‘Yibani Nothando Phakathi Kwenu’
“Ndininika umyalelo omtsha, wokuba nithandane; kanye njengoko ndinithandileyo mna, ukuba nani nithandane. Ngako oko bonke baya kwazi ukuba ningabafundi bam, ukuba ninothando phakathi kwenu.”—YOHANE 13:34, 35.
Oko Kuthethwa Ngala Mazwi: UKristu waxelela abalandeli bakhe ukuba bathandane ngendlela awayebathanda ngayo. Walubonakalisa njani uthando lwakhe kubo? Wayebathanda bonke abantu nangona ngexesha lakhe abantu babecalulwa ngokobuhlanga nangokwesini. (Yohane 4:7-10) Uthando lwashukumisela uYesu ukuba ancame ixesha namandla akhe ukuze ancede abanye. (Marko 6:30-34) Ekugqibeleni, uYesu Kristu wabonisa uthando ngeyona ndlela ibalaseleyo. Wathi: “Ndingumalusi omhle; umalusi omhle unikezela umphefumlo wakhe ngenxa yezimvu.”—Yohane 10:11.
Indlela Awayeqhuba Ngayo AmaKristu Enkulungwane Yokuqala: Ngenkulungwane yokuqala amaKristu ayebizana ngokuthi “mzalwana” okanye “dade.” (Filemon 1, 2) Abantu bazo zonke iintlanga babemkelekile kwibandla lamaKristu, kuba babekholelwa ukuba “akukho lucalucalulo phakathi komYuda nomGrike, kuba kukho iNkosi enye kubo bonke.” (Roma 10:11, 12) Emva kwePentekoste yowama-33 C.E., eYerusalem abafundi “bathengisa ngezinto abanazo nempahla baza babela bonke ingeniso yabo, kanye ngokokuswela kwakhe nabani na.” Kwakutheni? Kwakusenzelwa ukuba abo basandula ukubhaptizwa bakwazi ukuhlala eYerusalem ukuze baqhubeke “bezinikela emfundisweni yabapostile.” (IZenzo 2:41-45) Babeqhutywa yintoni? Ngaphantsi kweminyaka engama-200 beswelekile abapostile, uTertullian wacaphula izinto ezazithethwa ngabanye abantu ngamaKristu esithi: “Khanibone indlela abathandana ngayo . . . nendlela abakulungele ngayo ukufelana.”
Ngoobani Abalandela Lo Mzekelo Namhlanje? Incwadi ethi The History of the Decline and Fall of the Roman Empire (yowe-1837) ithi ukutyhubela iinkulungwane abo bathi bangamaKristu “baye baphathana kabuhlungu ngakumbi [kunabahedeni].” Uphando oluye lwenziwa kutshanje eMerika luye lwafumanisa ukuba abantu bonqulo—ngokukodwa abo bathi bangamaKristu—banobuhlanga. Amarhamente amazwe ahlukeneyo adla ngokuhamba icawa enye kodwa awancedani xa kuvela iingxaki.
Ngowama-2004, emva kokuba iFlorida intlithwe ziinkanyamba ezine kwisithuba seenyanga ezimbini, usihlalo weKomiti Yezohlangulo yaseFlorida weza kuhlola ukuba izinto zoncedo ababezikhuphile zazisetyenziswa kakuhle kusini na? Wathi alikho iqela elalilungelelene njengamaNgqina kaYehova, yaye wawaxelela ukuba uza kuwanceda ngayo nantoni na ayifunayo. Ekuqaleni, kowe-1997, iqela lohlangulo lamaNgqina kaYehova, laya eDemocratic Republic of Congo liphethe amayeza ukutya nempahla ukuze lincede abazalwana babo abangamaKristu nabanye abantu ababedinga uncedo. AmaNgqina kaYehova aseYurophu anikela ngempahla elinganiselwa kwi-R7 980 000.