Musa Ukuvumela Ukugula Kukuhluthe Ulonwabo

KHAWUBE nombono wakho uvuka ubawela ukuba lube luphelile olo suku. Uyazi ukuba nangolo suku uza kujamelana neentlungu zomzimba nezeemvakalelo. Kusenokwenzeka ukuba uvakalelwa njengoYobhi, owathi: “Ndikhetha ukufa kunezi nzingo ndikuzo.” (Yobhi 7:15, iThe New English Bible) Kuthekani ukuba loo meko iyaqhubeka kangangeminyaka?

Kwakunjalo nakwimeko kaMefibhoshete, unyana womhlobo kaKumkani uDavide, uYonatan. Xa wayeneminyaka emihlanu ubudala, uMefibhoshete “wawa waza waba sisiqhwala.” (2 Sam. 4:4) Kumele ukuba ukuxinezeleka ngokweemvakalelo kwaba nochatha kwintlungu yokuba sisiqhwala kwakhe xa wathi kamva watyholwa ngokungcatsha ukumkani waza waphulukana nezinto eziphathekayo awayenazo. Sekunjalo, ngokungaguquguqukiyo wazibonakalisa engowona mzekelo mhle ekumelaneni nobulwelwe, ukunyeliswa kunye nokuphoxeka, engazivumeli ezo zinto zimhluthe ulonwabo.—2 Sam. 9:6-10; 16:1-4; 19:24-30.

Omnye umzekelo ngokampostile uPawulos. Wakha wabhala ‘ngeliva enyameni’ ekwakufuneka alinyamezele. (2 Kor. 12:7) Kusenokwenzeka ukuba eli liva wayethetha ngalo, sisiphene esathatha ixesha elide okanye mhlawumbi ngabantu ababethandabuza ukuba ngumpostile kwakhe. Enoba kwakuyintoni na, le ngxaki wayenayo yathatha ixesha elide yaye kwafuneka ajamelane nentlungu emzimbeni okanye ngokweemvakalelo.—2 Kor. 12:9, 10.

Abanye abakhonzi bakaThixo namhlanje bathwaxwa zizigulo ezinganyangekiyo kanti abanye baxinezelekile. Eneminyaka eli-18 ubudala uMagdalena kwathiwa unesifo esibizwa ngokuba systemic lupus erythematosus, isifo apho inkqubo yomzimba yokuzikhusela ihlasela amalungu omzimba. Uthi: “Ndandisoyika kakhulu. Ngokuhamba kwexesha, ndaya ndigula ngakumbi ndaza ndaba neengxaki zesisu, ndaba nezilonda emlonyeni ndaza ndaba neengxaki kwidlala lengqula.” Kwelinye icala, uIzabela kwafuneka ajamelane nokugula okwakungabonakali kangako. Uthi: “Ekukhuleni kwam bendinengxaki yokuxinezeleka. Oko kuye kwakhokelela ekubeni ndisoloko ndiphakuphaku, ndineengxaki zokuphefumla yaye ndinamahlaba. Ngenxa yoko, ndisoloko ndityhafile.”

Ukuyamkela Imeko Ngobunjalo Bayo

Ukugula nobulwelwe kunokuyiphazamisa indlela ophila ngayo. Xa oku kusenzeka, kuyanceda ukuhlala phantsi ukhe uyipekisele kakuhle imeko okuyo. Kunokuba nzima ukuyamkela ngobunjalo bayo. UMagdalena uthi: “Isifo endinaso siya sibheka phambili. Ndisoloko ndivuka ndidiniwe kangangokuba kuba nzima nokuphakama ebhedini. Ngenxa yokuba esi sifo sisuka sindivuke nokuba kunini na, kunzima nokuceba kusengaphambili. Eyona nto indikhathaza gqitha kukuba andisakwazi nokusebenzela uYehova ngendlela ebendikade ndisenza ngayo.”

UZbigniew uthi: “Ngokuhamba kweminyaka, ndiqotywa sisifo samathambo yaye sindigqiba amalungu. Ngamanye amaxesha xa sendidumbe nyhani, ndoyiswa nayeyona misebenzi ilula. Indikhathaza gqitha loo nto.”

Kwiminyaka edluleyo, kuye kwafunyaniswa ukuba uBarbara unethumba elinwenwayo elisebuchotsheni. Uthi: “Umzimba wam uye watshintsha ngesiquphe. Ndiphelelwa ngamandla, ndihleli nje ndiqaqanjelwa yintloko yaye andikwazi ukunikela ingqalelo. Ngenxa yoku kugula kwam, kuye kwafuneka ndiyitshintshe yonke indlela endizenza ngayo izinto.”

Bonke aba bantu bangabakhonzi bakaYehova abazahluleleyo. Eyona nto ibalulekileyo kubo kukwenza ukuthanda kwakhe. Bathembele ngokupheleleyo kuThixo yaye bayakuvuyela ukuxhaswa nguye.—IMize. 3:5, 6.

UYehova Uluncedo—Njani?

Asimele sicinge ukuba sithwaxwa ziinkxwaleko kuba uThixo engakholiswa sithi. (IZili. 3:33) Cinga ngezinto ekwafuneka zinyanyezelwe nguYobhi nangona ‘wayengenakusoleka yaye ethe tye.’ (Yobhi 1:8) UThixo akalingi nabani na ngezinto ezimbi. (Yak. 1:13) Zonke izigulo—kuquka ezo zinganyangekiyo nezichaphazela iimvakalelo—zililifa elibuhlungu esalishiyelwa ngabazali bethu bokuqala, uAdam noEva.—Roma 5:12.

Noko ke, uYehova noYesu abasayi kuwashiya enyanyeni amalungisa. (INdu. 34:15) Ingakumbi xa kunzima ngokwenene, siyayiqonda into yokuba uThixo ‘uyindawo yethu yokusabela negwiba lethu.’ (INdu. 91:2) Ngoko xa uhlangabezana neemeko ezingenasicombululo silula, yintoni enokukunceda uhlale wonwabile?

Umthandazo: Njengoko ulandela emanyathelweni abakhonzi bakaThixo abathembekileyo bamandulo, unokulahlela umthwalo wakho kuBawo wethu wasezulwini ngokuthandaza kuye. (INdu. 55:22) Xa usenza oko, uya kufumana “uxolo lukaThixo olungaphaya kokuqonda.” Olo xolo ‘luya kuyilinda intliziyo yakho namandla akho engqondo.’ (Fil. 4:6, 7) Ngokuthandaza kuThixo enentembelo, uMagdalena uyakwazi ukuhlangabezana nesifo esimthez’ amandla. Uthi: “Ukuphalaza imbilini yam kuYehova kundizisela isiqabu kuze kundenze ndonwabe. Ngoku ndiyiqonda ngokwenene intsingiselo yokuthembela kuThixo imihla ngemihla.”—2 Kor. 1:3, 4.

UYehova unokuyiphendula imithandazo yakho ngokukunika amandla ngomoya wakhe oyingcwele, ngeLizwi lakhe nangabazalwana bethu abangamaKristu. Akunakulindela ukuba uThixo asuse ubulwelwe bakho ngokungummangaliso. Sekunjalo, unokuba nethemba lokuba uya kukunika ubulumko namandla owafunayo ukuze uhlangabezane nayo nayiphi na imbandezelo. (IMize. 2:7) Unokukomeleza aze akunike “amandla angaphaya koko kuqhelekileyo.”—2 Kor. 4:7.

Intsapho: Ukuba kwikhaya elinothando nobubele kunokukunceda ukunyamezele ukugula kwakho. Kodwa ke, khumbula ukuba nentsapho yakho ibandezelekile. Isenokuziva ngathi ibotshwe izandla neenyawo kanye njengawe. Sekunjalo, ikulungele ukukuxhasa nangawona maxesha anzima. Ukuthandaza kunye nayo kuya kuninceda nibe nentliziyo ezolileyo.—IMize. 14:30.

Ethetha ngentombi yakhe kunye nezinye intwazana ezisebandleni uBarbara uthi: “Zihamba nam xa ndisiya entsimini. Inzondelelo yazo iyandichukumisa.” UZbigniew uyifumanisa ingenakuthelekiswa nanto inkxaso ayifumana kwinkosikazi yakhe. Uthi: “Imisebenzi emininzi yasendlwini yenziwa nguye. Kwakhona, uyandincedisa ukunxiba yaye usoloko endiphathisa ibhegi yam xa ndisiya kwiintlanganiso zamaKristu nasentsimini.”

Amanye amaKristu: Ukuba kunye namanye amaKristu kuyasikhuthaza kuze kusithuthuzele. Kodwa kuthekani ukuba akukwazi ukuya ezintlanganisweni ngenxa yokuba ugula? UMagdalena uthi: “Ibandla liye landirekhodela iintlanganiso ukuqinisekisa ukuba azindiphosi. Abazalwana noodade basoloko bendifowunela ukuze baqonde indlela abanokundinceda ngayo. Kwakhona, bandithumelela neeleta ezindikhuthazayo. Ukucinga nje ngendlela abandikhathalele ngayo nenkxalabo yabo ngempilo-ntle yam kundenza ndinyamezele.”

UIzabela, othwaxwa luxinezeleko uthi: “Ebandleni ‘ndinootata’ ‘noomama’ abaninzi abandiphulaphulayo nabayiqondayo imeko yam. Ebandleni kusekhaya—kulapho ndifumana khona uxolo nolonwabo.”

Kuya kuba kuhle ukuba, abo bahlangabezana neemvavanyo ezahlukahlukeneyo ‘bangazahluli.’ Kunoko, bamele baluxabise ulwalamano abanalo nebandla. (IMize. 18:1) Xa besenjenjalo baba lukhuthazo olungathethekiyo kwabanye. Usenokuqala ube mathidala ukuchazela abazalwana noodade ngemeko okuyo. Sekunjalo, baya kukuxabisa ukuthetha kwakho phandle. Oko kuya kubavulela ithuba lokuba babonise ‘umsa wobuzalwana ongenaluhanahaniso.’ (1 Pet. 1:22) Usenokucela ukuba bakukhwelise ukuya kwiintlanganiso, ucele ukusebenza nabo entsimini okanye ucele ukuphalaza imbilini yakho kubo. Kambe ke, asimele sifune uncedo ngenkani kodwa simele sixabise uncedo abasinika lona.

Yiba nesimo sengqondo esihle: Ukukwazi ukuhlangabezana nesigulo esinganyangekiyo ngovuyo kuxhomekeke kuwe. Xa ungenathemba uye uzixelele ukuba ayikho nje into eya kuze ilunge. IBhayibhile ithi: “Umoya womntu unokusinyamezela isifo sakhe; kodwa umoya oxhwalekileyo, ngubani na onokuwunyamezela?”—IMize. 18:14.

UMagdalena uthi: “Ndizigcina ndixakekile ukuze ndiphephe ukusoloko ndicinga ngeengxaki zam. Kuba mnandi kakhulu xa impilo indixolele. Kuyandikhuthaza ukufunda amabali obomi abantu abaye bahlala bethembekile nangona benezigulo ezinganyangekiyo.” UIzabela uyomelezwa sisibakala sokuba uYehova emthanda yaye emxabisa. Uthi: “Ndiziva ndixabisekile yaye ndinesizathu sokuqhubeka ndiphila. Kanti, ndikhangele phambili kwithemba elimangalisayo lexesha elizayo.”

UZbigniew uthi: “Isigulo endinaso siye sandifundisa ukuthobeka nokuthobela. Sindifundise ukuqonda, ukwenza izigqibo zobulumko nokuxolela ngokusuka entliziyweni. Ndiye ndafunda ukukuvuyela ukukhonza uYehova ngaphandle kokuzisizela. Phofu ke, ndiye ndakhuthazelwa ekubeni ndiqhubeke ndisenza inkqubela ngokomoya.”

Khumbula ukuba uYehova uyakubona ukunyamezela kwakho. Uyayiqonda intlungu okuyo yaye ukukhathalele. Akasayi kuze ‘awulibale umsebenzi wakho nothando olubonisayo ngegama lakhe.’ (Heb. 6:10) Cinga ngesi sithembiso asichazela bonke abo bamoyikayo: “Andiyi kuze ndikushiye, ndingayi kuze ndikutyeshele.”—Heb. 13:5.

Ukuba ngamanye amaxesha uziva udimazekile, cinga ngethemba elimangalisayo lokuphila kwihlabathi elitsha. Kungekudala uya kuzibona iintsikelelo zoBukumkani bukaThixo emhlabeni!

[Ibhokisi/Imifanekiso ekwiphepha 28, 29]

Nangona Benezifo Ezinganyangekiyo, Abayeki Ukushumayela

“Andisakwazi kuhamba ndodwa, ngoko xa ndisiya entsimini ndikhatshwa ngumfazi wam okanye ngabanye abazalwana noodade. Ndiye ndizame ukuyibamba ngentloko into endiza kuyithetha entsimini kunye neendinyana zeBhayibhile.”—UJerzy, ongaboni kakuhle.

“Ukongezelela ekushumayeleni ngefowuni, ndibhala iileta yaye rhoqo ndiphendula abo abanomdla. Ngoxa ndisesibhedlele, ndisoloko ndibeka iBhayibhile neempapasho zamaNgqina kaYehova kufutshane nebhedi yam. Oko kuye kwandinceda ndaqalisa iincoko ezininzi ezinik’ umdla.”—UMagdalena, ofunyaniswe enesifo sesystemic lupus erythematosus.

“Ndiyakuthanda ukushumayela kwindlu ngendlu, kodwa xa ndingaziva kamnandi, ndinikela ubungqina ngefowuni.”—UIzabela, onesifo sokudandatheka.

“Ndiyakuthanda ukwenza amabuyelo nokunceda izifundo zeBhayibhile. Xa ndifumana umtyhi ngokwasempilweni, ndithanda ukunikela ubungqina kwindlu ngendlu.”—UBarbara, onethumba ebuchotsheni.

“Ndiphatha kuphela ibhegi yamaphephancwadi ekhaphukhaphu. Ndiqhubeka nokushumayela logama nje amathambo am abuhlungu esandivumela.”—UZbigniew, ophethwe sisifo samathambo.

[Umfanekiso okwiphepha 30]

Abantwana nabantu abadala banokubakhuthaza abanye