Unokukhetha Ukuba Nekamva Eliqaqambileyo—Njani?

UNOKUBA nalo njani ikamva eliqaqambe ngokwenene? Enye indlela kukusebenzisa amandla akho engqondo ukuze uhlole imiphumo yezigqibo ozenzayo ngoku.

Kuyavunywa kona, ukuba kusenokuba nzima ukwenza izigqibo ezinokubangela uphile ubomi obanelisayo ubomi bakho bonke. Kutheni kunjalo? Kungenxa yokuba abantu abaninzi abasingqongileyo banesimo sengqondo sokufuna ukuzifumana ngoku izinto abazifunayo. Ngokomzekelo, usenokufumanisa ukuba ukusebenzisa isiluleko seBhayibhile kunokukunceda wakhe ulwalamano oluluqilima kwintsapho yakho. (Efese 5:22–6:4) Kodwa ukuze ukwazi ukukwenza oko, kufuneka uchithe ixesha elingakumbi nentsapho yakho, ngoxa uxhathise umnqweno wokufuna ukuzilahlela nofele emsebenzini, ekuzihlaziyeni okanye kulonwabo. Njengokuba uye wenze nakwezinye inkalo zobomi, umele ukhethe phakathi kwezinto eziza konwabisa ixeshana nezo ziza kukonwabisa ixesha elide. Ungalikhetha njani ikhondo lobulumko? Thatha la manyathelo mane alandelayo.

1 Wazi Kusengaphambili Umphumo Wezigqibo Ozenzayo

Xa kufuneka wenze isigqibo, wazi kusengaphambili umphumo. IBhayibhile inikela eli cebiso: “Onobuqili ubona intlekele azifihle.” (IMizekeliso 22:3) Ukuba uyiphonononga ngokunyaniseka imiphumo yezigqibo ozenzayo, uya kukuphepha ukuthatha ikhondo olibonayo ukuba linokukufaka emhadini. Kwelinye icala, xa uyibona imiphumo emihle eya kuhlala ixesha elide ngenxa yesigqibo sobulumko osithabathayo, uya kutyhalela phambili ngokuzimisela.

Khawuzibuze oku: “Ukuba ndithabatha esi sigqibo kuya kwenzeka ntoni emva konyaka, kwiminyaka eli-10 okanye engama-20 ukusuka ngoku? Siya kundichaphazela njani? Siya kuyichaphazela njani yona intsapho yam nabanye abantu endibathandayo? Owona mbuzo ubalulekileyo ngulo: ‘Ngaba isigqibo endisenzayo siya kumvuyisa uThixo? Kuya kubuchaphazela njani ubuhlobo bam naye?’ Ekubeni iBhayibhile iphefumlelwe nguThixo, inokukunceda uqonde oko kumkholisayo nokuba uhlale uthe qwa ukuze ungeyeli kwimigibe osenokungayiboni.—IMizekeliso 14:12; 2 Timoti 3:16.

2 Wahlolisise Amathuba Osenokuba Nawo

Endaweni yokuba bazenzele izigqibo, abanye basuke nje baxelise abanye abantu. Kodwa ke indlela ethile yokuphila ayinakusuke ikhokelele ubani kwimpumelelo kuba nje ithandwa ngabantu abaninzi. Wahlolisise amathuba onawo. Ngokomzekelo, cinga ngoNatalie.a Uthi: “Ndandifuna ukuba nomtshato oqhuba kakuhle. Kodwa ndafumanisa ukuba andinakuwufumana ndiphila ngale ndlela. Bonke abahlobo bam basekholeji yayingabantu abakrelekrele. Sekunjalo, babesoloko besenza izigqibo eziphosakeleyo kubomi babo. Babethe gqolo betshintsha abafana okanye iintombi. Kanye njengabo, nam ndandithandana negquba labafana. Le ndlela yokuphila yandivisa ubuhlungu.”

UNatalie waqalisa ukufunda iBhayibhile namaNgqina kaYehova. Uthi: “KumaNgqina ndabona abantu abaselula nemitshato eqinileyo. Nangona kwakungelula, ngokuthe ngcembe ndakwazi ukutshintsha imilinganiselo yam yokuziphatha nendlela yokuphila.” Waba yintoni umphumo? UNatalie uthi: “Ndandifuna ukutshata nomntu endandimthanda ngokunzulu. Ekuhambeni kwexesha ndatshata nendoda eyayinemilinganiselo yonqulo efana neyam. Ndivakalelwa kukuba uThixo uye wandinika ubomi bentsapho obubhetele kunobo mna ndandiphupha ngabo.”

3 Hlola Indlela Oza Kuchaphazeleka ngayo Kwikamva

Ukuze ungacingi phambi kweenyawo zakho, yiba nombono ocacileyo woko ukufunayo kwikamva yaye ube nendlela oza kukuphumeza ngayo oko ukufunayo. (IMizekeliso 21:5) Xa ucinga musa ukuphelela nje kwiminyaka engama-70 okanye engama-80 ephilwa ngabantu. Kunoko, zibone wonwabile kwikamva elingenasiphelo elichazwa yiBhayibhile.

IBhayibhile ithi uThixo uye wenza indlela yokuba uluntu lufumane ubomi obungunaphakade, ngedini lentlawulelo likaKristu Yesu. (Mateyu 20:28; Roma 6:23) UThixo uthembisa ukuba kungekudala injongo yakhe yantlandlolo ngoluntu nangomhlaba iza kuzaliseka. Abo bamthandayo uThixo baza kuvulekelwa lithuba lokonwaba ngonaphakade kumhlaba omhle oya kube ulungisiwe. (INdumiso 37:11; ISityhilelo 21:3-5) Usenokulixhamla elo kamva ukuba uyacamngca ngalo.

4 Sebenzela Ukulufikelela Usukelo Ozibekele Lona

Unokulifumana njani elo kamva lithenjisiweyo? Qala ngokungenisa ulwazi ngoThixo. (Yohane 17:3) Ulwazi oluchanileyo lweBhayibhile luya kwenza uzithembe izithembiso zikaThixo ngekamva zize zibe yinto yokwenene. Ukholo olunjalo lunokukomeleza wenze utshintsho olufunekayo ukuze ufumane inkoliseko kaThixo.

Khawuve amava kaMichael. Uthi: “Ndaqala ukusebenzisa kakubi utywala neziyobisi xa ndandineminyaka eli-12 ubudala. Ndandikwiqela lootsotsi yaye ndandilindele ukuba ndiza kufa xa ndineminyaka engama-30 ubudala. Ndakhe ndazama ukuzibulala izihlandlo eziliqela ngenxa yomsindo. Kuba ndandicinga ukuba kuninzi endandinokukufumana ebomini, kodwa ndandingafumani nto.” Xa uMichael wayekumabanga aphakamileyo, omnnye woogxa bakhe waqalisa ukufunda iBhayibhile namaNgqina kaYehova. NoMichael wavuma ukufunda.

Oko wakufunda eBhayibhileni uMichael kwayitshintsha imbono yakhe ngekamva. Uthi: “Ndafunda ukuba kwixa elizayo umhlaba uza kuba yiparadesi nokuba abantu baza kuphila eluxolweni, kungekho zinto zibaxhalabisayo. Ndaqalisa ukubona oku njengekamva lam. Ndaba nosukelo lokwakha ulwalamano noYehova. Sekunjalo abakho amahla ndinyuka. Nasemva kokuba ndiqalile ukufunda iBhayibhile, ndakhe ndanxila izihlandlo ezimbalwa, ndaze ndalala nentombazana.”

Wakwazi njani uMichael ukuyoyisa le miqobo waza wayitshintsha ngokupheleleyo indlela awayephila ngayo? Uthi: “Umhlohli wam weBhayibhile wandikhuthaza ukuba ndifunde iBhayibhile yonke imihla ndize ndinxulumane nabo bafuna ukukholisa uThixo. Ndafumanisa ukuba ootsotsi endandikade ndiphila nabo babe sandiphembelela. Nangona babe njengentsapho kum, ndaluqhawula lonke ulwalamano kunye nabo.”

UMichael, wazibekela usukelo awaye nokulufikelela ngokukhawuleza nto leyo eyamnceda wafikelela usukelo awaye zibekele lona lokuvisisanisa ubomi bakhe nemilinganiselo kaThixo. Nawe unokwenza okufanayo. Kubhale phantsi oko ufuna ukukwenza kwixesha elizayo nezinto ofanele uzenze ukuze ukuphumeze. Usukelo lwakho luchazele abantu abaza kukuxhasa, uze ubacele ukuba bahlole inkqubela oyenzayo.

Musa ukukubekel’ amangomso ukufunda ngoThixo nokusebenzisa ulwalathiso lwakhe ebomini bakho. Yenza izinto eziza kwenza umthande uThixo neLizwi lakhe, iBhayibhile. ILizwi likaThixo lithi ngomntu osebenzisa imigaqo yeBhayibhile: “Konke akwenzayo kuya kuphumelela.”—INdumiso 1:1-3.

[Umbhalo osemazantsi]