Ngaba Imfundiso Yothixo Oneziqu Ezithathu ivela eBhayibhileni?

▪ Imfundiso Yothixo Oneziqu Ezithathu ichazwa ngale ndlela, nangona ichazwa ngeendlela ezininzi: “Ngoothixo abathathu (uBawo, uNyana noMoya oyiNgcwele), siqu ngasinye siphila ngonaphakade, ngasinye sinamandla, asikho esikhulu okanye esingaphantsi kunesinye, ngasinye kuthiwa nguThixo yaye xa zidibene ziba nguThixo omnye.” Ngaba le yimfundiso yeBhayibhile?

Le mfundiso idla ngokuxhaswa ngoMateyu 28:19. Amazwi akwiKing James Version acaphula amazwi kaYesu athi: “Hambani ngoko niye kufundisa abantu bazo zonke iitlanga, nibabhaptiza egama loYise, eloNyana neloMoya oyiNgcwele.” Yinyaniso ukuba kule vesi kukhankanywa uYise, uNyana noMoya oyiNgcwele. Noko ke, akutshiwo ukuba bangumntu omnye. UYesu wayethuma abalandeli bakhe abangamaYuda ukuba bafundise baze babhaptize abantu egameni loYise, loNyana nelomoya oyingcwele. Njengohlanga, Yintoni awayeyikholelwa amaYuda?

Xa uhlanga lakwaSirayeli lwafumana umnqophiso woMthetho, oyinxalenye yeBhayibhile, ayalelwa oku: “Uze ungabi nathixo bambi ngokuchasene nam.” (Duteronomi 5:7) Bangaphi abantu ababethetha apha? Ukuze ungaxakaniseki, iDuteronomi 6:4 ithi: “Phulaphula, Sirayeli: UYehova uThixo wethu nguYehova mnye”—kungekhona oziqu zithathu emnye. AmaSirayeli ayesandula ukukhululwa eYiputa, apho kwakunqulwa uOsiris, uIsis noHorus (ababoniswe ekhohlo)—ngabanye baba thixo baninzi baneziqu ezithathu. Ngoko ke, uSirayeli wayalelwa ukuba anqule uThixo omnye kuphela. Kwakubaluleke kangakanani ukuba abantu bawuqonde lo myalelo? Ngokokutsho kukaGqir. J. H. Hertz, ongurabhi wathi: “Oku kuchazwa ngokucacileyo kokunqulwa kothixo omnye kwakubhangisa ukunqulwa koothixo abaninzi . . . IShema ayiyiquki imfundiso yothixo wamaKristu oneziqu ezithathu njengechasene noBunye bukaThixo.”a

Ekubeni uYesu wayengumYuda ngokokuzalwa, wafundiswa ukuba alandele kwalo myalelo mnye. Emva kokuba ebhaptiziwe, elingwa nguMtyholi, wathi: “Hamb’ umke, Sathana! Kuba kubhaliwe kwathiwa, ‘NguYehova uThixo wakho omele umnqule, yaye nguye yedwa omele unikele inkonzo engcwele kuye.’” (Mateyu 4:10; Duteronomi 6:13) Kwesi siganeko sinokufunda izinto ezimbini. Eyokuqala, wayezama ukuhenda uYesu ukuba anqule omnye umntu kungekhona uYehova, into eyayingena kwenzeka ukuba uYesu wayeyinxalenye yalo Thixo. Eyesibini, uYesu wenza kwacaca ukuba mnye kuphela uThixo ofanele anqulwe xa wathi: “nguye yedwa,” hayi “thina,” into leyo engewayeyithethile ukuba wayeyinxalenye yoThixo oneziqu ezithathu.

Xa abantu befumana ulwazi oluchanileyo ngoThixo yaye befuna ukumkhonza, babhaptizwa “egameni loYise neloNyana nelomoya oyingcwele.” (Mateyu 28:19) Bayaliqonda yaye bayalamkela igunya likaYehova nendima kaYesu Kristu ekuphumezeni injongo kaYehova. (INdumiso 83:18; Mateyu 28:18) Kwakhona, bayayiqonda indlela osebenza ngayo umoya oyingcwele kaThixo, ukuba ngamandla akhe asebenzayo.—Genesis 1:2; Galati 5:22, 23; 2 Petros 1:21.

Imfundiso yoThixo oneziqu ezithathu iye yadida abantu kangangeenkulungwane. Kwelinye icala, uYesu uye wabakhanyisela abalandeli bakhe ngokubalathisa ‘kokuphela koThixo oyinyaniso,’ uYehova.—Yohane 17:3.

[Umbhalo osemazantsi]

[Inkcazelo Ngomfanekiso okwiphepha 23]

Musée du Louvre, eParis