Ngaba Ufak’ Isandla Ekwakheni Abanye Kwiintlanganiso ZamaKristu?
“Xa nibuthelene, . . . zonke izinto mazenzelwe ukwakhana.”—1 KOR. 14:26.
1. Ngokutsho kweyoku-1 yabaseKorinte isahluko 14, yintoni eyona njongo yeentlanganiso zamaKristu?
‘EZI ntlanganiso zindakhile!’ Ngaba wakha wathetha amazwi afanayo emva kweentlanganiso kwiHolo yoBukumkani? Akuthandabuzeki ukuba wakha wawathetha loo mazwi! Ngokwenene iintlanganiso zebandla ziyakhuthaza ibe akumangalisi oko. Kaloku, njengakwimihla yamaKristu enkulungwane yokuqala, eyona njongo yeentlanganiso zethu namhlanje, kukusomeleza ngokomoya. Phawula indlela umpostile uPawulos ayigxininisa ngayo injongo yeentlanganiso zamaKristu kwincwadi yakhe yokuqala eya kwabaseKorinte. Kwisahluko 14, uphindaphinda ingongoma yokuba zonke iintlanganiso zebandla zilungiselelwe ‘ukwakha ibandla.’—Funda eyoku-1 yabaseKorinte 14:3, 12, 26.a
2. (a) Yintoni ebangela ukuba iintlanganiso zihlaziye? (b) Nguwuphi umbuzo esiza kuwuhlolisisa?
2 Siyayiqonda into yokuba ngumoya kaThixo obangela ukuba sakheke okanye sihlaziyeke kwiintlanganiso. Ngenxa yoko, ntlanganiso nganye siyiqalisa ngokuthandaza kuYehova sicela uBawo wethu wasezulwini ukuba ayisikelele ngomoya wakhe oyingcwele. Sekunjalo, siyazi ukuba onke amalungu ebandla anokuba negalelo ukuze iintlanganiso zethu zibe zezakhayo. Ngoko, zintoni esinokuzenza ukuze iintlanganiso zethu zeveki ngeveki eziqhutyelwa kwiHolo yoBukumkani zisihlaziye zize zisikhuthaze ngokomoya?
3. Zibaluleke kangakanani iintlanganiso zamaKristu?
3 Ukuze siphendule lo mbuzo, siza kuhlolisisa izinto ezifanele zikhunjulwe ngabo baqhuba iintlanganiso. Siza kuhlolisisa nendlela ibandla elinokwenza ngayo ukuze bonke abo beze kwiintlanganiso bahlaziyeke. Sinomdla koku, kuba iintlanganiso zethu zingcwele. Eneneni, ukuya kwiintlanganiso nokuba nenxaxheba kuzo yindlela ebalulekileyo esinqula ngayo uYehova.—INdu. 26:12; 111:1; Isa. 66:22, 23.
Intlanganiso Elungiselelwe Ukufundisa IBhayibhile
4, 5. Yintoni injongo yeSifundo seMboniselo?
4 Sonke sifuna ukungenelwa kwiSifundo seMboniselo seveki ngeveki. Ngenxa yoko, ukuze siqonde injongo ephambili yale ntlanganiso, makhe sihlolisise olunye lotshintsho olwenziwe kwiMboniselo nakumanqaku afundwayo.
5 Ukususela kwinkupho yokuqala yohlelo lokufundisa lweMboniselo kaJanuwari 15, 2008, kuye kwafakwa umfanekiso ophawulekayo kwiphepha elingaphandle. Ngaba uye wawuphawula? Jonga iphepha elingaphandle leli phephancwadi uliphetheyo. Ezantsi kwenqaba kukho iBhayibhile evuliweyo. Lo mfanekiso ugxininisa isizathu sokuba sibe neSifundo seMboniselo. Injongo yethu kukufundisisa iBhayibhile sisebenzisa eli phephancwadi. KwiSifundo seMboniselo seveki ngeveki, ‘kucaciswa ngokucokisekileyo’ iLizwi likaThixo, yaye njengakwixesha likaNehemiya wamandulo, ‘kuchazwa nentsingiselo yalo.’—Neh. 8:8; Isa. 54:13.
6. (a) Luluphi utshintsho oluye lwenziwa kwiSifundo seMboniselo? (b) Yintoni efanele ikhunjulwe ngokuphathelele izibhalo eziphawulwe ngokuthi “funda”?
6 Ngenxa yokuba eyona ncwadi siyifundayo iyiBhayibhile, kuye kwenziwa utshintsho kwiSifundo seMboniselo. Ecaleni kwezibhalo eziliqela ezikumanqaku afundwayo kubhalwe “funda.” Siyakhuthazwa sonke ukuba sityhile iiBhayibhile zethu ezintlanganisweni xa kufundwa ezi zibhalo. (IZe. 17:11) Ngoba? Xa sisifunda kwiiBhayibhile zethu isiluleko esivela kuThixo, sinokusichukumisa ngokunzulu. (Heb. 4:12) Ngenxa yoko, ngaphambi kokuba kufundwe isibhalo, umqhubi wesifundo ufanele alinde abaphulaphuli basityhile ukuze bahambisane nalowo ufundayo.
Sinexesha Elingakumbi Lokuvakalisa Ukholo Lwethu
7. Liliphi ithuba elisivulekeleyo kwiSifundo seMboniselo?
7 Kuye kwenziwa uhlengahlengiso nakubude bamanqaku esifundo seMboniselo. Kwiminyaka yakutshanje, aye enziwa mafutshane. Loo nto ibangela ukuba kuchithwe ixesha elincinane ekufundeni iziqendu zeMboniselo kuze kuvuleke ithuba elingakumbi lokugqabaza. Ngenxa yoko, kuvuleka ithuba lokuba kuphendule abantu abaninzi, kubekho ophendula umbuzo, ochaza indlela isibhalo esingena ngayo nobalisa amava amafutshane abonisa ubulumko bokulandela imigaqo yeBhayibhile. Kumele kuchazwe nemifanekiso ekwelo nqaku.—Funda iNdumiso 22:22; 35:18; 40:9.
8, 9. Yintoni efanele yenziwe ngumqhubi weSifundo seMboniselo?
8 Noko ke, elo thuba lokuba kugqabaze abantu abaninzi linokubakho kuphela xa kusenziwa amagqabaza amafutshane naxa lowo uqhuba iSifundo seMboniselo engathethi kakhulu. Ngoko, yintoni enokunceda umqhubi wesifundo nabo banikela amagqabaza kwiintlanganiso bagqabaze ngendlela eya kwenza bonke bakheke?
9 Ukuze siphendule lo mbuzo, masicinge ngalo mzekelo. ISifundo seMboniselo esiqhutywa kakuhle sifana nesipha seentyatyambo esihle kunene. Njengoko isipha esikhulu sisenziwa ngeentyatyambo ezahlukahlukeneyo, ngoko nakwiSifundo seMboniselo kugqabaza abantu abaninzi. Kanye njengokuba ezo ntyatyambo zingalingani yaye zingafani ngemibala, namagqabaza anikelwa kwiintlanganiso akalingani yaye anikelwa ngeendlela ezahlukeneyo. Yintoni efanele yenziwe ngumqhubi wesifundo? Amagqabaza akhe afanele afane namagqabi aluhlaza afakwe kakuhle phakathi kweentyantyambo. La magqabi akafakwa abe maninzi; kunoko, kuxhaswa ngawo iintyatyambo. Ngokufanayo, umqhubi wesifundo ufanele akhumbule ukuba asinguye ofanele agqabaze kakhulu kunoko wongezelela nje apha naphaya kumagqabaza anikelwa ngabanye ebandleni. Xa kudityaniswa amagqabaza amalungu ahlukahlukeneyo ebandla nawomqhubi wesifundo, kuphuma amazwi amyoli afana neentyatyambo ezintle, abangela uchulumanco kubo bonke abakhoyo.
“Masisoloko Sinikela KuThixo Umbingelelo Wendumiso”
10. AmaKristu okuqala ayezigqala njani iintlanganiso zebandla?
10 Indlela uPawulos azichaza ngayo iintlanganiso zamaKristu kweyoku-1 yabaseKorinte 14:26-33 isinceda sibone indlela iintlanganiso ezaziqhutywa ngayo ngenkulungwane yokuqala. Ethetha ngezi ndinyana, omnye umphengululi weBhayibhile uthi: “Kumele ukuba eyona nto yayiphawuleka ngayo inkonzo yeCawa yamandulo kukuba wonke umntu wayeziva enelungelo nembopheleleko yokuba nenxaxheba. Umntu wayengazi ngenjongo yokuba aphulaphule kuphela kodwa naye wayephos’ amazwi ambalwa.” Enyanisweni, amaKristu okuqala ayegqala iintlanganiso zebandla njengethuba lokuvakalisa ukholo lwawo.—Roma 10:10.
11. (a) Yintoni eyenza ukuba iintlanganiso zakhe yaye ngoba? (b) Ngawaphi amacebiso esinokuwasebenzisa ukuze siphucule indlela esigqabaza ngayo kwiintlanganiso? (Funda umbhalo osemazantsi.)
11 Ukuvakalisa ukholo lwethu kwiintlanganiso kubangela ukuba “ibandla lakheke.” Ngokuqinisekileyo enoba sele uneminyaka emininzi usiya kwiintlanganiso, kuyavuyisa ukuphulaphula amagqabaza abazalwana noodadewethu. Uyachukumiseka xa umzalwana okanye udade osele ekhulile enikela impendulo esuk’ entliziyweni; kuyakhuthaza nokuphulaphula amagqabaza enziwa ngumdala onenyameko; uncuma wedwa xa umntwana ekhwaza impendulo yakhe evakalisa uthando analo ngoYehova. Kucacile ukuba, xa sigqabaza kwiintlanganiso zamaKristu, sonke siba nesabelo ekuzenzeni zibe zezakhayo.b
12. (a) Yintoni esinokuyifunda kumzekelo kaMoses noYeremiya? (b) Umthandazo usinceda njani xa sifuna ukugqabaza?
12 Noko ke, abo baneentloni banokukufumanisa kunzima ukugqabaza. Ukuba nawe unaloo ngxaki, into enokukunceda kukukhumbula ukuba akuwedwa. Eneneni, nabakhonzi bakaThixo abathembekileyo abanjengoMoses noYeremiya babenengxaki yokuthetha esidlangalaleni. (Eks. 4:10; Yer. 1:6) Noko ke, kanye njengokuba uYehova wanceda abo bakhonzi bakhe bamandulo ukuba bamdumise ekuhleni, uThixo unokukunceda nawe ukuba unikele imibingelelo yendumiso. (Funda amaHebhere 13:15.) Yintoni onokuyenza ukuze uYehova akuncede uyeke ukoyika ukugqabaza? Okokuqala, ufanele ulungiselele kakuhle. Emva koko, ngaphambi kokuba uye kwiHolo yoBukumkani, thandaza kuYehova umcele ngokungqalileyo ukuba akuphe isibindi sokugqabaza. (Fil. 4:6) Kuba ucela into ‘evumelana nokuthanda kwakhe,’ qiniseka ukuba uYehova uya kuwuphendula umthandazo wakho.—1 Yoh. 5:14; IMize. 15:29.
Iintlanganiso Ezilungiselelwe ‘Ukusakha, Ukusikhuthaza Nokusithuthuzela’
13. (a) Iintlanganiso zifanele zibenze bavakalelwe njani abo bezileyo? (b) Nguwuphi umbuzo obaluleke kakhulu abafanele bacinge ngawo abadala?
13 UPawulos uthi injongo ephambili yeentlanganiso zebandla ‘kukwakha, ukukhuthaza nokuthuthuzela’ abo bakhoyo.c (1 Kor. 14:3) Abadala abangamaKristu banokuqinisekisa njani ukuba iintetho zabo ziyabakhuthaza yaye ziyabathuthuzela abazalwana noodade? Ukuze siphendule lo mbuzo masihlolisise intlanganiso eyaqhutywa nguYesu emva kokuvuswa kwakhe.
14. (a) Yintoni eyenzekayo ngaphambi kokuba uYesu abe nentlanganiso nabapostile bakhe? (b) Yintoni ekusenokwenzeka ukuba yabangela ukuba abapostile bakhe bavuye xa ‘uYesu esondela kubo aze athethe nabo’?
14 Okokuqala phawula izinto ezenzeka ngaphambi kwaloo ntlanganiso. Ngaphambi kokuba uYesu abulawe, abapostile bakhe ‘bamshiya, basaba,’ yaye njengoko kwakuxelwe kwangaphambili ‘bachithachithwa ngamnye waya endlwini yakhe.’ (Marko 14:50; Yoh. 16:32) Emva kokuvuswa kwakhe, uYesu wabizela abapostile bakhe ababedandathekile kwintlanganiso ekhethekileyo.d “Abafundi abalishumi elinanye baya eGalili entabeni apho uYesu wayebalungiselele khona.” Ekufikeni kwabo ‘uYesu wasondela waza wathetha nabo.’ (Mat. 28:10, 16,18) Cinga indlela abamele ukuba bavuya ngayo abapostile ngenxa yoko kwenziwa nguYesu! Wathini uYesu kubo?
15. (a) Ziziphi izinto uYesu awathetha ngazo kodwa yintoni angazange ayenze? (b) Baziva njani abapostile emva kwaloo ntlanganiso?
15 UYesu waqalisa ngala mazwi: “Linikwe mna lonke igunya.” Emva koko wabayalela wathi: ‘Hambani ke ngoko niyokwenza abafundi.’ Ekugqibeleni wabaqinisekisa wathi: “Ndinani yonke imihla.” (Mat. 28:18-20) Kodwa ngaba uyiphawulile into uYesu angazange ayenze? Akazange abakhalimele abapostile bakhe; okanye asebenzise loo ntlanganiso ukuze abangxolise okanye abenze bazive benetyala ngenxa yokuba nokholo olubuthathaka okwexeshana. Kunoko uYesu wabanika umsebenzi obalulekileyo nto leyo yabaqinisekisayo ukuba yena noYise bayabathanda. Baziva njani abapostile ngendlela uYesu awabaphatha ngayo? Baziva bakhekile, bekhuthazekile yaye bethuthuzelekile kangangokuba nakuba kwakusele kudlule ithuba emva kwaloo ntlanganiso, baqhubeka “befundisa kwaye bevakalisa iindaba ezilungileyo.”—IZe. 5:42.
16. Abadala abangamaKristu bawuxelisa njani umzekelo kaYesu ekuqhubeni iintlanganiso ngendlela ehlaziyayo?
16 Bexelisa uYesu, namhlanje abadala bajonga iintlanganiso njengethuba lokuqinisekisa abazalwana babo ukuba uYehova uyabathanda. (Roma 8:38, 39) Ngenxa yoko, xa benikela iintetho, abadala banikel’ ingqalelo kwizinto abazalwana babo abazenza kakuhle kungekhona kubuthathaka babo. Abasoloko bethandabuza izinto ezenziwa ngabazalwana babo. Kunoko, indlela abathetha ngayo ibonisa ukuba babagqala njengabantu abathanda uYehova nabafuna ukwenza okulungileyo. (1 Tes. 4:1, 9-12) Kakade ke, maxa wambi abadala kufuneka banikele isiluleko ebandleni kodwa xa kukho abantu ekufuneka balulekwe, bafanele balulekwe ngasese. (Gal. 6:1; 2 Tim. 2:24-26) Xa bethetha nebandla lonke, abadala bafanele balincome xa kuyimfuneko. (Isa. 32:2) Bazama ukuthetha ngendlela eya kwenza ukuba bonke abeze kwiintlanganiso bagoduke behlaziyekile.—Mat. 11:28; IZe. 15:32.
Indawo Ekhuselekileyo
17. (a) Kutheni kubaluleke ngakumbi ngoku ukuba iintlanganiso zethu zibe likhusi? (b) Yintoni onokuyenza ukuze iintlanganiso zibe zezakhayo? (Funda ibhokisi ethi “Iindlela Ezilishumi Zokwenza Iintlanganiso Zikwakhe Wena Nabanye.”)
17 Njengoko ihlabathi likaSathana liya lisicinezela ngakumbi, sifanele siqiniseke ukuba xa sikwiintlanganiso zethu zamaKristu sikwindawo ekhuselekileyo yaye bonke abakhoyo bafanele bathuthuzeleke. (1 Tes. 5:11) Omnye udade owanyamezela iimvavanyo kunye nomyeni wakhe kwiminyaka ethile eyadlulayo uthi: “Ukuba kwiHolo yoBukumkani kwakufana nokuba sezandleni zikaYehova ezinothando. Xa silapho, sikunye nabazalwana noodadewethu abangamaKristu kwakuba lula ukulahlela umthwalo wethu kuYehova yaye sasiziva sinoxolo lwengqondo.” (INdu. 55:22) Ngamana bonke abeza kwiintlanganiso bangaziva bekhuthazekile yaye bethuthuzelekile. Ukuze siqiniseke ukuba oko kuyenzeka, masiqhubeke sifak’ isandla ekwenzeni iintlanganiso zamaKristu zibe zezakhayo.
[Imibhalo esemazantsi]
a Kwaxelwa kwangaphambili ukuba ezinye zezinto ezazisenziwa kwiintlanganiso zamaKristu ngenkulungwane yokuqala zaziya kuyekwa. Ngokomzekelo, ‘asisathethi ngeelwimi’ yaye ‘asisaprofeti.’ (1 Kor. 13:8; 14:5) Sekunjalo, amazwi kaPawulos asinceda siqonde indlela ezifanele ziqhutywe ngayo iintlanganiso zamaKristu.
b Ukuze ufumane amacebiso okuphucula indlela esigqabaza ngayo kwiintlanganiso, funda iMboniselo kaSeptemba 1, 2003, iphepha 19-22.
c Xa ichaza umahluko phakathi ‘kokukhuthaza’ ‘nokuthuthuzela,’ iVine’s Expository Dictionary of Old and New Testament Words, ithi igama lesiGrike eliguqulelwe ngokuthi ‘ukuthuthuzela’ lihambisana “nokubonisa ulwazelelelo ngokungafaniyo [nokukhuthaza].”—Thelekisa uYohane 11:19.
d Kusenokwenzeka ukuba uPawulos wayebhekisela kwesi sihlandlo xa wayesithi uYesu “wabonakala kubazalwana abangaphezu kwamakhulu amahlanu.”—1 Kor. 15:6.
Ubuya Kuphendula Uthini?
• Zibaluleke kangakanani iintlanganiso zamaKristu?
• Kutheni amagqabaza enziwa kwiintlanganiso efak’ isandla ‘ekwakhiweni kwebandla’?
• Yintoni esinokuyifunda kwintlanganiso eyaqhutywa nguYesu nabalandeli bakhe?
[Ibhokisi/Imifanekiso ekwiphepha 22, 23]
IINDLELA EZILISHUMI ZOKWENZA IINTLANGANISO ZIKWAKHE WENA NABANYE
Lungiselela kwangaphambili. Xa uwulungiselela kwangaphambili umbandela oza kuxutyushwa kwiHolo yoBukumkani, iintlanganiso ziya kubangela umdla yaye uya kungenelwa ngakumbi.
Yibakho rhoqo. Ukubakho kwabantu abaninzi kwiintlanganiso kuyakhuthaza, ngoko ubukho bakho bubalulekile.
Fika kwangethuba. Ukuba ufika ngaphambi kokuba kuqaliswe, uya kubakho xa kuculwa ingoma yokuvula naxa kuthandazwa kuba leyo yenye yendlela esinqula ngayo uYehova.
Yiza nazo zonke iincwadi ezifunekayo. Yiza neBhayibhile yakho neempapasho eziza kusetyenziswa kwiintlanganiso ukuze ungenelwe.
Phepha izinto eziphazamisayo. Ngokomzekelo, imiyalezo ekwicell phone yifunde ukuphuma kweentlanganiso. Ngaloo ndlela izinto zakho zobuqu uya kuzenza ngexesha elifanelekileyo.
Yiba nenxaxheba. Xa bebaninzi abantu abagqabazayo, abantu bakhuthazeka ngakumbi kukuva abantu abahlukahlukeneyo bevakalisa ukholo lwabo.
Betha koomofu xa ugqabaza. Oku kuvulela abaninzi ithuba lokugqabaza.
Zenze izabelo zakho. Xa unesabelo kwiSikolo Sobulungiseleli Sobuthixo okanye kwiNtlanganiso yeNkonzo, silungiselele kakuhle, siqhelisele uze uzame ukubakho.
Ncoma abo bebenenxaxheba. Xelela abo bebenenxaxheba okanye abaye bagqabaza kwiintlanganiso indlela oyixabisa ngayo imigudu yabo.
Ncokola nabanye. Ukubulisa abanye ngobubele nokuncokola nabo ngaphambi kokuqalisa kweentlanganiso nasemva kwazo kubangela uvuyo neengenelo kwabo bezileyo.