwaza lwaphelisa uloyiko ababenalo. Baba noxolo ngokukhethekileyo xa befumana umoya oyingcwele ababewuthenjisiwe. (Yohane 14:26) Ngenxa yempembelelo yomoya nokuphendulwa kwemithandazo yethu namhlanje, sinandipha “uxolo lukaThixo” olungenakuthelekiswa nanto, olwenza iintliziyo neengqondo zethu zizole. (Filipi 4:6, 7) Ngaphezu koko, umoya kaYehova usinceda sizole size sibe noxolo nabo sikhonza nabo kunye nabanye.—Roma 12:18; 1 Tesalonika 5:13.
13, 14. Kuyintoni ukuzeka kade umsindo, yaye kutheni sifanele sibe nako?
13 Ukuzeka kade umsindo kunxulunyaniswa nokuba noxolo, kuba kukunyamezela ngomonde xa sicatshukiswa okanye soniwe sinethemba lokuba kuza kulunga. UThixo uzeka kade umsindo. (Roma 9:22-24) NoYesu unalo olu phawu. Sinokungenelwa kwindlela uYesu awalubonakalisa ngayo, kuba uPawulos wabhala: “Isizathu sokuba ndenzelwe inceba sasikukuba njengoko imeko yam yayibalasele uKristu Yesu abonakalise ngam konke ukuzeka kade umsindo kwakhe, ndibe ngumzekelo kwabo baza kukholwa kuye ukuze bazuze ubomi obungunaphakade.”—1 Timoti 1:16.
14 Ukuzeka kade umsindo kusinceda sikwazi ukunyamezela xa abanye bethetha okanye besenza izinto esingazithandiyo. UPawulos wabongoza amaKristu awayekhonza nawo esithi: “Nizeke kade umsindo kubo bonke.” (1 Tesalonika 5:14) Ekubeni sonke singafezekanga yaye sisenza iimpazamo, ngokuqinisekileyo sifuna abantu babe nomonde kuthi, bazeke kade umsindo xa sibaphatha ngendlela engafanelekanga. Ngoko ke masizabalazele ‘ukuzeka kade umsindo sinovuyo.’—Kolose 1:9-12.
Yiba Nobubele Nokulunga
15. Chaza ububele, uze uchaze imizekelo yabantu abanobubele.
15 Ububele bubonakala xa sibonisa umdla kwabanye ngamazwi nangezenzo zobuhlobo. UYehova unobubele, kukwanjalo nangoNyana wakhe. (Roma 2:4; 2 Korinte 10:1) Umkhonzi kaThixo noKristu umele abe nobubele. (Mika 6:8; Kolose 3:12) Kwanabantu abangenalo ulwalamano noThixo baba ‘nobuntu obungaqhelekanga.’ (IZenzo 27:3; 28:2) Ngokuqinisekileyo ke ngoko, sinokuba nabo ububele ukuba ‘siqhubeka sihamba ngokomoya.’
16. Ziziphi ezinye iimeko esifanele sibonise ububele kuzo?
16 Ububele bunokubonakala naxa sinesizathu sokuba nomsindo ngenxa yamazwi ahlabayo okanye izenzo ezingekho ngqiqweni. UPawulos wathi: “Qumbani, kodwa ningoni; malingatshoni ilanga nicaphukile, ningamvuleli indawo uMtyholi. . . . Yibani nobubele omnye komnye, nibe nemfesane, nixolelane ngesisa kanye njengokuba noThixo wanixolelayo ngesisa ngaye uKristu.” (Efese 4:26, 27, 32) Kufuneka sibe nobubele ingakumbi kwabo banyamezele iimvavanyo. Kakade ke, umdala ongumKristu ebengayi kuba ubonisa ububele xa engamluleki ngeZibhalo lowo usengozini yokushiya ikhondo ‘lokulunga nobulungisa nenyaniso’ kuba nje engafuni ukuba akhathazeke.—Efese 5:9.
17, 18. Kuchazwa njani ukulunga, yaye olu phawu lumele lube nayiphi indima ebomini bethu?
17 Ukulunga kuthetha ukuba nesidima okanye ukuziphatha kakuhle. UThixo ulunge ngendlela egqibeleleyo. (INdumiso 25:8; Zekariya 9:17) UYesu unesidima yaye uziphethe kakuhle. Sekunjalo, akazange avume ukuba abizwe ngokuba ‘nguMfundisi Olungileyo.’ (Marko 10:17, 18) Oku kwakungenxa yokuba wayejonga uThixo njengobalaseleyo ngokulunga.
18 Asikwazi ukukwenza ngokupheleleyo okulungileyo ngenxa yesono esasizuz’ ilifa. (Roma 5:12) Sekunjalo, sinokuba nalo olu phawu ukuba sithandaza kuThixo simcele ‘asifundise ukulunga.’ (INdumiso 119:66) UPawulos waxelela amaKristu aseRoma oku: “Nam ndeyisekile ngani, bazalwana bam, ukuba nani nizele kukulunga, njengoko niye nazaliswa lulo lonke ulwazi.” (Roma 15:14) Umveleli ongumKristu umele abe ‘ngumthandi wokulunga.’ (Tito 1:7, 8) Ukuba sikhokelwa ngumoya kaThixo, siya kwaziwa ngokuba silungile, yaye uYehova uya ‘kusikhumbula ngokulunga esikwenzileyo.’—Nehemiya 5:19; 13:31.
“Ukholo Olungenaluhanahaniso”
19. Chaza ukholo ngokuvisisana namaHebhere 11:1.
19 Ukholo—oluyinxalenye yesiqhamo somoya—“lululindelo oluqinisekisiweyo lwezinto ezithenjiweyo, ubungqina obucacileyo bezinto zokwenene nangona zingabonwa.” (Hebhere 11:1) Ukuba sinokholo, asiyithandabuzi into yokuba izithembiso zikaYehova ziza kuzalisekiswa xa zizonke. Ukuqiniseka ngezo zinto zingekabonwa kufana nokuba nokholo lokuba sele zizalisekile. Ngokomzekelo, izinto ezidaliweyo zisenza siqiniseke ukuba uMdali ukho. Siya kuba nokholo olunjalo ukuba siqhubeka sihamba ngokomoya.
20. Siyintoni ‘isono esisithandela ngokulula,’ yaye sinokusiphepha njani eso sono nemisebenzi yenyama?
20 Ukungabi nalukholo ‘sisono esisithandela ngokulula.’ (Hebhere 12:1) Kufuneka sithembele kumoya kaThixo ukuze siphephe imisebenzi yenyama, ukuthanda izinto eziphathekayo, neemfundiso zobuxoki ezinokutshabalalisa ukholo lwethu. (Kolose 2:8; 1 Timoti 6:9, 10; 2 Timoti 4:3-5) Kubakhonzi bakaYehova banamhla, umoya kaThixo uvelisa ukholo olufana nolwamaKristu awayephila ngaphambi kwenkulungwane yokuqala namanye akwingxelo yeBhayibhile. (Hebhere 11:2-40) Yaye ‘ukholo lwethu olungenaluhanahaniso’ lunokulomeleza ukholo lwabanye.—1 Timoti 1:5; Hebhere 13:7.
Yiba Nobulali Nokuzeyisa
21, 22. Buchazwa njani ubulali, yaye kutheni sifanele sibe nabo?
21 Ukuba nobulali kukuzola. Olunye lweempawu zikaThixo bubulali. Oku sikwazi ngokuba uYesu owayenobulali, wayebuxelisa ngokugqibeleleyo ubuntu bukaYehova. (Mateyu 11:28-30; Yohane 1:18; 5:19) Ngoko ke, yintoni elindelekileyo kuthi njengabakhonzi bakaThixo?
22 NjengamaKristu, kulindeleke ukuba ‘sibonise ubulali kubantu bonke.’ (Tito 3:2) Siba nobulali kubulungiseleli bethu. Abo baneemfaneleko zokomoya bakhuthazwa ukuba balungise umKristu okreqayo “ngomoya wobulali.” (Galati 6:1) Sonke sinokufak’ isandla kumanyano noxolo lwamaKristu ngokuba ‘nokuthobeka kwengqondo nobulali.’ (Efese 4:1-3) Sinokubonisa ubulali ngokuqhubeka sihamba ngokomoya nokuzeyisa.
23, 24. Kuyintoni ukuzeyisa, yaye kusinceda njani?
23 Ukuzeyisa kubangela ukuba sikwazi ukuzibamba kwingcinga, intetho nasekwenzeni okubi. UYehova wayesoloko ‘eqhelisela ukuzeyisa’ kwindlela awayewaphatha ngayo amaBhabhiloni awatshabalalisa iYerusalem. (Isaya 42:14) UNyana wakhe ‘wasishiya nomzekelo’ kuba xa wayebandezelekile wabonisa ukuzeyisa. Yaye umpostile uPetros waluleka amaKristu awayekunye nawo esithi ‘elwazini makongezelele ukuzeyisa.’1 Peter 2:21-23; 2 Petros 1:5-8.
24 Abadala abangamaKristu bafanele bakwazi ukuzeyisa. (Tito 1:7, 8) Eneneni, bonke abakhokelwa ngumoya oyingcwele bamele baqhelisele ukuzeyisa ukuze baphephe ukuziphatha okubi, ukuba krwada, okanye nantoni na enokungamkholisi uYehova. Ukuba sivumela umoya kaThixo usenze sikwazi ukuzeyisa, abanye baya kukubona oko kwindlela esithetha ngayo nakwihambo yethu yobuthixo.
Qhubekani Nihamba Ngokomoya
25, 26. Ukuhamba ngokomoya kuya kuluchaphazela njani ulwalamano esinalo ngoku nakwikamva?
25 Ukuba sihamba ngokomoya, siya kuba ngabavakalisi boBukumkani abanenzondelelo. (IZenzo 18:24-26) Abantu abanozinikelo lobuthixo baya kuziva bonwabile yaye bekhululekile xa bekunye nathi. Njengabantu abakhokelwa ngumoya oyingcwele, siya kubakhuthaza abo bakhonza uYehova kunye nathi ukuba bahambe ngokomoya. (Filipi 2:1-4) Onke amaKristu afuna ukuba njalo.
26 Kweli hlabathi lilawulwa nguSathana, akuyondlwan’ iyanetha ukuhamba ngokomoya. (1 Yohane 5:19) Sekunjalo, namhlanje izigidi zabantu ziyakwenza oku. Ukuba sikholosa ngoYehova ngeentliziyo zethu zonke, siya kubunandipha ubomi yaye siya kuqhubeka sihamba kwiindlela zobulungisa zaLowo usipha umoya oyingcwele ngothando.—INdumiso 128:1; IMizekeliso 3:5, 6.
Unokuphendula Uthini?
• ‘Ukuhamba ngokomoya’ kuluchaphazela njani ulwalamano lwethu noThixo kunye noNyana wakhe?
• Siyintoni isiqhamo somoya oyingcwele?
• Ziziphi ezinye zeendlela zokubonisa isiqhamo somoya kaThixo?
• Ukuhamba ngokomoya kubuchaphazela njani ubomi bethu ngoku nakwikamva?
[Umfanekiso okwiphepha 23]
Umoya oyingcwele kaYehova usikhuthaza ukuba sibathande abo sikholwa nabo
[Umfanekiso okwiphepha 24]
Bonisa ububele ngamazwi nangezenzo