Ukulindela Imini KaYehova Ngonyamezelo
“Elukholweni lwenu nongezelele . . . unyamezelo.”—2 PETROS 1:5, 6.
1, 2. Luyintoni unyamezelo, yaye kutheni lufuneka kumaKristu?
IMINI enkulu kaYehova isemnyango. (Yoweli 1:15; Zefaniya 1:14) NjengamaKristu azimisele ukuhlala egcine ingqibelelo yawo kuThixo, sikhangele phambili kwixesha laxa kuya kuthethelelwa ulongamo lukaYehova. Okwangoku, sisajamelene nentiyo, ungcikivo, intshutshiso nokufela ukholo lwethu. (Mateyu 5:10-12; 10:22; ISityhilelo 2:10) Oku kufuna unyamezelo—amandla okumelana nobunzima. Umpostile uPetros uyasibongoza esithi: “Elukholweni lwenu nongezelele . . . unyamezelo.” (2 Petros 1:5, 6) Kufuneka sinyamezele, kuba uYesu wathi: “Lowo unyamezele kwada kwasekupheleni uya kusindiswa.”—Mateyu 24:13.
2 Kwakhona siyagula, siba sentlungwini yokufelwa, yaye silingwa nangezinye iindlela. Hayi indlela ebeya kuvuya ngayo uSathana ukuba besinokuphelelwa lukholo! (Luka 22:31, 32) Ngenxa yokuba sixhaswa nguYehova, sinokukwazi ukunyamezela izilingo ezahlukahlukeneyo. (1 Petros 5:6-11) Khawuhlolisise la mava alandelayo abonisa ukuba sinako ukulindela imini kaYehova ngonyamezelo nangokholo olungaxengaxengiyo.
Abazange Bayekiswe Kukugula
3, 4. Chaza umzekelo obonisa ukuba sinokumkhonza ngokuthembeka uYehova nakuba sigula.
3 UThixo akasiphilisi ngemimangaliso, kodwa usinika amandla okuba sikwazi ukunyamezela ukugula. (INdumiso 41:1-3) USharon wathi: “Eyona nto ndiyaziyo kukuba, mna nesi situlo sam sabagulayo asizange silahlane. Ekubeni ndazalwa ndinengxaki ebuchotsheni, andizange ndibunandiphe ubomi bam bobuntwana.” Ukufunda ngoYehova nezithembiso zakhe zempilo egqibeleleyo kwabangela ukuba uSharon abe nethemba. Nangona ethetha yaye ehamba nzima, uyavuya xa ekubulungiseleli bamaKristu. Kwiminyaka eli-15 edlulileyo, wathi: “Impilo yam iyawohloka, kodwa ndinyamezele ngenxa yokuba ndikholose ngoThixo yaye ndinolwalamano kunye naye. Hayi indlela endivuya ngayo ngokuba phakathi kwabantu bakaYehova nokuxhaswa nguye ngalo lonke ixesha!”
4 Umpostile uPawulos wabongoza amaKristu aseTesalonika ukuba ‘athuthuzele imiphefumlo edandathekileyo.’ (1 Tesalonika 5:14) Ukuphoxeka ngokunzulu kunokubangela udandatheko. Ngowe-1993, uSharon wabhala wenjenje: “Ngenxa yokuba ndandibona ngathi ndiyasilela kwizinto ezininzi, . . . kangangeminyaka emithathu ndadandatheka kakhulu. . . . Abadala babendithuthuzela yaye bendinika amacebiso. . . . Esebenzisa IMboniselo, uYehova uyasifundisa ngodandatheko. Ewe, uyabanyamekela abantu bakhe yaye uyayazi indlela esivakalelwa ngayo.” (1 Petros 5:6, 7) Nangoku sithethayo, uSharon usamkhonza ngokuthembeka uThixo njengoko elindele imini enkulu kaYehova.
5. Bubuphi ubungqina obubonisa ukuba amaKristu anokukwazi ukunyamezela uxinezeleko?
5 Amanye amaKristu axinezelekile ngenxa yezinto atyhubele kuzo ebomini. UHarley wazibonela ngawakhe amehlo umlo wobundlobongela weMfazwe Yehlabathi II, nto leyo eyayimenza angalali ngamaphupha amabi. Wayedla ngokukhala kakhulu ngoxa esebuthongweni athi: “Lumka! Lumka!” Emva koko wayevuka ebile xhopho. Noko ke, wakwazi ukuvumela ubomi bakhe bukhokelwe nguThixo yaye ngokuhamba kwexesha loo maphupha aphela.
6. Omnye umKristu wajamelana njani nebipolar?
6 Ukuya kushumayela kwindlu ngendlu kwakungeyondlwan’ iyanetha komnye umKristu owafunyaniswa ukuba unesifo esibizwa ngokuba yibipolar. Noko ke, akazange ayeke ukuya entsimini kuba wayesazi ukuba oko kuthetha ubomi kuye nakwabo bamphulaphulayo. (1 Timoti 4:16) Maxa wambi kwakuye kube nzima ukunkqonkqoza endlwini, kodwa uthi: “Emva kwexesha elithile ndandikwazi ukuzilawula iimvakalelo zam. Ukuya rhoqo entsimini kwandinceda ndahlala ndiphilile ngokomoya.” Kwakulucelomngeni kulo mzalwana nokuya ezintlanganisweni, kodwa wayeqinisekile ukuba unxulumano lokomoya lubalulekile. Ngoko, wayezama konke okusemandleni akhe ukuba abekho.—Hebhere 10:24, 25.
7. Nangona abanye besoyika ukuthetha esidlangalaleni okanye ukuya kwiintlanganiso, babonisa njani ukuba bayanyamezela?
7 Amanye amaKristu anezinto azoyika ngokugqithisileyo. Ngokomzekelo, asenokuziva enedyudyu xa kufuneka athethe esidlangalaleni okanye aye ezintlanganisweni. Khawucinge indlela ekunzima ngayo ngamaKristu anjalo ukugqabaza ezintlanganisweni okanye ukunikela intetho kwiSikolo Sobulungiseleli Sobuthixo! Sekunjalo, ayanyamezela, yaye ukubakho kwawo nokuba nenxaxheba ezintlanganisweni kusikhuthaza kakhulu.
8. Luluphi uncedo olunamandla ngakumbi xa uhlangabezana neengxaki ezibangelwa luxinezeleko lwengqondo?
8 Ukuzipha ixesha elininzi lokuphumla nokulala kunokumnceda umntu anyamezele iingxaki ezibangelwa luxinezeleko lwengqondo. Ubulumko kukuba onjalo afumane uncedo lwezamayeza. Noko ke olona ncedo lunamandla ngakumbi, kukuthembela kuThixo ngomthandazo. INdumiso 55:22 ithi: “Umthwalo wakho wulahlele kuYehova, yaye yena wokuxhasa. Akayi kuliyekela ilungisa lishukunyiswe.” Ngoko ke, “kholosa ngoYehova ngayo yonke intliziyo yakho.”—IMizekeliso 3:5, 6.
Ukunyamezela Intlungu Yokufelwa
9-11. (a) Yintoni enokusinceda sinyamezele intlungu yokufelwa ngumntu esimthandayo? (b) Umzekelo ka-Ana unokusinceda njani sikwazi ukunyamezela intlungu yokufelwa?
9 Xa ukufa kusahlukanisa amalungu entsapho, iintliziyo ziba lihlwili. UAbraham walila akufelwa ngumfazi awayemthanda, uSara. (Genesis 23:2) “Zathi waxa iinyembezi” nakwindoda efezekileyo uYesu xa kwakufe umhlobo wayo uLazaro. (Yohane 11:35) Ngoko asingomnqa ukuba buhlungu xa ufelwe ngumntu omthandayo. Noko ke, amaKristu ayazi ukuba kuza kubakho uvuko. (IZenzo 24:15) Ngenxa yoko, akabi “lusizi njengabo bangenathemba.”—1 Tesalonika 4:13.
10 Sinokuhlangabezana njani nentlungu yokufelwa? Mhlawumbi lo mzekelo unokusinceda. Ngokuqhelekileyo asiqhubeki sibuhlungu xa umhlobo eza kuhamba ixesha elide, kuba siyazi ukuba uza kubuya. Ukuba nembono enjalo ngokufa komKristu othembekileyo kunokusenza singabi buhlungu kakhulu kuba siyazi ukuba uthenjiswe ngovuko.—INtshumayeli 7:1.
11 Ukukholosa ngokupheleleyo ‘ngoThixo wentuthuzelo yonke’ kuya kusinceda sinyamezele intlungu yokufelwa. (2 Korinte 1:3, 4) Enye into eya kusinceda kukucingisisa ngoko kwenziwa ngomnye umhlolokazi owayephila ngenkulungwane yokuqala, uAna. Wafelwa yindoda emva kweminyaka esixhenxe kuphela betshatile. Kodwa xa wayeneminyaka engama-84, wayesanikela inkonzo engcwele kuYehova etempileni. (Luka 2:36-38) Alithandabuzeki elokuba ukuzinikela kwakhe kwamnceda wakwazi ukuhlangabezana nentlungu yokufelwa nokuba lilolo. Ukubandakanyeka kwimisebenzi yamaKristu ngalo lonke ixesha, kuquka umsebenzi wokushumayela ngoBukumkani, kunokusinceda sikwazi ukunyamezela intlungu yokufelwa.
Ukuhlangabezana Neemvavanyo Ezahlukahlukeneyo
12. Amanye amaKristu aye anyamezela luphi uvavanyo oluphathelele ubomi bentsapho?
12 Amanye amaKristu kufuneka anyamezele iimvavanyo eziphathelele ubomi bentsapho. Ngokomzekelo, ukuba iqabane lomtshato liyakrexeza, intsapho inokudandatheka kakhulu. Ngenxa yokothuka nentlungu, busenokuba nzima ubuthongo kwiqabane lomtshato elikhohlisiweyo yaye linokuhlala lisezinyembezini. Kunokuba nzima ukwenza imisebenzi nje elula kangangokuba linokwenza iimpazamo okanye ingozi. Kunokungangeni nkqu nokutya kweli qabane limsulwa, lehle emzimbeni yaye lingonwabi. Kunokuba nzima nokwenza imisebenzi yamaKristu. Yaye abantwana banokuchaphazeleka ngendlela engathethekiyo.
13, 14. (a) Ukukhuthaza njani umthandazo owenziwa nguSolomon ngexesha lokuvulwa kwetempile? (b) Kutheni simele sithandazele umoya oyingcwele?
13 Xa sivavanywa ngolo hlobo, uYehova uyasinceda. (INdumiso 94:19) Umthandazo kaKumkani uSolomon xa kwakuvulwa itempile kaYehova ubonisa ukuba uThixo uyayiphulaphula imithandazo yabantu bakhe. USolomon wathandaza kuThixo wenjenje: “Nawuphi na umthandazo, nasiphi na isicelo sobabalo esinokubakho kuye nawuphi na umntu kubo bonke abantu bakho amaSirayeli, ngenxa yokuba ngamnye uyasazi isibetho sentliziyo yakhe, baze bazolulele kule ndlu izandla zabo, kwanga ungeva usemazulwini, kwindawo ohlala kuyo emisiweyo, uze uxolele yaye wenze, unike ngamnye ngokweendlela zakhe zonke, ngenxa yokuba uyayazi intliziyo yakhe (kuba nguwe kuphela oyazi kakuhle intliziyo yabo bonke oonyana boluntu); ukuze bakoyike yonke imihla yokuphila kwabo phezu komhlaba owawunika ookhokho bethu.”—1 Kumkani 8:38-40.
14 Kunokunceda ngakumbi ukuhlala uthandazela umoya oyingcwele. (Mateyu 7:7-11) Uvuyo noxolo yinxalenye yesiqhamo somoya. (Galati 5:22, 23) Esinjani sona isiqabu xa uBawo wethu osezulwini eyiphendula imithandazo yethu—endaweni yentlungu iba luvuyo, kuze kubekho uxolo endaweni yokubandezeleka!
15. Ziziphi izibhalo ezinokusinceda sinciphise iinzingo?
15 Zibakho iinzingo xa kufuneka umntu anyamezele uxinezeleko. Kodwa ke, ezi nzingo zinokuncitshiswa ngamazwi kaYesu athi: “Musani ukuxhalela imiphefumlo yenu mayela noko niya kukudla okanye oko niya kukusela, okanye imizimba yenu mayela noko niya kukunxiba. ... Qhubekani, ke ngoko, nifuna kuqala ubukumkani nobulungisa [bukaThixo], yaye zonke ezinye izinto ziya kongezelelwa kuni.” (Mateyu 6:25, 33, 34) Umpostile uPetros wathi ‘masiliphose kuThixo lonke ixhala lethu, kuba usikhathalele.’ (1 Petros 5:6, 7) Kufanelekile ukwenza umgudu xa kufuneka sicombulule ingxaki. Kodwa, emva kokuba senze konke okusemandleni ethu, akuyi kusinceda nganto ukuxhalatyiswa yiloo ngxaki, into eya kusinceda kukuyithandazela. Umdumisi wavuma le ngoma: “Yiqengqele kuYehova indlela yakho, uze uthembele ngaye, kwaye yena uya kwenza.”—INdumiso 37:5.
16, 17. (a) Kutheni singakhululekanga ngokupheleleyo kwiinzingo? (b) Yintoni esiya kuyizuza xa sisebenzisa amaFilipi 4:6, 7?
16 UPawulos wabhala wenjenje: “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.” (Filipi 4:6, 7) Inzala engafezekanga ka-Adam ayinakuphuma ngokupheleleyo kwiinzingo. (Roma 5:12) Abafazi bakaEsawu abangamaHiti “bawenza wakrakra umoya” wabazali bakhe ababesoyika uThixo, uIsake noRebheka. (Genesis 26:34, 35) Ukugula kumele ukuba kwabangela iinzingo kumaKristu afana noTimoti noTrofimo. (1 Timoti 5:23; 2 Timoti 4:20) UPawulos wayebaxhalabele abo akholwa kunye nabo. (2 Korinte 11:28) Kodwa ‘uMphulaphuli wemithandazo’ usoloko ekunye nabo bamthandayo.—INdumiso 65:2.
17 Njengoko silindele imini kaYehova, sixhaswa yaye sithuthuzelwa ‘nguThixo woxolo.’ (Filipi 4:9) UYehova ‘unenceba nobabalo,’ “ulungile yaye ukulungele ukuxolela,” kwaye ‘uyakhumbula ukuba siluthuli.’ (Eksodus 34:6; INdumiso 86:5; 103:13, 14) Ngoko ‘masazise izibongozo zethu kuye,’ kuba oko kuya kubangela ukuba sibe ‘noxolo lukaThixo’—ukuzola okungaphaya kokuqonda.
18. Ngokutsho kukaYobhi 42:5, kunokwenzeka njani ukuba ‘simbone’ uThixo?
18 Xa uThixo ephendula imithandazo yethu, siyazi ukuba ukunye nathi. Emva kokuba uYobhi enyamezele iimvavanyo, wathi: “Ndikuve ngondiva [Yehova], kodwa ngoku iliso lam liyakubona.” (Yobhi 42:5) Ngeliso lokuqonda, lokholo nombulelo, sinokuyibona indlela uThixo asiphatha ngayo, size ‘simbone’ ngakumbi kunanini na ngaphambili. Hayi indlela olusinika uxolo lwentliziyo nolwengqondo ngayo ulwalamano olusondele ngolo hlobo!
19. Yintoni eya kwenzeka xa ‘siliphosa kuYehova lonke ixhala lethu’?
19 Ukuba ‘siliphosa kuYehova lonke ixhala lethu,’ sinokukwazi ukunyamezela iimvavanyo sinoxolo lwangaphakathi olukhokela iintliziyo neengqondo zethu. Kwiintliziyo zethu zokomfuziselo asiyi koyika. Iingqondo zethu aziyi kudideka okanye sicinge ngezinto ezisixhalabisayo.
20, 21. (a) Imeko kaStefano inikela buphi ubungqina ngokuzola xa ujamelene nentshutshiso? (b) Chaza umzekelo womntu oye wanyamezela intshutshiso ezolile.
20 Umfundi uStefano wanyamezela iimvavanyo zokholo ezolile. Ngaphambi kokuba anikele ubungqina okokugqibela, bonke abo babekwiSanhedrin ‘babona ubuso bakhe bunjengobuso bengelosi.’ (IZenzo 6:15) Ubuso bakhe babuzolile—bufana nobengelosi, umthunywa kaThixo. Emva kokuba uStefano ebhence ityala ababenalo abagwebi ngokufa kukaYesu, “baziva bexhelekile ezintliziyweni zabo baza bamtshixizela amazinyo.” “Ezele ngumoya oyingcwele,” uStefano “wondela ezulwini waza walubona uzuko lukaThixo noYesu emi ngasekunene kukaThixo.” Lo mbono wamomeleza uStefano waza wathembeka kwada kwasekufeni. (IZenzo 7:52-60) Nangona singaboni mibono, uThixo unokusenza sizole xa sitshutshiswa.
21 Khawuphawule indlela awayevakalelwa ngayo amanye amaKristu awafela ezandleni zamaNazi ngeMfazwe Yehlabathi II. Ethetha ngezinto atyhubele kuzo, omnye wathi: “Kwawiswa isigwebo sentambo. Ndathi ndakukuva oko, ndathetha la mazwi, ‘Thembeka kude kuse ekufeni,’ kunye namanye ambalwa awathethwa yiNkosi yethu, ndathi cwaka emva koko. . . . Kodwa libala ngoko. Kuba ngoku ndiseluxolweni, inzolo ongenakuyifanisa nanto!” Omnye umKristu oselula owayeza kunqunyulwa intloko wabhalela abazali bakhe wenjenje: “Ngoku kusemva kwentsimbi ye-12 ezinzulwini zobusuku. Ndisenokuzitshintsha iingqondo. Kodwa, andinakuze ndiphinde ndonwabe kweli hlabathi xa ndinokukhanyela iNkosi yam. Ngoku ndiyaniqinisekisa ukuba ndiza kufa ndonwabile yaye ndiseluxolweni.” Alithandabuzeki elokuba uYehova uyabaxhasa abakhonzi bakhe abanyanisekileyo.
Unako Ukunyamezela!
22, 23. Njengoko ulindele imini kaYehova ngonyamezelo, yintoni omele uqiniseke ngayo?
22 Usenokuba akujamelananga nocelomngeni olufana nolu sithethe ngalo. Sekunjalo, uYobhi owayesoyika uThixo wayenyanisile xa esithi: “Umntu, ozelwe ngumfazi, unobomi obufutshane obuzele kukuphazamiseka.” (Yobhi 14:1) Mhlawumbi ungumzali ozabalazela ukunceda abantwana bakhe ngomyalelo ophuma eBhayibhileni. Kusenokwenzeka ukuba banyamezele iimvavanyo esikolweni, kodwa hayi indlela ovuya ngayo xa bemmela ngokuqinileyo uYehova nemigaqo yakhe yobulungisa! Mhlawumbi utyhubela ubunzima nezilingo emsebenzini. Noko ke, unako ukuzinyamezela ezi meko kunye nezinye, kuba ‘uYehova ukuthwalela umthwalo mihla le.’—INdumiso 68:19.
23 Usenokucinga ukuba ungumntu nje ongabalulekanga, kodwa khumbula ukuba uYehova akasoze awulibale umsebenzi wakho nothando olubonisayo ngegama lakhe elingcwele. (Hebhere 6:10) Ngoncedo lwakhe, unokuzinyamezela iimvavanyo zokholo. Ngoko kwimithandazo nezinto oceba ukuzenza, ungakulibali ukuquka ukwenza ukuthanda kukaThixo. Ngenxa yoko, unokuqiniseka ukuba uThixo uya kukusikelela aze akuxhase njengoko uyilindele ngonyamezelo imini kaYehova.
Unokuphendula Uthini?
• Kutheni kufuneka amaKristu anyamezele?
• Yintoni enokusinceda sinyamezele ukugula nentlungu yokufelwa?
• Umthandazo usinceda njani sikwazi ukunyamezela izilingo?
• Kutheni kungekho nzima ukulindela ngonyamezelo imini kaYehova?
[Umfanekiso okwiphepha 29]
Ukukholosa ngoYehova kusenza sikwazi ukunyamezela intlungu yokufelwa
[Umfanekiso okwiphepha 31]
Umthandazo osuka entliziyweni usinceda sikwazi ukunyamezela iimvavanyo zokholo