Yintoni Ephosakeleyo Ngokusebenzelana Nemimoya?

Ukususela ebuntwaneni, uBarbaraa wabona imibono, weva amazwi athethayo, yaye lo nto yamenza weyiseka ukuba uye waqhagamshelana nabantu bakowabo abangasekhoyo. Yena nomyeni wakhe uJoachim babefunda iincwadi zobugqi yaye ekugqibeleni baba ziincutshe ekufundeni amakhadi emilingo. Oku kwabonisa ukuba babeza kwenza imali eninzi, eneneni kwabanjalo. Ngenye imini, la makhadi abaxelela ukuba kwakuza kufika abantu abayingozi ekhayeni labo aze abachazela indlela abamele bazikhusele ngayo.

NANGONA ukukholelwa kubugqi kusenokubonakala ngathi kushiywe lixesha kodwa basebaninzi abanomdla kubo. Abantu ehlabathini banxiba iziphondo, basebenzisa ibhodi yeOji baze bathethe noosiyazi ukuze babachazele ikamva okanye indlela yokuzikhusela kwizinto ezimbi. Kwinqaku elinomxholo othi “Laptop and Lucifer”, elikwiphephancwadi laseJamani iFocus lathi: “I-intanethi ibangela abantu babe nomdla kwizinto ezinento yokwenza nobugqwirha.”

Ngaba ubusazi ukuba iBhayibhile iyathetha ngokusebenzelana nemimoya? Oko ikuthethayo ngalo mba kunokukumangalisa.

Oko Kuthethwa YiBhayibhile Ngokusebenzelana Nemimoya

Umthetho uThixo awawunika abantu bakhe uSirayeli wamandulo wawusithi: “Maze kungafunyanwa namnye kuwe. . . ovumisayo, noqhelisela umlingo, nohlaba izihlabo nokhafulayo, nobopha ngoomabophe, nobuza koneshologu, noyinkunkqele ekuxeleni iziganeko kwangaphambili, nobuzisa kwabafileyo. Kuba uYehova uyamcekisa wonke ubani ozenzayo ezi zinto, yaye kungenxa yezi zinto zicekisekayo le nto uYehova uThixo wakho azigxothayo phambi kwakho.” (Duteronomi 18:10-12) Kwakutheni ukuze umthetho kaYehova ube nxamnye nezenzo zokusebenzelana nemimoya?

Njengoko amava esivule ngawo ebonisa, abantu abaninzi bakholelwa ukuba abantu abaphilayo bayakwazi ukunxibelelana nabangasekhoyo yaye inkcazelo efumaneka ngobugqi ivela kwabangasekhoyo. Inkolelo yokuba abantu abangasekhoyo bayaphila kwelemimoya ifundiswa kwiinkonzo ezininzi. Kodwa ngokwahlukileyo kule nkolelo, iBhayibhile itsho ngokucacileyo ukuba: “Abafileyo, abazi nto konke konke.” (INtshumayeli 9:5) Ichaza abafi njengabalele ubuthongo obunzulu, bengazi ngokupheleyo ngoko kuqhubekayo.b (Mateyu 9:18, 24; Yohane 11:11-14) Ekubeni kunjalo, usenokubuza ukuba, kutheni kukho amava abantu abaye banxibelelana nabantu abakwelemimoya? Ngubani obangela ukuba kubekho olo nxibelelwano?

Ukunxibelelana Nabakwelemimoya

Iingxelo zevangeli zibonisa ukuba xa wayelapha emhlabeni, uYesu wayethetha nemimoya. UMarko 1:23, 24 unikela ingxelo yokuba ‘umoya ongahlambulukanga’ waxelela uYesu oku: “Ndikwazi kakuhle ukuba ungubani na.” Ngaphandle kwamathandabuzo imimoya engendawo iyakwazi nawe ukuba ungubani. Kodwa ngaba wena uyayazi ukuba ingoobani?

Ngaphambi kokuba uThixo adale abantu, wadala inginginya yoonyana bokomoya okanye iingelosi. (Yobhi 38:4-7) Iingelosi zinobomi obungasentla kunobabantu. (Hebhere 2:6, 7) Zinamandla yaye zikrelekrele, yaye zazidalelwe ukuba zenze ukuthanda kukaThixo. Umdumisi wadanduluka wathi: “Mbongeni uYehova, nina zingelosi zakhe, zomeleleyo ngamandla, zenza ilizwi lakhe, Ngokuphulaphula isandi selizwi lakhe.”—INdumiso 103:20.

IBhayibhile ityhila ukuba ezinye iingelosi zaqalisa ukunxulumana nabantu ngendlela engalunganga. Ngayiphi injongo? Eyokuqala yakhohlisa abantu bokuqala, uAdam noEva, yabenza bamshiya uThixo noMdali wabo. Ngenxa yoko, yaba nguSathana uMtyholi, umhlebi nomchasi kaThixo.—Genesis 3:1-6.

Ekuhambeni kwexesha, ezinye iingelosi “zayishiya indawo yazo efanelekileyo yokuhlala” emazulwini, zaza zazambathisa imizimba yabantu yaye zaqalisa ukuhlalisana namabhinqa amahle. (Yude 6; Genesis 6:1, 2) Ezo ngelosi ezathi zashiya ikhaya lazo izulu nenzala yazo engumxube zaluphatha kakubi uluntu kangangokuba umhlaba “wawuzaliswe lugonyamelo.” Usenokuba uqhelene nengxelo yeBhayibhile echaza indlela uThixo awasiphelisa ngayo ngoMkhukula womhla kaNowa eso sizukulwana singendawo nesinogonyamelo.—Genesis 6:3, 4, 11-13.

Amanzi omkhukula ayinyanzela loo mimoya ingendawo ukuba iyilahle imizimba yenyama ize ibuyele kummandla womoya. Kodwa umdali akazange ayivumele ukuba ibuyele ‘kwindawo yayo efanelekileyo yokuhlala.’ Endaweni yoko, yathotywa yavalelwa kwimeko efana ‘nemihadi yentsunguzi yobumnyama.’ (2 Petros 2:4, 5) IBhayibhile ithi ezi ngelosi zavukelayo ‘ziidemon.’ (Yakobi 2:19) Zizo ezinika abantu abasebenzelana nemimoya amandla okuchaza izinto ezingaqhelekanga.

Oko Kufunwa Ziidemon

Eyona njongo iyintloko kukuphambukisa abantu ukuba bangamnquli uThixo oyinyaniso, uYehova. Iziphiwo okanye amandla abathi banawo abo banobugqi enzelwe ukuthintela abantu ukuba bangabi nolwazi oluchanileyo ngoThixo baze babe nolwalamano oluqinileyo naye.

Injongo yesibini yeedemon inokubonwa kwinkokeli yazo uSathana xa yayilinga uYesu. USathana wathembisa uYesu “zonke izikumkani zehlabathi nozuko lwazo.” Kodwa kwakufuneka enze ntoni uYesu ukuze azifumane? Wambongoza wathi: ‘yiwa phantsi unqule kum.’ Ewe, uSathana needemon bafuna ukunqulwa. Kodwa uYesu akazange avume ukulahla uThixo nonqulo lokwenyaniso.—Mateyu 4:8-10.

Namhlanje kunqabile ukuba imimoya engendawo ithethe ngokungqalileyo nabantu. Kunoko, izama ukubambisa abantu ngokubajika ngezinto ezibonakala zingenabungozi, njenge crystal balls, amagqabi eti, amakhadi omlingo, iintsimbi neehoroscopes. Musa ukukhohliswa zezo zinto! Azingomchankcatho ophumela kwele mimoya. Imimoya engendawo isebenzisa ubugqi ukuze ibambise abantu ibalahlekise ukuze bangamnquli uYehova. Xa oko kungayiphumezi injongo yazo, ziwaphatha kakubi amaxhoba. Ukuba kunjalo nakuwe, yintoni onokuyenza ukuze uzikhulule kwimpembelelo yazo?

Indlela Yokuphuncuka Kwimimoya

Ungaphazameli kuyo, imimoya engendawo ziintshaba zikaThixo, ezigcinelwe intshabalalo. (Yude 6) Zingamaqothaqikili, nabalahlekisi abazenza abantu abaswelekileyo. Ubunokuvakalelwa njani ukuba umntu othi ungumhlobo wakho uzenze into angeyiyo, kuba efuna ukukuphambukisa? Ubuya kusabela njani ukuba ufumanisa ukuba uye wathi ungazi wanobuhlobo nesidlwengu kwi-intanethi? Ukugudlana amacala needemon kuyingozi ngakumbi. Ufanele wenze konke okusemandleni ukuze uqhawule olo nxulumano. Yintoni onokuyenza?

Emva kokuba befunde iZibhalo abemi bamandulo base-Efese babona kuyimfuneko ukuzitshabalalisa iincwadi zabo zobugqi, nangona zazixabisa imali eninzi. “Bazitshisa phambi kwakhe wonk’ ubani.” (IZenzo 19:19, 20) Namhlanje izinto eziphathelele ubugqi aziquki nje iincwadi, iziphondo, ibhodi yeOji kodwa kwanezinto zobugcisa zale mihla. Cezela kude kuyo nantoni enokukukhokelela ekubeni usebenzelane nemimoya.

Usasikhumbula isibini ebekuthethwe ngaso ekuqaleni kweli nqaku? Amakhadi abo obugqi abalumkisa ngabantu ababeza kufika ekhayeni labo, ukuba bangabaphulaphuli yaye bangayamkeli nantoni na evela kubo. Noko ke, xa amaNgqina kaYehova amabini uConnie noGudrun eza ekhayeni labo esithi babaphathele iindaba ezilungileyo ngoThixo, uJoachim noBarbara bagqiba ekubeni babaphulaphule. Umbandela ababethetha ngawo wawuthetha ngokusebenzelana nemimoya, yaye la mabhinqa abanika inkcazelo yeZibhalo echanileyo. Kwaqaliswa ingxubusho yeBhayibhile.

Kungekudala uJoachim noBarbara bagqiba ekubeni baluqhawule lonke ulwalamano lwabo needemon. La maNgqina abachazela ukuba le mimoya ayizukuyithanda le nto. Enyanisweni baye baphila kabuhlungu behlaselwa ziidemon. Kangangexesha elithile babesoyika ebusuku de bafumana isiqabu xa bafudukela kwenye indlu. Ngalo lonke elo xesha lobunzima, esi sibini saqhubeka sinentembelo kumazwi akwabaseFilipi 4:13 athi: “Ezintweni zonke ndinamandla ngenxa yalowo undomelezayo.” UYehova wakusikelela ukuzimisela kwabo, yaye ekugqibeleni loo mimoya yayeka ukubakhathaza. Namhlanje uJoachim noBarbara ngabanquli abonwabileyo boThixo oyinyaniso, uYehova.

IZibhalo zibongoza bonke abo bafuna intsikelelo kaYehova zisithi: “Zithobeni . . . kuThixo kodwa mchaseni uMtyholi, wonibaleka. Sondelani kuThixo, naye uya kusondela kuni.” (Yakobi 4:7, 8) UYehova uThixo unako yaye uya kukunceda wahlukane nempembelelo yeedemon ukuba uyafuna. Xa bejonge ngasemva ekukhululekeni kwabo ekusebenzelaneni nemimoya, uJoachim noBarbara bavumelana ngokupheleleyo namazwi eNdumiso 121:2 athi: “Uncedo lwam luvela kuYehova.”

[Imibhalo esemazantsi]

[Amagama acatshulweyo akwiphepha 21]

Ubugqi buthintela abantu bangabi nolwalamano oluhle noThixo

[Amagama acatshulweyo akwiphepha 22]

“Sondelani kuThixo, naye uya kusondela kuni.”—YAKOBI 4:8