Sondela KuThixo
Ukuphumeza Imbopheleleko Esiyinikwe NguThixo
NGABA wakha wazibuza ukuba, ‘iyintoni injongo yobomi?’ UYehova akasenzenga sakwazi ukubuza imibuzo kuphela kodwa usenze safuna ukuzazi iimpendulo. Okuvuyisayo kukuba uThixo wethu oluthando akasishiyanga ebumnyameni. Impendulo esiyifunayo iseLizwini lakhe iBhayibhile. Khawucinge ngala mazwi kaKumkani uSolomon afumaneka kwiNtshumayeli 12:13.
Wayekwimeko entle uSolomon. Wayenokuyichaza kakuhle indlela yokufumana ulonwabo nenjongo yobomi. Wayesikelelwe ngobulumko obugqithiseleyo, ubutyebi nokuba ngukumkani, wakwazi ukuziphanda ngenyameko izinto abanomdla kuzo abantu, kuquka ukufumana ubutyebi nokubalasela. (INtshumayeli 2:4-9; 4:4) Wandula ke, phantsi kwempefumlelo, washwankathela konke oko wayekufumanisile ngokuthi: “Ukuqosheliswa kombandela, emva kokuba yonk’ into iviwe, naku: Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.” Lo mazwi achaza eyona nto yanelisayo koko kufunwa ngumntu.
“Yoyika uThixo oyinyaniso.” Ukucinga ukuba sifanele simoyike uThixo kusenokungathandeki ekuqaleni. Kodwa olu luhlobo loloyiko olufanelekileyo. Asimele sicinge ngoloyiko elibanalo ikhoboka ngenkosi yalo engqwabalala kunoko sinokucinga ngomnqweno umntwana abanawo wokufuna ukukholisa uyise. Inye imbekiselo ithi loo ndlela yokoyika uThixo “sisimo sengqondo sokuba nentlonelo enzulu esiboniswa ngabantu Bakhe Kuye ngenxa yokuba bemthanda yaye behlonela amandla nobungangamsha Bakhe.” Isimo sengqondo esinjalo sisenza senze ukuthanda kwakhe kuba simthanda yaye nathi sisazi ukuba uyasithanda. Olu hlobo loloyiko asiyomvakalelo nje, lubonakala ngezenzo. Njani?
“Ugcine imiyalelo yakhe.” Ukumoyika uThixo kusenza simthobele. Kusengqiqweni ukumthobela uYehova. Ekubeni enguMdali wethu, uyazi kakuhle eyona ndlela simele siphile ngayo, kanye njengokuba umntu oyenzileyo into engoyena uyazi kakuhle. Ukongezelela koko, uYehova ufuna zisihambele kakuhle izinto. Ufuna sonwabe, oko afuna sikwenze kwenzelwe ukunceda thina. (Isaya 48:17) Umpostile uYohane ukubeka ngale ndlela oku: “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.” (1 Yohane 5:3) Ukuthobela kwethu kubonisa indlela esimthanda ngayo uThixo yaye imiyalelo yakhe ibonisa indlela asithanda ngayo yena.
“Kuba oku kuyimbopheleleko yomntu.” La mazwi abonisa esona sizathu sibalulekileyo sokoyika uThixo nokumthobela. Simele senjenjalo, kuba yimboleleko yethu leyo. UYehova nguMdali wethu, simtyala bonke ubomi bethu. (INdumiso 36:9) Nathi simele simthobele. Xa siphila ngendlela afuna siphile ngayo, sifeza eyethu indima.
Iyintoni ke, ngoko injongo yobomi? Ngamafutshane, iyile: Silapha ukuze senze ukuthanda kukaThixo. Ayikho enye indlela onokubenza bubenentsingiselo ngayo ubomi bakho. Kutheni ungakhe ufune ukwazi okungakumbi ngentando kaThixo nendlela onokubuvisisanisa ngayo ubomi bakho nemithetho yakhe? AmaNgqina kaYehova ayakukuvuyela ukukunceda.
Izibhalo Onokuzifunda NgoNovemba:
◼ IMizekeliso 22-31; INtshumayeli 1-12–INgoma yazo iiNgoma 1-8