Ngaba Unaye Umntu Okucebisayo Kwizinto Zokomoya?
ESELITYENDYANA elineminyaka eli-16 ubudala, u-Uziya waba ngukumkani wobukumkani obusemazantsi bakwaYuda. Walawula iminyaka engaphezu kwama-50, ukususela ekupheleni kwenkulungwane yesithoba ukusa ekuqaleni kweyesibhozo ngaphambi kweXesha Eliqhelekileyo. Ukususela ebuntwaneni, u-Uziya “waqhubeka esenza okulungileyo emehlweni kaYehova.” Yintoni eyamncedayo wenza okulungileyo? Imbali ithi: “[U-Uziya] waqhubeka ethambekele ekufuneni uThixo ngemihla kaZekariya, umyaleli wokoyika uThixo oyinyaniso; yaye, ngemihla yokufuna kwakhe uYehova, uThixo oyinyaniso wamenza waphumelela.”—2 Kronike 26:1, 4, 5.
IBhayibhile ayithethi nto kangako ngoZekariya, umcebisi kakumkani, ngaphandle nje kwale ngxelo. Sekunjalo, ‘njengomyaleli wokoyika uThixo oyinyaniso,’ uZekariya wanceda lo mlawuli uselula ukuba enze okulungileyo. IThe Expositor’s Bible ithi ngokucacileyo uZekariya “wayeyindoda eyayizazi kakuhle iZibhalo, ezele ngamava kwizinto zokomoya neyayingalunkonyi ulwazi eyayinalo.” Ethetha ngoZekariya, omnye umphengululi weBhayibhile waqukumbela ngala mazwi: “Wayeqhelene kakuhle nesiprofeto yaye . . . wayeyindoda ekrelekrele, ezinikeleyo, nelungileyo; kanti kuyabonakala ukuba yayinefuthe kakhulu ku-Uziya.”
Ukuthembeka kukaUziya kwamzisela iintsikelelo ezininzi, yaye “wabonakalisa amandla ngokomlinganiselo ongaqhelekanga” kuba “uThixo oyinyaniso waqhubeka emnceda.” Ewe, ukuphumelela kwakhe njengomlawuli kwakuxhomekeke ekubeni uya kuhlala ethembekile kusini na kuThixo ‘ngemihla kaZekariya.’ (2 Kronike 26:6-8) Wathi akuphumelela u-Uziya, wazilibala iimfundiso zikaZekariya, umcebisi wakhe. “Intliziyo [kaUziya] yaba nekratshi ukusa kwinqanaba lokonakala, kangangokuba wenza ngokungathembeki kuYehova.” Ngenxa yesenzo sakhe sokungabi nantlonelo, wahlaselwa sisifo sesikhumba esenyanyekayo, esamshiya engumlwelwe, ukuze angabi sakwazi ukulawula ngokupheleleyo njengokumkani.—2 Kronike 26:16-21.
Ngaba unaye umntu onokuthi ngumcebisi wakho, okufundisa ukuba ‘ufune uThixo’? Usenokuba naye enokuba uselula okanye sele udlule kwiminyaka yobutsha, enoba uyindoda okanye ulibhinqa. Mxabise gqitha loo mntu, kuba icebiso lakhe linokukunceda uqhubeke usenza okulungileyo emehlweni kaYehova. Mphulaphule lo mKristu uqolileyo, uze unikele ingqalelo kwizinto akucebisa kuzo. Ngamana ungangaze uwanikele umva amazwi obulumko aloo “myaleli wokoyika uThixo oyinyaniso.”—IMizekeliso 1:5; 12:15; 19:20.