Ngaba Ukhe Waxokiswa?

AYIKHO into ebuhlungu njengokuxokiswa ngumntu omthembileyo. Usenokuziva uthotyiwe, ucaphuka yaye ungcatshiwe. Ubuxoki buchitha ubuhlobo nemitshato baze abantu baphulukane nezigidi zeerandi.

Ubuya kuvakalelwa njani ukuba ubuxokiswe ngoThixo? Ukuba uzinikele, umphumo ubunokuba mkhulu, njengakula marhamente alandelayo:

● “Ndandiziva ndingcatshiwe yicawa.”—UDEANNE.

● “Ndandicaphukile. Ndandiziva ndiqhathiwe—amathemba nosukelo lwam ayelilize.”—ULUIS.

Usenokuthandabuza ukuba kunokuthi kanti uxokisiwe ngoThixo. Izinto ozaziyo kusenokwenzeka ukuba waziva ngomntu omthembayo ongenakuze akuxokise ngabom—abazali bakho, umfundisi okanye umhlobo osenyongweni. Usenokuba ubukholelwa imfundiso ethile ubomi bakho bonke. Kodwa ngaba akuvumi ukuba neyona nto ekholelwa ngabantu abaninzi inokuba bubuxoki? Owayesakuba nguMongameli waseUnited States uFranklin D. Roosevelt wayeyiqonda le nyaniso kuba wathi: “Into enokoziweyo ayijiki ibe yinyani.”

Unokwazi njani ukuba uxokisiwe? UYesu wakhe wathi xa ethandaza kuThixo: “Ilizwi lakho liyinyaniso.” (Yohane 17:17) ILizwi likaThixo, iBhayibhile, lilo elinokusinceda sahlule inyaniso ebuxokini.

Kutheni ungavumeli iBhayibhile ibhence izinto ezintlanu ezibubuxoki ezidla ngokuthethwa ngoThixo?