Sukela Uxolo

“Masisukele izinto ezisingisa eluxolweni.”—ROMA 14:19.

1, 2. Kutheni amaNgqina kaYehova ephila ngoxolo?

KUNZIMA ukufumana uxolo lwenene kwihlabathi lanamhlanje. Kwanabantu bohlanga olunye nabathetha ulwimi olufanayo badla ngokwahlulwa lunqulo, ipolitiki nendlela abaphila ngayo. Ngokwahlukileyo koko, abantu bakaYehova bamanyene nangona bephuma “kuzo zonke iintlanga nezizwe nezizwana neelwimi.”—ISityhi. 7:9.

² Imeko yoxolo esiphila kuyo ayenzekanga ngamabona-ndenzile. Ngokuyintloko ibangelwa kukuba ‘sinandipha uxolo noThixo’ kuba sinokholo kuNyana wakhe, ogazi lakhe eligubungela izono zethu. (Roma 5:1; Efe. 1:7) Ngaphezu koko, uThixo wenene unika abakhonzi bakhe abanyanisekileyo umoya oyingcwele, yaye isiqhamo saloo moya siquka uxolo. (Gal. 5:22) Esinye isizathu sokuba sibe seluxolweni kukuba ‘asiyonxalenye yehlabathi.’ (Yoh. 15:19) Asithathi cala kwimiba yepolitiki. Ekubeni ‘siwakhandile amakrele ethu aba ngamakhuba,’ asizibandakanyi kwiimfazwe zelizwe lethu okanye ezehlabathi.—Isa. 2:4.

3. Uxolo esinalo lusinceda senze ntoni, yaye yintoni eza kuxutyushwa kweli nqaku?

³ Uxolo esinalo sonke alupheleli nje ekuphepheni ukwenzakalisa abazalwana bethu. Nangona ibandla lamaNgqina kaYehova esikulo linokubunjwa ngabantu beentlanga neemvelaphi ezahlukahlukeneyo, ‘siyathandana.’ (Yoh. 15:17) Uxolo lwethu lusibangela ukuba “senze okulungileyo kubo bonke, ngokukodwa kwabo bahlobene nathi elukholweni.” (Gal. 6:10) Simele siyixabise size siyilondoloze iparadesi yethu yokomoya enoxolo. Ngoko ke, makhe sihlole indlela esinokulusukela ngayo uxolo ebandleni.

Xa Sikhubeka

4. Yintoni esinokuyenza ukuze sisukele uxolo xa sikhubekise umntu othile?

⁴ Umfundi uYakobi wathi: “Sonke siyakhubeka izihlandlo ezininzi. Ukuba kukho nabani na ongakhubeki zwini, lowo uyindoda egqibeleleyo.” (Yak. 3:2) Ngenxa yoko, kunokubakho ukungavisisani phakathi kwabazalwana. (Fil. 4:2, 3) Kodwa ke, iingxaki eziphakathi kwabantu abathile zinokulungiswa ngaphandle kokuduba uxolo lwebandla. Ngokomzekelo, cinga ngesiluleko esifanele sisithobele ukuba siye sakhubekisa omnye umntu.—Funda uMateyu 5:23, 24.

5. Sinokulusukela njani uxolo xa soniwe?

⁵ Kuthekani ukuba soniwe ngento engenamsebenzi? Ngaba simele silindele ukuba loo mntu usonileyo eze kucela uxolo? Eyoku-1 kwabaseKorinte 13:5 ithi: “[Uthando] alunanzondo.” Xa soniwe, siya kuba sisukela uxolo ngokuxolela nangokuyiphosa kwelokulibala loo nto, ngokuthi ‘singabi nanzondo.’ (Funda eyabaseKolose 3:13.) Le yeyona ndlela yokusingatha iimpazamo ezingenamsebenzi zemihla ngemihla, kuba loo nto isenza sihlalisane ngoxolo nabazalwana bethu yaye isinika uxolo lwengqondo. Kukho umzekeliso wobulumko othi: “Kuyinto entle . . . ukukubetha ngoyaba ukunxaxha.”—IMize. 19:11.

6. Yintoni esimele siyenze ukuba kunzima kakhulu ukuyibetha ngoyaba into esikhubekisileyo?

⁶ Kuthekani ukuba kunzima kakhulu ukuyibetha ngoyaba loo nto isikhubekisileyo? Ukuhamba siyisasaza akulokhondo lobulumko. Intlebendwane enjalo iya kuluphelisa uxolo lwebandla. Yintoni ke enokwenziwa ukuze kulungiswe loo ngxaki ngoxolo? UMateyu 18:15 uthi: “Ukuba umzalwana wakho wenza isono, yiya usidandalazise isiphoso sakhe phakathi kwakho naye ninedwa. Ukuba uyakuphulaphula, umzuzile umzalwana wakho.” Ngoxa uMateyu 18:15-17 ebhekisela kwisono esinzulu, sisenokusebenzisa umgaqo ochazwe kwindinyana ye-15 ngokuya kumntu osonileyo sisodwa kunye naye size sizame ukuxolelana.a

7. Kutheni sifanele sikhawuleze ukulungisa iingxaki?

⁷ Umpostile uPawulos wathi: “Qumbani, kodwa ningoni; malingatshoni ilanga nicaphukile, ningamvuleli indawo uMtyholi.” (Efe. 4:26, 27) UYesu wathi: “Lungisana ngokukhawuleza nalowo ukumangaleleyo emthethweni.” (Mat. 5:25) Ngoko ke, ukusukela uxolo, kufuna ukuba silungise izinto ngokukhawuleza. Ngoba? Ngenxa yokuba ukwenjenjalo kuthintela iingxabano ukuba zinganweni okomlilo wedobo. Masingavumeli ikratshi, umona okanye ukubeka phambili izinto eziphathekayo kusithintele ekulungiseni iingxaki ngokukhawuleza.—Yak. 4:1-6.

Xa Ingxabano Ibandakanya Abantu Abaninzi

8, 9. (a) Yiyiphi ingxabano eyakha yabakho kwibandla laseRoma lenkulungwane yokuqala? (b) Sisiphi isiluleko uPawulos awasinika amaKristu aseRoma ngokuphathelele ingxabano yawo?

⁸ Maxa wambi iingxabano ebandleni zidla ngokuquka kungekuphela abantu ababini kodwa iqela labantu. Kwaba njalo kumaKristu aseRoma uPawulos awawabhalela incwadi ephefumlelweyo. Kwakukho impikiswano phakathi kwamaKristu angamaYuda naweeNtlanga. Abantu abathile kwelo bandla babebajongela phantsi abo babenezazela ezibuthathaka, okanye ezingqongqo ngokugqithiseleyo. Abo bantu babegweba abanye ngokungafanelekanga ngezinto zobuqu. Walicebisa ngelithini elo bandla uPawulos?—Roma 14:1-6.

⁹ UPawulos wabaluleka bonke abantu ababebandakanyekile kuloo mpikiswano. Waxelela abo babesazi ukuba abekho phantsi koMthetho kaMoses ukuba bangabajongeli phantsi abazalwana babo. (Roma 14:2, 10) Eso simo sengqondo sasiya kuwakhubekisa amanye amakholwa awayesakujonga njengento ecekisekayo ukutya izinto ezazingavumelekanga phantsi koMthetho. UPawulos wababongoza esithi: “Musa ukuchitha umsebenzi kaThixo ngenxa nje yokutya.” “Kuhle ukuba ungatyi nyama okanye ungaseli wayini okanye ungenzi nantoni na emkhubekisayo umzalwana wakho.” (Roma 14:14, 15, 20, 21) Kwelinye icala, uPawulos waluleka amaKristu awayenezazela ezingqongqo ukuba angabagqali njengabangathembekanga abo babenembono ephangaleleyo ngezinto. (Roma 14:13) Waxelela ‘wonke umntu ukuba angazicingeli ngaphezu koko amelwe kukuzicingela ngako.’ (Roma 12:3) Emva kokubaluleka bonke ababebandakanyekile kuloo ngxabano, uPawulos wathi: “Ngoko, ke, masisukele izinto ezisingisa eluxolweni nezinto ezakhayo komnye nomnye.”—Roma 14:19.

10. Yintoni efunekayo ukuze kulungiswe iingxabano namhlanje, njengoko kwakunjalo kwibandla laseRoma lenkulungwane yokuqala?

¹⁰ Sinokuqiniseka ukuba ibandla laseRoma lasabela kakuhle kwisiluleko sikaPawulos laza lenza utshintsho olufanelekileyo. Xa kusibakho iingxabano phakathi kwamaKristu namhlanje, ngaba asimele sizilungise ngobubele size ngokuthobeka sisebenzise isiluleko seZibhalo? Njengoko kwakunjalo ngamaRoma, namhlanje kusenokufuneka ukuba bonke abantu ababandakanyekileyo benze utshintsho ukuze ‘bahlale benoxolo phakathi kwabo.’—Marko 9:50.

Xa Kufuneka Unikele Uncedo

11. Yintoni enokwenziwa ngumdala ukuba umKristu ufuna ukuthetha naye ngengxaki anayo nomzalwana wakhe?

¹¹ Kuthekani ukuba umKristu ufuna ukuthetha nomdala ngengxaki anayo nesalamane okanye nomnye umKristu? IMizekeliso 21:13 ithi: “Nabani na ovingca indlebe yakhe kwisikhalo esimangalayo sesisweli, naye uya kukhala aze angaphendulwa.” Ngokuqinisekileyo umdala ‘akanakuvingca indlebe yakhe.’ Kodwa ke, omnye umzekeliso ulumkisa usithi: “Intetho yommangali etyaleni iba ngathi iyavakala, xa engekaphicothwa ngemibuzo.” (IMize. 18:17, iBhayibhile yesiXhosa yowe-1996) Umdala ufanele aphulaphule ngobubele, kodwa umele alumke angathath’ icala lalowo uze kuthetha naye. Emva kokuyiphulaphula loo ngxaki, mhlawumbi usenokubuza enoba loo mntu woniweyo sele ethethile na nomntu omonileyo kusini na. Kwakhona, umdala usenokuhlola amanyathelo eZibhalo anokuthathwa ngumntu owoniweyo ukuze asukele uxolo.

12. Chaza imizekelo ebonisa ingozi yokwenza izinto ngokungxama xa uve isikhalazo somntu othile.

¹² Kukho imizekelo yeBhayibhile emithathu ebonisa ingozi yokwenza izinto ngokungxama emva kokuva icala elinye nje kuphela labo babandakanyeke kwingxabano. UPotifare wakholelwa into awayixelelwa ngumkakhe yokuba uYosefu uzame ukumdlwengula. Ngenxa yokuba nomsindo ngento engenasihlahla, uPotifare wavalela uYosefu entolongweni. (Gen. 39:19, 20) UKumkani uDavide wakholelwa uZibha, owathi inkosi yakhe, uMefibhoshete, ingakwicala leentshaba zikaDavide. Ngokungxama uDavide waphendula wathi: “Khangela! Yonk’ into kaMefibhoshete yeyakho.” (2 Sam. 16:4; 19:25-27) UKumkani uArtashashta waxelelwa ukuba amaYuda ayesakha iindonga zeYerusalem yaye ayeza kuvukela uBukhosi bamaPersi. Lo kumkani wayikholelwa loo ngxelo ibubuxoki waza wayalela ukuba uyekwe wonke umsebenzi wokwakha eYerusalem. Ngenxa yoko, amaYuda ayeka ukwakha itempile kaThixo. (Ezra 4:11-13, 23, 24) Abadala abangamaKristu ngobulumko balandela isiluleko sikaPawulos esasisiya kuTimoti sokuba bakuphephe ukwenza izigqibo bengenazo zonke izibakala.—Funda eyoku-1 kuTimoti 5:21.

13, 14. (a) Ziziphi izinto esisenokungazazi ngokuphathelele ingxabano ephakathi kwabanye abantu? (b) Yintoni enokunceda abadala babagwebe ngokufanelekileyo abanye abazalwana?

¹³ Kwanaxa sele sive omabini amacala engxelo yabo babandakanyeke kwingxabano, kubalulekile ukuqonda ukuba, “ukuba nabani na ucinga ukuba uzuze ulwazi lokuthile, akakazi ngohlobo ebefanele ukuba wazi ngalo.” (1 Kor. 8:2) Ngaba sizazi zonke iinkcukacha ezibangele ukuba kuxatyanwe? Ngaba sinokuziqonda ngokupheleleyo iimvelaphi zabo bantu babandakanyekileyo? Xa kufuneka begwebile, kubaluleke ngenene ukuba abadala bangakhohliswa bubuxoki, ngamaqhinga okanye undiva! UMgwebi onyulwe nguThixo, uYesu Kristu, ugweba ngobulungisa. ‘Akagwebi ngayo nayiphi na imbonakalo nje esemehlweni akhe, yaye akohlwayi ngokwento nje eviwe ziindlebe zakhe.’ (Isa. 11:3, 4) Kunoko, uYesu ukhokelwa ngumoya kaYehova. Ngokufanayo, abadala bakhokelwa ngumoya oyingcwele kaThixo.

¹⁴ Ngaphambi kokwenza izigqibo ngokuphathele abanye abazalwana, abadala bamele bathandazele uncedo lomoya kaYehova baze bakhokelwe nguwo ngokuthi bahlole iLizwi likaThixo neempapasho zodidi lwekhoboka elithembekileyo neliyingqondi.—Mat. 24:45.

Ngaba Simele Sigcine Uxolo Enoba Sekumnyam’ Entla?

15. Sinokubaxelela nini abadala xa sifumanise ukuba kukho umntu owenze isono esinzulu?

¹⁵ NjengamaKristu sibongozwa ukuba sisukele uxolo. Kodwa ke, iBhayibhile ithi: “Ubulumko obuvela phezulu okokuqala nje bunyulu, bandule ke bube boboxolo.” (Yak. 3:17) Ukuba noxolo kuza emva kobunyulu, oko kukuthi, ukugcina imilinganiselo kaThixo yokuziphatha nokuphila ngayo. Ukuba umKristu ufumanisa ukuba umzalwana wakhe wenze isono esinzulu, umele amkhuthaze ukuba aye kuzichaza kubadala. (1 Kor. 6:9, 10; Yak. 5:14-16) Ukuba akade aye kuzichaza, yimbopheleleko yaloo mKristu unolwazi ngeso sono ukuba aye kusichaza ngokwakhe. Ukuba naye akayi ngelithi ugcina uxolo naloo moni, uya kuba uzibandakanya neso sono.—Lev. 5:1; funda iMizekeliso 29:24.

16. Yintoni esinokuyifunda kwinto eyenziwa nguYehu kuKumkani uYehoram?

¹⁶ Enye ingxelo ebandakanya uYehu ibonisa ukuba ubulungisa bukaThixo buza kuqala ngaphezu koxolo. UThixo wathumela uYehu ukuba adlulisele umgwebo kwindlu kaKumkani uAhabhi. UKumkani ongendawo uYehoram, unyana ka-Ahabhi noIzebhele, wahamba ngenqwelo yakhe ukuya kuhlangabeza uYehu waza wathi: “Luxolo na, Yehu?” Wathini uYehu? Wathi: “Lungakho njani uxolo logama kusekho uhenyuzo lukaIzebhele unyoko nokukhafula kwakhe okuninzi?” (2 Kum. 9:22) Emva koko, uYehu wathi rhuthu isaphetha sakhe wahlaba uYehoram entliziyweni. Njengokuba uYehu wenza okuthile, abadala abamele banyamezele abantu abangaguqukiyo abenza isono ngabom kuba nje befuna ukugcina uxolo. Bamele babagxothe aboni abangaguqukiyo ukuze ibandla liqhubeke liseluxolweni noThixo.—1 Kor. 5:1, 2, 11-13.

17. Yiyiphi indima edlalwa ngawo onke amaKristu ekusukeleni uxolo?

¹⁷ Iingxabano ezininzi ezibakho phakathi kwabazalwana azidli ngokuba zizono ezinzulu ezinokude zifune ikomiti egwebayo. Ngoko ke, siya kuba sibonisa uthando xa sizibetha ngoyaba iimpazamo zabanye abantu. ILizwi likaThixo lithi: “Ogubungela ukunxaxha ufuna uthando, yaye oqhubeka ethetha ngombandela wahlukanisa abazanayo.” (IMize. 17:9) Ukuphila ngokuvisisana nala mazwi kuya kusinceda sonke ukuba sigcine uxolo ebandleni size sihlale sinolwalamano oluhle noYehova.—Mat. 6:14, 15.

Ukusukela Uxolo Kuzisa Iintsikelelo

18, 19. Ziziphi iingenelo zokusukela uxolo?

¹⁸ Ukusukela “izinto ezisingisa eluxolweni” kuzisa iintsikelelo. Siba nolwalamano oluluqilima noYehova njengoko sixelisa iindlela zakhe, yaye sifak’ isandla kuxolo nomanyano lweparadesi yethu yokomoya. Kwakhona, ukusukela uxolo ebandleni kusinceda sibone iindlela esinokulusukela ngazo uxolo kwabo sishumayela kubo “iindaba ezilungileyo zoxolo.” (Efe. 6:15) Siya kukwazi ngakumbi ‘ukuthantamisa kubo bonke, sinyamezela ububi.’—2 Tim. 2:24.

¹⁹ Khumbula ukuba kuya kubakho “uvuko lwamalungisa nabangengomalungisa.” (IZe. 24:15) Xa elo themba lizaliseka apha emhlabeni, izigidi zabantu ezineemvelaphi, nobuntu obahlukahlukeneyo, ziya kuphinda ziphile—ukususela kwabo babephila “ekusekweni kwehlabathi”! (Luka 11:50, 51) Ukufundisa abantu abavusiweyo iindlela zoxolo kuya kuba lilungelo ngenene. Uqeqesho esilufumana ngoku lokudala uxolo luya kusinceda kakhulu xa kufika elo xesha!

[Umbhalo osemazantsi]

Ufunde Ntoni?

• Sinokulusukela njani uxolo ukuba siye sakhubekisa omnye umntu?

• Yintoni esinokuyenza ukuze sigcine uxolo xa soniwe?

• Kutheni kungebobulumko ukuthath’ icala kwiingxabano zabanye abantu?

• Chaza isizathu sokuba kubalulekile ukwenza ubulungisa kunokugcina uxolo nomntu owenze isono.

[Imifanekiso ekwiphepha 29]

UYehova uyabathanda abo baxolela abanye ngesisa