Ukuba Ngomnye Wabantwana BakaThixo
EMVA kweminyaka engama-30 emva kweMfazwe yaseKorea, iZiko Losasazo laseKorea lasungula iphulo lokukhangela amalungu eentsapho awahlukana ngexesha lemfazwe. Lazala nkomoni eli phulo? Ngaphezu kwabantu abangama-11 000 badityaniswa neentsapho zabo—kwakugixwa, kuwolwana ndibala ntoni na. Iphephandaba iKorea Times lathi: “Akuzange ngaphambili kwimbali yaseKorea kulile abantu abaninzi kangaka kwindawo enye ngaxesh’ anye.”
EBrazil, abazali bakaCézar baphisa ngaye ukuze bahlawule ityala. Kwiminyaka elishumi kamva lo mfana, wavuyiswa kukudibana nonina kangangokuba washiya intsapho eyayifumile awayehlala nayo waza wabuyela kubazali bakhe.
Zivuya ngokwenene iintsapho xa zidibana nelinye ilungu lentsapho ebezahlukene nalo. IBhayibhile isixelela ngentlungu yokwahlukaniswa kwabantu nentsapho kaThixo. Ikwasixelela nangendlela emanyaniswa ngayo. Kwenzeka njani oku? Phofu, wena unokuxhamla njani kolo vuyo?
Indlela Eyahlukaniswa Ngayo Intsapho KaThixo
Ethetha ngoMdali uYehova uThixo, umdumisi wathi: “Ukuwe umthombo wobomi.” (INdumiso 36:9) UYehova nguBawo wentsapho enkulu yendalo iphela yezidalwa ezikrelekrele nezithembekileyo. Loo nxalenye yentsapho yasezulwini iyilwa ziingelosi, ezingoonyana bokomoya kunye nenxalenye yasemhlabeni eyilwa ngabantu abaza kuba ngabantwana bakhe basemhlabeni.
Xa unyana kaThixo wokuqala ongumntu, uAdam, wavukelayo njengokuba kukhankanyiwe kwinqaku elandulela eli, intsapho engabantu yafumana intlungu yokwahlukaniswa noMdali noBawo wayo onothando. (Luka 3:38) Oku kwakungenxa yokuba xa uAdam wavukelayo, walahlekelwa lilungelo lokuba yena nenzala yakhe babe ngabantwana bakaThixo. Ngomkhonzi wakhe uMoses, uThixo wachaza imiphumo yoko kwenzekayo esithi: “Bona bazonakalisile ngokwabo; abangobantwana [baThixo], bazizisele isiphako ngokwabo.” “Isiphako” okanye utyekelo lwesono lwabantu abahlukaniswe noThixo ongcwele nogqibeleleyo kwiindlela zakhe. (Duteronomi 32:4, 5; Isaya 6:3) Ngaloo ndlela uluntu lwaba ziinkedama.—Efese 2:12.
Ukubethelela ukuzimela geqe koluntu, iBhayibhile ibhekisela kwabo bangeyiyo inxalenye yentsapho kaThixo ngokuba ‘ziintshaba.’ (Roma 5:8, 10) Ukwahlukaniswa noThixo kuye kwafaka uluntu kulawulo olungqwabalala lukaSathana nemiphumo yesono nokungafezeki okukhokelela ekufeni. (Roma 5:12; 1 Yohane 5:19) Ngaba abantu abanesono banokuba yinxalenye yentsapho kaThixo? Ngaba abantu abangafezekanga banokuba ngabantwana bakaThixo njengoAdam noEva ngaphambi kokuba bone?
Ukuhlanganisa Abantwana Abahlukaniswe NoThixo
Ngothando, uYehova wenzela abantu abangafezekanga abamthandayo amalungiselelo ukuze kungenelwe bona. (1 Korinte 2:9) Umpostile uPawulos ucacisa esithi: “UThixo ngoKristu walixolelanisa naye ihlabathi, engazibaleli kubo izigqitho zabo.” (2 Korinte 5:19) Njengokuba kucaciswe kwinqaku elingaphambi kweli, uYehova uThixo walungiselela uYesu Kristu njengentlawulelo yezono zethu. (Mateyu 20:28; Yohane 3:16) Enombulelo umpostile uYohane wabhala wathi: “Hayi ubukhulu bothando lukaBawo kuthi, lokuba sibizwe ngokuba singabantwana bakaThixo.” (1 Yohane 3:1) Ngaloo ndlela, kwavulelwa ithuba lokuba uluntu oluthobelayo lube yinxalenye yentsapho kaYehova kwakhona.
Nakuba bonke abantu beya kuba yinxalenye yentsapho kaThixo emanyeneyo phantsi kwenyameko yoBawo wabo osezulwini, phawula ukuba iBhayibhile ibachaza ngokuthi bangamaqela amabini. Sifunda oku: “Yona ivumelana nokuthanda [kukaThixo] elungiselela ukuzaliseka kwamaxesha amisiweyo, okuba, kuhlanganiselwe zonke izinto kwakhona kuKristu, izinto ezisemazulwini nezinto ezisemhlabeni.” (Efese 1:9, 10) Kutheni uThixo elungiselela izinto ngaloo ndlela?
Indlela uYehova alungelelanisa ngayo abantwana bakhe ukuba babe ngamaqela amabini inegalelo kumanyano lwentsapho yakhe. Sikhona isizathu esivakalayo sokwenza oku. Kangangendlela enkulu ngayo intsapho kaThixo ifaniswa nohlanga. Kuso nasiphi na isizwe kukhethwa abantu abambalwa abaza kubumba urhulumente ukuze kubekho ulungelelwano. Kakade, akakho urhulumente wabantu oye wazisa uxolo lokwenyaniso, kodwa uThixo ulungiselele ukuba intsapho yakhe ibe norhulumente ogqibeleleyo. Iqela lokuqala, “izinto zasezulwini,” libunjwa ngabantwana bakaThixo uYehova abakhethe bangurhulumente okanye uBukumkani basezulwini. Apho, “baza kulawula njengookumkani phezu komhlaba.”—ISityhilelo 5:10.
Abantwana BakaThixo Emhlabeni
Kwangaxeshanye, uYehova uqokelela “izinto zasemhlabeni” oko kukuthi izigidi zabantu emhlabeni wonke ukuze ekugqibeleni babe ngabantwana bakhe basemhlabeni. NjengoBawo onobubele, ubafundisa iindlela zakhe zothando ukuze nangona besuka kwiintlanga ezahlukeneyo bakwazi ukumanyana. Nkqu nabantu abaziindlobongela, abazingcayo, abaziphethe kakubi nabangamthobeliyo uThixo bayamenywa ukuba ‘baxolelaniswe noThixo.’—2 Korinte 5:20.
Kuthekani ngabo basigatyayo isimemo sokuba baxolelaniswe noThixo ukuze babe ngabantwana bakhe? Ukuze aqinisekise ukuba intsapho yakhe iseluxolweni yaye imanyene, uYehova uza kubohlwaya qatha abanjalo. Kuza kubakho “imini yomgwebo neyentshabalalo yabantu abangenabuthixo.” (2 Petros 3:7) UThixo uza kuwucoca umhlaba ngokubasiphula neengcambu abavukeli. Kuya kutsho kuthi qabu unoqolomba efile nje!—INdumiso 37:10, 11.
Kuya kulandela iminyaka eliwaka yoxolo, apho bonke abasabela kuthando lukaThixo beya kubuyiselwa ngokuthe ngcembe kubomi bemfezeko obalahlwa nguAdam. Nabafileyo baya kuvuswa. (Yohane 5:28, 29; ISityhilelo 20:6; 21:3, 4) Ngaloo ndlela uThixo uya kuzaliseka isithembiso sakhe sokuba: “Indalo [engabantu] ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.”—Roma 8:21.
Ukumanyaniswa NoYihlo
UCézar namawaka abantu baseKorea ebesithethe ngabo kwingabula zingcawu yeli nqaku kwafuneka benze okuthile ukuze bamanyaniswe neentsapho zabo. Abantu abaseKorea kwafuneka bazibandakanye nephulo alalimiselwe yaye uCézar kwafuneka ashiye intsapho eyayifumile awayehlala nayo. Ngokufanayo, ufanele uthabathe amanyathelo okuxolelaniswa noYihlo osemazulwini uYehova uThixo ukuze ube yinxalenye yentsapho yakhe. Yintoni ofanele uyenze?
Ukuze usondele kuThixo njengoYihlo, ufanele ufundisise iLizwi lakhe iBhayibhile ukuze ube nokholo olomeleleyo kuye nakwizithembiso zakhe. Ufanele ube nentembelo yokuba nantoni na uThixo akufundisa yona iza kukunceda. Kwakhona kuza kufuneka wamkele ukulungiswa nokuqeqeshwa nguThixo kuba iBhayibhile ithi kumaKristu: “UThixo uniphethe njengoonyana bakhe. Kuba nguwuphi na unyana ongaqeqeshwayo nguyise?”—Hebhere 12:7.
Ukuthabatha la manyathelo kuya kuyitshintsha indlela ophila ngayo. Ithi iBhayibhile: “Mawahlaziyeke amandla engqondo yenu, nambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.” (Efese 4:23, 24) Emva koko landela isibongozo sompostile uPetros esithi: “Njengabantwana abathobelayo, musani ukumilisa ngokweminqweno enaninayo ngaphambili ekungazini kwenu.”—1 Petros 1:14.
Ukufumana Intsapho Yakho Yokwenene
Xa uCézar wafumana unina, wafumanisa ukuba wayenomkhuluwa wakhe nosisi wakhe. Nawe, xa usondela kuYihlo osemazulwini uya kufumanisa ukuba unabazalwana noodade abaninzi kwibandla lamaKristu. Njengokuba unxulumana nabo, uya kufumanisa ukuba basondele kakhulu kuwe ngaphezu kwabantwana ozalwa nabo.—IZenzo 28:14, 15; Hebhere 10:24, 25.
Uyamenywa ukuba umanyane noYihlo nabazalwana noodadewenu bokwenene. Uvuyo oya kuba nalo luya kufana nqwa nolo lwafunyanwa nguCézar namawaka abantu baseKorea xa babedityaniswa neentsapho zabo kwakhona.
[Umfanekiso okwiphepha 8]
UCézar eneminyaka eli-19 ubudala nonina
[Imifanekiso ekwiphepha 10]
Thabatha amanyathelo okusondela kuThixo