Ukukholisa UThixo Kukhokelela Kubomi Obungunaphakade

“Uya kumsikelela nabani na olilungisa, Yehova; ngokungathi kungekhaka elikhulu, uya kubangqonga ngenkoliseko.”—INDU. 5:12.

1, 2. UEliya wacela ntoni kumhlolokazi waseTsarefathi, ibe yintoni awamqinisekisa ngayo?

UMHLOLOKAZI nonyana wakhe babelambile, ibe kwakunjalo nangomprofeti kaThixo. Njengoko lo mhlolokazi waseTsarefathi wayelungiselela ukubasa umlilo ukuze apheke, umprofeti uEliya wacela amanzi nesonka. Lo mhlolokazi wayekulungele ukumnika amanzi, kodwa ekuphela kokutya awayenako ‘yayingumgubo onokuzalisa isandla osengqayini enkulu nentwana yeoli esengqayini encinane.’ Wayevakalelwa kukuba akanakukwazi ukumpha ukutya lo mprofeti, yaye wamxelela naye.—1 Kum. 17:8-12.

² UEliya waqhubeka emcela esithi: “Kuqala ndenzele iqebengwana elibusazinge elincinane ngaloo nto ikhoyo, undizisele apha, uze wenzele wena nonyana wakho kamva. Kuba naku okuthethwe nguYehova uThixo kaSirayeli, ‘Ingqayi enkulu yomgubo ayiyi kuphela, nengqayi encinane yeoli ayiyi kuphela.’”—1 Kum. 17:13, 14.

3. Luluphi ukhetho olubalulekileyo esimele silwenze?

³ Lo mhlolokazi wayemele enze isigqibo esibaluleke ngakumbi kunesokuba wayeza kwenza ntoni ngokutya kwakhe kokugqibela. Ngaba wayeza kuthembela kuYehova ukuba uza kumsindisa yena nonyana wakhe, okanye wayeza kucinga kuphela ngesiqu sakhe kunokuba afune ukukholisa uThixo? Nathi simele senze isigqibo esifanayo. Ngaba siza kuxhalabela ukukholisa uYehova ngaphezu kokuxhalabela izinto eziphathekayo? Sinezizathu ezininzi zokuthembela kuThixo nokumkhonza. Ibe zikho nezinto esinokuzenza ukuze simkholise.

‘Ufanelwe Kukunqulwa’

4. Kutheni uYehova efanelwe kukunqulwa sithi?

⁴ UYehova unelungelo lokufuna abantu bamnqule ngendlela eyamkelekileyo. Ngamxhelo-mnye, abakhonzi bakhe abasezulwini bakuvuma oko besithi: “Ufanele, Yehova, Thixo wethu, ukwamkela uzuko nembeko namandla, ngenxa yokuba wadala zonke izinto, nangenxa yokuthanda kwakho zabakho yaye zadalwa.” (ISityhi. 4:11) Ekubeni edale zonke izinto, uYehova ufanelwe kukunqulwa.

5. Kutheni uthando lukaThixo lufanele lusishukumisele ukuba simkhonze?

⁵ Esinye isizathu sokuba sifanele simkhonze uYehova kukuba esithanda ngendlela engenakuthelekiswa. IBhayibhile ithi: “UThixo wamdala umntu ngokomfanekiso wakhe, wamdala ngokomfanekiso kaThixo; wadala indoda nebhinqa.” (Gen. 1:27) Abantu banenkululeko yokuzikhethela yaye uThixo ubadale bakwazi ukucinga nokuzenzela izigqibo. Ekubeni wasinika ubomi, uYehova waba nguBawo wethu. (Luka 3:38) Njengaye nawuphi na ubawo olungileyo, uye wanika oonyana neentombi zakhe oko kufunekayo ukuze banandiphe ubomi. Wenza ukuba ‘ilanga lakhe liphume’ yaye ‘nemvula uyayinisa,’ ukuze umhlaba uvelise ukutya okuninzi kumhlaba omhle.—Mat. 5:45.

6, 7. (a) UAdam wabangela wuphi umonakalo kwinzala yakhe? (b) Intlawulelo kaKristu iza kubenzela ntoni abo bakholisa uThixo?

⁶ UYehova uye wasihlangula nakwimiphumo emibi yesono. Xa uAdam wonayo wafana nomntu oba izinto kwintsapho yakhe ukuze aye kungcakaza. Ngokuvukela uYehova, wahlutha okuthile kubantwana bakhe—ulonwabo olungunaphakade. Ngenxa yokucingela isiqu sakhe kuphela, wadlulisela ukungafezeki ebantwini. Ngenxa yoko bonke abantu bayagula, baba buhlungu yaye ekugqibeleni bayafa. Kuye kufuneke intlawulo ukuze kukhululwe ikhoboka, ibe uYehova uye wasihlawulela ukuze asihlangule kuloo miphumo mibi. (Funda amaRoma 5:21.) Esenza ukuthanda kukaThixo, uYesu Kristu wanikela ‘ngomphefumlo wakhe waba yintlawulelo ngenxa yabaninzi.’ (Mat. 20:28) Kungekudala abo bakholisa uThixo baza kufumana iingenelo zaloo ntlawulelo.

⁷ UMdali wethu uYehova, wasipha esona sipho sikhulu esasingenakusifumana nakubani na, sokuba nobomi obonwabisayo nobunenjongo. Xa simkholisa, siza kukwazi ukubona indlela aza kuwuphelisa ngayo wonke umonakalo owenziwe ebantwini. UYehova uza kubonisa ngamnye wethu ukuba “ungumvuzi wabo bamfuna ngenyameko.”—Heb. 11:6.

“Abantu Bakho Baya Kuzinikela Ngokuvumayo”

8. Oko kwenzeka kuIsaya kusifundisa ntoni ngokukhonza uThixo?

⁸ Ukuze sikholise uThixo sifanele silisebenzise kakuhle ilungelo lethu lokuzikhethela. Oku kungenxa yokuba uYehova akanyanzeli mntu ukuba amkhonze. Ngemihla kaIsaya wabuza: “Ndothuma bani na, ngubani na owosiyela?” UYehova wanika loo mprofeti ithuba lokuba azikhethele, nto leyo eyayibonisa ukuba uyalihlonela ilungelo lakhe. Khawuthelekelele indlela ekumele ukuba wavuya ngayo uIsaya xa ephendula esithi: “Ndikho! Thuma mna.”—Isa. 6:8.

9, 10. (a) Sisiphi isimo sengqondo esifanele sibe naso xa sikhonza uThixo? (b) Kutheni kufanelekile ukukhonza uYehova ngomphefumlo uphela?

⁹ Abantu bakhululekile ukuba bazikhethele enoba bayamkhonza okanye abamkhonzi kusini na uThixo. UYehova ufuna simkhonze ngokuvumayo. (Funda uYoshuwa 24:15.) Nabani na okhonza uThixo ekrikriza akanakumkholisa; ibe akamfuni umntu omkhonza kuba efuna ukukholisa abanye. (Kol. 3:22) Ukuba sinikela inkonzo engcwele ‘sithingaza,’ sivumela izinto esizithandayo zeli hlabathi zisiphazamise kunqulo lwethu, uThixo akanakukholiswa sithi. (Eks. 22:29) UYehova uyazi ukuba kuza kungenelwa thina xa simkhonza ngomphefumlo uphela. UMoses wabongoza amaSirayeli ukuba akhethe ubomi ‘ngokuthi amthande uYehova uThixo wawo, aliphulaphule ilizwi lakhe, aze anamathele kuye.’—Dut. 30:19, 20.

¹⁰ UKumkani uDavide woSirayeli wamandulo wavuma ingoma esithi: “Abantu bakho baya kuzinikela ngokuvumayo ngemini yomkhosi wakho wamajoni. Ngobungangamsha bobungcwele, ekuphumeni kwesifingo, uneqela lakho labantu abaselula kanye njengamathontsi ombethe.” (INdu. 110:3) Abantu abaninzi namhlanje baphilela ukuziqokelelela imali nokuzonwabisa. Kodwa ke, inkonzo engcwele iza kuqala ebomini babantu abamthandayo uYehova. Indlela abanenzondelelo ngayo xa beshumayela iindaba ezilungileyo ibonisa oko kubalulekileyo kubo. Bamthemba ngokupheleleyo uYehova ukuba uza kubanika izinto abazifuna imihla ngemihla.—Mat. 6:33, 34.

Imibingelelo Ekholisa UThixo

11. AmaSirayeli ayethembe ukuba aza kungenelwa njani ngokunikela imibingelelo kuYehova?

¹¹ Phantsi koMthetho, abantu bakaThixo babenikela imibingelelo eyamkelekileyo ukuze bamkholise. ILevitikus 19:5 ithi: “Xa nibingelela kuYehova umbingelelo wobudlelane, nowunikela ukuze nizizuzele inkoliseko.” Kwincwadi efanayo yeBhayibhile, sifunda oku: “Ukuba nithe nabingelela umbingelelo wombulelo kuYehova, nifanele niwubingelele ukuze nizuze inkoliseko ngawo.” (Lev. 22:29) Xa amaSirayeli ayenikela imibingelelo yezilwanyana ezifanelekileyo kwisibingelelo sikaYehova, umsi owawusonyuka wawufana ‘nevumba elithozamisayo’ kuThixo oyinyaniso. (Lev. 1:9, 13) Kwakumkholisa yaye kumhlaziya ukubona indlela abamthanda ngayo abantu bakhe. (Gen. 8:21) Kukho umgaqo esiwufundayo namhlanje kwezi nkalo zoMthetho. UYehova uyakholiswa ngabo banikela imibingelelo eyamkelekileyo kuye. Wamkela imibingelelo enjani? Makhe sihlolisise iinkalo ezimbini ebomini: ihambo nentetho yethu.

12. Ziziphi izinto ezinokubangela uThixo acatshukiswe ‘kukunikela kwethu imizimba yethu njengemibingelelo’?

¹² Xa wayebhalela abaseRoma, umpostile uPawulos wathi: ‘Nikelani imizimba yenu ibe yimibingelelo ephilayo, engcwele, eyamkelekileyo kuThixo, inkonzo ke leyo engcwele ngokwamandla enu engqiqo.’ (Roma 12:1) Ukuze ubani amkholise uThixo kufuneka agcine umzimba wakhe wamkelekile kuye. Ukuba ebenokuzingcolisa ngecuba, ibetel nut, iziyobisi okanye asebenzise kakubi utywala, loo mnikelo ubungayi kuxabiseka. (2 Kor. 7:1) Ukongezelela koko, ekubeni umntu ‘oqhelisela uhenyuzo esona nxamnye nomzimba wakhe,’ naluphi na uhlobo lokuziphatha okubi lwenza umbingelelo wakhe umcaphukise uYehova. (1 Kor. 6:18) Ukuze akholise uThixo, ubani umele ‘abe ngcwele kuyo yonke ihambo yakhe.’—1 Pet. 1:14-16.

13. Kutheni kufanelekile ukuba sidumise uYehova?

¹³ Olunye uhlobo lombingelelo olumkholisayo uYehova lunento yokwenza noko sikuthethayo. Abo bamthandayo uYehova bebesoloko bethetha kakuhle ngaye ekuhleni naxa besemakhayeni abo. (Funda iNdumiso 34:1-3.) Funda iNdumiso 148-150, uze uphawule izihlandlo ezi ndumiso zintathu ezisikhuthaza ngazo ukuba sidumise uYehova. Liyinyaniso elokuba, “abo bathe tye kubafanele ukudunyiswa.” (INdu. 33:1) NoYesu Kristu, onguMzekelo wethu, wabethelela ukubaluleka kokudumisa uThixo ngokushumayela iindaba ezilungileyo.—Luka 4:18, 43, 44.

14, 15. UHoseya wabongoza amaSirayeli ukuba anikele ngemibingelelo enjani, yaye uYehova wavakalelwa njani yiyo?

¹⁴ Xa sishumayela ngenzondelelo singqina ukuba siyamthanda uYehova yaye sifuna ukumkholisa. Ngokomzekelo, khawucinge ngomprofeti uHoseya owabongoza amaSirayeli awayekunqulo lobuxoki nawayengamkholisi uThixo. (Hos. 13:1-3) Wathi makathandaze athi: “[Yehova] sixolele isiphoso sethu; uze wamkele okulungileyo, yaye siya kunikela njengembuyekezo amathole eenkomo aziinkunzi, amazwi emilebe yethu.”—Hos. 14:1, 2.

¹⁵ Inkomo yayisesona silwanyana sinexabiso eliphezulu amaSirayeli awayenokunikela ngaso kuYehova. Ngoko ke, “amathole eenkomo aziinkunzi, amazwi emilebe yethu,” ngamazwi anyanisekileyo, acingisiswe kakuhle nadumisa uThixo oyinyaniso. Wavakalelwa njani uYehova ngabo babesenza imibingelelo enjalo? Wathi: “Ndiya kubathanda ngokuzithandela.” (Hos. 14:4) Abantu ababenikela imibingelelo yendumiso enjalo uYehova wabaxolela, wakholiswa ngabo waza waba ngumhlobo wabo.

16, 17. Xa umntu eshumayela iindaba ezilungileyo kuba enokholo kuThixo, uYehova uvakalelwa njani ngendumiso yakhe?

¹⁶ Ukudumisa uYehova ekuhleni bekusoloko kubalaseliswa kunqulo lokwenyaniso. Ukuzukisa uThixo oyinyaniso kwakuthetha lukhulu kumdumisi kangangokuba wabongoza uThixo esithi: “Nceda uyoliswe yiminikelo yokuzithandela yomlomo wam, Yehova.” (INdu. 119:108) Kuthekani namhlanje? Ethetha ngesihlwele esikhulu sabantu bexesha lethu, uIsaya waprofeta wathi: “Baya kwazisa iindumiso zikaYehova. . . . [Izipho zabo] ziya kunyukela esibingelelweni sam [sikaThixo] ngenkoliseko.” (Isa. 60:6, 7) Eso siprofeto siyazaliseka kuba izigidi zabantu zinikela kuThixo “umbingelelo wendumiso, oko kukuthi, isiqhamo semilebe evakalisa ekuhleni igama lakhe.”—Heb. 13:15.

¹⁷ Kuthekani ngawe? Ngaba unikela kuThixo imibingelelo eyamkelekileyo? Ukuba akunjalo, ngaba uza kwenza utshintsho olufunekayo uze uqalise ukudumisa uYehova ekuhleni? Xa ukholo lwakho lukushukumisela ukuba uqalise ukushumayela iindaba ezilungileyo, umbingelelo wakho uya “kukholeka ngakumbi kuYehova kunenkunzi yenkomo.” (Funda iNdumiso 69:30, 31.) Siyakuqinisekisa ukuba ‘ivumba elithozamisayo’ lombingelelo wakho wokudumisa uYehova liza kufika kuye, yaye uya kukholiswa nguwe. (Hez. 20:41) Ayikho enye into eya kukuvuyisa ngolo hlobo.

‘UYehova Uya Kumsikelela Nabani Na Olilungisa’

18, 19. (a) Abantu abaninzi namhlanje bavakalelwa njani ngokukhonza uThixo? (b) Ukungamkholisi uThixo kukhokelela entwenini?

¹⁸ Namhlanje, abantu abaninzi bavakalelwa ngendlela efanayo nabo bexesha likaMalaki ababesithi: “Akunaxabiso ukukhonza uThixo. Yaye kube nayiphi ingenelo ukugcina kwethu imfanelo yakhe?” (Mal. 3:14) Ngenxa yokuthanda izinto eziphathekayo, bathi injongo kaThixo ayinakufezeka yaye imithetho yakhe ayisasebenzi. Bagqala umsebenzi wokushumayela njengoyinkcitha-xesha nocaphukisayo.

¹⁹ Iingcamango ezinjalo zaqala kumyezo wase-Eden. NguSathana oweyisela uEva ukuba abugqale njengobungabalulekanga ubomi obumnandi awabunikwa nguYehova nokuba angafuni kumkholisa. Namhlanje, uSathana uhlala ezama ukwenza abantu bakholelwe ukuba abayi kuzuza nto ngokwenza ukuthanda kukaThixo. Kodwa ke, uEva nomyeni wakhe bafumanisa ukuba ukungamkholisi uThixo kwabenza baphulukana nobomi babo. Kungekudala, abo balandela umzekelo wabo ombi baza kuhlelwa yimiphumo efanayo.—Gen. 3:1-7, 17-19.

20, 21. (a) Yintoni eyenziwa ngumhlolokazi waseTsarefathi, ibe zamhambela njani izinto? (b) Sifanele simxelise njani umhlolokazi waseTsarefathi, yaye ngoba?

²⁰ Thelekisa oko kwenzeka kuAdam noEva noko kwenzeka kuEliya nomhlolokazi waseTsarefathi ekuthethwe ngabo ngaphambili. Emva kokukhuthazwa nguEliya, eli bhinqa laqalisa ukubhaka laza laqala ngokunika lo mprofeti iqhekeza lesonka. UYehova wasizalisekisa isithembiso awasenza ngoEliya. Le ngxelo ithi: “Waqhubeka esidla, yena kunye naye nendlu yakhe kangangeentsuku. Ingqayi enkulu yomgubo ayizange iphele, nengqayi encinane yeoli ayizange iphele, ngokwelizwi likaYehova awalithethayo ngoEliya.”—1 Kum. 17:15, 16.

²¹ Umhlolokazi waseTsarefathi wenza into eyenziwa ligcuntswana nje kwiibhiliyoni zabantu abaphilayo namhlanje. Wathembela ngokupheleleyo kuThixo wosindiso, yaye uYehova akazange amlahle. Le ngxelo kwanezinye eziseBhayibhileni zibonisa ukuba uYehova ufanelwe kukuthenjwa sithi. (Funda uYoshuwa 21:43-45; 23:14.) Izinto eziye zenzeka kumaNgqina kaYehova ale mihla nazo zingqina ukuba akayi kuze abashiye abo bamkholisayo.—INdu. 34:6, 7, 17-19.a

22. Kutheni kungxamisekile ukuba sifune ukumkholisa uThixo ngaphandle kokulibazisa?

²² Isondele imini kaThixo yokugweba “bonke abahleliyo phezu kobuso bawo wonke umhlaba.” (Luka 21:34, 35) Akakho umntu onokuyibaleka. Ukuba nobutyebi okanye izinto eziphathekayo akunakuthelekiswa novuyo esiya kuba nalo xa uMgwebi omiselwe nguThixo esithi kuthi: “Yizani, nina nisikelelweyo nguBawo, budleni ilifa ubukumkani obalungiselelwa nina.” (Mat. 25:34) ‘UYehova uya kumsikelela nabani na olilungisa; ngokungathi kungekhaka elikhulu, uya kubangqonga ngenkoliseko.’ (INdu. 5:12) Ngaba bekungayi kuba bubulumko ukufuna ukumkholisa uThixo?

[Umbhalo osemazantsi]

Ngaba Uyakhumbula?

• Kutheni uYehova efanelwe kukunqulwa sithi ngokusuk’ entliziyweni?

• UYehova wamkela imibingelelo enjani namhlanje?

• Ibinzana elithi “amathole eenkomo aziinkunzi, amazwi emilebe yethu,” libhekisela entwenini, yaye kutheni sifanele siwanikele kuYehova?

• Kutheni sifanele sikholise uThixo?

[Umfanekiso okwiphepha 13]

Umprofeti kaThixo wathi makenze siphi isigqibo esibalulekileyo umhlolokazi osweleyo?

[Umfanekiso okwiphepha 15]

Sizuza ntoni ngokunikela umbingelelo wendumiso kuYehova?

[Umfanekiso okwiphepha 17]

UYehova akasoze akuphoxe xa uthembele ngokunyanisekileyo kuye