Buthande Ubulungisa Ngentliziyo Yakho Yonke

“Ubuthandile ubulungisa.”—INDU. 45:7.

1. Yintoni eya kusinceda silandele “umkhondo wobulungisa”?

NGELIZWI nangomoya oyingcwele wakhe, uYehova ukhokelela abantu bakhe “kumkhondo wobulungisa.” (INdu. 23:3) Noko ke, ekubeni singafezekanga, sidla ngokuphambuka kuloo mkhondo. Ukubuyela ekwenzeni okuhle kufuna umgudu nokuzimisela. Yintoni eya kusinceda siphumelele? NjengoYesu, simele sikuthande ukwenza okulungileyo.—Funda iNdumiso 45:7.

2. Uyintoni “umkhondo wobulungisa”?

² Uyintoni “umkhondo wobulungisa”? Umkhondo yindledlana okanye umzila omxinwa. Xa uhamba ngalo “mkhondo” ulawulwa yimilinganiselo kaYehova yobulungisa. NgesiHebhere nangesiGrike, igama elithi “ubulungisa” libhekisela koko “kuthe tye,” okuthetha ukubambelela ngokungqongqo kwimigaqo yokuziphatha. Ekubeni uYehova ‘eyindawo yokuhlala yobulungisa,’ abakhonzi bakhe bayakuvuyela ukuboniswa nguye eyona ndlela ithe tye abamele bahambe ngayo.—Yer. 50:7.

3. Sinokufunda njani ngakumbi ngobulungisa bukaThixo?

³ Ukuba sizama ngentliziyo yethu yonke ukuphila ngemilinganiselo kaThixo yobulungisa, siya kumkholisa ngokupheleleyo. (Dut. 32:4) Siya kukwazi ukwenza oko xa sifunda konke esinako ngoYehova uThixo kwiLizwi lakhe, iBhayibhile. Xa sifunda ngaye, sisondela kuye yonke imihla, siya kubuthanda ngakumbi ubulungisa bakhe. (Yak. 4:8) Kwanaxa kufuneka senze izigqibo ezibalulekileyo ebomini sifanele sikhokelwe liLizwi likaThixo eliphefumlelweyo.

Funa Ubulungisa BukaThixo

4. Kubandakanya ntoni ukufuna ubulungisa bukaThixo?

⁴ Funda uMateyu 6:33. Ukufuna ubulungisa bukaThixo akuphelelanga nje kwixesha esilichitha sishumayela iindaba ezilungileyo zoBukumkani. Ukuze inkonzo yethu engcwele yamkeleke kuYehova, indlela esiziphatha ngayo mihla le ifanele ivisisane nemilinganiselo yakhe ephakamileyo. Yintoni emele yenziwe ngabo bonke abafuna ubulungisa bukaYehova? Bamele ‘bambathe ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka.’—Efe. 4:24.

5. Yintoni eya kusinceda soyise ukudimazeka?

⁵ Njengoko sizabalazela ukuphila ngemilinganiselo kaThixo yobulungisa, maxa wambi sisenokudimazeka ngenxa yeempazamo zethu. Yintoni enokusinceda soyise ukudimazeka okusithez’ amandla size sifunde ukuthanda nokwenza ubulungisa? (IMize. 24:10) Sifanele sithandaze rhoqo kuYehova “ngeentliziyo ezinyanisekileyo siqiniseke ngokupheleleyo ngokholo.” (Heb. 10:19-22) Enoba singamaKristu athanjisiweyo okanye sinethemba lokuphila emhlabeni, sinokholo kwidini lentlawulelo likaYesu Kristu nakwizinto asenzela zona njengoMbingeleli wethu Omkhulu kakhulu. (Roma 5:8; Heb. 4:14-16) Umpostile uYohane wathi: ‘Igazi likaYesu lisihlambulula kuso sonke isono.’ (1 Yoh. 1:6, 7) IBhayibhile ithi nangona izono zethu “zingqombela, ziya kwenziwa mhlophe njengekhephu.” Limangalisa ngokwenene eli lungiselelo silenzelwe nguYehova ngedini lentlawulelo loNyana wakhe oyintanda!—Isa. 1:18.

Hlola Isikrweqe Sakho Sokomoya

6. Kutheni kubalulekile ukuba sihlole isikrweqe sethu sokomoya?

⁶ Sifanele sinxibe “isigcina-sifuba sobulungisa” ngalo lonke ixesha kuba siyinxalenye ebalulekileyo yesikrweqe sokomoya esivela kuThixo. (Efe. 6:11, 14) Enoba sisandul’ ukuzahlulela kuYehova okanye sesinamashumi eminyaka simkhonza, kubaluleke kakhulu ukuba sihlole isikrweqe sethu sokomoya yonke imihla. Ngoba? Ngenxa yokuba uMtyholi needemon zakhe balahlelwe emhlabeni. (ISityhi. 12:7-12) USathana ulugcwabevu ngumsindo yaye uyazi ukuba ixesha analo lincinane. Ngenxa yoko, uye wabahlasela ngamandla abakhonzi bakaThixo. Ngaba siyakuqonda ukubaluleka kokunxiba “isigcina-sifuba sobulungisa”?

7. Ukuqonda ukubaluleka ‘kwesigcina-sifuba sobulungisa’ kuya kusenza siziphathe njani?

⁷ Isigcina-sifuba sikhusela intliziyo yokoqobo. Ngenxa yokungafezeki kwethu, intliziyo yethu yokomfuziselo idla ngokuba nenkohliso yaye ityhudise. (Yer. 17:9) Ekubeni intliziyo yethu ityekele ebubini, kubalulekile ukuba siyiqeqeshe. (Gen. 8:21) Xa sikuqonda ukubaluleka ‘kwesigcina-sifuba,’ asinakusuka sisikhulule okwexeshana ngokukhetha ukuzonwabisa ngezinto uThixo azithiyileyo; singenako kananjalo ukuzivumela ukuba sibe neminqweno yokwenza okubi. Asinakuchitha ixesha elininzi elibalulekileyo sibukele umabonwakude. Kunoko, siya kuqhubeka sizama ukwenza izinto ezimkholisayo uYehova. Enoba sinokukhe siwe ngokucinga ngendlela yokwenyama engafanelekanga, uYehova unokusinceda sivuke kwakhona.—Funda iMizekeliso 24:16.

8. Kutheni sifanele sibe ‘nekhaka elikhulu lokholo’?

⁸ “Ikhaka elikhulu lokholo” liphakathi kweenxalenye zesikrweqe sethu sokomoya. Lisinceda sikwazi “ukucima yonke imijukujelwa evuthayo yalowo ungendawo.” (Efe. 6:16) Ukholo nokuthanda uYehova ngentliziyo epheleleyo kusinceda ukuba siziqhelise ukwenza ubulungisa size sihlale kwindlela esa kubomi obungunaphakade. Xa sifunda ukuthanda uYehova, siya kubuxabisa ngakumbi ubulungisa bakhe. Kodwa ke, kuthekani ngesazela sethu? Sisinceda njani kwimigudu yethu yokuthanda ubulungisa?

Hlala Unesazela Esilungileyo

9. Singenelwa njani ngokuhlala sinesazela esilungileyo?

⁹ Xa sasibhaptizwa, senza isicelo kuYehova sokuba “nesazela esilungileyo.” (1 Pet. 3:21) Ngenxa yokuba sinokholo kwintlawulelo, igazi likaYesu liyazigubungela izono zethu yaye ngaloo ndlela siba nolwalamano oluhle noThixo. Noko ke, ukuze sihlale sinalo sifanele sibe nesazela esilungileyo. Ukuba maxa wambi isazela sethu siyasigweba okanye siyasilumkisa, sifanele sivuye kuba sisasebenza kakuhle. Izilumkiso ezinjalo zibonisa ukuba isazela sethu asifanga ngokuphathelele imilinganiselo kaYehova yobulungisa. (1 Tim. 4:2) Kodwa ke isazela sinokuphumeza enye indima ebalulekileyo kwabo bathanda ubulungisa.

10, 11. (a) Balisa amava abonisa isizathu sokuba sifanele siphulaphule isazela sethu esiqeqeshwe yiBhayibhile. (b) Kutheni ukuthanda ubulungisa kunokusivuyisa?

¹⁰ Ukuba senza into ephosakeleyo, sinokutyiwa sisazela okanye sisingcungcuthekise. Omnye oselula waphambuka “kumkhondo wobulungisa.” Waba nomkhwa wokubukela amanyala waza waqalisa ukutshaya umya. Xa ekwiintlanganiso wayeziva enetyala yaye xa ekwinkonzo yasentsimini wayeziva ngathi uyahanahanisa, ngoko wayeka ukwenza izinto zamaKristu. Wathi: “Kodwa ndandingazi ukuba isazela sam sasiya kundigweba ngezenzo zam.” Waphinda wathi, “Kwadlula iminyaka emalunga nemine ndisenza izinto ngobudenge.” Emva koko waqalisa ukucinga ngokubuyela enyanisweni. Nangona wayecinga ukuba uYehova akayi kuwuphulaphula umthandazo wakhe, sekunjalo wathandaza ecela uxolo. Kungekapheli nemizuzu elishumi, kwafika unina waza wamkhuthaza ukuba abuyele ezintlanganisweni. Waya kwiHolo yoBukumkani waza wacela ukuqhutyelwa isifundo seBhayibhile ngomnye umdala. Ethubeni, wabhaptizwa, yaye uyambulela uYehova ngokusindisa ubomi bakhe.

¹¹ Ngaba alizicacelanga elokuba ulonwabo lwenene siya kulufumana ngokwenza okulungileyo? Njengoko sifunda ukuthanda ubulungisa size sibenze ngokupheleleyo, siya kukuvuyela ngakumbi ukwenza izinto ezikholisa uBawo wethu wasezulwini. Khawufan’ ucinge! Iyeza imini ekuya kuthi ngayo bonke abantu bangaxhalatyiswa zizazela zabo; kuya kucaca ngokupheleleyo ukuba sidalwe ngokomfanekiso kaThixo. Ngoko ke, ngoku masizimisele ukuthanda ubulungisa ngokusuka emazantsi eentliziyo zethu, size sivuyise uYehova.—IMize. 23:15, 16.

12, 13. Sinokusiqeqesha njani isazela sethu?

¹² Sinokusiqeqesha njani isazela sethu? Xa sifunda iZibhalo neempapasho ezisekelwe kuzo, kubalulekile ukukhumbula ukuba, “intliziyo yelungisa iyayicamngca impendulo.” (IMize. 15:28) Makhe siqwalasele indlela okusinceda ngayo oku xa kuziwa kumsebenzi wempangelo. Ukuba uhlobo oluthile lomsebenzi lungqubana ngokucacileyo neZibhalo, uninzi lwethu lukhawuleza lufune ukhokelo esilulungiselelwe ludidi lwekhoboka elithembekileyo neliyingqondi. Noko ke, xa kungacacanga enoba uhlobo oluthile lomsebenzi lwamkelekile okanye akunjalo, sifanele sifune imigaqo yeBhayibhile echaphazela le meko size sicingisise ngokunzulu ngayo.a Sifanele senze okufanayo nakwimigaqo ephathelele ukuphepha ukukhubekisa izazela zabantu. (1 Kor. 10:31-33) Okubaluleke ngakumbi kukuba sifanele sixhalabele imigaqo echaphazela ulwalamano lwethu noThixo. Ukuba uYehova ungumntu wenene kuthi, sifanele kuqala sizibuze lo mbuzo, ‘Ngaba ukwamkela kwam lo msebenzi kuya kumenza azive ebuhlungu uYehova?’—INdu. 78:40, 41.

¹³ Xa silungiselela iSifundo SeMboniselo okanye iSifundo SeBhayibhile Sebandla, sifanele sihlale siyikhumbula imfuneko yokucamngca ngezinto esizifundiswayo. Ngaba xa silungiselela siye singxamele nje ukukrwelela impendulo size sidlulele kwisiqendu esilandelayo? Ukulungiselela ngolo hlobo akunakusinceda sibuthande ngakumbi ubulungisa okanye kusenze sibe nesazela esiphaphileyo. Ukuba sifuna ukubuthanda ubulungisa, sifanele sikukhuthalele ukufundisisa nokucamngca ngoko sikufunda kwiLizwi likaThixo elibhaliweyo. Ukufunda ukuthanda ubulungisa ngentliziyo yonke kufuna umgudu!

Bulambele Uze Ubunxanelwe Ubulungisa

14. UYehova uThixo noYesu Kristu bafuna sivakalelwe njani ngenkonzo yethu engcwele?

¹⁴ UYehova noYesu Kristu bafuna sonwabe xa sisenza inkonzo engcwele. Yintoni eya kusinceda sonwabe? Kukuthanda ubulungisa! KwiNtshumayelo yaseNtabeni, uYesu wathi: “Banoyolo abo balambela baze banxanelwe ubulungisa, kuba baya kuhluthiswa.” (Mat. 5:6) Abaluleke ngantoni la mazwi kwabo banqwenela ukuthanda ubulungisa?

15, 16. Ziziphi iindlela abaya kwaneliswa ngazo abo balambileyo nabanxaniweyo ngokomoya?

¹⁵ Eli hlabathi siphila kulo lilawulwa ngongendawo. (1 Yoh. 5:19) Xa sifunda iphephandaba, enoba sikweliphi na ilizwe, siva iingxelo zobubi nogonyamelo ngendlela engazange yabakho. Ububi obenziwa ngabantu kwabanye buyabangcungcuthekisa abantu abalungileyo xa bebubona. (INtshu. 8:9) Njengabakhonzi bakaYehova, siyazi ukuba nguye yedwa onokwanelisa intswelo yokomoya yabantu abanqwenela ukufunda ubulungisa. Abantu abangamhloneliyo uThixo baya kutshatyalaliswa kungekudala, yaye abathandi bobulungisa abasayi kuze baxinezeleke ngenxa yabaphuli-mthetho nezenzo zabo ezibi. (2 Pet. 2:7, 8) Kuya kutsho kuthi qabu uNoqolomb’ efile nje!

¹⁶ Njengabakhonzi bakaYehova nabalandeli bakaYesu Kristu, siyaqonda ukuba bonke abo balambela baze banxanelwe ubulungisa baya “kuhluthiswa.” Baya kwaneliswa ngelungiselelo likaThixo lamazulu amatsha nomhlaba omtsha apho kuya ‘kuma ubulungisa.’ (2 Pet. 3:13) Ngoko mayingasidimazi okanye isimangalise into yokuba ingcinezelo nogonyamelo ziye zenza akwabikho bulungisa kweli hlabathi likaSathana. (INtshu. 5:8) UYehova, Oyena Uphakamileyo, uyakwazi oko kwenzekayo yaye kungekudala uza kubahlangula abo bathanda ubulungisa.

Zuza Iingenelo Ngenxa Yokuthanda Ubulungisa

17. Ziziphi ezinye zeengenelo eziya kufunyanwa ngabo bathanda ubulungisa?

¹⁷ INdumiso 146:8 igxininisa iingenelo eziya kufunyanwa ngabo bahamba kumkhondo wobulungisa. Umdumisi wathi: “UYehova uthanda abo bangamalungisa.” Khawufan’ ucinge! UMongami wendalo yonke uyasithanda xa sithanda ubulungisa! Ngenxa yothando lukaYehova, siqinisekile ukuba uya kusixhasa njengoko sibeka izilangazelelo zoBukumkani kwindawo yokuqala kubomi bethu. (Funda iNdumiso 37:25; neMizekeliso 10:3.) Ekugqibeleni, kulo mhlaba wonke kuya kuhlala abantu abathanda ubulungisa. (IMize. 13:22) Uninzi lwabakhonzi bakaThixo luya kuphuphuma luvuyo yaye luya kuvuzwa ngobomi obungenasiphelo kumhlaba omhle oyiparadesi, ngenxa yokuba luye lwenza ubulungisa. Kanti nangoku, abo bathanda ubulungisa bukaThixo bavuzwa ngoxolo lwangaphakathi olubanceda bahlale ngemvisiswano neentsapho zabo nasebandleni.—Fil. 4:6, 7.

18. Yintoni esimele siqhubeke siyenza njengoko silindele imini kaYehova?

¹⁸ Njengoko silindele ukufika kwemini enkulu kaYehova, simele siqhubeke sifuna ubulungisa. (Zef. 2:2, 3) Ngoko ke, masibonise uthando olunyanisekileyo ngeendlela ezithe tye zikaYehova uThixo. Oko kuquka ukuhlala sinxibe “isigcina-sifuba sobulungisa” ukuze sikhusele intliziyo yethu yomfuziselo. Kwakhona kufuneka sihlale sinesazela esilungileyo—esiya kusonwabisa size sivuyise intliziyo kaThixo wethu.—IMize. 27:11.

19. Yintoni esimele sizimisele ukuyenza, yaye kuza kuxutyushwa ntoni kwinqaku elilandelayo?

¹⁹ ‘Amehlo kaYehova asingasinga emhlabeni wonke ukuba ababonise amandla abo bantliziyo ziphelele kuye.’ (2 Kron. 16:9) Athuthuzela ngenene loo mazwi njengoko sisenza okuhle kweli hlabathi lizaliswe ziinkathazo, ukungazinzi, ugonyamelo nobungendawo! Liyinyaniso elokuba, iindlela zethu zobulungisa zinokubadida abantu abaninzi abahlukaniswe noThixo. Kodwa singenelwa kakhulu ngokubambelela kwimilinganiselo kaYehova. (Isa. 48:17; 1 Pet. 4:4) Ngoko ke, ngentliziyo epheleleyo, masizimisele ukuqhubeka sibuthanda yaye sibenza ubulungisa ngentliziyo yethu yonke, nto leyo eya kusizisela uvuyo. Noko ke, ukuba nentliziyo epheleleyo kukwaquka nokuthiya okuchasene nomthetho. Inqaku elilandelayo liza kusibonisa ukuba oku kuthetha ntoni.

[Umbhalo osemazantsi]

Unokuphendula Uthini?

• Ukuze sikwazi ukuthanda ubulungisa kutheni kubalulekile ukuqonda ixabiso lentlawulelo?

• Kutheni kubalulekile ukuba sinxibe “isigcina-sifuba sobulungisa”?

• Sinokusiqeqesha njani isazela sethu?

[Umfanekiso okwiphepha 26]

Isazela esiqeqeshiweyo sisinceda siqonde enoba uhlobo oluthile lomsebenzi lufanelekile kusini na