Funda ‘Kwisakhelo Senyaniso’
“Unesakhelo solwazi nesenyaniso kuwo uMthetho.”—ROMA 2:20.
KHANGELA IIMPENDULO ZALE MIBUZO:
Imibingelelo ekuMthetho kaMoses yayisisithunzi santoni?
Ifana ngantoni eminye yemibingelelo eyayisenziwa ngamaSirayeli noko kwenziwa ngamaKristu namhlanje?
Ziziphi izinto ezigqibayo enoba umbingelelo wamkelekile okanye awamkelekanga kuYehova?
1. Kutheni sifanele sibe nomdla wokuqonda ukubaluleka koMthetho kaMoses?
UKUBA imibhalo ephefumlelweyo kampostile uPawulos ibingekho, ngekunzima ukuba siqonde intsingiselo yeenkalo ezininzi zoMthetho kaMoses. Ngokomzekelo kwileta yakhe eya kumaHebhere, uchaza indlela uYesu ‘njengombingeleli omkhulu othembekileyo’ aye wanikela ngayo ngokupheleleyo “umbingelelo wokucamagushela” esenzela ukuba abo banokholo bafumane “intlangulo engunaphakade.” (Heb. 2:17; 9:11, 12) UPawulos wachaza nokuba umnquba ‘wawusisithunzi nje sezinto zasezulwini’ nokuba uYesu waba nguMlamleli ‘womnqophiso olunge ngakumbi’ kunalowo uMoses wayengumlamleli wawo. (Heb. 7:22; 8:1-5) Ngomhla kaPawulo, ukuchazwa koMthetho ngolo hlobo kwakubaluleke gqitha kumaKristu, yaye kusenjalo nangoku. Kusinceda sikuqonde ngakumbi ukuxabiseka kwamalungiselelo esiwenzelwe nguThixo.
2. AmaKristu angamaYuda ayenaliphi ilungelo elalingafunyanwa ngabantu beeNtlanga?
2 Xa wayebhalela amaKristu aseRoma, uPawulos wayebhekisela kumalungu ebandla angamaYuda awayefundiswe uMthetho kaMoses. Wayesazi ukuba ngenxa yokuba eqhelene nalo Mthetho kaThixo, ‘ayenesakhelo solwazi nenyaniso’ ngoYehova nangemigaqo yakhe yobulungisa. Ukuqonda nokuhlonela ngokunzulu ‘isakhelo senyaniso,’ kwanceda amaKristu angamaYuda, kanye njengamaYuda athembekileyo awayephila ngaphambi kwawo, ukuba akhokele, afundise aze akhanyisele abo babengawazi uMthetho uYehova awayewunike abantu bakhe.—Funda eyabaseRoma 2:17-20.
IZITHUNZI ZEDINI LIKAYESU
3. Kusinceda njani ukufunda ngemibingelelo yamaYuda amandulo?
3 Isakhelo senyaniso athetha ngaso uPawulos sinokusinceda nathi siqonde iinjongo zikaYehova. Imigaqo osekelwe kuyo uMthetho kaMoses ayikaphelelwa lixesha. Sinoko engqondweni, makhe sithethe ngenye inkalo yoMthetho—indlela imibingelelo neminikelo eyahlukahlukeneyo eye yawakhokelela ngayo amaYuda athobekileyo kuKristu nendlela eye yawanceda ngayo ukuba aqonde oko uThixo akufunayo kuwo. Yaye ekubeni zingasoze zitshintshe izinto uYehova azifunayo kubakhonzi bakhe, siza kubona nokuba umthetho kaThixo ophathelele imibingelelo neminikelo eyayisenziwa ngamaSirayeli, unokusinceda sihlole umgangatho wenkonzo engcwele esiyinikelayo.—Mal. 3:6.
4, 5. (a) UMthetho kaMoses ubakhumbuza ntoni abantu bakaThixo? (b) Umthetho kaThixo ongemibingelelo wawusalatha entwenini?
4 AmaYuda amandulo ayeyiqonda into yokuba iinkalo zazibethelela ukuba amaYuda angaboni. Ngokomzekelo, nabani na owayechukumisa isidumbu kwakufuneka ahlanjululwe. Ukuze kwenziwe oko, kwakuxhelwa inkomo ebomvu ephilileyo ize itshiswe. Uthuthu lwayo lwalugcinelwa “amanzi okuhlambulula” nawayefefwa emntwini owayehlanjululwa ngosuku lwesithathu nolwesixhenxe emva kokuba enze into emenze akahlambuluka. (Num. 19:1-13) Kwakhona njengendlela yokukhumbuza amaYuda ukuba ukuzala komntu kwakudlulisela ukungafezeki nesono, lalisithi ibhinqa emva kokubeleka, libe nethuba lokungahlambuluki, ekwakusithi emva kwalo, kufuneke lenze umbingelelo wokucamagushela izono.—Lev. 12:1-8.
5 Ukubingelela ngezilwanyana kwakufuneka kwiimeko ezininzi zemihla ngemihla ukuze kucanyagushelwe izono. Enoba abanquli bakaThixo babekuqonda oku okanye kwakungenjalo, le mibingelelo—kwanaleyo yathi kamva yayisenziwa etempileni kaYehova—‘yayisisithunzi’ sedini likaYesu elifezekileyo.—Heb. 10:1-10.
INJONGO YOMBINGELELO
6, 7. (a) AmaSirayeli ayekhokelwa yintoni xa ekhetha izilwanyana aza kubingelela ngazo, yaye oku kwakufanekisela ntoni? (b) Yiyiphi imibuzo esinokuzibuza yona?
6 Ngokomthetho nasiphi na isilwanyana ekwakuza kunikelwa ngaso kuYehova sasifanele ‘siphile’ qete ngandlela zonke—singabi yimfama, singenzakali, singabi nesiphene okanye sigule. (Lev. 22:20-22) Iziqhamo okanye ukudla okuziinkozo okwakunikelwa ngamaSirayeli kuYehova, kwakumele kube ‘ziintlahlela,’ ‘okona kulungileyo’ kwisivuno sawo. (Num. 18:12, 29) Umbingelelo okumgangatho ophantsi wawungamkelekanga kuYehova. Lo mthetho ubalulekileyo wendlela yokubingelela ngezilwanyana wenza sibone ukuba umbingelelo kaYesu wawungazi kuba nabala nasiphako nokuba uYehova wayeza kunikela ngeyona nto ikumgangatho ophezulu nayithandayo ukuze kuhlangulwe uluntu.—1 Pet. 1:18, 19.
7 Ukuba ngokwenene umntu wenza umbingelelo kuba embulela ngokunyanisekileyo uYehova ngenxa yokulunga Kwakhe, ngaba ebengenakukuvuyela ukukhetha esona silwanyana asithandayo? Yayiyekelwa kumntu ngamnye into afuna ukunikela ngayo. Noko ke, wayesazi ukuba uThixo akakholiswa kukuba kunikelwe ngesilwanyana esinesiphene kuba loo ibonisa ukuba udlulisa nje usana kunina okanye ujonga ukunikela njengoxanduva. (Funda uMalaki 1:6-8, 13.) Oku kufanele kusenze sicinge ngenkonzo esiyinika uThixo: ‘Ndimkhonza ngayiphi injongo uYehova? Ngaba kufanelekile ukuba ndihlole umgangatho wenkonzo endimnika yona neentshukumisa zam zokumkhonza.’
8, 9. Kutheni sifanele sisihlole isimo sengqondo amaSirayeli awayenaso xa ayesenza iminikelo?
8 Ukuba umSirayeli wayebingelela ngokuzithandela kuba embulela ngokunyanisekileyo uYehova, okanye enze umnikelo otshiswayo, kuba ecela inkoliseko yakhe, ngoko ukukhetha isilwanyana esifanelekileyo kwakungamele kube yinto enzima. Umnquli kaYehova uya kukuvuyela ukumnika eyona nto ayithandayo. AmaKristu namhlanje akasayenzi imibingelelo yoMthetho kaMoses; sekunjalo ayayenza imibingelelo kuba asebenzisa ixesha, amandla nezinto zawo ukuze akhonze uYehova. Umpostile uPawulos wabhekisela ‘kuvakaliso lwasekuhleni’ lwethemba lamaKristu ‘nokwenza okulungileyo nokwabelana ngezinto nabanye’ njengemibingelelo ekholisa uThixo. (Heb. 13:15, 16) Indlela abantu bakaYehova abayenza ngayo loo misebenzi idiza indlela abanoxabiso nabanombulelo ngayo ngazo zonke izinto uThixo abenzele zona. Isimo sengqondo neentshukumisa zabo benza inkonzo yamaKristu namhlanje ziyafana nezabo babesenza imibingelelo yokuzithandela mandulo.
9 Noko ke, kunokuthiwani kwimeko apho uMthetho kaMoses wawufuna umnikelo wesono okanye umnikelo wetyala kumntu oye wasilela? Ekubeni le minikelo yayimele yenziwe, ngaba ucinga ukuba bekuya kuba nzima ngaloo mntu ukunikela ngokuzithandela? Ngaba kunokwenzeka ukuba ibe loo mibingelelo yayisenziwa ngesikrokro? (Lev. 4:27, 28) Bekungayi kuba njalo ukuba loo mntu wayekufuna ngokunyanisekileyo ukulondoloza ulwalamano oluhle noYehova.
10. Yiyiphi ‘imibingelelo’ ekusenokufuneka yenziwe ngamaKristu ukuze alungise ulwalamano olonakeleyo?
10 Ngokufanayo namhlanje, usenokuthi ungacinganga, ungenzi ngabom, okanye ungaqondanga, wone nxamnye nomzalwana othile. Isazela sakho sinokukuxelela ukuba wenze into engafanelekanga. Ngaba umntu ozimisele ukukhonza uYehova ngendlela efanelekileyo, ebengayi kwenza konke okusemandleni akhe ukulungisa loo nto? Oko kunokuthetha ukucela uxolo ngokunyanisekileyo kuloo mntu umkhubekisileyo, okanye ukuba wenze isono esinzulu, ucele uncedo kubaveleli abangamaKristu abanothando. (Mat. 5:23, 24; Yak. 5:14, 15) Ngoko simele sincame okuthile ukuze silungise umonakalo esiwenze kumntu esimonileyo okanye kuThixo. Sekunjalo, xa sisenza loo ‘mibingelelo’ sigcina ulwalamano lwethu noYehova nabazalwana bethu luluhle yaye siba nesazela esicocekileyo. Oku kusiqinisekisa ngokuba indlela kaYehova yeyona simele siphile ngayo.
11, 12. (a) Yintoni eyayibandakanyekile kwimibingelelo yobudlelane? (b) Imibingelelo yobudlelane ifana njani nonqulo olunyulu namhlanje?
11 Eminye imibingelelo ekuthethwe ngayo kuMthetho kaMoses yayigqalwa njengeminikelo yobudlelane. Yayibonisa ukuba umntu useluxolweni noYehova. Umntu owenza loo mnikelo kunye nentsapho yakhe babesitya inyama yeso silwanyana kubingelelwe ngaso, mhlawumbi besenjenjalo kwelinye lamagumbi okutyela asetempileni. Umbingeleli omkhulu nabanye ababingeleli ababekhonza etempileni babefumana inxalenye yaloo nyama. (Lev. 3:1; 7:31-33) Injongo yokuba loo mntu enze loo mbingelelo kukufuna nje ukuba nolwalamano oluhle noThixo. Kwakuba ngathi lo mntu, intsapho yakhe, ababingeleli kunye noYehova batya kunye beseluxolweni.
12 Kumele ukuba kwakulilungelo elingathethekiyo ukuthi ngendlela efuziselayo, umeme uYehova esidlweni aze naye asamkele eso simemo! Ngokuqhelekileyo, umntu ebengathanda ukwenza konke anokukwenza ukuze onwabise undwendwe olubekeke ngolo hlobo. Ilungiselelo lombingelelo wobudlelane, eliyinxalenye yesakhelo senyaniso soMthetho, lalichaza isibakala sokuba, ngedini elikhulu likaYesu, bonke abantu abanqwenela ukuba nolwalamano olusondeleyo nolunoxolo noMdali wabo banokukwazi ukwenjenjalo. Namhlanje, sinokuba nolwalamano nobuhlobo obusenyongweni noYehova njengoko sinikela ngokuzithandela ngezinto zethu zexabiso nangamandla ethu kwinkonzo yakhe.
IZILUMKISO NGOKUPHATHELELE IMIBINGELELO
13, 14. Kwakutheni ukuze uYehova angawamkeli umbingelelo kaKumkani uSawule?
13 Kambe ke, ukuze yamkelwe nguYehova, imibingelelo yoMthetho kaMoses kwakufuneka inikelwe ngeenjongo nangesimo sengqondo esihle. Noko ke, iBhayibhile inemizekelo esisilumkiso yemibingelelo engazange yamkeleke kuThixo. Kwakutheni ukuze angayamkeli? Makhe sihlole iimeko ezimbini.
14 Umprofeti uSamuweli waxelela uKumkani uSawule ukuba lifikile ixesha lokuba uYehova aphumeze umgwebo nxamnye nama-Amaleki. Ngoko kwakuza kufuneka uSawule atshabalalise olu hlanga lulutshaba kwakunye nemfuyo yalo. Kodwa, emva kokuba uSawule oyisile, wavumela amajoni akhe ukuba asindise uAgagi, ukumkani wama-Amaleki. Kwakhona uSawule wasindisa imfuyo entle eyayiza kusetyenziswa ukuze kubingelelwe ngayo kuYehova. (1 Sam. 15:2, 3, 21) Wathini uYehova? Wamgatya uSawule ngenxa yokungathobeli kwakhe. (Funda eyoku-1 kaSamuweli 15:22, 23.) Sifunda ntoni koku? Ukuze uThixo ayamkele imibingelelo yethu, simele siyithobele imiyalelo yakhe.
15. Zazibonisa ntoni izinto ezimbi ezazisenziwa ngamanye amaSirayeli awayebingelela ngomhla kaIsaya?
15 Incwadi kaIsaya inomzekelo ofana nalo sele siwukhankanyile. Ngomhla kaIsaya, amaSirayeli ayedlulisa usana kunina xa ebingelela kuYehova. Noko ke, ngenxa yokuba babesenza izinto ezimbi, imibingelelo yabo yayingamkelekanga. UYehova wawabuza oku: “Kunangenelo ngantoni na kum ukuba mininzi kwemibingelelo yenu? Ndanele yimibingelelo etshiswa kuphele yeenkunzi zeegusha namanqatha ezilwanyana ezondlekileyo; yaye andiyoliswa naligazi lamathole eenkomo aziinkunzi neenkunzi zeemvana neenkunzi zeebhokhwe. . . . Yekani ukuzisa nayiphi na iminikelo engakumbi yokudla okuziinkozo engenaxabiso. Isiqhumiso—siyinto ecekisekayo kum.” Yayiyintoni ingxaki? UThixo wathi kubo: “Nakubeni nisenza imithandazo emininzi, andiphulaphulanga; zona kanye izandla zenu zizaliswe luphalazo-gazi. Zihlambeni; zihlambululeni; shenxisani ububi benu phambi kwamehlo am; yekani ukwenza okubi.”—Isa. 1:11-16.
16. Yintoni egqibayo enoba umbingelelo wamkelekile kusini na kuThixo?
16 UYehova akazange akholiswe yimibingelelo eyenziwa ngaboni abangaguqukiyo. Noko ke, wayamkela imithandazo nemibingelelo yabantu ababezama ngokunyaniseka ukuphila ngokuvumelana nemithetho yakhe. Isakhelo soMthetho sasifundisa abo bantu ukuba banesono yaye kufuneka bexolelwe. (Gal. 3:19) Ukuqonda oko kwakubenza bazisole. Nathi namhlanje, sifanele siqonde ukuba silifuna ngokwenene idini likaKristu kuthi kuba liyakwazi ukucamagushela izono. Ukuba siyakuqonda size sikuxabise oko, uYehova uya ‘kuyoliswa’ kuko konke esikwenza kwinkonzo yethu.—Funda iNdumiso 51:17, 19.
BONISA UKHOLO KWIDINI LIKAYESU!
17-19. (a) Singawubonisa njani umbulelo ngendlela efanelekileyo kuYehova ngedini lentlawulelo likaYesu? (b) Yintoni eza kushukuxwa kwinqaku elilandelayo?
17 Sinelungelo abangenalo abo babephila ngaphambi kwexesha lamaKristu, kuba akuseyomfuneko ukuba saneliswe nje kukubona ‘isithunzi’ seenjongo zikaThixo. (Heb. 10:1) Imithetho engemibingelelo yakhuthaza amaYuda ukuba abe nesimo sengqondo esasiza kuwanceda abe nolwalamano oluhle noThixo—ambulele ngokungazenzisiyo, afune ukumenzela konke okusemandleni awo aze aqonde ukuba kufuneka ehlawulelwe. Inkcazelo ekwiZibhalo zamaKristu ZesiGrike isinceda siqonde ukuba, ngentlawulelo uYehova uya kuyiphelisa ngokupheleleyo imiphumo yesono nokuba kwanangoku siyakwazi ukuba nesazela esicocekileyo phambi kwakhe. Idini lentlawulelo likaYesu lilungiselelo elimangalisayo!—Gal. 3:13; Heb. 9:9, 14.
18 Kakade ke, ukuze lisincede idini lentlawulelo, asimele siphelele nje ekulikheni phezulu. Umpostile uPawulos wabhala wathi: “UMthetho uye waba ngumkhapheli wethu osikhokelela kuKristu, ukuze sivakaliswe singamalungisa ngenxa yokholo.” (Gal. 3:24) Yaye ukholo olunjalo luhamba nemisebenzi. (Yak. 2:26) Ngenxa yoko, uPawulos wakhuthaza amaKristu enkulungwane yokuqala anesakhelo solwazi olukuMthetho kaMoses ukuba basebenzise olo lwazi. Ngokwenjenjalo, ihambo yawo yayiya kuvisisana nemigaqo kaThixo ayifundisayo.—Funda amaRoma 2:21-23.
19 Nangona kungeyomfuneko ukuba amaKristu athobele uMthetho kaMoses namhlanje, afanele anikele imibingelelo eyamkelekileyo kuYehova. Indlela esinokukwenza ngayo oko kuza kushukuxwa kwinqaku elilandelayo.
[Amagama acatshulweyo akwiphepha 17]
Izinto ezisiseko uYehova azifunayo kubakhonzi bakhe soze zitshintshe
[Umfanekiso okwiphepha 18]
Sisiphi isilwanyana obuya kunikela ngaso kuYehova?
[Umfanekiso okwiphepha 19]
UYehova uyakholiswa ngabantu abenza imibingelelo eyamkelekileyo kuye