UYehova—“UThixo Onika Uxolo”

“Ngamana uThixo onika uxolo angaba nani nonke.”—ROMA 15:33.

1, 2. Yiyiphi imeko echazwa yiGenesis isahluko 32 nesama-33, yaye yaba nawuphi umphumo?

KUKUFUTSHANE nePenuweli, isixeko esikufutshane nentlambo yeYabhoki, kwimpuma yomlambo iYordan. UEsawu uve ukuba iwele lakhe, uYakobi, libuyela ekhaya. Nangona sele kudlule iminyaka engama-20 ukususela oko uEsawu wathengisa ngelungelo lakhe lobuzibulo kumntakwabo, uYakobi uyoyika kuba ucinga ukuba umntakwabo usafuna ukumbulala. Ehamba namadoda angama-400, uEsawu uya ngakumntakwabo owabhacayo. Esoyika ukwamkelwa kakubi, uYakobi uthumelela uEsawu intabalala yezipho ezingaphezu kwama-550 zezilwanyana zasekhaya. Izicaka zikaYakobi zixelela uEsawu ukuba mhlambi ngamnye eziza nawo usisipho esivela kumntakwabo.

² Yada yafika imini ibikad’ ilindiwe! Njengoko uYakobi eqweb’ isibindi sokuya kuEsawu, uguqa ngamadolo—izihlandlo ezisixhenxe. UYakobi sele ethathe elona nyathelo libalulekileyo lokuthambisa intliziyo yomntakwabo. Yaye ucele kuYehova ukuba amhlangule esandleni sikaEsawu. Ngaba uYehova uyawuphendula lo mthandazo? Ewe. IBhayibhile ithi: “UEsawu wabaleka ukuya kumhlangabeza, waza wamwola, wawa entanyeni yakhe, wamanga.”—Gen. 32:11-20; 33:1-4.

3. Sifunda ntoni kwingxelo kaYakobi noEsawu?

³ Ingxelo kaYakobi noEsawu ibonisa ukuba simele senze umgudu wokulungisa iingxaki ezinokusongela uxolo esinalo ebandleni lamaKristu. Nangona uYakobi wayengamonanga uEsawu, wazimisela ukuba baxolelane. Kaloku, nguEsawu owadelela ilungelo lakhe lobuzibulo waza walithengisela uYakobi ngesitya sesityu. (Gen. 25:31-34; Heb. 12:16) Kodwa ke, indlela uYakobi awamphatha ngayo uEsawu ibonisa indlela esimele sikulungele ngayo ukugcina uxolo nabazalwana bethu abangamaKristu. Ikwabonisa nokuba uThixo wenene uyayisikelela imigudu esiyenzayo yokwenza uxolo. IBhayibhile inemizekelo emininzi esiyalela ukuba sibe ngabantu abadala uxolo.

Umzekelo Obalaseleyo Wokusikhuthaza

4. Liliphi ilungiselelo elenziwe nguThixo ukusindisa abantu esonweni nasekufeni?

⁴ Owona mzekelo ubalaseleyo womntu odala uxolo nguYehova—“uThixo onika uxolo.” (Roma 15:33) Cinga ngento uYehova awasenzela yona ukuze sibe seluxolweni kunye naye. Njengenzala ka-Adam noEva enesono, sifanelwe ‘ngumvuzo isono esiwuhlawulayo.’ (Roma 6:23) Sekunjalo, ngenxa yokuba esithanda gqitha, uYehova walungiselela ukuba sisindiswe ngokuthumela uNyana wakhe oyintanda emhlabeni ukuze azalwe engumntu ofezekileyo. Ibe noNyana wenza njengoko wayeyalelwe. Wavumela iintshaba zikaThixo ukuba zimbulale. (Yoh. 10:17, 18) UThixo wenene wamvusa uNyana wakhe oyintanda, owathi kamva wanikela kuYise ixabiso legazi lakhe elaphalalayo, nelaliya kuba yintlawulelo eyayiza kusindisa aboni abaguqukayo ekufeni ngonaphakade.—Funda amaHebhere 9:14, 24.

5, 6. Igazi likaYesu elaphalalayo liluchaphazela njani ulwalamano olonakeleyo oluphakathi kukaThixo nabantu abanesono?

⁵ Ilungiselelo ledini lentlawulelo loNyana kaThixo liluchaphazela njani ulwalamano olonakeleyo oluphakathi kukaThixo nabantu abanesono? UIsaya 53:5, uthi: “Wabethwa ukuze sibe noxolo, yaye ngamanxeba akhe siye saphiliswa.” Kunokuba abantu bajongwe njengeentshaba zikaThixo, xa bethobela banokuba seluxolweni kunye naye. “[NgoYesu] siye sakhululwa ngentlawulelo ngalo igazi lakhe, saxolelwa izigqitho zethu, ngokobutyebi bobubele bakhe obungasifanelanga.”—Efe. 1:7.

⁶ IBhayibhile ithi: “UThixo wakubona kulungile ukuba konke ukuzala kuhlale [kuKristu].” Oku kungenxa yokuba uKristu ungoyena mntu uphambili ekuzalisekeni kwenjongo kaThixo. Yintoni ke injongo kaYehova? Kukuba “aphinde axolelanise kuye ngokwakhe zonke ezinye izinto ngokwenza uxolo ngegazi [elaphalalayo] likaYesu Kristu.” “Zonke ezinye izinto” uThixo azenza zibe seluxolweni kunye naye ‘zizinto ezisemhlabeni nezinto ezisemazulwini.’ Ziintoni ezo?—Funda eyabaseKolose 1:19, 20.

7. Ziintoni “izinto ezisemazulwini” ‘nezinto ezisemhlabeni’ eziba seluxolweni noThixo?

⁷ Ilungiselelo lentlawulelo linceda amaKristu athanjisiweyo, aye ‘avakaliswa engamalungisa’ njengoonyana bakaThixo, ukuba akwazi ‘ukunandipha uxolo noThixo.’ (Funda eyabaseRoma 5:1.) Kuthiwa ‘azizinto ezisemazulwini’ ngenxa yokuba anethemba lokuphila khona yaye “aza kulawula njengookumkani phezu komhlaba” aze akhonze njengababingeleli kuThixo. (ISityhi. 5:10) Kwelinye icala, “izinto ezisemhlabeni” zibhekisela kubantu abaguqukayo, abaya kuthi ekugqibeleni baphile ubomi obungunaphakade emhlabeni.—INdu. 37:29.

8. Uchaphazeleka njani xa ucinga ngezinto uYehova azenzileyo ukunceda uluntu lube seluxolweni kunye naye?

⁸ Evakalisa umbulelo osuka emazantsi entliziyo yakhe ngelungiselelo likaYehova, uPawulos wabhalela amaKristu athanjisiweyo ase-Efese, esithi: “UThixo, osisityebi ngenceba, . . . wasenza saphila ndawonye noKristu, kwanaxa sasifile kwizigqitho—kambe ke niye nasindiswa ngenxa yobubele bakhe obungasifanelanga.” (Efe. 2:4, 5) Enoba sinethemba lokuphila ezulwini okanye emhlabeni, siyamtyala uThixo ngenxa yenceba nobubele bakhe obungasifanelanga. Iintliziyo zethu zizaliswa ngumbulelo njengoko sicinga ngezinto uYehova aye wazenza ukuze abantu bakwazi ukuba seluxolweni kunye naye. Xa sijongene neemeko ezisongela uxolo nomanyano lwebandla, ngaba asimele sixelise uThixo ngokudala uxolo?

Ukufunda Kwiindlela Zika-Abraham NoIsake

9, 10. UAbraham wazingqina njani engumntu odala uxolo kwindlela awaqhubana ngayo noLote xa kwavuka ingxabano phakathi kwabalusi babo?

⁹ Ngokuphathelele usolusapho uAbraham, iBhayibhile ithi: “‘UAbraham wakholwa kuYehova, kwaza oko kwabalelwa kuye njengobulungisa,’ waza wabizwa ngokuba ‘ngumhlobo kaYehova.’” (Yak. 2:23) Ukholo luka-Abraham lwabonakala ngezenzo zakhe zokuthanda uxolo. Ngokomzekelo, njengoko imihlambi ka-Abraham yayisanda, kwabakho ukungevani phakathi kwabalusi bakhe nabomtshana wakhe uLote. (Gen. 12:5; 13:7) Into eyayilindelekile ukuze ilunge loo ngxaki yayikukuba uAbraham noLote bahlukane. UAbraham wayeza kuyicombulula njani loo ngxaki? Kunokuba asebenzise ubudala nolwalamano analo noThixo ukuze axelele umtshana wakhe into amakayenze, uAbraham wazingqina engumntu odala uxolo.

¹⁰ UAbraham wathi kumtshana wakhe: “Makungabikho ngxabano kaloku, phakathi kwam nawe naphakathi kwabalusi bam nabalusi bakho, kuba siyazalana.” Lo solusapho waqhubeka wathi: “Aliphambi kwakho na ilizwe liphela? Ndincede ke ngoko, masahlukane. Ukuba uya ngasekhohlo, mna ndoya ngasekunene; kodwa ukuba uya ngasekunene, mna ndoya ngasekhohlo.” ULote wakhetha owona mhlaba uchumileyo, kodwa uAbraham akazange amqumbele. (Gen. 13:8-11) Kamva xa uLote wathinjwa ziintshaba ezazihlasela ilizwe, uAbraham wamhlangula ngokukhawuleza umtshana wakhe.—Gen. 14:14-16.

11. UAbraham waludala njani uxolo nabamelwane bakhe abangamaFilisti?

¹¹ Kwakhona cinga ngendlela uAbraham awaludala ngayo uxolo nabamelwane bakhe abangamaFilisti kwilizwe lamaKanan. AmaFilisti ‘ayehluthe ngogonyamelo’ iqula lamanzi elalimbiwe ngabakhonzi baka-Abraham eBher-shebha. Yayiza kwenza ntoni ngoku le ndoda ebihlangule umtshana wayo ngokoyisa ookumkani abane ababemthimbile? Kunokuba alwe aze athathe iqula lakhe, uAbraham wakhetha ukuzithulela. Ekuhambeni kwexesha, ukumkani wamaFilisti wandwendwela uAbraham ukuze enze umnqophiso woxolo kunye naye. UAbraham wathetha ngokubiwa kwequla lakhe kuphela emva kokuba lo kumkani emenze wafunga ukuba uya kuba nobubele kwinzala yokumkani wamaFilisti. Othuswe kukuva le nto, lo kumkani walibuyisela iqula kuAbraham. Waza ke uAbraham waqhubeka ehlala ngoxolo njengomphambukeli kwelo lizwe.—Gen. 21:22-31, 34.

12, 13. (a) UIsake wawuxelisa njani umzekelo kayise? (b) UYehova wazisikelela njani iindlela zikaIsake zokuthanda uxolo?

¹² Unyana ka-Abraham uIsake waxelisa uyise ngokuthanda uxolo. Oku kubonakala kwindlela awaqhubana ngayo namaFilisti. Ngenxa yendlala eyayigquba elizweni, uIsake wafuduka nentsapho yakhe esuka emntla weBhere-lahayi-royi ummandla obharhileyo waseNegebhi ukuya kumhlaba ochumileyo wamaFilisti eGerare. Apho, uYehova wamsikelela ngesivuno esiyintabalala waza wandisa nomhlambi wakhe. AmaFilisti ammonela. Kuba engafuni uIsake aphumelele njengoyise, amaFilisti awadiba amaqula awayembiwe ngabakhonzi baka-Abraham kuloo mmandla. Ekugqibeleni, ukumkani wamaFilisti waxelela uIsake ukuba ‘emke elumelwaneni lwabo.’ Loo ndoda ithand’ uxolo uIsake, yemka.—Gen. 24:62; 26:1, 12-17.

¹³ Emva kokuba uIsake efudukele kwindawo ekude, abalusi bakhe bemba elinye iqula. Abalusi bamaFilisti bathi loo manzi ngawabo. Njengoyise, uAbraham, uIsake akazange alilwele elo qula. Kunoko, waphinda wacela abantu bakhe ukuba bembe elinye iqula. AmaFilisti alibanga nelo qula. Ukuze agcine uxolo, uIsake wayifudusa inkampu yakhe enkulu wayisa kwenye indawo. Abakhonzi bakhe bemba iqula uIsake awalibiza ngokuba yiRehobhoti. Ekuhambeni kwexesha, wafudukela kumhlaba waseBher-sheba owawuchume nangakumbi, apho uYehova wamsikelela waza wathi kuye: “Musa ukoyika, kuba ndinawe, yaye ndiza kukusikelela ndize ndiyandise imbewu yakho ngenxa ka-Abraham umkhonzi wam.”—Gen. 26:17-25.

14. UIsake wazingqina njani engumntu odala uxolo xa ukumkani wamaFilisti wafuna ukwenza umnqophiso woxolo kunye naye?

¹⁴ Ngokuqinisekileyo, uIsake wayenokukwazi ukulwela ilungelo lakhe lokusebenzisa onke amaqula awayembiwe ngabakhonzi bakhe. Ngapha koko, ukumkani wamaFilisti namahlakani akhe beza kumtyelela eBher-sheba baza bafuna ukwenza umnqophiso woxolo kunye naye, besithi: “Sibonile ukuba ngaphandle kwamathandabuzo uYehova unawe.” Sekunjalo ukuze agcine uxolo, uIsake wakhetha ukufuduka izihlandlo eziliqela kunokuba alwe. Nangesi sihlandlo uIsake wazingqina engumntu odala uxolo. Ingxelo ithi: ‘Wazenzela itheko iindwendwe zakhe zaza zadla, zasela. Zavuka ekuseni ngentsasa elandelayo baza bafungelana. Emva koko uIsake wazindulula zaza zemka kuye ngoxolo.’—Gen. 26:26-31.

Ukufunda Kunyana Owayethandwa Kakhulu NguYakobi

15. Yintoni eyabangela ukuba abantakwabo Yosefu bangakwazi ukuthetha ngoxolo kunye naye?

¹⁵ Unyana kaIsake uYakobi wakhula waba ‘yindoda engenakusoleka.’ (Gen. 25:27) Njengoko sele kuxutyushiwe ekuqaleni kweli nqaku, uYakobi wafuna ukuxolelana nomntakwabo, uEsawu. Ngokuqinisekileyo, uYakobi wangenelwa kumzekelo kaIsake wokuba noxolo. Yintoni enokuthethwa ngoonyana bakaYakobi? Koonyana bakhe abali-12, uYosefu ngoyena wayethandwa kakhulu nguYakobi. UYosefu wayengumntwana othobelayo, onembeko nowayesoloko efuna ukukholisa uyise. (Gen. 37:2, 14) Kodwa ke, abakhuluwa bakaYosefu bammonela kangangokuba babengakwazi ukuthetha ngoxolo kunye naye. Ngenkohlakalo, bathengisa uYosefu ebukhobokeni baza baqhatha noyise besithi uYosefu ubulewe lirhamncwa lasendle.—Gen. 37:4, 28, 31-33.

16, 17. UYosefu wazingqina njani engumntu othanda uxolo kubantakwabo?

¹⁶ UYehova waba kunye noYosefu. Ekuhambeni kwexesha, uYosefu waba yinkulumbuso yaseYiputa—elandela emva koFaro ngegunya. Xa kwabakho indlala elizweni labo, abantakwabo Yosefu beza eYiputa yaye abazange bamqonde ngenxa yempahla yasebukhosini awayeyinxibile. (Gen. 42:5-7) UYosefu wayenokuziphindezela ngokulula kubantakwabo ngenxa yenkohlakalo abayenza kuye nakuyise! Noko ke, kunokuba afune ukubuyis’ izitya, uYosefu wazama ukuba baxolelane. Xa kwabonakala ngokucacileyo ukuba abantakwabo baguqukile, wabenza bamqonda, esithi: “Musani ukuba buhlungu yaye ningaziqumbeli kuba nathengisa ngam apha; kuba uThixo wandithumela phambi kwenu ukuze kulondolozwe ubomi.” Emva koko, wabanga bonke abantakwabo waza walilela kubo.—Gen. 45:1, 5, 15.

¹⁷ Emva kokufa kukayise, uYakobi, abantakwabo Yosefu bacinga ukuba uYosefu wayeza kuziphindezela kubo. Njengoko babephalaza imbilini yabo kuye, “zathi waxa iinyembezi” kuYosefu waza wathi kubo: “Musani ukoyika. Ndiza kunibonelela ngokutya nina nabantwana benu.” UYosefu othanda uxolo “wabathuthuzela, wathetha nabo ebaqinisekisa.”—Gen. 50:15-21.

“Zabhalelwa Ukuyalela Thina”

18, 19. (a) Ungenelwe njani ngokuhlola imizekelo yabantu ababedala uxolo ekuthethwe ngabo kweli nqaku? (b) Siza kuxubusha ntoni kwinqaku elilandelayo?

¹⁸ UPawulos wathi: “Zonke izinto ezabhalwa kwixesha langaphambili zabhalelwa ukuyalela thina, ukuze ngonyamezelo lwethu nangentuthuzelo yeZibhalo sibe nethemba.” (Roma 15:4) Singenelwe njani ngokuhlola kungekuphela nje umzekelo obalaseleyo kaYehova kodwa nengxelo eseBhayibhileni ka-Abraham, uIsake, uYakobi noYosefu?

¹⁹ Ngaba ukucinga ngoxabiso ngezinto uYehova asenzele zona ukulungisa umonakalo owenzeke kulwalamano lwakhe nabantu abanesono, akumele kusishukumisele ukuba sonke sibe seluxolweni nabanye? Umzekelo ka-Abraham, uIsake, uYakobi noYosefu ubonisa ukuba abazali banokuba nempembelelo entle ebantwaneni babo. Ngaphezu koko, ezi ngxelo zibonisa ukuba uYehova uyayisikelela imigudu yabantu abazama ukudala uxolo. Ayimangalisi ke ngoko into yokuba uPawulos athi uYehova ‘nguThixo onika uxolo’! (Funda eyamaRoma 15:33; 16:20.) Inqaku elilandelayo liza kuxubusha ngesizathu sokuba uPawulos athi kubalulekile ukuba sisukele uxolo nendlela esinokuludala ngayo.

Ufunde Ntoni?

• Yiyiphi indlela uYakobi awaludala ngayo uxolo xa wayeza kudibana noEsawu?

• Uvakalelwa njani ngento eyenziwe nguYehova ukunceda abantu babeseluxolweni kunye naye?

• Ufunde ntoni kumzekelo wokudala uxolo ka-Abraham, uIsake, uYakobi noYosefu?

[Imifanekiso ekwiphepha 23]

Liliphi elona nyathelo libalulekileyo elathathwa nguYakobi ukuze axolelane noEsawu?