Sondela KuThixo

“Wambongoza UYehova”

ENYE indoda eyatyeshela inyaniso eyayikhuliswe ngayo yathi: “Ndandiziva ndingafaneleki.” Xa yayiqalisa ukutshintsha indlela eyayiphila ngayo, yacinga ukuba ayisayi kuze ixolelwe nguThixo. Kodwa lo moni uguqukileyo wakhuthazwa yingxelo yeBhayibhile engoManase, ebhalwe kweyesi-2 yeziKronike 33:1-17. Ukuba nawe uziva ungafaneleki ngenxa yezono owazenzayo, unokuthuthuzelwa ngumzekelo kaManase.

UManase wakhuliswa kwikhaya elalinqula uThixo. Uyise, uHezekiya wayengomnye wookumkani ababebalasele bakwaYuda. UManase wazalwa emva kweminyaka emalunga nemithathu emva kokuba ubomi bukayise bandiswe ngokungummangaliso nguThixo. (2 Kumkani 20:1-11) Akuthandabuzeki ukuba uHezekiya wamjonga unyana wakhe njengesipho esivela kuThixo waza wazama ukumfundisa ukuthanda unqulo olunyulu. Kodwa abantwana babazali abakhonza uThixo abasoloko bexelisa abazali babo. Kwakunjalo nangoManase.

UManase wayengaphantsi kweminyaka eli-12 ubudala ukubhubha kukayise. Okubuhlungu kukuba, uManase “wenza okubi emehlweni kaYehova.” (Ivesi 1, 2) Ngaba lo kumkani uselula waphenjelelwa ngamaphakathi akhe awayengalukhathalelanga unqulo lokwenyaniso? IBhayibhile ayisichazeli. Into esixelela yona kukuba uManase waqalisa ukunqula izithixo waza wakhohlakala. Wenza izibingelelo zoothixo bobuxoki, wenza amadini ngoonyana bakhe, wahamba kwabaneshologu waza wabeka umfanekiso oqingqiweyo kwitempile kaYehova eYerusalem. UManase oneenkani akazange azithobele izilumkiso zikaYehova, uThixo owabangela ukuba azalwe ngokungummangaliso.—Ivesi 3-10.

Ekugqibeleni uYehova wavumela ukuba uManase athinjelwe eBhabhiloni. Apho ekuthinjweni uManase waba nethuba lokucamngca ngobomi bakhe. Ngaba ngoku wabona ukuba izithixo zakhe ezingenamandla nezingaphiliyo zazingazange zikwazi ukumkhusela? Ngaba wacinga ngezinto awayezifundiswe nguyise xa wayesengumntwana? Enoba sasiyintoni isizathu, uManase waguquka. Ingxelo ithi: “Wambongoza uYehova uThixo wakhe waqhubeka ezithoba kakhulu . . .Yaye waqhubeka ethandaza Kuye.” (Ivesi 12, 13) Kodwa ngaba indoda eyayenze izono ezinzulu ngolo hlobo yayinokuxolelwa nguThixo?

UYehova wachukunyiswa yinguquko kaManase enyanisekileyo. UYehova wakuva ukukhalela kwakhe inceba “wambuyisela eYerusalem ebukumkanini bakhe.” (Ivesi 13) Ukubonisa ukuba wayeguqukile, uManase wenza unako nako ukuze alungise umonakalo, wasusa izithixo elizweni waza wabongoza abantu ukuba ‘bakhonze uYehova.’—Ivesi 15-17.

Ukuba uziva ungafanelwanga kukuxolelwa nguThixo ngenxa yezono oye wazenza, funda kumzekelo kaManase. Le ngxelo iyinxalenye yeLizwi likaThixo eliphefumlelweyo. (Roma 15:4) Kucacile ukuba, uYehova ufuna sazi ukuba “ukulungele ukuxolela.” (INdumiso 86:5) Ayisosono kodwa yintliziyo yomoni eyona nto ibalulekileyo. Umoni othandaza ngentliziyo eguqukileyo, oyeka ikhondo lakhe elibi aze azimisele ukwenza into elungileyo ‘unokumbongoza uYehova,’ njengoko wenzayo uManase.—Isaya 1:18; 55:6, 7.

Izibhalo Onokuzifunda NgoJanuwari

◼ Eyesi-2 yeziKronike 29-36–uEzra 1-10