Yibani ‘Nemfesane’

AKUZANGE nanini na ngaphambili babe baninzi kangaka abantu abayifuna ngamehlw’ abomvu imfesane njengoko bejamelene nendlala, ukugula, ubuhlwempu, ulwaphulo-mthetho, iimfazwe neentlekele zemvelo. Imfesane kukuba novelwano kumntu obandezelekileyo nosentlungwini ngoxa unqwenela ukuyiphelisa. Njengokufudumala kwemitha yelanga okutsho kamnandi, imfesane inokumhlaziya umntu obandezelekileyo, idambise iintlungu, ize ikhuthaze umntu osezingxakini.

Sinokubonisa imfesane ngezenzo namazwi—sibanyamekele abanye size sisoloko sikulungele ukubanceda. Imfesane ayimele iphelele kwintsapho, abahlobo bethu kunye nabo sibaqhelileyo. Sinokuyibonisa nakubantu esingabazi nokubazi. UYesu Kristu wabuza lo mbuzo kwiNtshumayelo yaseNtabeni: “Ukuba nithanda abo banithandayo, ninamvuzo mni na?” Le ndoda inovelwano yaphinda yathi: “Zonke izinto, ngoko, enifuna abantu bazenze kuni, yenzani ngokunjalo nani kubo.”—Mateyu 5:46, 47; 7:12.

Unokuwafunda la mazwi—abizwa ngokuba nguMthetho Omkhulu—kwiZibhalo Ezingcwele. Abaninzi bayavuma ukuba iBhayibhile yeyona ncwadi inokunceda abantu bakwazi ukubonisa imfesane. IZibhalo zisichazela ngokuphindaphindiweyo ngembopheleleko esinayo yokunceda abo bangenakuzinceda ngezizathu ezithile. IBhayibhile ichaza uMbhali wayo noMdali wethu, uYehova uThixo, njengohamba phambili ngokuba nemfesane.

Ngokomzekelo, sifunda oku: ‘UThixo ugwebela inkwenkwe engenayise nomhlolokazi, uthanda umphambukeli amnike isonka nengubo yokwaleka.’ (Duteronomi 10:18) UYehova uThixo uchazwa ‘njengophumezela abaqhathiweyo umgwebo, anike abalambileyo isonka.’ (INdumiso 146:7) Ngokuphathelele abaphambukeli ababandezelekileyo, uYehova wakhupha lo Mthetho: “Makabe njengenzalelwane yenu umphambukeli lowo uphambukele kuni; yaye uze umthande njengawe.”—Levitikus 19:34.

Noko ke, ukubonisa imfesane akusoloko kulula. Umpostile uPawulos wawabhalela oku amaKristu aseKolose: “Buhlubeni ubuntu obudala kunye noqheliselo lwabo, nize nambathe ubuntu obutsha, obuthi ngolwazi oluchanileyo benziwe bube butsha ngokomfanekiso waLowo wabudalayo . . . Njengabanyulwa bakaThixo, abangcwele nabathandwayo, yambathani umsa wemfesane.”—Kolose 3:9, 10, 12.

Ngoko ke, ukuze sibe nemfesane kufuneka senze umgudu. Ukwenjenjalo kuyinxalenye ‘yobuntu obutsha’ ekulindeleke ukuba amaKristu abambathe. UPawulos wayephila kwihlabathi elikhohlakeleyo elaliphethwe yiRoma yamandulo. Wakhuthaza abo wayekhonza kunye nabo ukuba benze utshintsho olukhawulezileyo kubuntu babo ukuze babe nemfesane novelwano.

Amandla Emfesane

Abanye abantu bagqala abo banemfesane njengababuthathaka nabazizisulu. Ngaba loo mbono ichanile?

Akunjalo konke konke! Eyona nto inokuqhubela umntu ekubeni nemfesane yokwenene luthando olunzulu oluvela kuThixo, osisimntwiso solo phawu. “UThixo uluthando.” (1 Yohane 4:16) UYehova ukufanele ukubizwa ngokuba ‘nguYise onenceba noThixo wentuthuzelo yonke.’ (2 Korinte 1:3) Igama eliguqulelwe ngokuthi ‘inceba’ ngokuyintloko libhekisela “kusizi, nokuvelana neentsizi zabanye abantu.” Kaloku, uYehova “unobubele kwabo bangenambulelo nabangendawo”!—Luka 6:35.

UMdali wethu ufuna ukuba nathi sibe neempawu zobubele njengemfesane. KuMika 6:8 sifunda oku: “Ukuxelele, mntundini wasemhlabeni, okulungileyo. Kwaye yintoni ayibizayo kuwe uYehova ngaphandle kokuqhelisela okusesikweni nokuthanda ububele?” KwiMizekeliso 19:22, sifunda oku: “Into enqwenelekayo kumntu wasemhlabeni bububele bakhe bothando.” Ngokufanayo uNyana kaThixo, uYesu Kristu, owabubonisa ngokugqibeleleyo ubuntu bukaYise, wababongoza wathi abalandeli bakhe: “Qhubekani nisiba nenceba, kanye njengoko uYihlo enenceba.” (Luka 6:36) IThe Jerusalem Bible iliguqulela ngolu hlobo eli binzana: “Yibani nemfesane njengoko uYihlo enemfesane.”

Kukho izizathu ezivakalayo zokwenjenjalo ekubeni ukuba nemfesane kunomvuzo ongathethekiyo. Sisoloko sikubona ukuchana kwala mazwi akwiMizekeliso 11:17: “Umntu onobubele bothando uqhubana ngokunomvuzo nomphefumlo wakhe.” Xa sibonisa imfesane kumntu osweleyo, uThixo ugqala oku njengento eyenzelwa Yena. Uyithabathela kuye imbopheleleko yokubabuyisela ngobubele abakhonzi bakhe ababonisa imfesane. Ephefumlelwe, uKumkani uSolomon wakha wathi: “Obabala isisweli uboleka uYehova, yaye impatho yakhe uya kumbuyekeza ngayo.” (IMizekeliso 19:17) NoPawulos wabhala wathi: “Niyazi ukuba ngamnye, nakuphi na okulungileyo asenokukwenza, uya kwamkeliswa ngako nguYehova.”—Efese 6:8.

Imfesane inamandla okulondoloza imvisiswano nawokucombulula iingxwabangxwaba. Inceda ekulungiseni ukungaboni ngasonye, yaye itshayelela indlela yokuxolela. Ukungaboni ngasonye kudla ngokubangelwa kukuba asisoloko sikhupha imbilini yethu ngendlela ebesingathanda ukwenza ngayo okanye ngenxa yokuba indlela esenza ngayo izinto isenokujongwa ngenye indlela. Inceda apho ke imfesane, ifike ilondoloze uxolo. Kulula ukuxolela umntu odume ngokuba nemfesane. Imfesane isinceda ukuba senze izinto ngokuvisisana nesiluleko sikaPawulos kumaKristu: “Qhubekani ninyamezelana yaye nixolelana ngesisa ukuba nabani na unesizathu sokukhalazela omnye.”—Kolose 3:13.

Imfesane Iboniswa Ngokuba Novelwano

Ngaphezu koko, imfesane inciphisa iinkxwaleko. Njengoko sele sibonisile, ikukubonisa uvelwano kwabo baxinezelekileyo nokubandezeleka nababandezelekileyo. Imfesane iquka ukuvelana nabantu abasentlungwini uze uthabathe inyathelo lokubanceda.

Xa enovelwano, amaKristu axelisa uYesu. Akazange axakeke kangangokude angakwazi ukunceda abanye ngezinto eziphathekayo nangokomoya. Wathi akubona ukuba abanye baswele, wazama ukubanceda ngemfesane.

Khawucinge nje ngendlela uYesu awasabela ngayo xa wabona abantu abaziindwayinge ngokomoya: “Akubona izihlwele wazisizela, ngenxa yokuba zazihlinzekile, zilahliwe njengezimvu ezingenamalusi.” (Mateyu 9:36) Omnye umphengululi weBhayibhile uthi, igama eliguqulelwe apha ngokuthi “wazisizela,” lichaza “imvakalelo eshukumisa amazantsi entliziyo yomntu.” Enyanisweni eli gama liye lachazwa njengelona gama linamandla kwisiGrike lokuchaza imfesane.

Ngokufanayo, amaKristu anemfesane ayakhawuleza ukunceda abantu abasweleyo ngokomoya nangokwezinto eziphathekayo. Umpostile uPetros wabhala wathi: “Cingani nto-nye nonke, nivelane, ninomsa wobuzalwana, nemfesane, nithobekile engqondweni.” (1 Petros 3:8) Ngokomzekelo, xa enye intsapho yamaKristu asweleyo kwafuneka ifudukele komnye ummandla ngenxa yempilo, amaKristu alapho ayinika indlu eyayiza kuhlala kuyo kangangeenyanga ezintandathu ngaphandle kokuyihlawulela. Intloko-ntsapho yalapho ithi: “Suku ngalunye ayesiza kuqonda ukuba siphila njani na, yaye amazwi awo okhuthazo ayesenza sizive samkelekile.”

AmaKristu okwenyaniso anyamekela neemfuno zabantu angabaziyo. Ngovuyo anikela ngexesha, amandla nezinto zawo eziphathekayo ukuze ancede abantu angabaziyo. NgamaNgqina kaYehova abumba iqela lamatsha-ntliziyo achazwe kwinqaku elingaphambi kweli nawanceda abantu angabaziyo ngokupheleleyo.

Ngenxa yoko ibandla lamaKristu lizaliswe ngumoya wemfesane nothando. Uthando lubangela ukuba amalungu ebandla akhonze abanye. Iinkedama nabahlolokazi ebandleni basenokufuna ukuba ubanyamekele uze ube novelwano kubo ngenxa yeengxaki zabo ezahlukahlukeneyo. Ngaba unokubanceda kubuhlwempu abakubo, xa bengakwazi kufumana unyango nendawo yokuhlala efanelekileyo, okanye ubancede kwezinye iingxaki?

Kwaba njalo kwesinye isibini esitshatileyo saseGrisi. Umyeni wahlaselwa sistroke. Yena nenkosikazi yakhe basiwa kwisibhedlele esasikumgama wamakhulukhulu eekhilomitha. Noko ke, babephila ngemalana ababeyifumana ngokuvuna baze bathengise iiorenji ababezilimile. Ngubani owayeza kubenzela lo msebenzi ngoxa besesibhedlele? Ibandla lasekuhlaleni langenelela. Lazivuna lazithengisa ezo orenji, kwafumaneka imali eyanceda esi sibini sisweleyo, saza safumana uxolo lwengqondo.

Imfesane inokuboniswa ngeendlela ezahlukeneyo. Ngokomzekelo, amaKristu anemfesane ayaqonda ukuba maxa wambi eyona nto ifunwa ngabantu ababandezelekileyo kukutyelelwa ngabantu abanovelwano baze bathuthuzelwe ngeZibhalo.—Roma 12:15.

Yiba Phakathi Kwabantu Abanemfesane

Ibandla lamaKristu elisehlabathini lonke liyindawo yoxolo nentuthuzelo ekuboniswa kuyo imfesane nobubele. AmaKristu okwenyaniso ayaqonda ukuba imfesane inomtsalane ngoxa inkohlakalo isahlula abantu. Ngenxa yoko, njengoko ezama ukuxelisa uYise osezulwini azama ukuba ‘nemfesane’ ngandlela zonke.

AmaNgqina kaYehova ayakumema ukuba uze kunandipha imfesane, uthando nenkathalo, mpawu ezo ezesameleyo phakathi kwawo. Aqinisekile ukuba uya kuziva wamkelekile phakathi kwabantu abanjalo.—Roma 15:7.

[Umfanekiso okwiphepha 5]

UPawulos wabongoza amaKristu aseKolose ukuba ambathe umsa wemfesane

[Imifanekiso ekwiphepha 7]

Xa ebona kuyimfuneko, uYesu wayezama ukunceda ngemfesane