Khawubone Igama Entlanjeni
IST. MORITZ. Ngaba wakha weva ngendawo enjalo? Mhlawumbi wakha weva ngayo, kuba yindawo edumileyo ehlabathini yokuchitha iiholide ekwiEngadine Valley, eSwitzerland. Kodwa iSt. Moritz iyenye yezinto ebezisoloko zinomtsalane kule ntlambo intle iphakathi kweentaba zeAlps ezigqunywe likhephu ezikumzantsi-mpuma weSwitzerland kufuphi nomda waseItali. Ikwalapho neSwiss National Park, entle enezityalo nezilwanyana ezahlukahlukeneyo ezidumisa uMdali wethu Ozukileyo, uYehova. (INdu. 148:7-10) Kodwa nesithethe salapho esaqalisa ngenkulungwane ye-17 siyamdumisa.
Usenokutsalwa ngumbhalo ongaqhelekanga okwizindlu ezininzi ezikule ntlambo. Kuyinto eqhelekileyo ukubona igama likaThixo libhalwe ngaphambili endlwini, mhlawumbi ngasentla komnyango. Kwiinkulungwane ezadlulayo kwakuyinto eqhelekileyo ukuhombisa umphandle wendlu ngemibhalo eyayipeyintwa, ikrolwe kwiplastari okanye ematyeni. Apha ubona umfanekiso wendlu ekwidolophana yaseBever. Umbhalo okule ndlu unokuguqulelwa ngale ndlela: “Le ndlu yakhiwa ngowe-1715. UYehova usisiqalo yaye uYehova usisiphelo. Zonke izinto zinokubakho ngenxa kaThixo, yaye akukho nto inokubakho ngaphandle kwakhe.” Kulo mbhalo mdala igama likaThixo libhalwe izihlandlo ezibini.
Kwidolophana yaseMadulain kukho umbhalo omdala nangakumbi. Uthi: “INdumiso 127. Ngaphandle kokuba uYehova uyayakha indlu, kulilize ukusebenza nzima kwabakhi bayo kuyo. Lucius Rumedius. Ngowe-1654.”
Kutheni libhalwe ekuhleni igama likaThixo kule ntlambo? Emva phayaa ngexesha loHlaziyo, iBhayibhile yapapashwa ngesiRomansh, ulwimi olusuka kwisiLatini oluthethwa e-Engadine. Enyanisweni, yayiyincwadi yokuqala ukuguqulelwa kolo lwimi. Bechukunyiswa koko babekufunda kwiLizwi likaThixo, abantu abaninzi bale ndawo abazange banele ukubhala amagama abo kuphela kodwa babhala namazwi acatshulwe eBhayibhileni aquka igama likaThixo.
Nanamhlanje le mibhalo isavakalisa igama likaYehova kwaye iyamdumisa, kwanasemva kweenkulungwane yabhalwayo kwezo zindlu. Iindwendwe nabemi bale ntlambo banokufunda okongezelelekileyo ngoThixo ozukileyo uYehova, ngokutyelela kwesinye isakhiwo esinegama lakhe—iHolo yoBukumkani yamaNgqina kaYehova eseBever.
[Inkcazelo Ngomfanekiso okwiphepha 7]
© Stähli Rolf A/age fotostock