“Ukuthobela Kulunge Ngakumbi Kunombingelelo”

UKUMKANI wokuqala kaSirayeli wamandulo yayinguSawule. Nangona wayekhethwe nguThixo oyinyaniso, ekugqibeleni uSawule akazange athobele.

Ziziphi izinto eziphosakeleyo ezenziwa nguSawule? Ngaba wayenokukwazi ukuziphepha? Sinokungenelwa njani ngokuqwalasela umzekelo wakhe?

UYehova Uchaza Ukumkani Amnyulileyo

Ngaphambi kokuba uSawule abe ngukumkani, umprofeti uSamuweli wayekhonza njengommeli kaThixo kwaSirayeli. USamuweli wayesele emdala, yaye oonyana bakhe bengathembekanga. Kwangaxeshanye, olu hlanga lwalusongelwa ziintshaba zalo. Xa amadoda amakhulu akwaSirayeli acela uSamuweli ukuba awanyulele ukumkani oza kuwagweba noza kuwakhokela xa kusiyiwa edabini, uYehova wayalela lo mprofeti ukuba athambise uSawule njengenkokeli waza wathi: ‘Umele abasindise abantu bam esandleni samaFilisti.’—1 Sam. 8:4-7, 20; 9:16.

USawule ‘wayeselula yaye eyinzwana.’ Noko ke, asiyonkangeleko yakhe kuphela eyayimenza afaneleke. Wayethobekile. Ngokomzekelo, uSawule wabuza uSamuweli: “AndingomBhenjamin na wesona sizwe sincinane kwezakwaSirayeli, nentsapho yakowethu eyona ingabalulekanga kuzo zonke iintsapho zesizwe sakwaBhenjamin? Ngoko kutheni na ukuba uthethe into enjengale kum?” USawule wayengaphakamanga yaye nentsapho yakowabo engayijongi njengebalulekileyo, nangona uyise, uKishe, ‘wayenendyebo eninzi.’—1 Sam. 9:1, 2, 21.

Phawula nendlela uSawule awasabela ngayo xa uSamuweli wamchaza ekuhleni ukumkani wakwaSirayeli okhethwe nguYehova. USamuweli waqala wathambisa uSawule ngasese waza wathi kuye: ‘Yenza oko kusemandleni akho, ngenxa yokuba uThixo oyinyaniso unawe.’ Emva koko, lo mprofeti wabizela abantu ndawonye ukuze achaze ekuhleni ukhetho lukaYehova. Noko ke, xa kwachazwayo ukuba nguSawule, akazange afumaneke. Ngenxa yokuba neentloni waya kuzifihla. UYehova wachaza apho akhoyo, yaye uSawule wabhengezwa njengokumkani.—1 Sam. 10:7, 20-24.

Edabini

Kungekudala, uSawule wabadanisa bonke abo babesenokuba babethandabuza enoba uyafaneleka kusini na. Xa ama-Amoni asongela ngokuhlasela idolophu yamaSirayeli, “umoya kaThixo wasebenza kuSawule.” Esebenzisa igunya lakhe, wahlanganisa abaphumi-mkhosi, wabalungelelanisa waza wabakhokela ukuba boyise edabini. Kodwa uSawule wathi nguThixo obangele ukuba boyise, esithi: “Namhlanje uYehova wenze usindiso kwaSirayeli.”—1 Sam. 11:1-13.

USawule wayeneempawu ezintle yaye uThixo wamsikelela. Wayeqonda ukuba uYehova unamandla. Noko ke, impumelelo yamaSirayeli nokumkani wawo yayixhomekeke kwinto enye eyayibaluleke kakhulu. USamuweli wathi kubantu bakwaSirayeli: “Ukuba niya kumoyika uYehova nize okunene nimkhonze nithobele nelizwi lakhe, yaye ningawuvukeli umyalelo kaYehova, kokubini nina nokumkani omele anilawule ngokuqinisekileyo niya kuba ngabalandeli bakaYehova uThixo wenu.” Yintoni amaSirayeli ayenokuqiniseka ngayo xa ethembekile kuThixo? USamuweli wathi: “UYehova akayi kubalahla abantu bakhe ngenxa yegama lakhe elikhulu, ngenxa yokuba uYehova ukuthabathele kuye ukunenza abantu bakhe.”—1 Sam. 12:14, 22.

Ukuthobela yayiyeyona nto ibalulekileyo ukuze uThixo akholiswe ngawo, ibe kusenjalo nanamhlanje. Xa abakhonzi bakaYehova bethobela imiyalelo yakhe, uyabasikelela. Kodwa kuthekani xa bengamthobeli uYehova?

“Wenze Ngobudenge”

Emva kwento eyenziwa nguSawule kumaFilisti, amfun’ esiqwini. Umkhosi ‘onjengentlabathi eselunxwemeni lolwandle ukuba mninzi’ weza kulwa noSawule. “Azibonela namadoda akwaSirayeli ukuba asezingxakini ezinkulu, ngenxa yokuba abantu babebandezelekile; abantu bazifihla emiqolombeni nasemigongxweni nasezingxondorheni nasemagumbini aphantsi komhlaba nasemihadini yamanzi.” (1 Sam. 13:5, 6) Wayeza kwenza ntoni uSawule?

USamuweli wayeyalele uSawule ukuba badibane eGiligali, apho lo mprofeti wayeza kunikela khona imibingelelo. USawule walinda, kodwa uSamuweli wayengade afike yaye umkhosi kaSawule wawuchithakala. Ngoko uSawule wayithathela kuye imbopheleleko yokunikela loo mibingelelo. Emva nje kokuba ekwenzile oko, uSamuweli wafika. Akuva oko kwenziwe nguSawule, uSamuweli wathi kuye: “Wenze ngobudenge. Akuwugcinanga umyalelo kaYehova uThixo wakho akuyalele wona, ngenxa yokuba, ukuba ubuwugcinile, uYehova ngebuqinisile ubukumkani bakho phezu koSirayeli ukusa kwixesha elingenammiselo. Ke ngoku ubukumkani bakho abuyi kuhlala. Ngokuqinisekileyo uYehova uya kuzifumanela indoda evunyiweyo yintliziyo yakhe; yaye uYehova uya kuyimisela ibe yinkokeli phezu kwabantu bakhe, ngenxa yokuba akukugcinanga oko uYehova akuyalele kona.”—1 Sam. 10:8; 13:8, 13, 14.

USawule wabonisa ukungabi nalukholo xa wagabadela ngokukhetha ukungathobeli umyalelo kaThixo wokuba alinde uSamuweli ukuba eze kunikela umbingelelo. USawule wenza okwahluke ngokupheleleyo koko kwenziwa nguGidiyon owayesakuba ngumphathi-mkhosi wamaSirayeli! UYehova wayalela uGidiyon ukuba aphungule umkhosi wakhe ukususela kuma-32 000 ukusa kuma-300, yaye uGidiyon wathobela. Ngoba? Ngenxa yokuba wayenokholo kuYehova. Encedwa nguThixo, woyisa amajoni ali-135 000. (ABagwe. 7:1-7, 17-22; 8:10) UYehova ngewayemncedile naye uSawule. Noko ke, ngenxa yokungathobeli kukaSawule, amaFilisti aphanga amaSirayeli.—1 Sam. 13:17, 18.

Xa sijamelene nobunzima, sizenza njani izigqibo? Kwabo baswele ukholo, kusenokubonakala ngathi ukugatya imigaqo kaThixo yeyona nto ibhetele. Ekubeni uSamuweli wayengekho, kusenokwenzeka ukuba uSawule wayecinga ukuba wenze ngobulumko. Noko ke, kwabo bazimisele ukukholisa uThixo, ukulandela imigaqo yeZibhalo esebenza kuloo nto kugqitywa ngayo yeyona ndlela ifanelekileyo yokwenza izinto.

UYehova Ugatya USawule

Ebudeni bokuhlaselwa kwama-Amaleki, uSawule wenza enye impazamo enkulu. UThixo wayewagwebile ama-Amaleki ngenxa yokuhlasela amaSirayeli engenzanga nto xa ayephuma eYiputa. (Eks. 17:8; Dut. 25:17, 18) Ngaphezu koko, ama-Amaleki amanyana nezinye iintlanga ukuze aphinde ahlasele abantu bakaThixo abakhethiweyo ebudeni bexesha laBagwebi. (ABagwe. 3:12, 13; 6:1-3, 33) Ngoko uYehova wawaphendulisa ama-Amaleki waza wayalela uSawule ukuba awatshabalalise.—1 Sam. 15:1-3.

Kunokuba athobele umyalelo kaYehova wokuba atshabalalise la ma-Amaleki akhohlakeleyo nezinto zawo, uSawule wathimba ukumkani wawo waza wagcina ezona zilwanyana zawo zilungileyo. Yintoni eyenzekayo xa uSamuweli wabuza uSawule ngalo mba? USawule wazama ukosulela ityala kwabanye esithi: “Abantu baye banemfesane ngezona zilungileyo emhlambini wezimvu nasemhlambini weenkomo, ngenjongo yokubingelela kuYehova.” Enoba uSawule ngokwenene wayenenjongo yokubingelela ngezo zilwanyana okanye akunjalo, wayengathobelanga. Ngoku uSawule wayengasekho ‘mncinane emehlweni akhe.’ Ngenxa yoko, umprofeti kaThixo waxelela uSawule ukuba akamthobelanga uThixo. Emva koko uSamuweli wathi: “Ngaba uYehova lo uyoliswa yiminikelo etshiswayo nemibingelelo na njengoko kunjalo ngokuthotyelwa kwelizwi likaYehova? Khangela! Ukuthobela kulunge ngakumbi kunombingelelo . . . Ekubeni uligatyile ilizwi likaYehova, ngako oko naye uyakugatya ekubeni ngukumkani.”—1 Sam. 15:15, 17, 22, 23.

Xa uYehova wawususayo umoya wakhe oyingcwele waza wayeka ukumsikelela uSawule, lo kumkani wokuqala wakwaSirayeli walawulwa “ngumoya ombi.” USawule waqalisa ukungamthembi nokummonela uDavide—indoda uYehova kamva awayeza kuyenza ukumkani. USawule wazama kaliqela ukubulala uDavide. IBhayibhile ithi xa wabona ukuba “uYehova unoDavide,” “uSawule wasoloko elutshaba lukaDavide.” USawule wazama ukumzingela wada wayalela nokuba kubulawe ababingeleli abangama-85 nabanye. Siyabonakala ke isizathu sokuba uYehova amshiye!—1 Sam. 16:14; 18:11, 25, 28, 29; 19:10, 11; 20:32, 33; 22:16-19.

Xa amaFilisti aphinda ahlasela amaSirayeli, uSawule wabhenela ekusebenzelaneni nemimoya ezama ukufumana uncedo. Ngosuku olulandelayo, wangxwelerhwa ngokuqatha edabini waza wazibulala. (1 Sam. 28:4-8; 31:3, 4) Ngokuphathelele ukungathobeli kokumkani wokuqala wakwaSirayeli, iZibhalo zithi: “Wafa . . . ke uSawule ngenxa yokungathembeki kwakhe awakwenza ngokungabi nalukholo kuYehova ngokuphathelele ilizwi likaYehova angaligcinanga nangokubuzisa kwakhe koneshologu. Akabuzisanga kuYehova.”—1 Kron. 10:13, 14.

Umzekelo kaSawule ombi ubonisa ngokucacileyo ukuba ukuthobela uYehova kubhetele kunokunikela nawuphi na umbingelelo kuye. Umpostile uYohane wathi: “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.” (1 Yoh. 5:3) Ngamana singangaze siyilibale le nyaniso ibalulekileyo: Ukuze sibe nolwalamano oluhlala luhleli noThixo, sifanele simthobele.

[Umfanekiso okwiphepha 21]

Ekuqaleni uSawule wayeyinkokeli ethobekileyo

[Umfanekiso okwiphepha 23]

Kwakutheni ukuze uSamuweli athi kuSawule “ukuthobela kulunge ngakumbi kunombingelelo”?