Ngaba Iholide Yobuhedeni Inokujikwa Ibe YeyobuKristu?
NGEXESHA leKrismesi, ngobusika bowama-2004, kukho umbandela owawuxutyushwa shushu eItali. Abanye ootitshala nabaphathi besikolo babexhasa ingcamango yokunciphisa okanye ukuphelisa nantoni na esisithethe sonqulo esiphathelele iKrismesi. Oku babekwenzela ukuhlonela abantwana abangengomaKatolika nabangengomaProtestanti ababesanda ezikolweni. Noko ke, bakho ababesithi ezi zithethe zimele zihlonelwe yaye zigcinwe ngendlela yazo.
Kodwa ke ngaphandle kwalo mbandela, zazivela phi ezi zithethe zininzi kangaka zeKrismesi? Njengoko le ngxoxo yayifikelela kuvuthondaba, iphephandaba laseVatican iL’Osservatore Romano lanikela inkcazelo ebangel’ umdla.
Ngokuphathelele umhla weKrismesi, eli phephandaba lamaKatolika lathi: “Asikwazi kuwazi owona mhla uchanileyo wokuzalwa kukaYesu kuba nembali yamaRoma ayiqinisekanga, kanti nendlela abantu ababebalwa ngayo ngelo xesha, nohlolisiso olwenziwayo kwiinkulungwane ezalandelayo aluwucacisi ncam lo mba. . . . Lo mhla udumileyo wama-25 kaDisemba, wakhethwa yiCawa yaseRoma ngenkulungwane yesine. KwiRoma eyayizaliswe bubuhedeni, olu yayilusuku lothixo weLanga . . . Nangona ubuKristu babusele bamkelwe eRoma ngenxa ye-Edict of Constantine, abantu ngokubanzi, ngokukodwa amajoni, babesabambelele kwiinkolelo zobuxoki zothixo weLanga. Le misitho ichazwe ngasentla, eyayisenziwa ngomhla wama-25 kuDisemba, yayinemvelaphi yezithethe ezithandwayo. Oku kwabangela ukuba iCawa yaseRoma ivakalise owama-25 kuDisemba njengomhla obalulekileyo kumaKristu, kuba yabeka iLanga lokwenene Lokusesikweni, uYesu Kristu endaweni yothixo weLanga, yaza yathi olu lusuku lokubhiyozela ukuzalwa kwakhe.”
Kuthekani ngomthi weKrismesi, ngoku osele uyinxalenye yobuKatolika?
Inqaku elikwiphephandaba lamaKatolika lithi ngemihla yamandulo, kwakukho inkolelo yokuba imithi emininzi eluhlaza, efana “neholly, ibutcher’s broom, umthi womlowureli namasebe ompayina, kwakunokwenziwa amayeza athintela ukugula ngayo.” Lahlabela mgama lenjenje: “Ngomhla wama-24 kuDisemba owandulela oweKrismesi, kwakukhunjulwa uAdam noEva, ngokuthi kwenziwe ibali elidume kunene loMthi weParadesi esemhlabeni . . . Kwakumele kusetyenziswe umthi wama-apile, kodwa ekubeni umthi wama-apile usoma ebusika, kwakubekwa umpayina eqongeni kuze kuxhonywe ama-apile kumasebe awo okanye, kufuziselwe iNtlawulelo ezayo ngamaqebengwana angenagwele, yaye ezo zonka zazifuzisela ubukho bukaYesu, kwakusenziwa nezimuncumuncu kuze kunikwe abantwana izipho.” Kwenzeka ntoni emva kwelo xesha?
Ithetha ngesithethe sokusebenzisa umthi weKrismesi esaqala eJamani ngenkulungwane ye-16, iL’Osservatore Romano ithi: “I-Itali lelinye lamazwe okugqibela ukwamkela umthi weKrismesi, esinye sezizathu zoko kukuba umthi weKrismesi wawusetyenziswa ngamaProtestanti yaye kwakufanele kusetyenziswe umfanekiso wokuzalwa kukaYesu endaweni yawo.” UPopu Paul VI “waba ngowokuqala ukumisa umthi omkhulu weKrismesi [eSt. Peter’s Square, eRome]” kufuphi nomfanekiso wokuzalwa kukaYesu.
Ngaba iyamkeleka into yokuba inkokeli yonqulo idibanise ubuKristu neziganeko nezinto ezinemvelaphi yobuhedeni bamandulo? Ngokuphathelele ikhondo elifanele amaKristu iZibhalo zithi: “Bunabudlelane buni na ubulungisa nokuchas’ umthetho? Okanye kunakwabelana kuni na ukukhanya nobumnyama?”—2 Korinte 6:14-17.
[Imifanekiso ekwiphepha 8, 9]
Umthi weKrismesi (kwiphepha elilandelayo) kunye nomfanekiso wokuzalwa kukaYesu eVatican
[Inkcazelo]
© 2003 BiblePlaces.com
[Umfanekiso okwiphepha 9]
Uthixo welanga
[Inkcazelo]
Museum Wiesbaden