Ukuthethelelwa Kwamalungelo Amaxhoba Ogonyamelo
NgoMeyi 3, 2007, iNkundla Yamalungelo Abantu YaseYurophu eStrasbourg, eFransi yathethelela amaNgqina kaYehova akwiRiphabliki yaseGeorgia. INkundla yafumanisa ukuba amaNgqina ayephethwe kakubi yaye ilungelo lawo lokunqula ngokukhululekileyo laye lanyhashwa. Kwakhona iNkundla yakhalimela urhulumente wangaphambili waseGeorgia ngokungabatshutshisi aba funz’ eweni. Yintoni eyabangela ukuba kufikelelwe kwesi sigqibo?
Ngo-Oktobha 17, 1999 amaNgqina kaYehova ali-120 eBandla LaseGldani eTbilisi elikomkhulu ayehlanganisene ngoxolo ukuze anqule. Ngequbuliso ihlokondiba labantu abangama-200 elalikhokelwa nguVasili Mkalavishvili ongumfundisi wecawa yamaOthodoki osikiweyo bambonzeleka kwindawo ekwakuqhutyelwa kuyo iintlanganiso. Elo hlokondiba elaliphethe imisimbithi neminqamlezo lababhulel’ amasaka abantu ababelapho kangangokuba abanye benzakala. Elinye ibhinqa elalilapho lenzakaliswa elisweni. Kwabo bantu babelapho abali-16 kwafuneka badibane nogqirha. Xa amanye amaNgqina aya kucela uncedo kwabakwantsasana badibana nomphathi wamapolisa, owathi ukuba ebekhona yena ngebabethele oogqirha nezicaka. Olu hlaselo lwafotwa lelinye ilungu lelo hlokondiba yaye kamva oku kwaboniswa koomabonwakude besizwe, bebonisa ngokucacileyo ukuba ngoobani ababehlasela.a
AmaNgqina amangala kodwa akukho nto yenziwayo ngalo nto. Ipolisa elaliphanda eli tyala lathi nalo lalingumOthodoki ngenxa yoko lalingakwazi ukungathabathi cala kweli tyala. Ukuthi cwaka kwabasemagunyeni kwakhuthaza elo hlokondiba ukuba lihlasele amaNgqina izihlandlo ezingaphezu kwekhulu.
Ngoko ke, ngoJuni 29, 2001, amaNgqina kaYehova afak’ isicelo kwiNkundla Yamalungelo Abantu YaseYurophu.b INkundla yawisa isigwebo sokugqibela ngoMeyi 3, 2007, yabonisa ngokuphandle ukuhlaselwa kwawo nokungangeneleli kukarhulumente. INkundla yathi: “Abasemagunyeni . . . babenembopheleleko yokusabela ngokukhawuleza ekuqinisekiseni ubunyaniso” bohlaselo. Isolek’ umsundulo inkundla yathi: “Ukuyekelel’ umxakatho kwizenzo ezilolo hlobo kwenza abantu bangabi nantembelo kwinkqubo yomthetho nangendlela urhulumente abambelela ngayo kuyo.”
INkundla yaqukumbela ngelithi: “Njengokuba kwakuqal’ ukuba amaNgqina kaYehova ahlaselwe ngolunya kangaka ngo-Oktobha 17 1999 abasemagunyeni abazange basikhalimele eso siganeko yaye oku kwavula ithuba lokuba ahlaselwe kulo lonke ilizwe laseGeorgia.”
Amalungelo amaxhoba olo hlaselo athethelelwa yaye urhulumente wayalelwa ukuba ahlawule umonakalo neendleko zenkundla zamalungu eBandla LaseGldani. Nangona amaNgqina kaYehova aseGeorgia ekuvuyela ukuphathwa kakuhle, akwavuyela nokuba isigqibo seNkundla siqinisekisa ilungelo lawo lokuhlanganisana ngaphandle kokuphazanyiswa. Ngenxa yoku abulela uYise osemazulwini, uYehova uThixo obalathisayo nobakhuselayo.—INdumiso 23:4.
[Imibhalo esemazantsi]
a Ukuze ufumane inkcazelo engakumbi funda uVukani! wesiNgesi kaJanuwari 22, 2002, iphepha 18-24, opapashwe ngamaNgqina kaYehova.
b INkundla Yamalungelo Abantu YaseYurophu yiarhente yeBhunga laseYurophu ekhusela imithetho nokunyhashwa kwamalungelo abantu ngokusekelwe kwiEuropean Convention for the Protection of Human Rights and Fundamental Freedoms. Ilizwe laseGeorgia lamkela izindululo zeli bhunga ngoMeyi 20, 1999 yaye ngaloo ndlela lazibophelela kwimithetho yalo.