Nceda Abantwana Bakho Bahlangabezane Neengxaki Zabo Ezininzi

ABANTWANA bethu bajamelene neengxaki ezinzima. Baphila kwihlabathi elingendawo nelinomoya kaSathana yaye bamele balwisane ‘neenkanuko zobutsha.’ (2 Tim. 2:22; 1 Yoh. 5:19) Ngaphezulu, kuba befuna ‘ukukhumbula uMdali wabo Ozukileyo,’ bayagculelwa, bade maxa wambi bahlaselwe ngabo bachase iinkolelo zabo. (INtshu. 12:1) Ecinga ngexesha lokukhula kwakhe, omnye umzalwana ogama linguVincent uthi: “Ndandisoloko ndihlaselwa okanye ndingcungcuthekiswa, abanye babede bafune ukulwa nam kuba ndiliNgqina. Amaxesh’ amaninzi kwakuba kubi kangangokuba ndandide ndingafuni nokuya esikolweni.”a

Ngaphandle kwezo ngcinezelo zehlabathi, kusenokufuneka oonyana bethu okanye iintombi zethu zilwisane nokufuna ukufana noontanga bazo. Omnye udade okwishumi elivisayo ogama linguCathleen uthi: “Akukho mnandi xa abanye bekujonga njengomntu owahlukileyo.” UAlan ongumzalwana oselula uthi: “Abantwana endandifunda nabo babedla ngokundimema ngeempela-veki yaye ndandikubawela ukuhamba nabo.” Ngapha koko, abantu abaselula bakunqwenela kakhulu ukuba nenxaxheba kwimidlalo yesikolo, nto leyo enokwenza babe nonxulumano olubi. UTanya ongudade oselula uthi: “Ndiyazithanda ezemidlalo. Abaqeqeshi bezemidlalo esikolweni babefuna ndingene kumaqela abo. Kwakuba nzima ukwala.”

Unokubanceda njani abantwana bakho bahlangabezane neengxaki zabo ezininzi? UYehova unike abazali umyalelo wokuba baqeqeshe abantwana babo. (IMize. 22:6; Efe. 6:4) Injongo yabazali aboyika uThixo kukukhulisa umnqweno wokuthobela uYehova ezintliziyweni zabantwana babo. (IMize. 6:20-23) Ngenxa yoko, abantwana baya kukwazi ukumelana neengcinezelo zehlabathi kwanaxa bengekho phambi kwabazali babo.

Kuba nzima ngabazali ukwenza umsebenzi wokuziphilisa, ukukhulisa intsapho nokwenza imisebenzi yebandla—zonke ezi zinto bezenza ngaxeshanye. Bambi benza le misebenzi bengenawo amaqabane omtshato okanye bejamelene nenkcaso yeqabane elingakholwayo. Ngoko yintoni onokuyenza ukuze uncede abantwana bakho bakwazi ukumelana nengcinezelo yoontanga, izilingo nokungcungcuthekiswa mihla le?

Ukuba Nolwalamano Olusondeleyo NoYehova

Okokuqala abantu abaselula bafanele bazi ukuba uYehova nguMntu wokwenene. Kufuneka bancedwe ‘bambone Lowo ungabonakaliyo.’ (Heb. 11:27) UVincent, okhankanywe ngaphambilana, ukhumbula indlela abazali bakhe abamnceda ngayo ukuze abe nolwalamano olusondeleyo noYehova. Uthi: “Bandifundisa ukuba kubalulekile ukuthandaza. Ndisakhumbula ukuba ndaqala ndisemncinci ukuthandaza kuYehova yonke imihla ebusuku ngaphambi kokuba ndilale. UYehova waba ngumntu wokwenene kum.” Ngaba uyathandaza nabantwana bakho? Kutheni ungaphulaphuli ukuba bathini xa bethandaza kuYehova? Ngaba baphindaphinda into enye? Okanye ngaba bayakwazi ukuzityand’ igila kuYehova? Xa uphulaphula imithandazo yabo, uya kukwazi ukubona enoba benza inkqubela yokomoya kusini na.

Enye indlela ebalulekileyo abantu abaselula abanokusondela ngayo kuYehova kukufunda iLizwi likaThixo. UCathleen okhankanywe ngaphambilana uthi: “Ukufunda iBhayibhile ndisemncinci kwandinceda. Kwandiqinisekisa ukuba nokuba abanye abantu abandithandi, uYehova ungakum.” Ngaba abantwana bakho banalo ucwangciso lokufunda iBhayibhile?—INdu. 1:1-3; 77:12.

Liyinyaniso elokuba abantwana abalwamkeli ngendlela efanayo uqeqesho lwabazali. Nokukhula kwabo ngokomoya kunokuxhomekeka kwiminyaka yabo. Kodwa xa abaselula bengafundiswa, kuya kuba nzima ukuba bamazi uYehova njengoMntu wokwenene. Abazali kufuneka babethelele amazwi kaThixo ebantwaneni babo ukuze bayazi indlela uYehova avakalelwa ngayo enoba baphi na. (Dut. 6:6-9) Abantwana bakho kufuneka bakholelwe ukuba uYehova ubakhathalele.

Indlela Ephumelelayo Yokunxibelelana

Enye indlela ebalulekileyo onokunceda ngayo abantwana bakho, lunxibelelwano. Eneneni, unxibelelwano asikokuthetha nje nabantwana bakho. Luquka ukubuza imibuzo uze uphulaphule ngenyameko xa bephendula—enoba baphendula ngendlela eyahlukileyo kwinto wena obuyicinga. UAnne onoonyana ababini uthi: “Ndiye ndibabuze imibuzo de ndikuqonde kakuhle oko bakucingayo nezinto abajamelana nazo ebomini babo.” Ngaba abantwana bakho bavakalelwa kukuba uyabaphulaphula xa bethetha nawe? UTanya okhankanywe ngaphambilana uthi: “Abazali bam babendiphulaphula xa ndithetha yaye babengayilibali into ebesithethe ngayo. Babewazi amagama abantwana endandifunda nabo. Babedla ngokundibuza ngabo nangezinye izinto ebesizithethe ngaphambili.” Ukuphulaphula nokukhumbula into ebenithethe ngayo kubalulekile.

Iintsapho ezininzi ziye zafumanisa ukuba xa kutyiwa, kuvuleka amathuba onxibelelwano. UVincent uthi: “Ukutyela ndawonye sasikugqala njengento ebalulekileyo ekhaya. Kwakufuneka sihlale etafileni njengentsapho ngalo lonke ixesha. Sasingavunyelwa ukuba sibukele umabonwakude, siphulaphule unomathotholo okanye sifunde xa kutyiwa. Amaxesha amaninzi sasincokola nje ngezinto eziqhelekileyo yaye le ndlela yokuncokola yayindinceda ndifumane isicombululo seengxaki neengcinezelo zasesikolweni.” Wongezelela athi: “Ukuqhelana nokuthetha nabazali bam ngexesha lesidlo kwakundinceda ndizive ndikhululekile ukuthetha nabo xa ndifuna bandincede kwizinto ezibalulekileyo.”

Zibuze, ‘Zingaphi izihlandlo evekini esitya ngazo sonke njengentsapho?’ Xa ninokwenza uhlengahlengiso, ngaba loo nto inokuninceda nifumane amathuba angakumbi okuncokola nabantwana benu?

Indlela Ekubaluleke Ngayo Ukuba Siqhelisele

UNqulo Lwentsapho olwenziwa qho ngeveki luvula amathuba okuncokola yaye loo nto inceda abaselula bakwazi ukujamelana neengxaki zabo. UAlan ekuthethwe ngaye ngaphambili uthi: “Xa sifunda njengentsapho, abazali bam babesenza sikhululeke. Babethetha ngezinto ababesazi ukuba ziya kusinceda kwiingxaki esijamelene nazo.” Unina ka-Alan uthi: “Xa sifunda sasiye sibe nalo nexesha lokuqhelisela nabantwana bethu into abanokuyenza xa bejamelene neengxaki. Oku kwakubanceda bafunde indlela yokumela ukholo lwabo baze babonise ukuba izinto abazikholelwayo ziyinyaniso. Kwakubenza babe nesibindi sokujamelana neengxaki.”

Eneneni, xa abantwana bejamelene nengcinezelo yoontanga, kufuneka okungakumbi kunokusuka nje bangavumi baze bemke kuloo ndawo. Bafanele bakwazi ukuphendula xa bebuzwa isizathu sokuba benze into ethile okanye bangayenzi. Bafanele baqiniseke ngento abaya kuyenza xa begculelwa ngenxa yeenkolelo zabo. Xa bengakwazi ukuthethelela iinkolelo zabo, kuya kuba nzima ukuba bakwazi ukumela unqulo lokwenyaniso. Amaxesha okuqhelisela aya kubanceda babe nesibindi.

Kwibhokisi ekwiphepha 18 kuchazwa ezinye zeengxaki abantwana abanokudibana nazo yaye nisenokuqhelisela indlela abanokuhlangabezana ngayo nazo ngexesha loNqulo Lwentsapho. Xa niqhelisela, babuze imibuzo ukuze bakwazi ukuxhasa iimpendulo zabo. Hlolisisani nezinto abanokuzifunda kwimizekelo eseBhayibhileni. Ngokuqinisekileyo olo qeqesho luya kubanceda abantwana bakho ukuba bakwazi ukuhlangabezana neengxaki esikolweni nakwezinye iindawo.

Ikhaya—Ngaba Yindawo Ekhuselekileyo?

Ngaba abantwana bakho bayakuvuyela ukugoduka suku ngalunye xa kuphuma isikolo? Ukuba ikhaya lenu yindawo ekhuselekileyo, loo nto iya kunceda abantwana bakho bakwazi ukujamelana neengxaki zabo. Omnye udade oseBheteli ngoku, uthi: “Enye yezona zinto zibalulekileyo zandincedayo ekukhuleni kwam kukuba ndandiziva ndikhuselekile xa ndisekhaya. Enoba kwakunzima kangakanani na esikolweni ndandisazi ukuba izinto ziza kulunga ukufika kwam ekhaya.” Kunjani kwelenu ikhaya? Ngaba kukho ‘ukugqajukelwa yimisindo, usukuzwano, nezahlukano’, okanye ngaba kukho ‘uthando, uvuyo noxolo’? (Gal. 5:19-23) Ukuba uxolo alukho, ngaba uye uzame ukubona into eninokuyenza ukuze abantwana bakho bazive bekhuselekile xa besekhaya?

Enye indlela onokunceda ngayo abantwana bakho ukuba bakwazi ukujamelana neengxaki kukubanceda bafumane unxulumano olwakhayo. Ngokomzekelo, kutheni ungamemi abazalwana noodade basebandleni abakhulileyo ngokomoya xa nizihlaziya njengentsapho? Okanye ngaba unokupheka isidlo esilula uze umeme umveleli ohambahambayo okanye abanye abakwinkonzo yexesha elizeleyo? Ngaba kukho abathunywa bevangeli okanye amalungu aseBheteli owaziyo anokuba ngabahlobo babantwana bakho, abanokubhalelana nabo iileta, iie-mail okanye bafowunelane nabo? Unxulumano olunjalo lunokubanceda abantwana bakho bakwazi ukuzibekela usukelo lwezinto zokomoya. Cinga nje ngendlela umpostile uPawulos awaba nempembelelo entle ngayo kuTimoti. (2 Tim. 1:13; 3:10) Ukunxulumana kukaTimoti noPawulos kwamnceda ukuba akwazi ukuzibekela usukelo lokomoya.—1 Kor. 4:17.

Bancome Abantwana Bakho

UYehova uyakholiswa kukubona abaselula bemela okulungileyo nakuba bejamelene neengcinezelo kweli hlabathi likaSathana. (INdu. 147:11; IMize. 27:11) Ngokuqinisekileyo nawe uyavuyiswa kukubona abaselula bekhetha elona khondo lobulumko. (IMize. 10:1) Baxelele abantwana bakho indlela ovakalelwa ngayo ngabo, ubancome rhoqo. UYehova wabamisela umzekelo omhle abazali. Xa uYesu wayebhaptizwa, uYehova wathi: “UnguNyana wam, oyintanda; ndikholisiwe nguwe.” (Marko 1:11) Eso siqinisekiso sivela kuYise simele ukuba samomeleza ngokwenene uYesu ukuze akwazi ukuhlangabezana neengxaki ezaziphambi kwakhe! Ngokufanayo, nawe baxelele abantwana bakho ukuba uyabathanda uze ubancome ngezinto ezintle abazenzayo.

Liyinyaniso elokuba, akunakubakhusela ngokupheleleyo abantwana bakho kwiingcinezelo, ekungcungcuthekisweni nakugculelo. Sekunjalo ininzi into onokuyenza ukuze ubancede. Njani? Bancede babe nolwalamano olusondeleyo noYehova. Vula amathuba encoko eyakhayo. Lisebenziseni kakuhle ixesha enenza ngalo uNqulo Lwentsapho nize nenze ikhaya lenu libe yindawo ekhuselekileyo. Xa usenjenjalo, uya kuxhobisa abantwana bakho ukuze bakwazi ukujamelana neengxaki ezininzi.

[Umbhalo osemazantsi]

[Ibhokisi/Umfanekiso okwiphepha 18]

UKUQHELISELA KUNOKUBA LUNCEDO

Nantsi eminye yemizekelo yezinto abantu abaselula abanokujamelana nazo. Kutheni ningaqheliseli indlela yokujamelana nezi ngxaki ngexesha loNqulo Lwentsapho?

▸ Umqeqeshi weqela lezemidlalo ucela intombi yakho ukuba idlale kwiqela labadlali besikolo.

▸ Xa esendleleni evela esikolweni, unyana wakho unikwa umdiza ukuba atshaye.

▸ Kukho amakhwenkwe athembisa unyana wakho ngokumbetha ukuba aphinde ambona eshumayela.

▸ Ngoxa intombi yakho ingena kwindlu ngendlu enkonzweni yasentsimini, idibana nomntwana efunda naye esikolweni.

▸ Intombi yakho ibuzwa phambi kweklasi isizathu sokuba ingakhahleli iflegi.

▸ Kukho inkwenkwe esoloko igculela unyana wakho ngenxa yokuba eliNgqina.

[Umfanekiso okwiphepha 17]

Ngaba abantwana bakho banalo ucwangciso lokufunda iBhayibhile?

[Umfanekiso okwiphepha 19]

Ngaba uyabamema abazalwana noodade basebandleni abakhulileyo ngokomoya xa nizihlaziya njengentsapho?