Yiba Nenzondelelo Ngonqulo Lokwenene
“Isivuno sikhulu, kodwa abasebenzi bambalwa.”—MAT. 9:37.
1. Unokuyichaza njani into engxamisekileyo?
MASITHI unoxwebhu ekufanele ithi iphela imini lube lusezandleni zomntu othile. Uza kwenza ntoni? Ulubhala uthi “LUNGXAMISEKILE!” Usendleleni eya kwindawo ebalulekileyo, kodwa ushiywe lixesha. Uza kwenza ntoni? Uthi kumqhubi wemoto oyikhweleyo, “Khawubalekise torho; NDINGXAMILE!” Xa kukho into ekufuneka uyenzile libe nexesha lixhatshwa yinja, uye uzive ungakhululekanga. Izibilini ziba phezulu, yaye uye ugxabhagxabhise kangangoko kunokwenzeka. Iba njalo ke into xa ingxamisekile!
2. Nguwuphi owona msebenzi ungxamisekileyo ofanele wenziwe ngamaKristu okwenene namhlanje?
2 Owona msebenzi ungxamisekileyo ofanele wenziwe ngamaKristu okwenene namhlanje kukushumayela iindaba ezilungileyo zoBukumkani, nokwenza abafundi abantu bazo zonke iintlanga. (Mat. 24:14; 28:19, 20) Ecaphula amazwi kaYesu, umfundi uMarko wathi lo msebenzi ufanele wenziwe “kuqala,” oko kukuthi, ngaphambi kokuba isiphelo sifike. (Marko 13:10) Le yinto ekulindeleke ukuba yenzeke. UYesu wathi: “Isivuno sikhulu, kodwa abasebenzi bambalwa.” Isivuno asilindiswa; sifanele sihlanganiswe ngaphambi kokuba ixesha lokuvuna liphele.—Mat. 9:37.
3. Yintoni abanye abaye bayenza ukuze babe nenxaxheba kulo msebenzi ungxamisekileyo wokushumayela?
3 Ekubeni umsebenzi wokushumayela ungowona ubalulekileyo kuthi, sifanele siwunike ixesha, amandla nengqalelo yethu kangangoko kunokwenzeka. Kuyancomeka ukubona ukuba abaninzi benza kanye loo nto. Abanye baye baphila ubomi obulula ukuze babe kubulungiseleli bexesha elizeleyo njengoovulindlela okanye abathunywa bevangeli okanye bakhonze kumakhaya aseBheteli asehlabathini jikelele. Baxakekile ngumsebenzi wabo. Kusenokwenzeka ukuba kuye kwafuneka bancame izinto ezininzi, yaye mhlawumbi baye bajamelana neengxaki. Sekunjalo, uYehova ubanika intabalala yeentsikelelo. Sivuyisana nabo ngaloo nto. (Funda uLuka 18:28-30.) Abanye bona, nangona bengakwazi ukuba kwinkonzo yexesha elizeleyo, banikela ixesha elininzi kangangoko banako kulo msebenzi usindis’ ubomi, oquka ukunceda abantwana bethu ukuba basindiswe.—Dut. 6:6, 7.
4. Yintoni enokubangela abanye baphelelwe yimvo yongxamiseko?
4 Njengoko sibonile, ukungxamiseka kwento kudla ngokuxhomekeka kwixesha elisikiweyo, nakwinjongo emele ifikelelwe. Siphila kwixesha lesiphelo, yaye sinobungqina obuninzi—obuvela kwiZibhalo nobusuka kwimbali—obuxhasa loo nto. (Mat. 24:3, 33; 2 Tim. 3:1-5) Sekunjalo, akukho mntu ulaziyo elona xesha esiya kufika ngalo isiphelo. Xa wayechaza iinkcukacha ‘zomqondiso’ obonisa ‘ukupheliswa kwenkqubo yezinto,’ uYesu wathi: “Akukho bani uwaziyo loo mhla nelo lixa, azazi neengelosi zamazulu engazi noNyana, kodwa nguBawo kuphela.” (Mat. 24:36) Nangona kunjalo, abanye basenokukufumanisa kunzima ukuhlala benemvo yongxamiseko, ingakumbi ukuba sele kuyiminyaka besenjenjalo. (IMize. 13:12) Ngaba ukhe uvakalelwe ngaloo ndlela ngamany’ amaxesha? Yintoni enokusinceda sihlale sinemvo yongxamiseko ngomsebenzi uYehova uThixo noYesu Kristu abafuna siwenze namhlanje?
Masiqwalasele Umzekelo Wethu, UYesu
5. Ziziphi iindlela uYesu awabonisa ngazo ukuba unemvo yongxamiseko ngobulungiseleli?
5 Kubo bonke abantu ababenemvo yongxamiseko ekukhonzeni uThixo, ngokuqinisekileyo uYesu Kristu ungowona mzekelo ubalaseleyo. Isizathu sokuba abe nemvo yongxamiseko kukuba, zazininzi izinto awayemele azenze kwiminyaka nje emithathu enesiqingatha. Nangona kunjalo, uYesu wenza izinto ezininzi kakhulu kunqulo lokwenene ngaphezu kwakhe nabani na. Walazisa igama likaYise nenjongo yakhe, washumayela iindaba ezilungileyo zoBukumkani, wabhenca uhanahaniso neemfundiso zobuxoki zeenkokeli zonqulo, waza waphakamisa ulongamo lukaYehova kwada kwasa ekufeni. Wayezilahlela nofele, etyhutyha zonk’ iindawo—efundisa, enceda kwaye ephilisa abantu. (Mat. 9:35) Akakho umntu owakha wenza umsebenzi ongako ngexeshana nje elingephi. UYesu wazibhokoxa kangangoko kwakunokwenzeka.—Yoh. 18:37.
6. Yiyiphi eyona nto uYesu awayenikel’ ingqalelo kuyo?
6 Yintoni eyenza uYesu ukuba azibhokoxe ebudeni babo bonke ubulungiseleli bakhe? Isiprofeto sikaDaniyeli simele ukuba sambonisa uYesu ukuba wayeshiyeke nexesha elingakanani na. (Dan. 9:27) Ngoko, njengoko kubonisiwe, ubulungiseleli bakhe basemhlabeni babuza kuphela ‘kwisiqingatha seveki,’ okanye emva kweminyaka emithathu enesiqingatha. Kungekudala emva kokuba engene eYerusalem ngentwasahlobo yowama-33 C.E., uYesu wathi: “Lifikile ilixa lokuba uNyana womntu azukiswe.” (Yoh. 12:23) Nangona uYesu wayesazi ukuba sele eza kufa, akazange ahlale enikele ingqalelo kuloo nto, okanye ibe sesona sizathu sokuzibhokoxa kwakhe. Kunoko, wasebenzisa naliphi na ithuba alifumanayo lokwenza ukuthanda kukaYise nelokubonisa uthando kwabanye abantu. Olo thando lwamenza wakhetha abafundi waza wabaqeqesha, wabathuma ukuya kushumayela kwabanye. Oku wakwenza ukuze baqhubeke nalo msebenzi wayewuqalile baze benze imisebenzi emikhulu kuneyakhe.—Funda uYohane 14:12.
7, 8. Basabela njani abafundi bakaYesu xa wayecoca itempile, yaye kwakutheni ukuze uYesu enze oko?
7 Esinye isiganeko esenzeka ebomini bukaYesu sibonisa ngokucacileyo ukuba wayenenzondelelo. Kwakusekuqaleni kobulungiseleli bakhe, ngePasika yowama-30 C.E. UYesu nabafundi bakhe beza eYerusalem baza bafika etempileni kukho “abo babethengisa iinkomo nezimvu namahobe nabananisi bemali besezihlalweni zabo.” Yintoni eyenziwa nguYesu, yaye yabethelela ntoni ezingqondweni zabafundi bakhe?—Funda uYohane 2:13-17.
8 Okwenziwa kwaza kwathethwa nguYesu ngaloo mini kwenza abafundi bacinga ngamazwi enye yeendumiso zikaDavide, athi: “Ukuzondelela indlu yakho ngokupheleleyo kundidlile.” (INdu. 69:9) Ngoba? Kaloku, esi senzo sasimbeka engozini. Zonke izikhakhamela ezaziphethe itempile—ababingeleli, ababhali nabanye—zaziluxhasa olu shishino lunengeniso nolulihlazo. Xa uYesu wayebhenca yaye ephazamisa elo qhinga, wayezenza utshaba lweenkokeli zonqulo zelo xesha. Ngokwenene babengaphazami abafundi bakhe xa babesithi, ‘unenzondelelo ngendlu kaThixo,’ okanye unqulo lokwenene. Kodwa ke yintoni inzondelelo? Ngaba yahlukile kungxamiseko?
Umahluko Phakathi Kwemeko Yongxamiseko Nokuba Nenzondelelo
9. Inokuchazwa njani inzondelelo?
9 Esinye isichazi-magama sithi igama elithi “inzondelelo” lithetha “ukuba nomnqweno nomdla wokuphumeza into ethile,” yaye sithi esinye isithetha-ntonye seli gama lihlombe. Ngokuqinisekileyo, uYesu wabonakalisa zonke ezi mpawu kubulungiseleli bakhe. Ngenxa yoko iToday’s English Version iguqulela le ndinyana ngale ndlela: “Ukuzinikela kwam kwindlu yakho, Thixo, kunditshisa njengomlilo.” Okubangel’ umdla kukuba, kwezinye iilwimi zaseMpuma, ibinzana elithi “inzondelelo” lakhiwa ngamagama amabini ngokuthe ngqo athetha “intliziyo etshisayo,” ngokungathi intliziyo iyavutha. Akumangalisi ke ngoko ukuba abafundi bakhe bakhumbule amazwi kaDavide xa bebona okwenziwa nguYesu etempileni. Yintoni ke eyabangela ukuba intliziyo yakhe ivuthe ize imbangele ukuba enze oko wakwenzayo?
10. Lithetha ukuthini igama elithi “inzondelelo” xa lisetyenziswa eBhayibhileni?
10 Igama elithi “inzondelelo” elikwindumiso kaDavide lithatyathwe kwigama lesiHebhere elidla ngokuguqulelwa ngokuthi “ikhwele” kwezinye iindinyana zeBhayibhile. Ngamanye amaxesha, INguqulelo Yehlabathi Elitsha ilichaza ngokuthi “ofuna uzinikelo olupheleleyo.” (Funda iEksodus 20:5; 34:14; noYoshuwa 24:19.) Esinye isichazi-magama seBhayibhile sithi ngeli binzana: “Lidla ngokusetyenziswa kubantu abatshatileyo . . . Kanye njengokuba indoda okanye umfazi esenokukhweleta kuba enelungelo elipheleleyo kwiqabane lakhe, naye uThixo unelungelo lokuba nekhwele ngabantu bakhe.” Ngenxa yoko, inzondelelo ekuthethwa ngayo eBhayibhileni asikokuba nehlombe nje ngento ethile, njengehlombe ababa nalo abalandeli bomdlalo othile ngaloo mdlalo. UDavide wayenenzondelelo ebonisa ukuba nekhwele elifanelekileyo, ngamany’ amazwi, wayengabunyamezeli ubutshaba okanye ugculelo, ezimisele ukukhusela igama elilungileyo okanye ukulungisa umonakalo.
11. Yintoni eyabangela ukuba uYesu azibhokoxe ngenzondelelo?
11 Abafundi bakaYesu babechanile ngokunxulumanisa amazwi kaDavide noko babekubona kusenziwa nguYesu etempileni. UYesu akazange azibhokoxe kuba nje eleqa ixesha, kodwa wayenenzondelelo—okanye enekhwele—ngegama likaYise nangonqulo olunyulu. Xa wabona igama likaThixo ligculelwa yaye linyeliswa, waba nenzondelelo, okanye ikhwele, waza walungisa loo monakalo. Xa uYesu wabona abantu abathobekileyo becinezelwa yaye bexhatshazwa ziinkokeli zonqulo, inzondelelo awayenayo yamenza wafuna ukubakhulula kuloo ngcinezelo waza wazikhalimela kabukhali ezo nkokeli zonqulo zazibacinezela.—Mat. 9:36; 23:2, 4, 27, 28, 33.
Yiba Nenzondelelo Ngonqulo Lokwenene
12, 13. Yintoni eye yenziwa ziinkokeli zeNgqobhoko namhlanje ngokuphathelele (a) igama likaThixo? (b) uBukumkani bukaThixo?
12 Imeko yonqulo namhlanje ifana nqwa neyemihla kaYesu—ukuba phofu ayithanga kratya. Ngokomzekelo, khumbula ukuba into yokuqala uYesu awayifundisa abalandeli bakhe ukuba bayithandazele ligama likaThixo, kuba wathi: “Malingcwaliswe igama lakho.” (Mat. 6:9) Ngaba sikhe sizive iinkokeli zonqulo, ingakumbi abefundisi beNgqobhoko, zifundisa abantu igama likaThixo nokuba balingcwalise, okanye balizukise? Kunoko, ziye zathetha kakubi ngoThixo zisebenzisa iimfundiso zobuxoki ezifana noBathathu Emnye, ukungafi komphefumlo, nesihogo somlilo, zisenza uThixo abonakale njengomntu ongaziwa mntu, ongenakumqonda, nesikhohlakali ekuthi ngco kuso xa singcungcuthekisa abantu. Ziye zagculela uThixo nangehambo elihlazo nangohanahaniso lwazo. (Funda eyabaseRoma 2:21-24.) Ngaphezulu koko, zizame ngandlela zonke ukulifihla igama likaThixo, zilisusa nakwiinguqulelo zazo zeBhayibhile. Ngaloo ndlela ziyabathintela abantu ukuba bangasondeli kuThixo baze babe nolwalamano naye.—Yak. 4:7, 8.
13 UYesu wafundisa abalandeli bakhe ukuba bathandazele noBukumkani bukaThixo, esithi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mat. 6:10) Nangona iinkokeli zeNgqobhoko zidla ngokuwucengceleza lo mthandazo, ziye zakhuthaza abantu ukuba baxhase imibutho yepolitiki neminye imibutho yabantu. Ukongezelela koko, zibenza intlekisa abo bazama ukushumayela nokunikela ubungqina ngobu Bukumkani. Ngenxa yoko, abantu abaninzi abathi bangamaKristu abathethi nokuthetha ngoBukumkani bukaThixo, singasathethi ke ngokukholelwa kubo.
14. Abefundisi beNgqobhoko baye balithibaza njani iLizwi likaThixo?
14 UYesu wakha wathandaza kuThixo esithi: “Ilizwi lakho liyinyaniso.” (Yoh. 17:17) Kwaye ngaphambi kokuba abuyele ezulwini, uYesu wathi wayeya kumisela ‘ikhoboka elithembekileyo neliyingqondi’ ukuze lilungiselele abantu bakhe ukutya kokomoya. (Mat. 24:45) Abefundisi beNgqobhoko bazingomb’ izifuba besithi bafundisa abantu iLizwi likaThixo, kodwa ngaba baye bathembeka kwiNkosi? Nakanye. Kunoko, ngoku bade batyekela ekuthini oko kuthethwa yiBhayibhile yintsomi. Kunokuba bondle imihlambi yabo ngokutya kokomoya, ukuze ifumane intuthuzelo nokukhanya, baye bawanyumbaz’ iindlebe amarhamente ngentanda-bulumko yabantu. Ukongezelela koko, baye bayithibaza imilinganiselo kaThixo yokuziphatha ngenjongo yokuvulela umtyhi oko bakubiza ngokuba yimilinganiselo yokuziphatha emitsha.—2 Tim. 4:3, 4.
15. Uvakalelwa njani ngazo zonke izinto eziye zenziwa ngabefundisi egameni likaThixo?
15 Ngenxa yazo zonke izinto eziye zenziwa—kusithiwa zenziwa egameni loThixo weBhayibhile—abantu abaninzi abanyanisekileyo baye baphoxeka okanye baphelelwa lukholo kuThixo naseBhayibhileni. Baye baba ngamaxhoba kaSathana nenkqubo yakhe yezinto engendawo. Uziva njani ke wena xa ubona yaye usiva ezi zinto zisenzeka umhla nezolo? Njengomkhonzi kaYehova, xa ubona olu gculelo nezinyeliso zityatyekwa kwigama likaThixo, ngaba akuye uzive unyanzelekile ukuba wenze konke okusemandleni akho ukuze ulungise lo monakalo? Xa ubona abantu abanyanisekileyo beqhathwa yaye bexhatshazwa, ngaba akuye ufune ukuthuthuzela le miphefumlo icinezelweyo? Xa uYesu wabona abantu bemihla yakhe ‘behlinzekile yaye belahliwe njengezimvu ezingenamalusi,’ akazange aphelele ekubasizeleni. ‘Wabafundisa izinto ezininzi.’ (Mat. 9:36; Marko 6:34) Nathi ke sifanele sibe nenzondelelo ngonqulo lokwenene njengoYesu.
16, 17. (a) Yintoni efanele isenze sifune ukuzibhokoxa kubulungiseleli? (b) Yintoni esiza kuyixubusha kwinqaku elilandelayo?
16 Xa sijonga ubulungiseleli bethu ngaloo ndlela, amazwi kampostile uPawulos akweyoku-1 kuTimoti 2:3, 4 aba nentsingiselo ekhethekileyo. (Funda.) Siyazibhokoxa kubulungiseleli, kungekokuba siqhutywa kukwazi ukuba siphila kwimihla yokugqibela kuphela, kodwa nangenxa yokuqonda ukuba leyo yintando kaThixo. Ufuna abantu bayazi inyaniso ukuze nabo bafunde ukumnqula nokumkhonza baze bafumane iintsikelelo. Sinyanzelekile ukuba sizibhokoxe kubulungiseleli, kwaye isizathu asikokuba sisikelwe ixesha kuphela, kodwa sizibhokoxa nangenxa yokuba sifuna ukuzukisa igama likaThixo nokunceda abantu bazi ukuthanda kwakhe. Sinenzondelelo ngonqulo lokwenene.—1 Tim. 4:16.
17 Njengabantu bakaYehova, sisikelelekile kuba siyayazi injongo kaThixo ngoluntu nangomhlaba. Sithi abanendlela yokunceda abantu bafumane ulonwabo nethemba eliqinisekileyo ngekamva. Sinako ukubabonisa indlela yokusinda xa kutshatyalaliswa le nkqubo yezinto kaSathana. (2 Tes. 1:7-9) Kunokuba sityhafiswe okanye sidinyazwe kukubona ngathi imini kaYehova ayifiki, sifanele sivuye kuba sisenexesha lokuba nenzondelelo ngonqulo lokwenene. (Mika 7:7; Hab. 2:3) Sinokuyihlakulela njani loo nzondelelo? Inqaku elilandelayo liza kuxubusha ngalo mbandela.
Ngaba Unokuchaza?
• Yintoni eyabangela uYesu ukuba azibhokoxe kubulungiseleli bakhe?
• Lithetha ukuthini igama elithi “inzondelelo” xa lisetyenziswa eBhayibhileni?
• Ziziphi izinto esizibona zisenzeka namhlanje ezimele zisenze sibe nenzondelelo ngonqulo lokwenene?
[Umfanekiso okwiphepha 8]
UYesu wayesoloko esenza ukuthanda kukaYise yaye ebonakalisa uthando kwabanye abantu
[Umfanekiso okwiphepha 10]
Sinesizathu esibambekayo sokuba nenzondelelo ngonqulo lokwenene