Ukukhangela Ubuncwane Kwiintaba ZaseAltay

YIMINI entle ngoMeyi kwiRiphabliki yaseAltay—ummandla othimb’ umphefumlo emzantsi ntshona weSiberia. Xa sisithi ntla phandle kwifestile yekhaya lethu sibona amahlathi amakhulu ashinyeneyo; ngasemva kwawo kukho iincopho zentaba ezinendili ezigqunywe likhephu. Lo ngummandla osemagqagaleni wama-Altaics—abantu baseAsiya abahlukileyo nabathetha ulwimi lwabo. Iintaba zeAltai likhaya laba bantu, igama lazo lisekelwe kulwimi lwaseTurkey nolwaseMongolia oluthetha “bugolide.”

Yiminyaka nje embalwa mna nomfazi wam siqalise ukufunda iNtetho Yezandla yaseRashiya nokutyelela amabandla namaqela entetho yezandla amaNgqina kaYehova. Kweli lizwe, kukho amaqela ezizwe angaphezu kwe-100 neenkcubeko ezingaphezu kwama-70 onke asebenzisa ulwimi lwesiRashiya. Bona abantu abangevayo basebenzisa olunye ulwimi, uLwimi Lwentetho Yezandla yaseRashiya. Abantu abangevayo basondelelene kakhulu yaye abaninzi esidibana nabo bakulungele ukusibalisela ngemvelaphi yabo yaye ayibobubele zimvuzemvuze. Banjalo nabantu baseAltay.

Kwisixeko saseGorno-Altaysk, seva ukuba kukho abantu abambalwa abangevayo abahlala kwilali encinane kumgama weekhilomitha ezingama-250. Siyazi ukuba ambalwa amaNgqina alapho kodwa alikho elazi intetho yezandla kuwo. Sicinga ngaba bantu abangevayo bamaAltaic saza sagqiba ekubeni siye kubakhagela. Ihlombe lethu lachukumisa uYury noTatyana, isibini esingevayo esavumayo ukuhamba nathi. Salayisha evenini iimpapasho zentetho yezandla ezikwiDVD nezixhobo zokuzidlala. Saphatha umphako omninzi esasiza kuzixhasa ngawo kolo hambo. Ekugqibeleni sazifefa ngeyeza elithintela isifo esibangelwa kukulunywa ngamakhalane.

Indlela esasihamba kuyo yayityhubela kwiintaba ezintle. Umoya unevumba elimnandi lee ntyatyambo, elisenza sidlamke! Sonwaba gqitha sakubona umhlambi weebhokhwe zasendle zaseSiberia zisidla ingca. Izindlu zaseAltaic zakhiwe ngeplanga zaze zafulelwa ngamazinki. Kufutshane nazo kukho izindlu zeplanga ezibizwa ngokuba ziiayyl, zidla ngokuba ngooronta abaneekona ezintandathu. Ezinye zifana neentente ezifulelwe ngamaxolo omthi. Iintsapho ezininzi zaseAltaic zihlala kwiiayyl ukususela ngoMeyi ukuya kuSeptemba zize zibuyele endlwini ebusika.

Samkelwa ngezandla ezifudumeleyo ngamaNgqina asekuhlaleni, nawathi asisa kwikhaya lesibini sama-Altaic esingevayo. Bavuya bakusibona yaye babenomdla wokwazi ukuba sivela phi yaye senza ntoni. Safumanisa ukuba banekhompyutha, ngoko ke sakhupha iDVD, baza bona bathi mayidlalwe. Kwathi cwaka ngoko nangoko; kwabangathi akukho mntu. Babethe ntsho ekhompyutheni, bemana belinganisa izinto abazibonayo baze banqwale. Nangona kwakunzima ukuba basijonge kodwa sade sanxibelelana nabo sakwazi ukuyibuyisela ekuqaleni iDVD kwindawo ebonisa umhlaba omhle oyiparadesi. Sayinqumamisa kancinane komnye umboniso, saza sachaza oko uThixo aza kukwenzela uluntu nokuba ngabantu abanjani abaza kuphila ngonaphakade kwezi meko sizibona kule DVD. Wasikhuthaza kakhulu umdla wabo yaye ekupheleni kolo tyelelo, basichazela ngesinye isibini esingevayo esihlala kwenye ilali.

Saphinda sasendleleni kwakhona, sihamba kwindlela enamagophe eyehla ezintabeni saya kufika kule lali incinane. Apho safumana intsapho yabantu abangevayo—umyeni, umfazi, umama womfazi nonyana oselula wesi sibini—bavuya gqitha bakusibona. Sangena kwindlu enomnyango omncinane enevumba lomthi onuka kamnandi nentloya. Entungo inomngxuma ongenisa ukukhanya. Ekoneni kukho iziko elikalikwe mhlophe, isitovu luze lona udonga lugqunywe ngekhaphethi ebomvu. Esi sibini senza ukutya okuthandwayo ekuhlaleni—amaqebengwana neti. Sababuza ukuba bebesazi ukuba banokuba ngabahlobo bakaThixo. Bawucingisisa lo mbuzo waza umama womfazi wasixelela ukuba xa wayengumntwana, wakhe wathatha ukutya wakusa entabeni ukuze akuphe oothixo. Wenyusa amagxa waza wancuma esithi “andazi ukuba yayithetha ntoni loo nto.” “Yayisisithethe nje sethu.”

Sathi sakubabonisa iDVD ethetha ngalo mbandela ubuso babo bakhululeka. Babekufuna ukuqhubeka nale ncoko, kodwa babeza kuqhubeka njani? Nangona iselifowuni idla ngokwenza kube lula ukuthetha nabantu, kodwa apha azisebenzi. Sathi siza kubabhalela.

Ilanga liya kunina njengoko sisahlukana size siphinde indlela eya eGorno-Altaysk, sasidiniwe kodwa sanelisekile. Emva kwexesha elithile, sabuza amaNgqina asekuhlaleni ngale ntsapho yaye safumanisa ukuba kwenye iveki, umyeni uya kwidolophu enkulu, ukuze afunde iBhayibhile aye nakwintlanganiso encedwa ngudade wasekuhlaleni oyaziyo intetho yezandla. Sivuya ngokwenene kuba imigudu yethu ivelisa iziqhamo!

Iphulo lethu lokukhangela abantu abangevayo linokufaniswa nokukhangela ubuncwane obufihlwe entabeni. Iiyure ezichithwa kukhangelwa aba bantu kuye kwavuzwa xa safumana isacholo, ngokungathi kuye kwazenzekela. Kuthi, iintaba zeAltay ziya kuhlala zifana negolide, zisikhumbuza abantu abanomdla esabafumana kuzo.