Ndiyibonile Indlela Enamandla Ngayo Inyaniso YeBhayibhile

Kubalisa uVito Fraese

KUSENOKWENZEKA ukuba, akuzange khe uve ngendawo ekuthiwa yiTrentinara. Yidolophu encinane ekumzantsi weNaples, eItali. Abazali bam nomkhuluwa wam, uAngelo, bazalelwa apho. Emva kokuzalwa kuka-Angelo, abazali bam bafudukela eUnited States baza baya kuhlala eRochester, eNew York, apho ndazalelwa khona ngowe-1926. UTata wadibana okwesihlandlo sokuqala naBafundi BeBhayibhile, njengoko ayebizwa njalo amaNgqina kaYehova, ngowe-1922. Kungekudala emva koko, yena noMama baba ngaBafundi BeBhayibhile.

UTata wayengumntu ozolileyo nowayekuthanda ukucinga nzulu ngezinto, kodwa wayekucaphukela ukungabikho kokusesikweni. Wayengakwazi ukuyinyamezela into yokuba abefundisi bebavimba ulwazi abantu, ngoko wayekukhuthalele ukuthetha nabo ngeenyaniso zeBhayibhile. Emva kokuba ethathe umhlala-phantsi, waba kwinkonzo yexesha elizeyo yaye waqhubeka nayo de impilo neengqele zasebusika zamnyanzela ukuba ayeke xa wayeneminyaka engama-74 ubudala. Nasemva koko waqhubeka eshumayela iiyure ezingama-40 ukusa kwezingama-60 ngenyanga de waya kutsho kwiminyaka engaphezu kwama-90 ubudala. Umzekelo kaTata wandikhuthaza gqitha. Nangona wayengumntu onoburharha, wayengazithathi lula izinto. Wayedla ngokuthi: “Inyaniso ibalulekile yaye ifanele ixatyiswe.”

UMama noTata benza konke okusemandleni ukuze basifundise iLizwi likaThixo sobahlanu. Ndabhaptizwa ngoAgasti 23, 1943, ndaza ngoJuni 1944 ndaba nguvulindlela. Udadewethu uCarmela wayenguvulindlela eGeneva, eNew York, yaye wayesebenza noFern owayendwebile. Kungekudala ndabona ukuba uFern ngundofanaye wam. Ngoko satshata ngoAgasti 1946.

Ukuba Ngumthunywa Wevangeli

Isabelo sethu sokuqala yaba kukuba ngoovulindlela abakhethekileyo eGeneva naseNorwich, eNew York. NgoAgasti 1948, safumana ilungelo lokuba kwiklasi ye-12 yaseGiliyadi. Emva koko sathunyelwa eNaples, eItali, kunye nesinye isibini esingabathunywa bevangeli, uCarl noJoanne Ridgeway. Ngaloo minyaka, iNaples yayitsala nzima ngenxa yokudlavulwa yimfazwe. Kwakunzima ukufumana indlu, ngoko sahlala kwindlu encinane enamagumbi amabini.

Ekukhuleni kwam abazali bam babethetha isiNeapolitan ngoko nangona ndandivakala ukuba ndikhulele eMerika, abantu babendiva xa ndithetha isiTaliyane. UFern wayengakwazi ukuthetha isiTaliyane. Kodwa wasifunda de ekugqibeleni wandodlula ngokusithetha.

Ekuqaleni, ekuphela kwabantu ababenomdla eNaples yayiyintsapho eyayinamalungu amane. Yayithengisa icuba elalingavumelekanga ngokusemthethweni. Mihla le, uTeresa, owayelilungu lale ntsapho, wayetshintsha ungamazi. Kusasa, wayebonakala esisidudla ngenxa yemidiza awayeyingxala kwiskethi esasineepokotho ezininzi. Kwakusithi kubetha ingokuhlwa abe sele ebhitye wangumcinga. Inyaniso yayitshintsha ngokupheleleyo le ntsapho. Ekugqibeleni, amalungu ale ntsapho ali-16 aba ngamaNgqina. Ngoku kwisixeko saseNaples, kukho amaNgqina amalunga nama-3 700.

Ukuchaswa Komsebenzi Wethu

Emva kokuba sineenyanga ezisithoba kuphela siseNaples, abasemagunyeni basinyanzela sobane ukuba siphume siphele kweso sixeko. Saya kuhlala eSwitzerland kangangenyanga saza sabuyela eItali siphethe amaphepha-mvume okungena elizweni asichaza njengabakhenkethi. Mna noFern sathunyelwa eTurin. Ekuqaleni saqesha igumbi kwindlu yelinye inenekazi yaye sasisebenzisa igumbi lokuhlambela nekhitshi lalo. Ekufikeni kwabakwaRidgeway eTurin, saqesha indlu ethile. Ekuhambeni kwexesha, sahlala kuloo ndlu sizizibini zabathunywa bevangeli ezintlanu.

Ngowe-1955, xa abasemagunyeni basigxothayo eTurin, kwakusele kubekwe isiseko kumabandla amane amatsha. Ngoku abazalwana basekuhlaleni babeza kukwazi ukunyamekela la mabandla. Abasemagunyeni bathi, “Siqinisekile ukuba ukuhamba kwenu bantundini baseMerika, iza kubhanga yonke le nto yenu.” Kodwa ulwando olwabakho lwabonisa ukuba impumelelo yalo msebenzi ixhomekeke kuThixo. Namhlanje, eTurin kukho amaNgqina angaphezu kwama-4 600 namabandla angama-56.

IFlorence—Isixeko Esihle

Isabelo sethu esilandelayo saba seFlorence. Sasidla ngokuva ngesi sixeko ekubeni udadewethu uCarmela nomyeni wakhe uMerlin Hartzler babethunyelwe khona njengabathunywa bevangeli. Kodwa khawuzibone nje sele uhlala apho. Kwiindawo ezifana nePiazza della Signoria, ePonte Vecchio nePalazzo Pitti, ezona ndawo zenza esi sixeko sibe sesodumo! Kwakuvuyisa ukubona indlela abantu baseFlorence ababesabela ngayo kwiindaba ezilungileyo.

Safunda nenye intsapho yaye abazali babhaptizwa. Noko ke, utata walapho wayeyingedle. Ngowe-1973, IMboniselo yathi ukutshaya ngumkhwa ongacocekanga yaye yabongoza abafundi bayo ukuba bayeke ukutshaya. Abantwana bale ntsapho abadala babongoza uyise ukuba ayeke. Wathembisa ukuba uya kuyeka kodwa akazange ayeke. Ngenye imini umama weli khaya wathi amawele akhe aneminyaka esithoba ubudala makaye kulala engawathandazelanga njengoko wayeqhele ukwenjenjalo ngaphambi kokuba alale. Kamva waziva ebuhlungu waza waya egumbini lawo. Ayesele ezithandazele. Wawabuza, “Niye nathini xa nithandaza?” Athi, “Yehova, sicela uncede uTata ayeke ukutshaya.” Lo mama wabiza umyeni wakhe esithi, “Khawuzokuva into ethandazelwa ngabantwana bakho.” Wathi akubeva, walila waza wathi, “Soze ndiphinde nditshaye!” Wasigcina isithembiso sakhe ibe ngoku amalungu ale ntsapho angaphezu kwe-15 angamaNgqina.

Ukukhonza EAfrika

Ngowe-1959 sathunyelwa eMogadishu, eSomalia, nabanye abathunywa bevangeli ababini, uArturo Leveris nomntakwethu uAngelo. Safikela kwimeko yezobupolitika engentle. Ngokomyalelo weZizwe Ezimanyeneyo, urhulumente waseItali wayefanele ancede abantu baseSomalia bafumane uzimele-geqe kodwa kunoko, izinto zaba mandundu nangakumbi. Amanye amaTaliyane esasifunda nawo iBhayibhile emka kwelo, yaye kwaba nzima ukuba kusekwe ibandla apho.

Ebudeni belo xesha, umveleli otyelela amasebe wathi mandibe ngumncedisi wakhe. Ngoko saqalisa ukutyelela amazwe angqonge elo. Abanye esasifunda nabo benza inkqubela kodwa kwafuneka bashiye amakhaya ngenxa yenkcaso. Abanye abazange bahambe nangona kwafuneka benyamezele ukubandezeleka.a Kuyachukumisa ukucinga ngendlela ababemthanda ngayo uYehova nezinto abazinyamezelayo ngenxa yokuhlala bethembekile.

ESomalia nase-Eritrea kwakusoloko kufumile yaye kushushu ngendlela enganyamezelekiyo. Ukutya kwalapho okubabayo kwakusenza sibe shushu ngakumbi. Ukuqala kwethu ukutya oku kutya kwisifundo seBhayibhile, umfazi wam eqhula wathi indlela okubaba ngayo kujike iindlebe zakhe zabomvu.

Emva kokuba uAngelo noArturo befumene esinye isabelo, sasala sedwa. Kwakungelula kuba kwakungekho mntu usikhuthazayo. Sekunjalo, le meko yasinceda sasondela ngakumbi kuYehova saza samthemba ngakumbi. Ukutyelela amazwe avalwe umsebenzi kwakusikhuthaza ngokwenene.

ESomalia, zazininzi izinto ezazisitsalisa nzima. Sasingenayo ifriji, ngoko sasithenga kuphela ukutya esiza kutya ngaloo mini njengamaqatha enyama kakrebe okanye iziqhamo zalapho, ezifana nemengo, ipopo, imbambusi, ikhokhonathi okanye ibhanana. Sasidla ngokukhathazwa zizinambuzane ezibhabhayo. Maxa wambi zazidla ngokuhlala entanyeni ngoxa siqhuba isifundo seBhayibhile. Ekubeni sasinesithuthuthu, oko kwakusinceda singahambi ixesha elide kwingqatsini yelanga.

Ukubuyela EItali

Ngenxa yabahlobo abanesandla esivulekileyo, sakwazi ukukhwela inqanawa ethutha iibhanana saza sabuyela eItali sisiya kwindibano yezizwe ngezizwe eTurin ngowe-1961. Saxelelwa ukuba siza kunikwa esinye isabelo. NgoSeptemba 1962, sabuyela eItali ndaza ndaqalisa ukuba ngumveleli wesiphaluka. Sathenga imoto encinane esayisebenzisa kangangeminyaka emihlanu ukuya kwiziphaluka ezibini.

Emva kokutshiswa lilanga laseAfrika, ngoku kwafuneka sinyamezele ingqele eqhaqhazelisa amazinyo. Kubusika bethu bokuqala, ngoxa sasityelele ibandla elikumazantsi eeAlps, salala kwigumbi elingenasifudumezi (heater), elingentla kwegumbi eligcina ingca. Ingqele yayizenzela kuthi kangangokuba sangena ngeedyasi ezingubeni. Ngobo busuku, kuloo ngingqi kwafa iinkukhu ezine nezinja ezimbini ngenxa yengqele!

Ekuhambeni kwexesha ndaba ngumveleli wesithili. Ngaloo minyaka, sasihamba lonke elaseItali. Amaxesha amaninzi sasidla ngokutyelela indawo ezifana neCalabria neSicily. Sasikhuthaza abaselula ukuba benze inkqubela ngokomoya baze bazibekele usukelo lokukhonza njengabaveleli bamabandla, abalungiseleli abahambahambayo okanye bakhonze eBheteli.

Zininzi izinto esiye sazifunda kubahlobo abathembekileyo nabaye bakhonza uYehova ngentliziyo iphela. Siye sazixabisa iimpawu zabo, ezifana nokunyaniseka kuYehova, ukuba nesisa, ukuthanda abazalwana babo, ukuba bhetyebhetye nokuba nomoya wokuzincama. Siye saya emitshatweni kwiiHolo zoBukumkani. Yayiqhutywa ngamaNgqina agqalwa ngokusemthethweni njengabalungiseleli bonqulo, nto leyo eyayingenakwenzeka kweli lizwe kwiminyaka edlulileyo. Iintlanganiso azisaqhutyelwa emakhitshini abazalwana okanye kuhlalwe emaplangeni njengoko kwakunjalo eTurin. Kunoko, amabandla amaninzi aneeHolo zoBukumkani ezintle ezizukisa uYehova. Iindibano zethu asisaziqhubeli kwiiholo ezingaphucukanga, kodwa siziqhubela kwiiHolo Zendibano ezinkulu. Kuye kwasivuyisa kakhulu ukubona inani labavakalisi lisanda ukuya kutsho ngaphezu kwama-243 000. Ukufika kwethu eItali sasingama-490 kuphela.

Senze Ukhetho Olufanelekileyo

Zikho iingxaki esiye sajamelana nazo, kuquka ukukhumbula ekhaya nokugula. UFern wayedla ngokukhumbula ekhaya ngalo lonke ixesha ebona ulwandle. Kukhe kwafuneka nokuba enze utyando izihlandlo ezithathu. Ngenye imini, xa wayesiya kuqhuba isifundo sakhe seBhayibhile, wahlaselwa ngumntu ochasayo owayephethe ifolokhwe enomphini omde. Ngenxa yoko, kwafuneka aye kulala esibhedlele.

Nangona sasikhe sidimazeke, siye ‘salinda kuYehova,’ njengoko zisikhuthaza njalo iZililo 3:24. UnguThixo wentuthuzelo. Ngesinye isihlandlo xa uFern wayedimazekile, wafumana ileta emnandi evela kuMzalwan’ uNathan Knorr. Wathi ekubeni wazalwa kufuphi naseBethlehem, ePennsylvania, apho uFern waqalisa khona ukuba nguvulindlela, wayesazi ukuba abafazi basePennsylvania abangamaDatshi bomelele yaye abanikezeli lula njengokuba enjalo naye. Wayethetha inyaniso. Ukutyhubela iminyaka, abantu abaninzi baye basikhuthaza ngeendlela ezahlukahlukeneyo.

Nangona siye sajamelana neengxaki, siye sazama ukuhlala sinenzondelelo ngobulungiseleli. Ethelekisa ukuba nenzondelelo neLambrusco, iwayini yaseItali ehlwahlwazayo, uFern uqhula athi, “Inzondelelo yethu ifanele ihlale ifana nale wayini ihlwahlwazayo.” Emva kokuba kumsebenzi wesiphaluka nowesithili kangangeminyaka engama-40, safumana ilungelo lokutyelela nokumisela amaqela namabandla athetha ezinye iilwimi ngaphandle kwesiTaliyane. La maqela ashumayela kubantu abavela eBangladesh, e-Eritrea, e-Ethiopia, eGhana, eIndiya, eNigeria, kwiiPhilippines, eSri Lanka, eTshayina nakwamanye amazwe. Kungatshona ilanga ndibalisa indlela amandla eLizwi likaThixo aye aguqula ngayo ubomi babantu abaye benzelwa inceba nguYehova.—Mika 7:18, 19.

Suku ngalunye sithandaza kuYehova ukuba asinike amandla okuqhubeka nobulungiseleli bethu. Kuyasomeleza ukwazi ukuba sivuyisa iNkosi. Kuyasivuyisa kwaye kusenza siqiniseke ukuba senze ukhetho olufanelekileyo ebomini ngokusasaza inyaniso yeBhayibhile.—Efe. 3:7; Kol. 1:29.

[Umbhalo osemazantsi]

[Isicangca/Imifanekiso ekwiphepha 27-29]

(Ukuba ufuna inkcazelo ehlahlelwe kakuhle, yiya kwimpapasho)

Abazali bam eRochester, NY

Ngowe-1948

ESouth Lansing kwiklasi ye-12 yaseGiliyadi

Ngowe-1949

Ndikunye noFern ngaphambi kokuba siye eItali

ECapri, eItali

Ngowe-1952

ETurin naseNaples sikunye nabanye abathunywa bevangeli

Ngowe-1963

UFern nezinye zezifundo zakhe zeBhayibhile

‘Inzondelelo yethu ifanele ihlale ifana newayini ehlwahlwazayo’