Imibuzo Evela Kubafundi
Ekubeni onke amadoda akwaSirayeli ayesiba kuMthendeleko Wamaqebengwana Angenagwele ngexesha lokuqalisa ukuvuna, ngubani owayevuna intlahlela yerhasi eyayisiziswa engcweleni?
UMthetho kaMoses wawusithi kumaSirayeli: “Kathathu ngonyaka mayibonakale yonke into eyindoda phambi koYehova uThixo wakho kuloo ndawo aya kuyinyula: ngomthendeleko wamaqebengwana angenagwele nangomthendeleko weeveki nangomthendeleko weminquba.” (Duteronomi 16:16) Ukususela kwixesha likaKumkani uSolomon, uThixo wamisela ukuba kuyiwe kwitempile eseYerusalem.
Umthendeleko wokuqala kule mithathu, wawuba sekuqaleni kwentwasahlobo. Wawubizwa ngokuba nguMthendeleko Wamaqebengwana Angenagwele, yaye wawuqalisa kusuku olusemva kwePasika kaNisan 14 uze uqhubeke kangangeentsuku ezisixhenxe de kube ngoNisan 21. Ngosuku lwesibini lomthendeleko, ngoNisan 16, kwakuqalisa isivuno sokuqala sonyaka ngokuvisisana nekhalenda engcwele. Ngolo suku, umbingeleli omkhulu wayemele athabathe “isithungu sentlahlela” yesivuno serhasi aze asitshangatshangise “phambi koYehova” engcweleni. (Levitikus 23:5-12) Ekubeni onke amadoda kwakufuneka abekho kuMthendeleko Wamaqebengwana Angenagwele, wawuvunwa ngubani lo mnikelo?
Umyalelo wokunikela intlahlela yesivuno kuYehova ngoMthendeleko Wamaqebengwana Angenagwele wawubhekiswe kuhlanga lonke. Lo myalelo wawungathi mntu ngamnye makaqalise ukuvuna aze azise intlahlela yakhe engcweleni. Kunoko, kwakufuneka kumiselwe abameli abaza kulungiselela uhlanga luphela. Ngenxa yoko, abo bameli babethunywa ukuba baye kusika isithungu soMthendeleko Wamaqebengwana Angenagwele kwintsimi yerhasi ekufuphi. Igqabaza ngoku, iEncyclopaedia Judaica ithi: “Ukuba irhasi ivuthiwe yayithatyathwa kummandla waseYerusalem; kungenjalo yayithatyathwa kuwo nawuphi na ummandla wakwaSirayeli. Yayivunwa ngamadoda amathathu, iyileyo iphethe irhengqa yayo nengobozi yayo.” Emva koko isithungu serhasi sasisiwa kumbingeleli omkhulu aze yena enze umnikelo ngaso kuYehova.
Lo myalelo wokunikela intlahlela yesivuno wawunika amaSirayeli ithuba elihle lokubulela uThixo ngokusikelela ilizwe lawo, nangesivuno esihle. (Duteronomi 8:6-10) Noko ke, okubaluleke nangakumbi kukuba, umsitho womnikelo ‘wawusisithunzi sezinto ezilungileyo eziza kuza.’ (Hebhere 10:1) Kuphawuleka ukuba, uYesu Kristu wavuswa ngoNisan 16, 33 C.E., usuku lokunikela intlahlela yesivuno kuYehova. Ngokuphathelele uYesu, umpostile uPawulos wabhala: “UKristu uvusiwe kwabafileyo, intlahlela kwabalele ekufeni. . . . Kodwa ngamnye kuluhlu lwakhe: UKristu intlahlela, emva koko abo bangabakaKristu ebudeni bobukho bakhe.” (1 Korinte 15:20-23) Isithungu sentlahlela esasitshangatshangiswa ngumbingeleli omkhulu phambi koYehova sasifanekisela uYesu Kristu ovusiweyo—umntu wokuqala owavuswa kwabafileyo waza waphila ubomi obungunaphakade. Ngaloo ndlela, uYesu wavula indlela yokukhululwa koluntu esonweni nasekufeni.
[Inkcazelo Ngomfanekiso okwiphepha 26]
© 2003 BiblePlaces.com