“Ezi Ndaba Zilungileyo ZoBukumkani Ziya Kushunyayelwa”
“Kwaye ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—MATEYU 24:14.
Oko Kuthethwa Ngala Mazwi: Umbhali wencwadi yeVangeli uLuka wabhala ukuba uYesu “wahambela kwizixeko ngezixeko nakwiidolophana ngeedolophana, eshumayela yaye evakalisa iindaba ezilungileyo zobukumkani bukaThixo.” (Luka 8:1) UYesu ngokwakhe wathi: “Ndimele ndizivakalise iindaba ezilungileyo zobukumkani bukaThixo nakwezinye izixeko, ngenxa yokuba ndithunywe oko.” (Luka 4:43) Wathuma abafundi bakhe ukuba bashumayele iindaba ezilungileyo kwiidolophu nakwidolophana waza kamva wabayalela esithi: “niya kuba ngamangqina am . . . nakwezona nxalenye zikude zomhlaba.”—IZenzo 1:8; Luka 10:1.
Indlela Awayeqhuba Ngayo AmaKristu Enkulungwane Yokuqala: Abafundi bakaYesu abazange bachithe xesha benza ezo zinto uYesu wayebafundisa zona. “Yaye imihla yonke etempileni nakwizindlu ngezindlu baqhubeka ngaphandle kokuyekelela befundisa kwaye bevakalisa iindaba ezilungileyo ezingoKristu, uYesu.” (IZenzo 5:42) Umsebenzi wokushumayela wawungenziwa libathwana labafundi abafundileyo. Umbhali-mbali uNeander uthi “uCelsus, umntu wokuqala ukubhala nxamnye namaKristu wayengayithandi into yokuba abantu abasebenza ngewulu, abathungi bezihlangu, abasuki bezikhumba nabantu abangafundanga babengabashumayeli bevangeli abanenzondelelo.” Kwincwadi yakhe ethi The Early Centuries of the Church, uJean Bernardi wathi: “[AmaKristu] ayesiya naphina ukuze athethe nabo bonke abantu. Koohola beendlela nasezixekweni, kwiindawo zembutho nasemakhayeni abantu. Ayeshumayela enoba abantu bayawamkela okanye abawamkeli. . . Naseziphelweni zomhlaba.”
Ngoobani Abalandela Lo Mzekelo Namhlanje? Umfundisi waseTshetshi uDavid Watson ubhala athi: “Ukusilela kwecawa ekushumayeleni nasekufundiseni sesona sizathu siyintloko esibangele abantu bangabi namdla wokukhonza uThixo namhlanje.” Kwincwadi yakhe ethi Why Are the Catholics Leaving? UJosé Luis Pérez Guadalupe wabhala ngemisebenzi yeeCawa zomoya, amaSabatha nezinye waza wathi “abashumayeli kwindlu ngendlu.” Ngokuphathelele amaNgqina kaYehova, wabhala wathi: “Ashumayela kwindlu ngendlu ngendlela ecwangcisiweyo.”
Amagqabaza kaJonathan Turley abangel’ umdla nayinyaniso afumaneka kwiCato Supreme Court Review, 2001-2002: “Xa ukhankanya amaNgqina kaYehova ezingqondweni zabantu abaninzi kuthi qatha abashumayeli abatyelela emakhayeni ethu ngamaxesha esingawalindelanga ngawo. KumaNgqina kaYehova, ukuguqula abantu kwindlu ngendlu akuyiyo nje enye indlela yokomeleza ukholo lwawo kodwa ngundoqo wokholo lwawo.”
[Ibhokisi ekwiphepha 9]
Ngaba Uyalubona Uphawu?
Ngokusekelwe kwiZibhalo eziye zaxutyushwa kula manqaku, ngoobani namhlanje ocinga ukuba banophawu olubonisa ukuba bangamaKristu okwenyaniso? Nangona kukho amashumi amawaka amaqela neemvaba ezizingomb’ isifuba zisithi zingamaKristu, cinga ngoko kwathethwa nguYesu kubalandeli bakhe esithi: “Asingabo bonke abathi kum, ‘Nkosi, Nkosi,’ abaya kungena ebukumkanini bamazulu, kodwa ngulowo wenza ukuthanda kukaBawo osemazulwini oya kungena.” (Mateyu 7:21) Ukubaqonda abo benza ukuthanda kukaBawo—ngamanye amazwi abanophawu lobuKristu bokwenyaniso—uze unxulumane nabo oko kunokukhokelela kwiintsikelelo ezingunaphakade phantsi koBukumkani bukaThixo. Siyakumema ukuba uthethe namaNgqina kaYehova aye akunika eli phephancwadi ukuze ufumane inkcazelo engakumbi ngokuphathelele uBukumkani bukaThixo neentsikelelo obuya kuzizisa.—Luka 4:43.