Ngaba Ubusazi?
Ekubeni kwaSirayeli imvula yayisina emva kwexesha elide, ayesenza njani ukuze aqiniseke ukuba anamanzi awaneleyo?
▪ Phakathi kukaOktobha noAprili, imvula ina kakhulu kwaSirayeli yaye maxa wambi kuna izikhukula. Noko ke, ehlotyeni inkoliso yale “milambo” iyatsha yaye imvula iyanqaba kangangeenyanga. Babewafumana njani amanzi awaneleyo abantu ababephila ngexesha lokubhalwa kweBhayibhile?
Bayicombulula le ngxaki ngokwenza imijelo ezindulini baze loo manzi bawathumele kumaqula angaphantsi komhlaba. Uphahla lwendlu lwalwenziwe ngendlela yokuba lukwazi ukuqokelela amanzi ukuze angene kula maqula. Iintsapho ezininzi zaziba nequla ezazisikha kulo amanzi xa zinxaniwe.—2 Kumkani 18:31; Yeremiya 6:7.
AmaSirayeli ayephinda asebenzise nemithombo. Kwiindawo ezingamajojo, imvula yasebusika yayitshona emhlabeni ide ifike elulwalweni, aze amanzi ahambe ngalo ade aphinde agqabhuke emithonjeni. Ixesha elininzi abantu babedla ngokwakha ecaleni komthombo (ien ngesiHebhere) yaye loo nto ibonakala kumagama eendawo afana ne-En-shemeshe, iEn-rogele ne-En-gedi. (Yoshuwa 15:7, 62) EYerusalem kwagqojozwa iliwa ukuze kuziswe amanzi esixekweni.—2 Kumkani 20:20.
Kwiindawo ezazingenamithombo, kwakusembiwa iqula (ibeʼerʹ ngesiHebhere), njengelo liseBher-shebha, ukuze kufunyanwe amanzi angaphantsi komhlaba. (Genesis 26:32, 33) Umbhali uAuthor André uthi “indlela [amaSirayeli] awayicombulula ngayo le ngxaki isachukumisa nanamhla oku.”
Imel’ Ukuba Yayinjani Indlu Ka-Abram (okanye uAbraham)?
▪ UAbram nomkakhe babehlala kwisixeko samaKhaledi esibizwa ngokuba yiUre. Kodwa uThixo wabayalela ukuba bashiye eso sixeko ukuze baye kuhlala ezintenteni. (Genesis 11:31; 13:12) Khawuthelekelele indlela ekwafuneka bezincame ngayo ukuze benze loo nto.
IUre ekwilizwe laseIraq kule mihla, yembiwa nguLeonard Woolley phakathi kowe-1922 nowe-1934. Phakathi kwezakhiwo awazifumanayo yayizizindlu ezingama-73 ezazakhiwe ngezitena. Amagumbi ezindlu ezininzi ayexhake ibala. Embindini weli bala kwakukho imibhobho yokuhambisa amanzi amdaka. Kwizindlu ezinkulu, iindwendwe zaziba nendlu yazo yangasese. Amanye amagumbi aphantsi ayenamakhitshi nendawo yokubasa namagumbi okulala amakhoboka. Intsapho yayihlala kumagumbi aphezulu ekwakusiyiwa ngezinyuko kuwo. Ezi zinyuko zazisiya kwiveranda eyenziwe ngamaplanga ejikeleze ibala.
Lo kaWoolley wabhala wathi: “Indlu . . . enebala eligangathiweyo neendonga ezikalikiweyo, nemibhobho yokuhambisa amanzi . . . enamagumbi ali-12 nangaphezulu, yayibonisa umgangatho wokuphila ophezulu. Ezi yayizizindlu . . . zabantu abakumgangatho ophakathi wokuphila, oonovenkile, abarhwebi, ababhali njalo njalo.”
[Umfanekiso okwiphepha 19]
Iqula LaseHorvot Mezada, KwaSirayeli
[Inkcazelo]
© Masada National Park, Israel Nature and Parks Authority
[Umfanekiso okwiphepha 19]
Umzobo Wendlu Yexesha Lika-Abraham
[Inkcazelo]
© Drawing: A. S. Whitburn