“Ndilazisile Igama Lakho”

“Ndilibonakalisile igama lakho kubantu ondinike bona bephuma ehlabathini. . . . Ndilazisile igama lakho kubo yaye ndiza kulazisa.”—YOHANE 17:6, 26.

Oko Kuthethwa Ngala Mazwi: UYesu walazisa igama likaThixo ngokulisebenzisa kubulungiseleli bakhe. Xa uYesu efunda iZibhalo, njengoko wayeqhele ukwenza, ufanele ukuba wayelibiza igama likaThixo. (Luka 4:16-21) Wafundisa abalandeli bakhe ukuba bathandaze bathi: “Bawo, malingcwaliswe igama lakho.”—Luka 11:2.

Indlela Awayeqhuba Ngayo AmaKristu Enkulungwane Yokuqala: Umpostile uPetros wachazela amadoda amakhulu eYerusalem ukuba uThixo uzikhethele “isizwana segama lakhe” kuzo zonke iintlanga. (IZenzo 15:14) Abapostile nabanye bafundisa ukuba “Wonk’ ubani obiza egameni likaYehova uya kusindiswa.” (IZenzo 2:21; Roma 10:13) Nabo babelisebenzisa igama likaThixo xa bebhala. ITosefta eyingqokelela yemithetho yamaYuda eyagqitywa ngowama-300 C.E., ithi mayela nokuvalwa umlomo kweencwadi zamaKristu ngabachasi: “Iincwadi zeVangeli neencwadi zeminim [ekwakucingwa ukuba zezamaKristu angamaYuda] zatsha. Kodwa zatshiswa kwezo ndawo zazikuzo, . . . zona neembekiselo ezazibhekisela kwiGama likaThixo elalikuzo.”

Ngoobani Abalandela Lo Mzekelo Namhlanje? IThe Revised Standard Version yeBhayibhile, egunyaziswe liBhunga leSizwe lamaBandla kaKristu laseUnited States, lithi kwintshayelelo yalo: “Ukusetyenziswa kwalo naliphi na igama lobuqu lokuphela koThixo oyinyaniso, ngokungathi kukho abanye oothixo afanele ohlulwe kubo, kwayekwa kubuYuda ngaphambi kwexesha lamaKristu yaye akuwafanelanga amaKristu.” Ngaloo ndlela, igama likaThixo yalithabathelisa indawo ngesibizo esithi “NKOSI.” Kutshanje, iVatican iye yayalela oobhishophu bayo ukuba: “Bayeke ukusebenzisa igama likaThixo lesiHebhere elinoonobumba abane ababizwa ngokuba yitetragrammaton okanye uYHWHa xa becula naxa bethandaza.”

Ngobani namhlanje abasebenzisa igama likaThixo nabalazisayo? Xa uSergey waseKyrgyzstan, wayekwishumi elivisayo, wabukela imuvi eyathi igama likaThixo nguYehova. Kwadlula iminyaka elishumi, engazange aphinde eve igama likaThixo libizwa kwakhona. Ekuhambeni kwexesha uSergey wafudukela eUnited States, amaNgqina kaYehova amabini amtyelela ekhayeni lakhe aze ambonisa igama likaThixo eBhayibhileni. USergey akazange akwazi ukulubamba uvuyo esakufumanisa iqela elisebenzisa igama likaYehova. Okubangel’ umdla kukuba iWebster’s Third New International Dictionary ngaphantsi kwegama elithi “uYehova uThixo,” ithi “kuphela kothixo owaziwa nokuphela kothixo onqulwa ngamaNgqina kaYehova.”

[Umbhalo osemazantsi]