Isizathu Sokuba UDorkas Athandwe

SONKE siyafuna ukuthandwa. Ngaba uvakalelwa ngaloo ndlela?—a IBhayibhile ithetha ngoDorkas owayethandwa kakhulu.

UDorkas wayehlala eYopa, isixeko esikufutshane noLwandle lweMeditera. IYerusalem yayimalunga neekhilomitha ezingama-56 ukusuka eYopa. UDorkas wayengomnye wabafundi bokuqala bakaYesu.

Ucinga ukuba yintoni eyayimenza athandwe kangaka uDorkas?— IBhayibhile ithi wayesenza izinto ezintle esipha. Kubonakala ukuba wayesenzela abahlolokazi impahla entle, umhlolokazi ngumfazi obhujelwe yindoda. Kwakhona njengoYesu, wayethetha nabantu abaninzi ngoThixo oyinyaniso.

Ngaba uyayazi into ebuhlungu eyehlela uDorkas?— Ugula kakhulu aze afe. Bonke abahlobo bakhe babuhlungu. Bathumela abantu apho wayehlala khona umpostile uPetros, malunga neekhilomitha ezili-16. Abo bantu bamcela ukuba afike ngokukhawuleza. Ukufika kwakhe, uPetros unyukela kwigumbi eliphezulu apho akhoyo uDorkas. Bonke abafazi abalapho bayakhala, bambonisa iimpahla awayebenzele zona uDorkas.

Emva koko uPetros ubayalela ukuba baphume kwelo gumbi. UPetros nabanye abapostile bakhe bayenza imimangaliso ngaphambili, kodwa akakho kubo owakhe wavusa umntu ofileyo. Ucinga ukuba wenza ntoni uPetros ngoku?—

UPetros uguqa ecaleni kwesidumbu aze athandaze kuYehova. Emva koko uyalela uDorkas ukuba aphakame. UDorkas uyaphakama! UPetros uyamncedisa aphakame. Ubiza abahlolokazi nabanye aze ababonise. Ngaba unokuyithelekelela indlela avuye ngayo?—

Makhe sicinge izinto onokuzifunda kweli bali lokuvuswa kukaDorkas. Enye yezinto eziboniswayo kukuba, ukuba unceda abanye abantu, uya kuthandwa ngabantu abaninzi. Kodwa eyona nto ibalulekileyo kukuba uya kukhunjulwa uze uthandwe nguThixo. Akasoze azilibale izinto ezintle ozenzela abanye abantu. Uya kukuvuza ngobomi obungunaphakade nolonwabo kwihlabathi lakhe elitsha.