Yiba Ngumlandeli KaKristu Wokwenene

“Wonke umthi olungileyo uvelisa isiqhamo esihle, kodwa wonke umthi obolileyo uvelisa isiqhamo esingento yanto.”—MAT. 7:17.

1, 2. Abalandeli bakaKristu bokwenene bahluke ngantoni kwabo bobuxoki, ingakumbi kweli xesha lesiphelo?

UYESU wathi abantu ababeya kuzibanga bengabakhonzi bakhe bexoka, babeya kwahluka kubalandeli bakhe bokwenyaniso ngeziqhamo zabo—iimfundiso zabo nendlela abaziphethe ngayo. (Mat. 7:15-17, 20) Kakade ke, umntu uphenjelelwa zizinto ezisengqondweni nezisentliziyweni yakhe. (Mat. 15:18, 19) Abo bondliwa ngeemfundiso zobuxoki bavelisa “isiqhamo esingento yanto” ngoxa abo bafundiswa inyaniso bevelisa “isiqhamo esihle.”

² Ezi ndidi zimbini zeziqhamo ziye zacaca ebudeni beli xesha lesiphelo. (Funda uDaniyeli 12:3, 10.) AmaKristu obuxoki anembono ephosakeleyo ngoThixo yaye ayahanahanisa kuzinikelo lwawo lobuthixo, kanti lawo anolwazi oluchanileyo anqula uThixo “ngomoya nenyaniso.” (Yoh. 4:24; 2 Tim. 3:1-5) Azama ukubonakalisa iimpawu ezifana nezikaKristu. Kodwa kuthekani ngawe siqu? Njengoko uhlolisisa ezi mpawu zintlanu zilandelayo zamaKristu okwenyaniso, zibuze: ‘Ngaba indlela endiziphethe ngayo nendifundisa ngayo iyavisisana neLizwi likaThixo? Ngaba ndiyenza ibe nomtsalane inyaniso kwabo bayifunayo?’

Ukuphila Ngokuvisisana NeLizwi LikaThixo

3. UYehova ukholiswa yintoni yaye kuthetha ntoni oku kumaKristu okwenyaniso?

³ UYesu wathi, “Asingabo bonke abathi kum, ‘Nkosi, Nkosi,’ abaya kungena ebukumkanini bamazulu, kodwa ngulowo wenza ukuthanda kukaBawo osemazulwini oya kungena.” (Mat. 7:21) UYehova akakholiswa kukuba sitsho nje ngomlomo ukuba singamaKristu kodwa into emkholisayo kukuba senze izinto alindele ukuba sizenze. Oko kuquka indlela abaphila ngayo abalandeli bokwenene bakaKristu, indlela abajonga ngayo imali, imisebenzi yempangelo, ukuzonwabisa, izithethe nemibhiyozo yehlabathi, umtshato kunye nolwalamano lwabo nabanye abantu. Kodwa amaKristu obuxoki anesimo sengqondo sehlabathi eliye lazityeshela iindlela zobuthixo kule mihla yokugqibela.—INdu. 92:7.

4, 5. Sinokuwasebenzisa njani amazwi kaYehova akuMalaki 3:18 ebomini bethu?

⁴ Ngokuvisisana noku, umprofeti uMalaki wabhala wathi: “Nina niya kuwubona kwakhona umahluko phakathi kwelungisa nongendawo, phakathi kwalowo ukhonza uThixo nalowo ungamkhonzanga.” (Mal. 3:18) Njengoko ucinga ngala mazwi, zibuze: ‘Ngaba ndiyafana nabantu behlabathi, okanye ngaba ndahlukile kubo? Ngaba ndisoloko ndizama ukwamkeleka kubantu endinxulumana nabo, enoba kusesikolweni okanye emsebenzini, okanye ngaba ndisoloko ndibambelele ngokuqinileyo kwimigaqo yeBhayibhile ndide ndiyimele xa kuyimfuneko? (Funda eyoku-1 kaPetros 3:16.) Kakade ke, asifuni kuzenza ngcwele, kodwa sifuna ukwahluka kwabo bangamthandiyo nabangamkhonziyo uYehova.

⁵ Ukuba ubona kukho indawo onokuphucula kuyo, kutheni ungathandazi ngalo mba uze uzixhobise ngokufunda iBhayibhile, ngomthandazo nangokuya rhoqo kwiintlanganiso? Okukhona ukwenza oko ukufunda kwiLizwi likaThixo, kokukhona uya kuvelisa “isiqhamo esihle,” esiquka “isiqhamo semilebe evakalisa ekuhleni igama [likaThixo].”—Heb. 13:15.

Shumayela NgoBukumkani BukaThixo

6, 7. Kumba wokushumayela ngoBukumkani, nguwuphi umahluko okhoyo phakathi kwamaKristu okwenyaniso nawobuxoki?

⁶ UYesu wathi: “Ndimele ndizivakalise iindaba ezilungileyo zobukumkani bukaThixo nakwezinye izixeko, ngenxa yokuba ndithunywe oko.” (Luka 4:43) Kwakutheni ukuze uYesu abalaselise uBukumkani bukaThixo kubulungiseleli bakhe? Wayesazi ukuba njengoKumkani wobo Bukumkani ekunye nabazalwana bakhe abavusiweyo abathanjiswe ngomoya oyingcwele, baza kuzisiphula neengcambu iingxaki eziphambili zoluntu—isono noMtyholi. (Roma 5:12; ISityhi. 20:10) Ngoko wayalela abalandeli bakhe ukuba bavakalise obo Bukumkani de kuphele le nkqubo yezinto. (Mat. 24:14) Abantu abatsho nje ngomlomo ukuba bangabalandeli bakaKristu abawenzi lo msebenzi—enyanisweni, abakwazi kuwenza. Ngoba? Kungenxa yezi zizathu zithathu: Okokuqala, abanakukwazi ukushumayela ngento abangayaziyo. Okwesibini, abaninzi kubo abathobekanga yaye abanayo inkalipho yokujamelana nokugculelwa nenkcaso evela kubamelwane xa sishumayela kubo ngoBukumkani. (Mat. 24:9; 1 Pet. 2:23) Yaye okwesithathu, amaKristu obuxoki akanawo umoya kaThixo.—Yoh. 14:16, 17.

⁷ Kwelinye icala, abalandeli bakaKristu bokwenene bayabazi uBukumkani bukaThixo nento obuya kuyiphumeza. Ngaphezu koko, babubeka kuqala obo Bukumkani, yaye babuvakalisa ehlabathini lonke bencedwa ngumoya oyingcwele kaYehova. (Zek. 4:6) Ngaba wena uwenza rhoqo lo msebenzi? Ngaba uzama ukuba ngumvakalisi woBukumkani ophumelelayo, mhlawumbi ngokuchitha ixesha elingakumbi kubulungiseleli okanye ngokuhlakulela ubuchule obungakumbi? Abanye baye bazama ukuphucula ubulungiseleli babo ngokuyisebenzisa ngakumbi iBhayibhile. Umpostile uPawulos, owayeziqhelise ukuqiqa nabantu ngeZibhalo, wabhala wathi: “Ilizwi likaThixo liphilile, linamandla.”—Heb. 4:12; IZe. 17:2, 3.

8, 9. (a) Ngawaphi amava abonisa ukubaluleka kokusebenzisa iBhayibhile kubulungiseleli bethu? (b) Sinokubuphucula njani ubuchule bethu bokusebenzisa iLizwi likaThixo?

⁸ Xa wayesenza umsebenzi wendlu ngendlu, omnye umzalwana wafundela indoda engumKatolika uDaniyeli 2:44 waza wachaza indlela uBukumkani bukaThixo obuya kuzisa ngayo uxolo lokwenene nonqabiseko. Le ndoda yaphendula yathi: “Ndiyithanda gqitha into yokuba uye wavula iBhayibhile waza wandibonisa oko kuthethwa sisibhalo kunokusuka nje undixelele.” Xa omnye umzalwana wafundela ibhinqa elingumOthodoki wamaGrike isibhalo, eli bhinqa labuza imibuzo eliqela. Nakule meko, lo mzalwana owayehamba nomfazi wakhe, waphendula ngokusuka eBhayibhileni. Kamva, eli bhinqa lathi: “Niyasazi isizathu sokuba ndivume ukuncokola nani? Kungenxa yokuba nifike apha niphethe iBhayibhile naza nafunda ngokusuka kuyo.”

⁹ Kakade ke, iimpapasho zethu zibalulekile yaye sifanele sizisebenzise xa sisentsimini. Sekunjalo, eyona ncwadi simele siyisebenzise yiBhayibhile. Ngoko, ukuba ubungaqhelanga kuyisebenzisa ngokuthe rhoqo entsimini, kutheni ungakwenzi usukelo lwakho oko? Mhlawumbi unokukhetha iindinyana ezimbalwa ezicacisa uBukumkani bukaThixo nendlela obuya kuzicombulula ngayo iingxaki ezikhathaza abantu elumelwaneni lwakho. Emva koko, lungiselela ukuzifundela abantu xa ushumayela kwindlu ngendlu.

Lithwale Ngebhongo Igama LikaThixo

10, 11. Kumba wokusetyenziswa kwegama likaThixo, nguwuphi umahluko okhoyo phakathi kukaYesu nabaninzi abazibanga bengabalandeli bakhe?

¹⁰ “‘Ningamangqina am,’ utsho uYehova, ‘yaye mna ndinguThixo.’” (Isa. 43:12) UYesu, oliNgqina likaYehova eliphambili, wakugqala njengelungelo ukuthwala igama likaThixo nokulazisa ebantwini. (Funda iEksodus 3:15; uYohane 17:6; amaHebhere 2:12.) Eneneni, ngenxa yokuvakalisa kukaYesu igama likaYise, wabizwa ngokuthi ‘liNgqina Elithembekileyo.’—ISityhi. 1:5; Mat. 6:9.

¹¹ Ngokungafaniyo noko, abaninzi kwabo bazibanga bengabameli bakaThixo noNyana wakhe baye baba nesimo sengqondo esingafanelekanga ngegama likaThixo, bada balisusa kwiinguqulelo zabo zeBhayibhile. Eso simo sengqondo sibonakala nakumyalelo owanikwa oobhishophu bamaKatolika, othi “igama likaThixo elibhalwe ngoonobumba abane besiHebhere itetragrammaton, uYHWH alifanele lisetyenziswe” kunqulo.a Le asiyondlela efanelekileyo yokuqiqa.

12. Abakhonzi bakaYehova babonakala njani ngokucacileyo ngowe-1931?

¹² Exelisa uKristu ‘nelifu elikhulu lamangqina’ angaphambili, amaKristu okwenyaniso ayakuvuyela ukusebenzisa igama likaThixo. (Heb. 12:1) Enyanisweni, ngowe-1931 abakhonzi bakaThixo babonakala ngokucacileyo ukuba bakhonza uYehova ngokwamkela igama elithi amaNgqina kaYehova. (Funda uIsaya 43:10-12.) Ngaloo ndlela, abalandeli bakaKristu bokwenene baba ‘ngabantu ababizwa ngegama likaThixo.’—IZe. 15:14, 17.

13. Sinokuphila njani ngokuvisisana negama lethu esiliphiwe nguThixo?

¹³ Sinokuphila njani ngokuvisisana neli gama likhethekileyo? Enye into esinokuyenza kukukhuthala ekunikeleni ubungqina ngoThixo. UPawulos wabhala wathi: “Wonk’ ubani obiza egameni likaYehova uya kusindiswa. Noko ke, baya kubiza njani na kulowo bangakholwanga kuye? Baya kukholwa njani na kulowo bangevanga ngaye? Baya kuva njani na kungekho bani ushumayelayo? Baya kushumayela njani na bengathunywanga?” (Roma 10:13-15) Sifanele sibubhence ubuxoki obufundiswa ziicawa nobunyelisa uMdali wethu, njengemfundiso yesihogo eyenza uThixo wothando abonakale ekhohlakele njengoMtyholi.—Yer. 7:31; 1 Yoh. 4:8; thelekisa uMarko 9:17-27.

14. Baye bathini abanye xa beboniswa igama likaThixo?

¹⁴ Ngaba unebhongo lokuthwala igama likaYihlo wasezulwini? Ngaba unceda abanye ukuba balazi elo gama lingcwele? Elinye ibhinqa laseParis eFransi, leva ukuba amaNgqina kaYehova ayalazi igama likaThixo laza lacela ukuba elinye iNgqina lilibonise elo gama eBhayibhileni. Lalifundela iNdumiso 83:18 yaye eli bhinqa lachukumiseka. Laqalisa ukufunda iBhayibhile yaye ngoku likhonza ngokuthembeka kwelinye ilizwe. Xa elinye ibhinqa elingumKatolika elihlala eOstreliya labona igama likaThixo eBhayibhileni okokuqala, zathi waxa iinyembezi ngenxa yovuyo. Sele kudlule iminyaka emininzi ngoku linguvulindlela othe ngxi. Kutshanje, xa elinye iNgqina laseJamaica labonisa elinye ibhinqa igama likaThixo eBhayibhileni yalo, nalo lalila. Ngoko ke, yiba nebhongo ngokuthwala igama likaThixo, uze uxelise uYesu ngokwenza elo gama lixabisekileyo laziwe ngabantu bonke.

“Musani Ukulithanda Ihlabathi”

15, 16. AmaKristu okwenyaniso alijonga njani ihlabathi yaye yiyiphi imibuzo esifanele sizibuze yona?

¹⁵ “Musani ukulithanda ihlabathi nezinto ezisehlabathini. Nabani na olithandayo ihlabathi, uthando lukaBawo alukho kuye.” (1 Yoh. 2:15) Ihlabathi nomoya walo lichasene noYehova nomoya wakhe oyingcwele. Ngenxa yoko, abalandeli bakaKristu bokwenyaniso abaphephi nje kuphela ukuba yinxalenye yehlabathi. Balithiyile, kuba bayazi ukuba, njengoko umfundi uYakobi wabhalayo, “ubuhlobo kunye nehlabathi bubutshaba kunye noThixo.”—Yak. 4:4.

¹⁶ Kunokuba nzima ukulandela la mazwi kaYakobi kuba zininzi izilingo kweli hlabathi. (2 Tim. 4:10) Yiyo le nto uYesu wathandazela abalandeli bakhe wathi: “Ndiyakucela, kungekhona ukuba ubasuse ehlabathini, kodwa ukuba ubalinde ngenxa yalowo ungendawo. Abayonxalenye yehlabathi, kanye njengoko nam ndingeyonxalenye yehlabathi.” (Yoh. 17:15, 16) Zibuze: ‘Ngaba ndiyazama ukungabi yonxalenye yehlabathi? Ngaba abanye bayazazi iinkolelo zam ngokuphathelele imibhiyozo nezithethe ezichaseneyo neZibhalo, kuquka ezo zingenamvelaphi yobuhedeni kodwa ezicacileyo ukuba zibonisa umoya wehlabathi?’—2 Kor. 6:17; 1 Pet. 4:3, 4.

17. Yintoni enokubangela abantu abantliziyo zinyanisekileyo bafune ukukhonza uYehova?

¹⁷ Eneneni, nangona iinkolelo zethu ezisekelwe eBhayibhileni zingazukuthandwa lihlabathi, bakhona abantliziyo zinyanisekileyo abaza kuba nomdla kuzo. Xa abantu bebona ukuba sinokholo olunzulu eZibhalweni yaye siphila ngokuvisisana nalo, ngokungathi kunjalo baya kuthi kubathanjiswa: “Siza kuhamba nani, kuba sivile ukuba uThixo unani.”—Zek. 8:23.

Bonakalisa Uthando Olunyanisekileyo LobuKristu

18. Yintoni ebandakanyekileyo ekuthandeni uYehova nommelwane?

¹⁸ UYesu wathi: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela” waphinda wathi, “uze umthande ummelwane wakho njengawe siqu.” (Mat. 22:37, 39) Olo thando (ua·gaʹpe ngesiGrike) luthando lomgaqo olubandakanya imbopheleleko nokuphatha abantu ngendlela efanelekileyo yaye ludla ngokuquka imvakalelo enamandla. Lunokufudumala yaye lube nzulu. (1 Pet. 1:22) Lwahlukile ekuzingceni, lubonakala ngokuthetha nangokwenza izinto ngokungazingci.—Funda eyoku-1 kwabaseKorinte 13:4-7.

19, 20. Balisa amava abonisa ukuba uthando lobuKristu lunamandla.

¹⁹ Njengoko uthando lusisiqhamo somoya oyingcwele kaThixo, lubangela ukuba amaKristu okwenyaniso enze into abangenakukwazi ukuyenza abanye abantu, njengokoyisa imiqobo yobuhlanga, yezithethe neyezopolitiko. (Funda uYohane 13:34, 35; Gal. 5:22) Abantu abanjengezimvu bayachukumiseka xa bebona olu thando. Ngokomzekelo, xa omnye umfana womYuda wakwaSirayeli wayeqala ukuya kwiintlanganiso zamaKristu, wothuka akubona abazalwana abangamaYuda nabangama-Arabhu bekhonza uYehova ndawonye. Ngenxa yoko waqalisa ukuya rhoqo kwiintlanganiso waza wavuma ukuqhutyelwa isifundo seBhayibhile. Ngaba nawe ubathanda ngaloo ndlela abazalwana bakho? Yaye ngaba ubamkela ngobubele abantu abaqalayo ukuza kwiHolo yoBukumkani, kungakhathaliseki ukuba ngabaluphi uhlanga, ibala okanye bakuwuphi umgangatho wokuphila?

²⁰ NjengamaKristu okwenyaniso siyazama ukubathanda bonke abantu. Omnye umvakalisi oselula wase-El Salvador wayeqhuba isifundo seBhayibhile kunye nebhinqa elingumKatolika elineminyaka engama-87 ubudala nelaliyithanda gqitha icawa yalo. Ngenye imini, eli bhinqa lagula kakhulu laza lalaliswa esibhedlele. Ekuphumeni kwalo esibhedlele, amaNgqina ayelityelela aze aqinisekise ukuba linako ukutya. Ayenza le nto isithuba esingangenyanga. Akukho namnye kubantu becawa yalo oweza kulityelela. Waba yintoni umphumo? Lalahla yonke imifanekiso yalo eqingqiweyo, layeka ukuba lilungu lecawa laza laqhubeka nesifundo seBhayibhile. Ngokwenene, uthando lobuKristu lunamandla! Lunokufikelela iintliziyo zabantu nangaphezu kokuba kunokuba njalo xa beshunyayezwa.

21. Yintoni esinokuyenza ukuze ikamva lethu linqabiseke?

²¹ Kungekudala uYesu uya kuthetha la mazwi kwabo bazibanga bengabakhonzi bakhe: “Andizange ndinazi! Mkani kum, nina benzi bokuchasene nomthetho.” (Mat. 7:23) Ngoko, masivelise isiqhamo esibonisa intlonelo kuBawo nakuNyana. UYesu wathi: “Wonk’ ubani owevayo la mazwi am aze awenze uya kufaniswa nendoda eyingqondi, eyakha indlu yayo phezu kolwalwa.” (Mat. 7:24) Ukuba sizingqina singabalandeli bakaKristu bokwenene, uThixo uya kukholiswa sithi yaye siya kuba nekamva elinqabisekileyo ngokungathi lakhelwe phezu kolwalwa!

[Umbhalo osemazantsi]

Ngaba Uyakhumbula?

• Bahluke njani abalandeli bakaKristu kwabo bobuxoki?

• Chaza ezinye ‘zeziqhamo’ abonakala ngazo amaKristu okwenyaniso.

• Luluphi usukelo onokuzibekela lona ukuze uvelise iimpawu zobuKristu?

[Umfanekiso okwiphepha 13]

Ngaba uyisebenzisa rhoqo iBhayibhile entsimini?

[Umfanekiso okwiphepha 15]

Ngaba abanye bayazazi iinkolelo zakho ngokuphathelele imibhiyozo echaseneyo neZibhalo?