Ukunikela Imibingelelo Yomphefumlo Uphela KuYehova
“Nayiphi na into eniyenzayo, yenzeni ngomphefumlo uphela ngokungathi niyenzela uYehova.”—KOL. 3:23.
KHAWUBONE UKUBA UNOKUPHENDULA NA:
Sinokumzukisa njani uYehova kwizinto esizenza imihla ngemihla?
Yiyiphi imibingelelo esinokuyenza xa sidumisa uThixo?
Singanikela njani ngezinto zethu eziphathekayo kuYehova?
1-3. (a) Ngaba ukufa kukaYesu kwisibonda sentuthumbo kuthetha ukuba uYehova akasafuni naluphi na uhlobo lombingelelo kuthi? Cacisa. (b) Nguwuphi umbuzo ophakamayo ngokuphathelele imibingelelo yanamhlanje?
NGENKULUNGWANE yokuqala Ngaphambi kweXesha Eliqhelekileyo, uYehova wayenza yacaca kubantu bakhe into yokuba, idini likaYesu lentlawulelo liwuphelisile uMthetho kaMoses. (Kol. 2:13, 14) Yonke iminikelo yamadini eyayisenziwa ngamaYuda kangangamakhulukhulu eminyaka yayingasafuneki yaye ingasenaxabiso. UMthetho wawuyifezile injongo yawo yokuba “yokuba ngumkhapheli wethu osikhokelela kuKristu.”—Gal. 3:24.
2 Oko akuthethi kuthi amaKristu akasenamdla kwimibingelelo. Ngokwahlukileyo, umpostile uPetros wathetha ngemfuneko ‘yokunikela imibingelelo yokomoya eyamkelekileyo kuThixo ngoYesu Kristu.’ (1 Pet. 2:5) Ngaphezu koko, umpostile uPawulos wayenza yacaca into yokuba ubomi bomKristu ozahluleleyo—bubonke nje—bunokufaniswa ‘nombingelelo.’—Rom. 12:1.
3 Ngoko ke, umKristu wenza umbingelelo ngenxa kaYehova, enoba kungokunikela ngezinto eziphathekayo okanye kungokuncama izinto ezithile ngenxa yakhe. Ngokusuka koko sikwaziyo ngezinto ezazifuneka kumaSirayeli, singaqiniseka njani ukuba yonke imibingelelo yethu namhlanje yamkelekile kuYehova?
KUBOMI BEMIHLA NGEMIHLA
4. Yintoni esimele siyikhumbule ngemisebenzi yamihla le yobomi?
4 Njengoko siqhubeka nobomi bethu bemihla ngemihla, kusenokubonakala kunzima ukudibanisa izinto esizenzayo nokubingelela kuYehova. Izinto eziquka umsebenzi wasekhaya, umsebenzi wesikolo, impangelo, okanye ukuthenga zisenokubonakala zingenanto yakwenza kangako nobumoya bethu. Kodwa ukuba uzahlulele kuYehova okanye uza kwenjenjalo kungekudala, ngoko ibalulekile indlela ozijonga ngayo izinto ezibonakala zingenamsebenzi. Ngoko singamaKristu imini nobusuku. Simele sisebenzise imigaqo yeBhayibhile kuzo zonke iinkalo zobomi bethu. Yiloo nto uPawulos wasibongoza ngelithi: “Nayiphi na into eniyenzayo, yenzeni ngomphefumlo uphela ngokungathi niyenzela uYehova, kungekhona abantu.”—Funda eyabaseKolose 3:18-24.
5, 6. Yintoni emele ichaphazele indlela yamihla le esinxiba nesiziphatha ngayo?
5 Izinto ezenziwa ngumKristu mihla le aziyonxalenye yenkonzo engcwele. Sekunjalo, isibakala sokuba uPawulos esibongoza ukuba sisebenze ‘ngomphefumlo uphela ngokungathi senzela uYehova’ sisenza sicinge ngendlela esibuphila ngayo ubomi bethu xa bubonke. Ngoko, sinokukusebenzisa njani oku kubomi bethu? Ngaba ngalo lonke ixesha siziphatha size sinxibe ngendlela efanelekileyo? Okanye njengoko sisenza imisebenzi yethu zemihla ngemihla, ngaba simele sibe neentloni ukuzibiza ngokuba singamaNgqina kaYehova, ngenxa yendlela esiziphatha ngayo okanye ngenxa yendlela esinxibe ngayo? Nakanye! Abantu bakaYehova abamele benze nantoni na enokulimela kakubi igama likaThixo.—Isa. 43:10; 2 Kor. 6:3, 4, 9.
6 Makhe sixubushe indlela ukunqwenela ukusebenza ‘ngomphefumlo uphela ngokungathi senzela uYehova’ okunokuzichaphazela ngayo iinkalo ezininzi zobomi bethu. Njengoko siqhubeka nale ngxubusho, khumbula ukuba yonke imibingelelo amaSirayeli awayeyinika uYehova yayimele ibe kowona mgangatho uphezulu anokuwufikelela.—Eks. 23:19.
INDLELA OBUCHAPHAZELEKA NGAYO UBOMI BAKHO
7. Yintoni ebandakanyekileyo kuzahlulelo lwamaKristu?
7 Xa wawuzahlulela kuYehova, wasenza eso sigqibo ngaphandle kwamathandabuzo, akunjalo na? Enyanisweni, wawusithi uYehova uza kuba kwindawo yokuqala kuzo zonke iinkalo zobomi bakho. (Funda amaHebhere 10:7.) Ngokwenene eso yaba sisigqibo esihle. Ngaphandle kwamathandabuzo uye wazibonela ukuba xa uzabalazela ukwenza ngokuvisisana nokuthanda kukaYehova kuyo nayiphi na into, imiphumo iba mihle. (Isa. 48:17, 18) Abantu bakaThixo bangcwele yaye bonwabile kuba babonakalisa iimpawu zaLowo ubafundisayo.—Lev. 11:44; 1 Tim. 1:11.
8. Sithetha ntoni kuthi isibakala sokuba uYehova wayeyigqala njengengcwele imibingelelo eyayisenziwa mandulo?
8 Imibingelelo eyayinikelwa ngamaSirayeli kuYehova yayigqalwa ingcwele. (Lev. 6:25; 7:1) Igama lesiHebhere eliguqulelwe ngokuthi “ubungcwele” lidlulisela ingcamango yokwahluka, ukukhetheka okanye ukungcwaliselwa uThixo. Ukuze imibingelelo yethu yamkeleke kuYehova, imele yahluke yaye ingadyojwa yimpembelelo yeli hlabathi. Asimele sithande nanye kwizinto uYehova azithiyileyo. (Funda eyoku-1 kaYohane 2:15-17.) Ngokucacileyo, oku kuthetha ukuba simele siluphephe naluphi na unxulumano okanye ukubandakanyeka kwizinto ezisenokubangela ukuba uThixo asijonge njengabantu abangcolileyo. (Isa 2:4; ISi 18:4) Kukwathetha nokuba asimele siqhubeke sibukele izinto ezingcolileyo okanye sivumele iingqondo zethu zicinge ngezinto ezinjalo.—Kol. 3:5, 6.
9. Ibaluleke kangakanani indlela umKristu abaphatha ngayo abanye, yaye ngoba?
9 UPawulos wabongoza amanye amaKristu ngelithi: “Musani ukulibala ukwenza okulungileyo nokwabelana ngezinto nabanye, kuba uThixo uyakholiswa yimibingelelo enjalo.” (Heb 13:16) Ngoko uYehova ukugqala njengemibingelelo eyamkelekileyo kuye ukuba nobubele nokwenzela abanye izibele rhoqo. Ukubaxhalabela ngothando abanye kubonisa ukuba singamaKristu okwenyaniso.—Yoh 13:34, 35; Kol 1:10.
IMIBINGELELO ELUNQULWENI
10, 11. UYehova ubujonga njani ubulungiseleli nonqulo lwethu njengamaKristu, yaye oku kumele kube nayiphi impembelelo kuthi?
10 Enye yezona ndlela zibonakalayo esinokuthi njengamaKristu sibenzele ngazo abanye oko kulungileyo, ‘kungovumo lwasesidlangalaleni lwethemba lethu.’ Ngaba uxhakamfula naliphi na ithuba elivelayo ukuze unikele ubungqina? UPawulos wawubiza lo msebenzi wamaKristu ubalulekileyo ngokuthi ‘ngumbingelelo wendumiso, oko kukuthi, isiqhamo semilebe evakalisa ekuhleni igama likaThixo.’ (Heb 10:23; 13:15; Hos 14:2.) Kuninzi okunokuthethwa ngobuninzi nangokubaluleka kwexesha esilichitha sishumayela iindaba ezilungileyo zoBukumkani, yaye iintetho ezininzi ezikwiNtlanganiso yeNkonzo zilungiselelwe ukusinceda sihlale sicinga ngalo msebenzi. Noko ke, ekubeni inkonzo yethu yasentsimini kunye nokunikela ubungqina obungacwangciswanga ‘zingumbingelelo wendumiso,’ nto leyo ethetha inxalenye yethu yonqulo, loo mbingelelo umele ube ngowona uxabisekileyo esinokunikela ngawo. Ngoxa iimeko zisenokungafani, ixesha esilinikelayo sivakalisa iindaba ezilungileyo, lisoloko libonisa uxabiso esinalo ngezinto zokomoya.
11 AmaKristu asoloko ezibekela ixesha lokunqula enoba akwenza oko ewodwa okanye ekunye nabanye abantu. NguYehova ofuna senjenjalo. Kuyinyaniso kona ukuba, akuseyomfuneko ukulandela ngokungqongqo uphumlo lweSabatha okanye siye rhoqo kwimithendeleko eseYerusalem. Noko ke, ezo ndlela zonqulo zinazo ezinye izinto ezifana nazo namhlanje. UThixo usalindele ukuba siyiphephe imisebenzi efileyo size sifundisise iLizwi lakhe, sithandaze siye nakwiintlanganiso zamaKristu. Yaye iintloko-ntsapho ezingamaKristu zinembopheleleko yokukhokela ekuqhubeni unqulo lwentsapho namalungu eentsapho zawo. (1Te 5:17; Heb 10:24, 25) Ngokuphathelele izinto zokomoya, senza kakuhle ukuzibuza ukuba, ‘Ngaba ndimele ndiyiphucule indlela endinqula ngayo?’
12. (a) Iminikelo yeziqhumiso yonqulo lwamandulo inokuthelekiswa nantoni namhlanje? (b) Olu thelekiso lumele luyichaphazele njani imithandazo yethu?
12 UKumkani uDavide wathi xa wayeculela uYehova: “Ngamana umthandazo wam ungalungiselelwa njengempepho phambi kwakho.” (INdu. 141:2) Khawukhe ucinge okomzuzwana ngemithandazo yakho—izihlandlo eyenziwa ngayo nomgangatho wayo. Incwadi yeSityhilelo ifanisa “imithandazo yabo bangcwele” nesiqhumiso kuba imithandazo eyamkelekileyo kuYehova ivakala njengevumba elimnandi nelithozamisayo. (ISityhi. 5:8) KuSirayeli wamandulo, isiqhumiso esasisenziwa rhoqo kwisibingelelo sikaYehova sasimele silungiselelwe kakuhle. UYehova wayesamkela kuphela xa sinikelwa ngokuvumelana nemiyalelo yakhe. (Eks. 30:34-37; Lev. 10:1, 2) Ukuba imithandazo yethu esuk’ entliziyweni siyenza ngolo hlobo, sinokuqiniseka ukuba yamkelekile kuYehova.
UKUPHA NOKWAMKELA
13, 14. (a) Wenzelwa ntoni uPawulos nguEpafrodito nalibandla laseFilipi, yaye wavakalelwa njani lo mpostile ngaloo nto? (b) Sinokuwuxelisa njani umzekelo kaEpafrodito nowebandla laseFilipi?
13 Ukunikela ngemali ukuze kuxhaswe umsebenzi owenziwa ehlabathini lonke kunokufaniswa nombingelelo, enoba sinikela kakhulu okanye kancinane. (Marko 12:41-44) Ngenkulungwane yokuqala Ngaphambi kweXesha Eliqhelekileyo, ibandla laseFilipi lathumela uEpafrodito eRoma ukuze anyamekele iintswelo zokwenyama zikaPawulos. Kuyabonakala ukuba lo mthunywa waseFilipi waphathela uPawulos isipho semali esasisuka ebandleni. AbaseFilipi babengaqali ukwenzela uPawulos izibele ezinje. Oku babekwenza kuba babengafuni uPawulos azikhathaze ngemali ukuze akwazi ukuzinikela ngokupheleleyo kubulungiseleli bakhe. UPawulos wasijonga njani esi sipho? Wasibiza ngokuba ‘livumba elimnandi, umbingelelo owamkelekileyo, okholekileyo kuThixo.’ (Funda eyabaseFilipi 4:15-19) UPawulos wabuxabisa ngokwenene ububele babantu baseFilipi yaye noYehova wayebuxabisa.
14 Ngokufanayo namhlanje, uYehova uyixabisa ngokwenene iminikelo yethu yokuxhasa umsebenzi owenziwa ehlabathini lonke. Ngaphezu koko, uthembisa ukuba, ukuba sibeka izilangazelelo zoBukumkani kwindawo yokuqala ebomini bethu, uya kuzinyamekela zonke iimfuno zethu, ezokomoya nezokwenyama.—Mat. 6:33; Luka 6:38.
BONISA UXABISO
15. Ziziphi ezinye zezinto ombulela ngazo uYehova?
15 Kungasa gede sibala izizathu ezininzi zokumbulela uYehova. Liyinyaniso elokuba, suku ngalunye sifanele simbulele ngesipho sobomi asijizeke ngaso. Usinika zonke izinto eziyimfuneko ukuze siphile—ukutya, impahla, ikhusi yaye siphefumla nje kungenxa yakhe. Ukongezelela, ukholo lwethu olusekelwe kulwazi oluchanileyo lusinika ithemba. Kubalulekile ukuba simnqule uYehova size sidlulisele imibingelelo yendumiso kuye ngenxa yoko akuko noko asenzele kona.—Funda iSityhilelo 4:11.
16. Singalubonakalisa njani uxabiso esinalo ngedini lentlawulelo likaKristu?
16 Njengoko sele sibonile kwinqaku elidlulileyo, esona sipho sixabisekileyo sikaThixo asinike uluntu, lidini lentlawulelo likaKristu. Esi sisipho esimangalisayo, esibonisa indlela uThixo asithanda ngayo. (1 Yohane 4:10) Singalubonisa njani uxabiso esinalo ngaso? UPawulos uthi: “Uthando analo uKristu luyasinyanzela, ngenxa yokuba siye sagqiba kwelokuba, umntu omnye wabafela bonke; . . . yaye wafela bonke ukuze abo baphilayo bangabi saziphilela, kodwa baphilele yena lowo wabafelayo waza wavuswa.” (2 Kor. 5:14, 15) Eneneni, uPawulos wayesithi ukuba siyabuxabisa ububele bothando bukaThixo obungasifanelanga, siya kuphilela ukuzukisa Yena kunye noNyana Wakhe. Sibonakalisa uthando noxabiso kuThixo noKristu ngokumthobela nangokunqwenela ukushumayela nokwenza abafundi.—1 Tim. 2:3, 4; 1 Yohane 5:3.
17, 18. Ziziphi ezinye iindlela abanye abaye bawandisa ngazo umbingelelo wendumiso kuYehova? Yenza umzekelo.
17 Ngaba kunokwenzeka ngawe ukuba uphucule indlela owunikela ngayo umbingelelo wendumiso kuThixo? Emva kokucingisisa ngazo zonke izinto ezintle uYehova abenzele zona, abanye baye bashukunyiselwa ekubeni bahlengahlengise ixesha nezinto abazenzayo ukuze bachithe ixesha elingakumbi beshumayela ngoBukumkani. Kangangenyanga enye nangaphezulu enyakeni, abanye baye baba ngoovulindlela abangabancedani, ngoxa abanye baye bangoovulindlela abathe ngxi. Abanye baye bancedisa kumsebenzi wokwakha iiHolo zoBukumkani. Ngaba ezi asizondlela zisemagqabini zokuba noxabiso? Ukuba sizenza ngenjongo elungileyo—ukuze sibonise uxabiso nokuze sidlulisele umbulelo—ziya kuba yinkonzo engcwele eyamkelekileyo kuThixo.
18 AmaKristu amaninzi aye avakalelwa kukuba afanele ambulele kakhulu uYehova yaye loo nto iye yawakhuthaza. Omnye wala maKristu nguMorena. Wayekhangela iimpendulo kwimibuzo yezinto zokomoya ebenayo kwicawa yamaKatolika awakhulela kuyo nakwintanda-bulumko yama-Asiriya. Kodwa akazange azifumane iimpendulo ezanelisayo. Into eyaqabula unxano lwakhe lokomoya kukufunda iBhayibhile namaNgqina kaYehova. UMorena wabulela gqitha ngokuphendulwa ngeZibhalo kuyo yonke imibuzo yakhe nendlela ezo mpendulo eziye zabuphucula ngayo ubomi bakhe kangangokuba wayefuna ukubulela uYehova ngokusebenzisa onke amandla akhe kwinkonzo yakhe. Ngoko emva kokuba ebhaptiziwe waqalisa ubuvulindlela bobuncedani obuqhubekayo, waza kamsinya nje emva kokuba iimeko zakhe zimvumela waba nguvulindlela othe ngxi. Sele kuyiminyaka engama-30 ngoku uMorena ekwinkonzo yexesha elizeleyo.
19. Unokwenza njani ukuze wandise imibingelelo oyenzela uYehova?
19 Eneneni, baninzi abakhonzi bakaYehova abameko zabo zingabavumeliyo ukuba bakhonze njengoovulindlela. Enoba yintoni esinokuyiphumeza kwinkonzo kaYehova, sonke sinako ukunikela imibingelelo yokomoya eyamkelekileyo kuye. Kwindlela esiziphatha ngayo, sifanele siyihlolisise ngenyameko imigaqo yobulungisa, sikhumbula ukuba simela uYehova ngalo lonke ixesha. Ngokholo, sithembele ngokupheleleyo ekusebenzeni kwenjongo kaThixo. Emisebenzini emihle, sincedisa ekusasazweni kweendaba ezilungileyo. Ngokuphuphuma kweentliziyo zethu nangenxa yoxabiso ngazo zonke izinto uYehova asenzele zona, masiqhubeke sisenza imibingelelo yomphefumlo uphela ngenxa kaYehova.
[Amagama acatshulweyo akwiphepha 25]
Ngaba ukulunga kukaYehova kukukhuthazela ekubeni uphucule umbingelelo wakho wendumiso?
[Umfanekiso okwiphepha 23]
Ngaba usebenzisa naliphi na ithuba elivelayo ukuze unikele ubungqina?